Тожикистон: Рустам Эмомали, илтимос, жамоат транспортини текин қилинг Tojikiston dunyo yangiliklar

Тожикистонда жамоатчилик президент Эмомали Раҳмоннинг тўнғич ўғлига мурожаат билан чиқишди. Рустам Эмомалидан жамоат транспортини болалар учун бепул қилишни сўрашди. Фаолларга кўра, айнан чипта нархи боис, улардан кўпчилиги мактабга бора олмай қолишган.

Рустам Эмомали бошқа кўплаб вазифалари қаторида Тожикистон Миллий мажлисининг раиси ва Душанбе шаҳри ҳокими ҳам саналади.

Тожикистон Ўзбекистон ва Қозоғистондан кейин минтақанинг аҳолиси энг йирик учинчи давлати бўлади.

Мамлакат аҳолисининг ярмига яқинини ўсмирлар ва ёшлар ташкил этиши айтилади.

Алоқадор мавзулар:

Мурожаат

Тожикистондаги етакчи Asia-Plus интернет нашрининг ёзишича, мурожаатни фаол, "Нури Фирдавс" ижтимоий гуруҳи асосчиси Зуля Раҳматова эълон қилган.

Мурожаатда фаоллар Рустам Эмомалидан "болаларнинг жамоат транспортида текин юришлари ёки уларнинг йиллик йўл транспорт чипталарини тенг ярмига арзонлаштириш имкониятини кўриб чиқишни қаттиқ илтимос қилишган".

Бундан ташқари, "ҳайдовчиларнинг чиптасиз вояга етмаган болаларни автобусдан тушириб юборишларини тақиқлаш"ни ҳам сўрашган.

Фаолларга кўра, ҳайдовчиларнинг бу каби хатти-ҳаракатлари болаларнинг ҳаётини хавф остига қўяди, улар ярим йўлда қолиб кетишади.

Маълум бўлишича, жамоат транспортида йўл ҳақи қимматлашганидан кейин Тожикистонда кўпчилик бола мактабга чиқа олмай қолган.

Бу яқин йилларда Марказий Осиёнинг қолган бирор бир давлатидан бунга ўхшаш хабар олинмаган.

Тожикистонлик фаолларнинг мурожаати худди шуниси билан ҳам алоҳида эътибор тортувчи воқеъликка айланган.

Нарх-наволар

Тожикистонда жамоат транспортида йўл ҳақи сўнгги бор шу йилнинг 10 сентябрь куни оширилган.

Агар, Asia-Plus интернет нашри келтириб ўтган нарх-наволарга таянилса, болалар учун мўлжалланган йиллик йўл транспорт чиптасининг қиймати 300 сомонийга чиққан.

АҚШ долларига чаққанда, бу ҳозир 26 ярим долларга яқин пул дегани.

Мурожаатчи фаолларга кўра, нарх-наволардаги сўнгги ўзгаришлар аксарият кам таъминланган оилаларни қийнаб қўйган.

Айниқса, 2 ёки ундан ортиқ фарзандли бўлган оилалар жамоат транспортини ўзларига эп кўра олмайдиган аҳволга тушиб қолишган.

Айрим болалар мактабга пиёда бўлса-да барибир бориш ҳаракатида.

Аммо фаоллар бундан ҳам хавотирда.

Уларга кўра, ҳозир тез қоронғу тушади ва болаларнинг ҳаёти яна хатар остида қолади.

Шундай деркан, фаоллар Рустам Эмомалидан ўз илтимосларини кўриб чиқиш, халқнинг қалб ноласига қулоқ тутиш ва болаларга ёрдам бериши"ни ўтиниб илтимос қилишган.

Маълум бўлишича, жамоат транспорти ҳақи Тожикистон Монополияга қарши хизмати билан келишилган ҳолда амалга оширилган.

Бунга эса, ёқилғи ва эҳтиёт қисмларининг қимматлашгани сабаб қилиб келтирилган.

Asia-Plus нинг ёзишича, бу янгилик, айниқса, пойтахт Душанбе аҳолиси томонидан бир хилда қарши олинмаган, жамоатчиликнинг кучли резонансига сабаб бўлган.

Тожикистон Қирғизистон билан бирга минтақанинг нисбатан камбағал иккита давлатидан биттаси бўлади.

Яқин-яқингача мамлакат аҳолиси салмоқли қисмининг тирикчилиги четда меҳнат муҳожирлигида банд яқинлари ортга юбораётган маблағлар ҳисобидан ўтиб келган.

Тожикистон Ўзбекистондан кейин Марказий Осиёнинг энг кўп фуқаролари ташқи миграцияга юз тутган давлати экани кўрилади.

Фаолларнинг бу мурожаатига Рустам Эмомалининг расмий муносабати ҳозирча имконсиз.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek