Маросим янги президент сайланган ҳар 4 йилда, 20 январ куни маҳаллий вақт билан соат кундузи 12 да ўтказилади. Дастлаб ушбу маросим 4 март куни ўтказиларди. Лекин сайловлар билан қасамёдга келтириш маросими орасидаги муддат 1933 йили Конституцияга ўзгартиришлар билан қисқартирилган. Қудратнинг тинч йўлда қўлдан қўлга ўтишини англатувчи қасам ичиш Капитолий биносининг зинапоясида амалга оширилади. Шундан сўнг Пенсилвания кўчаси бўйлаб парад ўтказилади ва кетидан қатор зиёфатлар билан нишонланади. Маросимга Доналд Трамп ва унинг рафиқасини Президент Обама ва рафиқаси ҳамроҳлик қилиб боришади. Маросимда Конгресс аъзолари, сиёсатчилар ва тарафдорлар қатнашадилар. Ноябр ойидаги сайловларда жаноб Трампга мағлуб бўлган Демократлар партиясидан Ҳилари Клинтон ва турмуш ўртоғи, собиқ президент Бил Клинтонлар ҳам ҳозир бўладилар. Шунингдек, собиқ президентлар Жорж Буш ва рафиқаси, Жим Картерларнинг иштироклари тасдиқланган. Маросимларда иштирок этиш учун Вашингтонга 800 мингдан 900 минг киши келиши режаланган. Лекин уларнинг ҳаммаси ҳам тарафдорлар эмаслиги айтилмоқда. Яъни, норозиликлар рўй бериши эҳтимолдан ҳоли эмас. 8 йил аввал Барак Обама президентликка қасамёд келтирган вақти маросимларда 1.8 миллион киши қатнашганди. Вашингтон сайёҳлик бюросидан Элиот Фергюсонга кўра, шаҳар меҳмонхоналарига кутилганидан камроқ буюртмалар келиб тушган. Баъзи меҳмонхоналар атиги 50 фоизга тўла. Лекин ҳашаматлироқ меҳмонхоналар анчайин гавжумлашган. Ким келмайди Вакиллар палатасидаги Демократлар партиясидан 50 аъзо Доналд Трамп ва конгресмен, ҳуқуқ фаоли Жон Люис билан ўртасидаги тортишув туфайли маросимга келмасликларини билдиришган. Баъзи Конгресс аъзолари маросимнинг эртаси кунига режаланган норозилик намойишида қатнашишларини билдирганлар.
