آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
انڈیا کے دارالحکومت دلی میں مسلسل دوسرے روز بھی ہلاکتوں کی تعداد 400 سے زیادہ ہو گئی ہے جبکہ جے پور گولڈن ہپستال نے کہا ہے کہ اس کے پاس فقط تین گھنٹوں کی آکسیجن سپلائی رہ گئی ہے۔ ادھر پاکستان کے صوبہ پنجاب میں مزید 78 ہزار افراد کو ویکسین لگائی گئی ہے۔
امریکہ نے انڈیا میں کورونا وائرس کے بحران سے مقابلے کے لیے امدادی سامان سے لدے مزید تین جہاز بھیجے ہیں۔
امریکہ حکومت کی امدادی ایجنسی یو ایس ایڈ کے پریس ریلیز کے مطابق ان طیاروں میں آکسیجن سلنڈرز، آکسیجن سے متعلق دیگر سامان اور اس کے علاوہ مزید طبی ساز و سامان موجود ہے۔
اس کے علاوہ ان طیاروں میں تقریباً نو لاکھ این 95 ماسکس بھی بھیجے گئے ہیں۔
مئی کے پہلے روز پاکستان میں 45 ہزار سے زیادہ ٹیسٹس کیے گئے جس کے نتیجے میں 4414 نئے متاثرین کی تشخیص ہوئی اور انھی 24 گھنٹوں میں 113 اموات کی تصدیق بھی ہوئی۔
تازہ ترین اعداد و شمار کے بعد پاکستان میں اب مجموعی متاثرین کی تعداد 829933 ہو چکی ہے جبکہ کُل اموات اب 18 ہزار سے بڑھی گئی ہیں۔
ایک خوش آئند بات یہ رہی کہ ایک ہی دن میں پانچ ہزار سے زیادہ افراد صحتیاب ہو گئے اور ملک میں فعال مریضوں کی تعداد ساڑھے 90 ہزار سے کچھ کم ہو کر 89661 تک آ گئی۔
یاد رہے کہ پاکستان میں وبا کے آغاز کے بعد سے سب سے زیادہ فعال مریض گذشتہ برس پہلی جولائی کو تھے جب پاکستان میں ایک لاکھ آٹھ ہزار سے زیادہ کووڈ 19 کے مریض تھے لیکن اس کے بعد سے یہ تعداد گھٹنا شروع ہو گئی تھی۔
نارائن دبھادکر کووڈ 19 کے مریض تھے لیکن انھوں نے ہسپتال میں زیر علاج ایک نوجوان مریض کو اپنا آکسیجن بیڈ دیا۔‘ انڈیا کے شہر ناگپور کا یہ واقعہ سوشل میڈیا پر وائرل ہوا اور اب اس پر شدید بحث و مباحثہ ہو رہا ہے۔ اس واقعے کی حقیقت کیا ہے، جانیے اس تحریر میں۔
محکمہ صحت خیبر پختونخواہ کے مطابق صوبے میں گذشتہ 24 گھنٹوں میں 864 نئے مریضوں میں کورونا پایا گیا ہے جبکہ چالیس مریض ہلاک ہوئے ہیں۔ مجموعی طور پر خیبر پختونخواہ میں 3350 لوگ کورونا کے ہاتھوں زندگی کی بازی ہارچکے ہیں۔
ترکی میں پولیس نے کم از کم دو سو افراد کو بغیر اجازت کے لیبر ڈے کے سلسلے میں ریلیاں نکالنے اور ان میں شرکت کرنے کے الزام میں گرفتار کر لیا ہے۔
ترکی میں کورونا وائرس کی تیسری لہر کی شدت میں کمی کے لیے مختلف پابندیاں لگائی گئی ہیں۔ اس سال کورونا وائرس کے تناظر میں ان ریلیوں کی اجازت نہیں دی گئی تھی۔
ترکی کے علاوہ بھی لیبر ڈے کی ریلیاں کئی ممالک میں نکالی گئی ہیں جہاں حکام کو خدشات ہیں کہ یہ ریلیاں کورونا وائرس کی وبا کی روک تھام میں منفی کردار ادا کریں گی۔
یکم مئی کو انڈیا میں کووڈ سے ہلاک ہونے والے افراد کی تعداد ایک مرتبہ پھر 3650 سے زیادہ رہی ہے۔
تازہ ترین اعدادوشمار کے مطابق ملک میں سنیچر کو اس وبا سے ہلاک ہونے والے افراد کی تعداد 3689 رہی جو کہ ایک نیا ریکارڈ ہے۔
سنیچر کو انڈیا میں تین لاکھ 92 ہزار سے زیادہ نئے مریض سامنے آئے جبکہ ملک میں کورونا کے نئے متاثرین کی شرح 18.24 فیصد تک پہنچ گئی ہے۔
این سی او سی نے ملک بھر میں حضرت علی کے یومِ شہادت کے موقع پر ملک بھر میں جلوسوں پر پابندی عائد کر دی ہے تاہم اس دن کی مناسبت سے مجالس کی اجازت دی گئی ہے
سیرم انسٹی ٹیوٹ آف انڈیا جس نے آسٹرازینیکا آکسفورڈ کوویڈ 19 ویکسین کو کویسشیلڈ کے نام سے بنائی ہے کا کہنا ہے کہ وہ دیگر ممالک میں بھی یہ ویسکین تیار کر سکتی ہے۔
سیرم انسٹی ٹیوٹ آف انڈیا کے چیف ایگزیکٹو آفیسر آدر پوناوالا نے جمعے کو برطانیہ کے ٹائمز میگزین کو انٹرویو میں یہ خبر دی۔
ان کا کہنا تھا کہ اس حوالے سے آئندہ چند دنوں میں اعلان کیا جائے گا۔
پونا والا کا کہنا ہے کہ جولائی تک ان کی کمپنی ہر ماہ میں دس کروڑ خوراکیں تیار کر لے گی۔
پونا والا کا کہنا تھا کہ میں لندن میں ہوں کیونکہ میں واپس نہیں جانا چاہتا۔
انھوں نے کہا کہ `ہر بات کی ذمہ داری میرے کندھوں پر ہے، مگر میں اسے تنہا نہیں کر سکتا۔ میں ایسی صورتحال میں نہیں جانا چاہتا جہاں آپ بس اپنا کام کرنے کی کوشش کر رہے ہوں۔ اور بس اس لیے کہ آپ کسی ایکس وائی زیڈ کو ان کی ضرورت کے مطابق ویکسین فراہم نہیں کر سکتے، آپ واقعی یہ انداز نہیں لگانا چاہتے کہ وہ کیا کرنے جا رہے ہیں۔‘
انھوں نے کہا کہ ویکسین کے حصول کی خواہش اور اس حوالے سے پایا جانے والا غصہ ایسے پہلے کبھی نہیں دیکھا گیا تھا۔ ہر کوئی سوچتا ہے کہ اسے ویکسین کی ضرورت ہے۔ لیکن وہ یہ سمجھنے سے قاصر ہیں کہ کسی کو ان سے پہلے ملنا کیوں ضروری ہے۔
سنیچر کو انڈیا کے دارالحکومت دلی میں کورونا وائرس کے مزید 25219 کیسز رجسٹرڈ کیے گئے ہیں جبکہ مزید 412 افراد ہلاک ہو گئے ہیں۔
حکام کی جانب سے جاری کیے جانے والے تازہ ترین اعداد و شمار کے مطابق دلی میں مثبت کیسز کی شرح 31 اعشاریہ چھ ایک فیصد ہے۔ اس کا مطلب یہ ہے کہ ٹیسٹ کروانے والے ہر تین میں سے ایک شخص کو کورونا وائرس ہے۔
اعداد و شمار کے مطابق 50554 افراد گھروں میں تنہائی اختیار کیے ہوئے ہیں۔
صورتحال دیکھتے ہوئے وزیراعلیٰ اروند کیجریوال نے لاک ڈاؤن میں مزید ایک ہفتے کی توسیع کر دی ہے۔
انھوں نے اس کا اعلان ٹوئٹر پر کیا۔ یہ دوسری بار ہے جب دلی میں لاک ڈاؤن میں توسیع کی گئی ہے۔
پنجاب میں حکام کا کہنا ہے کہ 40 سال سے زائد عمر کے افراد کے لیے رجسٹریشن کا عمل جاری ہے اور پچاس سال سے زائد عمر کے افراد شناختی کارڈ دکھا کر کسی بھی سنٹر سے ویکسین لگوا سکتے ہیں۔
سیکرٹری پرائمری اینڈ سیکنڈری ہیلتھ کیئر کا کہنا ہے کہ 50 سال سے زائد عمرکے معذور اور نہ چل پھر سکنے والے شہریوں کے لیے ہوم ویکسینیشن کی سہولت بھی موجود ہے۔سیکرٹری محکمہ پرائمری اینڈ سیکنڈری ہیلتھ کیئر کا کہنا ہے کہ کورونا وائرس پر قابو پانے کے لیے ہر طرح کے اجتماعات سے گریز کریں۔
محکمہ اوقاف پنجاب کی جانب سے جاری ٹوٹیفکیشن کے مطابق رمضان کے آخری عشرے میں مساجد اور مزارات پر اعتکاف کی اجازت نہیں دی جائے۔
حکام کا کہنا ہے کہ پابندی کا فیصلہ کورونا وائرس کے خدشے کے پیش نظر کیا گیا۔
پاکستان کے زیر انتظام کشمیر میں مزید 110 افراد میں کورونا کی تشخیص ہوئی ہے جبکہ ایک مریض جان کی بازی ہار گیا۔
انتظامیہ کی جانب سے جاری اعداد و شمار گذشتہ 24 گھنٹوں کے دوران 112 کورونا متاثرین صحت یاب ہو گئے ہیں۔
اس وقت وہاں ایکٹو کیسز کی کل تعداد 2236 ہے۔
انڈیا کے زیر انتظام کشمیر میں محکمہ اطلاعات اور پبلک ریلیشن کا کہنا ہے کہ کورونا کرفیو جموں اور کشمیر کے تمام 20 اضلاع میں نافذ رہے گا۔
رات کے وقت کرفیو کا آغاز آٹھ بجے شروع ہوا تھا جو صبح سات بجے تک جاری رہے گا۔
وزیراعلیٰ پنجاب عثمان بزدار نے کہا ہے کہ صوبائی دارالحکومت میں شہریوں کی زندگیوں کے تحفظ کے لیے 2 روز تک مکمل لاک ڈاؤن رہے گا۔
عثمان بزدار شہریوں سے اپیل کی ہے کہ وہ گھروں میں رہیں، بلاضرورت باہر نہ نکلیں۔
ان کا کہنا تھا کہ صوبے کے دیگر شہروں میں بھی مثبت کیسوں اور شرح اموات میں اضافہ ہو رہا ہے اور صورتحال کا روزانہ کی بنیاد پر جائزہ لے کر ضروری اقدامات کیے جا رہے ہیں۔
۔عثمان بزدار نے کہا کہ پنجاب کابینہ نے لاہور سمیت زیادہ مثبت شرح والے شہروں میں مکمل لاک ڈاؤن کی تجویز دی ہےاور اگر صورتحال میں بہتری نہ آئی تو لاک ڈاؤن کے سوا کوئی چارہ نہیں رہے گا۔
انھوں نے کہا کہ مریضوں کی تعداد بڑھنے سے ہیلتھ پروفیشنلز بھی دباؤ کا شکار ہیں۔
امریکی یونیورسٹی آف میری لینڈ اپر چیساپیک ہیلتھ میں بطور چیف بڑائے شعبہ متعدی امراض ڈاکٹر فہیم یونس کا کہنا ہے کہ کھلی جگہوں پر کورونا وائرس کے پھیلنے کا امکان 10 فیصد سے کم ہوتا ہے تاہم بند جگہوں پر یہ امکان 18 گنّا بڑھ جاتا ہے۔
سوشل میڈیا پر اپنے ایک اور پیغام میں انھوں نے کہا کہ ماسک نہ پہننااور ہاتھ ملاتے رہنا بہادری نہیں۔
کورونا کے بڑھتے کیسز کے پیش نظر پاکستان کے صوبہ پنجاب میں ضلعی انتظامیہ کی تجویز پر لاہور شہر کے مزید 15علاقوں میں سمارٹ لاک ڈاؤن نافذ کر دیا گیا ہے۔
سیکرٹری پرائمری اینڈ سیکنڈری ہیلتھ کیئر سارہ اسلم نے سمارٹ لاک ڈاؤن نوٹیفیکیشن جاری میں بتایا ہے کہ یہ 13 مئی تک نافذالعمل رہے گا اور زیادہ کورونا ٹیسٹ مثبت آنے والے علاقوں میں سمارٹ لاک ڈاؤن لگایا جا رہا ہے۔
لاہور کے علاقے علامہ اقبال ٹاؤن میں مصطفی ٹاؤن اور پی آئی اے سوسائٹی میں سمارٹ لاک ڈاؤن لگا دیا گیا ہے۔ لاہور کینٹ میں ڈی ایچ اے فیز-1، فیز -5، عارف جان روڈ اورایڈن کاٹیج کو بند کر دیا گیا ہے۔
سیکرٹری پرائمری اینڈ سیکنڈری ہیلتھ کیئر کے مطابق داتا گنج بخش ٹاؤن کے علاقے میسن روڈ، سنت نگر، راج گڑھ ، اسلام پورہ، ساندہ اور شاہ جمال میں بھی سمارٹ لاک ڈاون لگا دیا گیا ہے۔
حکام نے گلبرگ میں گارڈن ٹاؤن کے علاقے اتا ترک بکر بلاک اور ماڈل ٹاؤن ڈی بلاک کو بند کر دیا ہے۔
لاہور میں شالیمار ٹاؤن کا علاقہ سٹاف کالونی UET میں بھی لاک ڈاون لگا دیا گیا ہے۔ لاک ڈاؤن والے علاقوں میں تمام شاپنگ مالز،ریسٹورانٹ،دفاتر(نجی اور سرکاری) بند رہیں گے۔
سیکرٹری پرائمری اینڈ سیکنڈری ہیلتھ کیئر کے مطابق علاقہ مکینوں کی نقل و حمل محدود ہو گی، انتہائی ضرورت کے پیش نظر ایک فرد ایک سواری استعمال کر سکے گا۔ اس دوران ہر قسم کے اجتماعات پر مکمل پابندی ہو گی۔
کووڈ 19 سے متاثر ہونے کے بعد سامنے آنے والے مضر اثرات پر تحقیق کرنے والوں کا کہنا ہے کہ سونگھنے کی حس واپس لانے کے لیے 'سونگھنے کی ٹریننگ' کروائی جائے اور اس دوران سٹیرائڈز کا استعمال نہ کیے جائیں۔
یہ ایک ایسا مرحلہ ہوتا ہے جس کے دوران متاثرہ شخص کو متعدد ماہ تک مختلف اشیا کی مہک سونگھائی جاتی ہیں تاکہ اس کے دماغ کو دوبارہ ان کی مہک کو پہچاننے سے متعلق ٹریننگ دی جا سکے۔
بین الاقوامی ماہرین کے ایک گروہ کا کہنا ہے کہ سونگھنے کی ٹریننگ کرنا انتہائی سستا اور آسان عمل ہے۔
اور سٹیرائڈز کے برعکس یہ کسی بھی قسم کے مضر اثرات سے بھی پاک ہے۔
انڈیا کے دارالحکومت نئی دہلی کے بترا ہسپتال میں آکسیجن کی قلت سے کورونا وائرس کے آٹھ مریض ہلاک ہو گئے ہیں۔
پریس ٹرسٹ آف انڈیا کے مطابق مرنے والوں میں بترا ہسپتال میں معدے اور پیٹ کے امراض کے ڈیپارٹمنٹ کے چئیرمین بھی شامل ہیں۔
دلی کے وزیراعلیٰ آروند کیجروال نے انڈین خبر رساں ادارے اے این آئی کو بتایا کہ آکسیجن کی شدید قلت ہے اور بہت سے ہپستالوں نے ہنگامی صورتحال کا اعلان کیا ہے۔
انھوں نے کہا: ’ہم نے عدالت کو بتایا اور مرکزی حکومت کو بھی لکھا ہے کہ دلی کو روزانہ کی بنیاد پر 976 ٹن آکسیجن کی ضرورت ہے لیکن ہمیں صرف 490 ٹن آکسیجن دی گئی ہے اور گذشتہ روز ہمیں صرف 312 ٹن آکسیجن دی گئی۔‘
دلی ہائی کورٹ نے کہا ہے کہ کووڈ 19 کی وبا کے دوران ہسپتالوں کو موجودہ تجربے سے سبق سیکھنا چاہیے اور آکسیجن پلانٹس لگانے چاہیے۔
جسٹس وپن سنگھی اور جسٹس ریکھا پیلی پر مشتمل بنچ نے کہا کہ کچھ ہسپتال اخراجات پر غور کرتے ہوئے آکسیجن پلانٹ جیسی اہم چیزوں پر سرمائے کے اخراجات کو کم کر دیتے ہیں۔
ملک میں کورونا وائرس کی دوسری لہر کے دوران جاری آکسیجن کی قلت کے معاملے پر دائر متعدد درخواستوں کی سنیچر کے روز سماعت کرتے ہوئے بنچ نے کہا کہ آکسیجن پلانٹ اہم ہیں اور ان کا نہ ہونا غیر زدمہ داری ہے۔