آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ملکہ الزبتھ کی وفات: پاکستان میں 12 ستمبر کو سوگ، پرچم سرنگوں رہے گا
پاکستان حکومت نے اعلان کیا ہے کہ ملکہ برطانیہ کی وفات پر برطانوی حکومت اور عوام سے اظہارِ یکجہتی کے لیے 12 ستمبر کو پاکستان یومِ سوگ منائے گا۔
لندن میں پاکستانی ہائی کمیشن نے ٹؤٹر پر بتایا کہ پیر کے روز ملک بھر میں قومی پرچم سرنگوں رہے گا۔
اس سے قبل پاکستان کے وزیر اعظم شہباز شریف نے برطانوی وزیر اعظم لز ٹرس کو ملکہ الزبتھ دوم کی وفات پر تعزیتی خط تحریر کیا تھا۔
وزیراعظم محمد شہباز شریف نے برطانوی وزیر اعظم لز ٹرس کے نام تعزیتی خط میں لکھا کہ ملکہ الزبتھ دوم نے اپنی زندگی بے لوث عوامی خدمت کے لیے وقف کر دی اور ان کی باوقار موجودگی برطانیہ کے عوام کے لیے تقویت کا باعث تھی۔
وزیر اعظم شہباز شریف نے کہا کہ ملکہ الزبتھ نے اپنے دور حکمرانی میں دنیا میں مثبت تبدیلوں میں کلیدی کردار ادا کیا۔
ملکہ الزبتھ دوم کی خلوص اور ان کی انتھک نگرانی میں دولت مشترکہ کی تنظیم دنیا میں آزاد ممالک کی مضبوط تنظیم بن گئی ہے۔ طویل عرصہ تک عوامی خدمات کے تحفظ کے لیے خدمات کے باوجود ملکہ الزبتھ کی شخصیت اور ان کی موجودگی برطانیہ اور دنیا بھر کے لوگوں کے لیے اتحاد اخوت کی طاقت کا نشان بنی۔
ملکہ الزبتھ دوم کے پاکستان کے دورے کو یاد کرتے ہوئے وزیر اعظم پاکستان نے کہا کہ وقت گزرنے کے ساتھ پاکستانی عوام اور ملکہ برطانیہ کے درمیان تعلقات مضبوط ہوتے گئے۔
وزیر اعظم نے کہا کہ ’مشکل کی اس گھڑی میں مجھ سمیت پوری پاکستانی قوم کی تمام ہمدردیاں برطانوی شاہی خاندان، برطانوی حکومت اور برطانوی عوام کے ساتھ ہیں۔‘
End of سب سے زیادہ پڑھی جانے والی
اسلام آباد میں وزیر اعظم کی برطانوی ہائی کمیشن آمد پر برطانوی ہائی کمشنر نے استقبال کیا۔ انھوں نے ملکہ الزبتھ دوم کی خدمات کو خراج عقیدت پیش کرتے ہوئے ہائی کمیشن میں رکھی تعزیتی کتاب میں اپنے تاثرات قلمبند کیے۔