Афғон-Ўзбек чегарасида Ўзбек чегарачиси ҳалок бўлган O'zbekiston Afg'oniston chegara
Президент Шавкат Мирзиёев айтишича, Афғонистон томондан Ўзбекистон-Афғонистон давлат чегараларини бузиб ўтиш ҳаракати бўлган.
Бу ҳақда 27 сентябр куни Президент Мирзиёев Наманган вилоятига сайловолди кампанияси доирасидаги сафари чоғи айтган.
"Куни кеча ҳам давлатимиз чегарасини бузиб ўтишга уриниш бўлди. Бир наркобарон ҳаракат қилди. Лекин биз дахлсизлик масаласида позициямиз қатъий, керак бўлса, чегарамизни ҳимоя қилиш учун қурол ишлатамиз", дея Президент Мирзиёевдан иқтибос келтирди Телеграмдаги Ниҳол канали.
"Кечаги вазиятда ҳам ўз вазифасини шараф билан бажарган бир аскаримиз қаҳрамонларча ҳалок бўлди. У шу юрт фарзанди - наманганлик эди", - деган Президент Мирзиёев.
Ўзбекистон расмийлари бир ўзбекистонлик ҳарбий ҳалок бўлган ҳодисанинг бошқа тафсилотини очиқлаганлари йўқ.
Ўзбекистон ва Афғонистонни Амударё ажратиб туради.
Дарё устида Термиз шаҳри яқинида Афғонистоннинг Ҳайратонини боғлайдиган автомобил ва темир йўл кўприги қурилган, кўприкни Ўзбекистоннинг СССР давридаги раҳбари Шароф Рашидов очган эди.
Амударёнинг бошқа жойларидан ҳам Ўзбекистонга ўтиш қийин, чегара СССР замониданоқ қаттиқ қўриқланади.
Бироқ наркотик модда ташувчиларининг Афғонистондан Ўзбекистонга ўтиш ҳаракатлари, наркоташувчилар билан Ўзбекистон чегарачиларининг ўқотар қуроллар ишлатилган тўқнашувлари кўп кузатилади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
