اپاچی: انڈین ایئر فورس میں شامل جدید جنگی صلاحیت سے لیس ہیلی کاپٹر

،تصویر کا ذریعہGetty Images

،تصویر کا کیپشنامریکہ سے معاہدے کے تحت انڈیا کو آٹھ جدید جنگی ہیلی کاپٹر ’اپاچی اے ایچ 64 ای‘ موصول ہوئے ہیں جنھیں پٹھان کوٹ ایئربیس پر ایک باضابطہ تقریب میں انڈین ایئرفورس میں شامل کر لیا گیا۔ اس تقریب میں ایئر چیف مارشل بریندر سنگھ دھنوا مہمان خصوصی تھے۔

،تصویر کا ذریعہGetty Images

،تصویر کا کیپشنانڈین وزیر اعظم نریندر مودی کی حکومت نے امریکہ سے 22 جنگی اپاچی ہیلی کاپٹر خریدنے کا معاہدہ کیا تھا جس میں سے آٹھ انڈیا کو مل چکے ہیں۔ باقی کے جنگی ہیلی کاپٹر مارچ 2020 میں دیے جائیں گے۔ پٹھان کوٹ ایئربیس پر ان ہیلی کاپٹرز کی موجودگی اہم ہے کیونکہ یہاں سے قریب سرحد پر اکثر کشیدگی رہتی ہے۔

،تصویر کا ذریعہGetty Images

،تصویر کا کیپشنبوئنگ کمپنی نے جنوری 1984 میں پہلی مرتبہ اپاچی ہیلی کاپٹر امریکی فوج کے لیے بنائے تھے۔ اب تک کمپنی نے 2200 سے زیادہ اپاچی ہیلی کاپٹر بیچے ہیں۔ انڈیا سے قبل بوئنگ نے یہ ہیلی کاپٹر امریکہ، مصر، انڈونیشیا، اسرائیل، یونان، قطر، سعودی عرب اور جاپان سمیت کئی ملکوں کو بیچے ہیں۔

،تصویر کا ذریعہGetty Images

،تصویر کا کیپشنکمپنی کے مطابق 16 فٹ اونچے اور 18 فٹ چوڑے اس ہیلی کاپٹر کو اڑانے کے لیے دو پائلٹ درکار ہوتے ہیں۔ اس میں ایک بڑا اینجن لگا ہوتا ہے تاکہ اس کے بڑے پر اور پنکھے تیز رفتار میں گھوم سکیں۔

،تصویر کا ذریعہBOEING.COM

،تصویر کا کیپشنجدید جنگی صلاحیت سے لیس یہ ہیلی کاپٹر امریکی کمپنی بوئنگ نے بنائے ہیں۔ انڈین فضائیہ کے ایئر چیف کے مطابق ’یہ دنیا کے سب سے طاقتور ہیلی کاپٹر ہیں۔ ان سے (جنگی) مشن کئے جا سکتے ہیں۔‘ بوئنگ کمپنی کا کہنا ہے کہ یہ ہیلی کاپٹر ایک وقت میں تقریباً تین گھنٹے تک پرواز کرسکتے ہیں۔

،تصویر کا ذریعہBOEING.COM

،تصویر کا کیپشنبوئنگ کی اپنی ویب سائٹ کے مطابق یہ جنگی ہیلی کاپٹر 280 کلومیٹر فی گھنٹے تک کی رفتار سے اڑ سکتے ہیں۔ 550 کلو میٹر کی پرواز کی حد والے ان ہیلی کاپٹرز میں ٹینک تباہ کرنے والے 16 میزائل پھینکنے کی صلاحیت ہے۔ ان کے نیچے نسب بندوق میں گولیوں کے 12000 راؤنڈ بھرے جا سکتے ہیں۔

،تصویر کا ذریعہGetty Images

،تصویر کا کیپشنکمپنی نے اپنی ویب سائٹ پر لکھا ہے کہ بوئنگ اور امریکی فوج کے درمیان ایک معاہدہ ہے جس کے تحت کمپنی ان ہیلی کاپٹرز کی دیکھ بھال میں بھی مدد کرے گی لیکن یہ مفت نہیں ہو گا۔ اپاچی ہیلی کاپٹر کے منفرد ڈیزائن کی بدولت اسے ریڈار میں پکڑنا مشکل ہوتا ہے۔

،تصویر کا ذریعہGetty Images

،تصویر کا کیپشنبرطانوی ایئر فورس کے ایک پائلٹ ایڈ میکی کے مطابق اپاچی ہیلی کاپٹر کو اڑانا ایسا ہے جیسے آپ کو 160 کلومیٹر فی گھنٹے کی رفتار سے چلنے والی گاڑی کی چھت پر باندھ دیا ہو۔ ان کے مطابق انڈیا نے ہر پائلٹ کی ٹریننگ کے لیے تقریباً تیس لاکھ ڈالر خرچے ہوں گے۔