اگر تنازع شدت اختیار کر گیا تو پورا خطہ لپیٹ میں آ سکتا ہے: اردن
اردن کے وزیر خارجہ ایمن صفدی نے کہا ہے کہ فلسطینی شہریوں کی مصر منتقلی ان کے ملک کے لیے ناقابل قبول ہے۔
بی بی سی ورلڈ سروس کے پروگرام نیوز آور میں انھوں نے کہا کہ فلسطینیوں کا انخلا اور دوسرے ممالک میں ان کی منتقلی مسئلے کا حل نہیں ہے۔ انھوں نے غزہ کے شہریوں کے لیے غزہ میں تحفظ فراہم کرنے کا مطالبہ کیا ہے۔
ایمن صفدی نے کہا کہ دنیا کو امن اور وقار کے ساتھ رہنے کے تمام لوگوں کے حق کے لیے کھڑے ہونے کی ضرورت ہے اور دنیا کو اسرائیلی اور فلسطینی شہریوں کے قتل کی مذمت کرنے کی ضرورت ہے۔
انھوں نے کہا کہ ’یوکرین کو خوراک اور پانی کی فراہمی بند کرنا جنگی جرم ہے تو پھرغزہ میں یہ سب کرنا کیسے جرم نہیں؟‘
اردن مصر اور قطر سمیت دیگر عرب ممالک کے ساتھ مل کر حماس کی طرف سے یرغمال بنائے گئے اسرائیلیوں کو وطن واپس لانے میں مدد کر رہا ہے۔
واضح رہے کہ یرغمال بنائے جانے والوں میں معمر افراد اور بچوں کے بارے میں پوچھے گئے سوال پر انھوں نے کہا کہ پس پردہ اس حوالے سے بہت کام ہو رہا ہے۔
اردن کے وزیر خارجہ نے کہا کہ ’ہمیں امید ہے کہ ہم ان یرغمالیوں کو رہا کروانے میں کامیاب ہو جائیں گے اور یہ کشیدگی رک جائے اور ہم آگے بڑھ سکیں۔‘
انھوں نے تنازعات کے پورے خطے کو اپنی لپیٹ میں لینے سے متعلق بھی خبردار کیا ہے۔
انھوں نے کہا کہ ’اگر یہ تنازع بڑھتا ہے اور اس کے بڑھنے کا حقیقی خطرہ ہے تو ہم ایک ایسے بھیانک خواب کے بارے میں بات کر رہے ہوں گے جو پورے خطے کو اپنی لپیٹ میں لے لے گا۔‘