کورونا وائرس: ایرانی پارلیمان کے سپیکر علی لاریجانی میں وائرس کی تصدیق

لائیو کوریج

1. 2 اپريل 2020کورونا وائرس: سڈنی کے ساحل سمندر پر ’گھر میں رہیے‘ کا پیغام

2. 2 اپريل 2020کورونا وائرس: ٹرمپ کو چین کے اعدادوشمار پر شکوک وشبہات

   امریکی صدر ڈونلڈ ٹرمپ نے چین کے کورونا وائرس سے متعلق اعدادوشمار پر شکوک وشبہات کا اظہار کرتے ہوئے کہا ہے کہ یہ تعداد تھوڑی کم ہے۔

   امریکی صدر کا یہ بیان بلومبرگ کی ایک رپورٹ کے بعد سامنے آیا ہے جس میں کہا گیا تھا کہ وائٹ ہاؤس کو ایک خفیہ رپورٹ موصول ہوئی ہے جس میں بتایا گیا ہے کہ چین نے ملک میں کورونا وائرس سے ہونے والے اموات اور متاثرین کی تعداد کم بتائی ہے۔

   ٹرمپ نے کہا ہے کہ انھیں یہ رپورٹ موصول نہیں ہوئی لیکن ایسا لگتا ہے کہ چین کے اعدادوشمار تھوڑے کم ہیں۔

   انہوں نے یہ بھی کہا: ’ان (چین) کی تعداد درست ہے یا نہیں لیکن میں چین کا اکاؤنٹنٹ نہیں ہوں۔‘

   واضح رہے کہ چین کے نیشنل ہیلتھ کمیشن کے اعدادوشمار کے مطابق ملک میں فی الحال کورونا وائرس کے 81554 تصدیق شدہ کیسز ہیں جبکہ اموات کی کل تعداد 3312 ہے۔

3. 2 اپريل 2020لاک ڈاؤن کے باوجود تیل کی قیمتوں میں اضافہ

   امریکی صدر ٹرمپ نے ایک بیان میں کہا ہے کہ انھیں امید ہے کہ سعودی عرب اور روس تیل کی قیمتوں پر جلد معاہدہ طے کر لیں گے، جس کے بعد عالمی منڈی میں تیل کی قیمتوں میں اضافہ دیکھنے میں آیا ہے۔

   دونوں ممالک کے درمیان قیمتوں پر تنازعہ عل رہا تھا جس کی وجہ سے خام تیل کی قیمتیں 18 سال کی کم ترین سطح پر آ گئی تھیں۔

   ساتھ ہی ساتھ دنیا بھر میں لاک ڈاؤن ہونے کے باعث تیل کی مانگ میں بھی کمی آئی ہے۔

   وائٹ ہاؤس میں ایک پریس کانفرنس سے خطاب کرتے ہوئے صدر ٹرمپ نے کہا کہ یہ صورتحال دونوں ممالک کے مفاد میں نہیں اور ان کے خیال میں دونوں فریق جلد ہی کوئی معاہدہ طے کر لیں گے۔

   ایشیا کی مارکیٹوں میں برینٹ کروڈ کی قیمت چھ فیصد اضافے کے بعد 26 ڈالر فی بیرل پر آ گئی ہے جبکہ امریکی تیل کی قیمتیں بھی بانچ فیصد بڑھی ہیں۔

4. 2 اپريل 2020ایشیا کی سب سے بڑی کچی آبادی میں کورونا سے متاثرہ شخص ہلاک

   انڈیا کے تجارتی مرکز ممبئی میں دھاروی کی کچی آبادی، جہاں دس لاکھ سے زیادہ افراد آباد ہیں، میں ایک 56 سالہ شخص کورونا وائرس سے ہلاک ہو گیا ہے۔

   بدھ کو اس شخص میں وائرس کی تصدیق سے ایک ہفتہ قبل ان میں بخار اور کھانسی کی علامات ظاہر ہوئی تھیں۔

   حکام نے اس عمارت کو سیل کر دیا ہے جہاں یہ شخص رہائش پذیر تھا جبکہ خاندان کے دیگر سات افراد کو قرنطینہ میں منتقل کر دیا گیا ہے۔

   یہ کچی آبادی ممبئی کے وسط میں واقع ہے جو کہ ایک شہر کے اندر ایک شہر ہے۔ یہاں بے شمار تنگ گلیاں، کھلی نالیاں اور چھوٹی چھوٹی جھونپڑیاں موجود ہیں۔

   ماہرین نے نشاندہی کی ہے کہ اگرچہ معاشرتی دوری انتہائی ضروری ہے لیکن دھاروی کی کچی آبادی میں یہ تقریباً ناممکن ہے اور ایسے علاقے میں کورونا وائرس کا پھیلاؤ روکنا ایک بہت بڑا چیلنج ہو سکتا ہے۔

5. 2 اپريل 2020روس سے طبی سامان امریکہ پہنچ گیا

   ایک روسی طیارہ طبی سازوسامان کے ساتھ امریکہ پہنچ چکا ہے۔ روس کے اس فوجی طیارے نے امریکی ریاست نیویارک میں لینڈ کیا ہے۔

   امریکی سیکرٹری خارجہ مائیک پومپیو نے ٹوئٹر پر لکھا: کوویڈ 19 کو شکست دینے کے لیے ہمیں مل کر کام کرنا ہو گا۔ یہی وجہ ہے کہ امریکہ نے روس سے فوری ضرورت کا حفاظتی سامان خریدنے پر اتفاق کیا۔‘

   پیر کے روز روسی صدر ولادیمیر پوتن کی امریکی صدر کے ساتھ بات چیت ہوئی تھی جس کے بعد یہ سامان امریکہ بھیجا گیا ہے۔

   واضح رہے کہ روس انسانی ہمدردی کی بنیاد پر اٹلی کو طبی سامان اور ماہرین بھیج چکا ہے۔

6. 2 اپريل 2020کورونا: پاکستان میں 2426 متاثرین، سندھ میں پابندیاں مزید سخت

7. 2 اپريل 2020بریکنگ, دنیا بھر میں کورونا وائرس سے 47,208 افراد ہلاک، متاثرین کی تعداد تقریباً دس لاکھ

   دنیا بھر میں کورونا وائرس سے 47,208 افراد ہلاک ہو چکے ہیں جبکہ متاثرین کی تعداد دس لاکھ کے قریب پہنچ چکی ہے۔

   اٹلی: 13155 اموات

   سپین: 9387 اموات

   امریکہ: 5116 اموات

   فرانس: 4043 اموات

   چین: 3316 اموات

   ایران: 3036 اموات

   برطانیہ: 2357 اموات

   ہالینڈ: 1173 اموات

   جرمنی: 931 اموات

   بیلجیئم: 828 اموات

   دنیا بھر میں کورونا وائرس سے متاثرہ افراد کی کل تعداد 935817 ہے۔ یاد رکھیے کہ یہ تعداد صرف تصدیق شدہ کیسز کی ہے جبکہ اصل تعداد اس سے زیادہ بھی ہو سکتی ہے۔

   امریکہ: 215417 متاثرین

   اٹلی: 110574 متاثرین

   سپین: 104118 متاثرین

   چین: 82381 متاثرین

   جرمنی: 77981 متاثرین

   فرانس: 57763 متاثرین

   ایران: 47593 متاثرین

   برطانیہ: 29865 متاثرین

   بیلجیئم: 13964 متاثرین

   ہالینڈ: 13696 متاثرین

   یہ اعدادوشمار امریکہ کی جان ہاپکنز یونیورسٹی سے لیے گئے ہیں۔

8. 2 اپريل 2020امریکہ: چار مزید ریاستوں میں شہریوں کو گھروں میں رہنے کی ہدایت

   امریکہ میں تین روز کے دوران کورونا وائرس سے ہونے والی اموات کی تعداد دگنی ہونے کے بعد مزید چار امریکی ریاستوں میں شہریوں کو گھروں میں رہنے کی ہدایات جاری کی گئی ہیں۔

   فلوریڈا، جارجیا، میسیسپی اور نویڈا کے گورنروں نے شہریوں کو گھروں میں رہنے کی سخت ہدایات جاری کی ہیں۔

   امریکی صدر ڈونلڈ ٹرمپ نے کہا ہے کہ انھیں وفاقی حکومت کو ملک گیر حکمنامہ جاری کرنے کی کوئی ضرورت دکھائی نہیں دیتی، 39 ریاستوں اور ڈسٹرکٹ کولمبیا کے رہائشیوں کو صرف ڈاکٹر کے پاس یا ضروری سامان خریدنے کے لیے باہر جانے کی اجازت ہے۔

   امریکی صدر نے بدھ کے روز وائٹ ہاؤس کی بریفنگ میں یہ بھی بتایا کہ وہ مشہور مقامات کو جانے والی پروازیں روکنے پر غور کر رہے ہیں۔

9. 2 اپريل 2020کورونا وائرس: مشرق وسطیٰ پر منڈلاتا ہوا ٹائم بم

   جس طرح کورونا وائرس آہستہ آہستہ مشرق وسطیٰ میں اپنے قدم جما رہا ہے اس کے خطے میں انسانی اور سیاسی سطح پر تباہ کن نتائج ہو سکتے ہیں۔

10. 2 اپريل 2020پانچ دن بعد گھر آئے، چائے پی اور ہسپتال واپس

    بھوپال میں کورونا وائرس کے پھیلاوٴ کے سبب کام بڑھ جانے سے ڈاکٹر سُدھیر پانچ روز بعد اپنے گھر واپس لوٹے لیکن گھر کے اندر جانے کے بجائے باہر بیٹھے چائے پیتے نظر آ رہے ہیں اور چائے پی کر وہ ہسپتال واپس چلے گئے۔

11. 2 اپريل 2020کورونا وائرس: دنیا میں اب تک کیا ہوا؟

12. 2 اپريل 2020دنیا میں لاک ڈاؤن کے انوکھے اور تخلیقی طریقے

    دنیا بھر کے ملک کورونا وائرس کے پھیلاؤ کو روکنے کے لیے بے مثال اقدامات کر رہے ہیں جن میں سے چند ممالک میں سخت پابندیاں اور کچھ ممالک میں کیے جانے والے اقدامات خاصے نرم ہیں جبکہ بعض ممالک میں انتہائی تخلیقی اقدامات بھی کیے گئے ہیں۔

13. 2 اپريل 2020انڈیا میں تازہ صورتحال: 41 ہلاک، 1600 متاثر

    انڈیا میں کورونا وائرس سے اب تک 41 افراد ہلاک ہو چکے ہیں جبکہ 1600 سے زیادہ افراد اس سے متاثر ہوئے ہیں۔

    دلی میں ہونے والے تبلیغی جماعت کے اجتماع سے کورونا وائرس کے 378 نئے مریض سامنے آئے ہیں۔ جس کے بعد حکام اس اجتماع میں شرکت کرنے والوں کی تلاش میں ہیں۔

    حکام کے مطابق تقریباً نو ہزار افراد کو خطرہ ہے جبکہ ایک ہزار افراد کو پہلے ہی قرنطینہ میں رکھا گیا ہے۔

    انڈیا کی ریاست راجھستان نے اعلان کیا ہے کہ ریاست میں رہنے والے تمام افراد کی سکریننگ کی جائے گی۔

    واضح رہے کہ انڈیا میں آج لاک ڈاؤن کا نوواں روز ہے جبکہ حکومت نے ملک بھر میں 21 دن کے لاک ڈاؤن کا اعلان کر رکھا ہے۔

14. 2 اپريل 2020جاپان میں ٹوئٹر پر ہیش ٹیگ ٹو ماسک کا ٹرینڈ, ماریکو اوئی، بی بی سی نیوز

    جاپان میں حکومت نے ہر گھر میں دو ماسک فراہم کرنے کا اعلان کیا ہے جس سے عوام مطمئن دکھائی نہیں دے رہے۔

    جاپانی حکومت کے اس اعلان کے بعد ٹوئٹر پر ہیش ٹیگ ٹو ماسک ٹرینڈ کرنے لگا۔

    کچھ لوگوں نے پوچھا ’اگر آپ کے خاندان میں دو سے زیادہ لوگ ہوں تو کیا ہو گا؟‘ جبکہ کچھ سوشل میڈیا صارفین اس کا موازنہ ان ممالک سے کرنے لگے جہاں نقد رقم تقسیم کی گئی ہے۔

    جاپان میں اب تک کورونا وائرس سے 57 افراد ہلاک ہو چکے ہیں جبکہ اس سے متاثرہ افراد کی تعداد 2384 ہے۔

15. 2 اپريل 2020کورونا کے پھیلاؤ میں اضافے پر عالمی ادارہ صحت کی تشویش

    عالمی ادارہ صحت کے سربراہ ٹریڈروس ایدہانم کا کہنا ہے کہ انھیں وقت کے ساتھ ساتھ کورونا وائرس کے اضافی نمو پر گہری تشویش ہے۔

    پریس بریفنگ سے خطاب کرتے ہوئے انھوں نے کہا کہ گذشتہ ایک ہفتے میں ہلاکتوں کی تعداد دوہری ہوئی ہے۔

    عالمی ادارہ صحت کے سربراہ کا کہنا تھا کہ اگلے کچھ دنوں میں دنیا کورونا وائرس کے 10 لاکھ مصدقہ کیسز اور 50 ہزار تک ہلاکتیں پہنچنے کے لیے تیار رہے۔

16. 2 اپريل 2020امریکہ میں کورونا وائرس سے ہلاکتوں کی تعداد 5116، متاثرین کی تعداد 2 لاکھ سے تجاوز کر گئی

    امریکہ میں کورونا وائرس سے اب تک 5116 افراد ہلاک ہو چکے ہیں جبکہ اس وائرس سے متاثرہ افراد کی تعداد 2 لاکھ سے تجاوز کر گئی ہے۔

    امریکہ کے نائب صدر مائیک پینس نے امریکہ میں متاثرین کی بڑھتی تعداد کی صورتحال کا موازنہ اٹلی سے کیا ہے جہاں اب تک کورونا وائرس سے سب سے زیادہ ہلاکتیں ہو چکی ہیں۔

    امریکہ پہلے ہی خبرادر کر چکا ہے اس وبا سے ڈھائی لاکھ امریکی شہری ہلاک ہو سکتے ہیں۔

17. 2 اپريل 2020کورونا وائرس سے متعلق بی بی سی اردو کی خصوصی لائیو کوریج

    کورونا وائرس سے متعلق بی بی سی اردو کے لائیو پیج میں خوش آمدید۔

    آپ کو یہاں دنیا بھر میں کورونا وائرس کی تازہ ترین صورتحال کے بارے میں لمحہ بہ لمحہ اپ ڈیٹس ملیں گی۔

    مارچ کے مہینے میں کورونا وائرس کے حوالے سے دنیا میں کیا کیا ہوا؟ جاننے کے لیے یہاں کلک کریں۔

18. 2 اپريل 2020کورونا وائرس: ایرانی پارلیمان کے سپیکر علی لاریجانی میں وائرس کی تصدیق