آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
انگلینڈ اور پاکستان کے درمیان سات ٹی ٹوئنٹی میچوں کی سیریز کا ساتواں میچ آج کھیلا گیا جس میں انگلینڈ نے پاکستان کو 67 رنز سے شکست دے دی ہے۔
بلال کریم مغل
محمد حسنین نے جب ڈیوڈ ملان کو گیند کروائی تو آؤٹ ہوئے فل سالٹ۔ اُنھیں نائب کپتان شاداب خان نے خاصے فاصلے سے ہی ڈائریکٹ تھرو کر کے رن آؤٹ کر دیا۔
وہ 12 گیندوں پر 20 رنز بنا سکے۔
ڈیوڈ ملان نے رن لینے کا فیصلہ منسوخ کر دیا تھا جس کی وجہ سے فل سالٹ کو فوراً واپس بھاگنا پڑا مگر وہ گیند کی رفتار کا مقابلہ نہ کر سکے۔
محمد حسنین کی گیند پر ایلکس ہیلز ایل بی ڈبلیو آؤٹ ہو گئے ہیں۔ اُنھوں نے 13 گیندوں پر 18 رنز بنائے۔
انگلینڈ کی جانب سے ریویو نہیں لیا گیا۔
فل سالٹ کی جانب سے پاکستانی ٹیم کے لیے چھٹے میچ میں بھی مشکل پیدا کر دی گئی تھی۔ ان کی 88 رنز کی ناقابلِ شکست اننگز نے انگلینڈ کو باآسانی میچ جتوا دیا تھا۔
ان کا سٹرائیک ریٹ 214.63 رہا تھا۔
چنانچہ آج ان کی بیٹنگ دیکھ کر پاکستانی مداح ایک مرتبہ پھر دل تھامے ہوئے ہیں۔
تین اوورز کے اختتام پر انگلینڈ 35 رنز بنا چکا ہے جس میں سے 18 رنز فل سالٹ کے ہیں
ہانیہ ناز نے لکھا کہ سالٹ جہاں رکے تھے وہیں سے دوبارہ شروع ہو گئے۔
ملک شجاعت نے لکھا کہ فل سالٹ بھائی، آج نہیں۔ ہمیں پہلے ہی ایک غم ہے کہ صبح پیر ہے۔
ربیعہ نامی ٹوئٹر صارف نے لکھا کہ ڈاکٹر نے ٹھیک کہا تھا، سالٹ سے ہائی بلڈ پریشر ہوتا ہے۔
انگلینڈ نے پاکستان کے خلاف بیٹنگ کی شروعات کر دی ہے۔ پاکستان کی جانب سے پہلا اوور محمد نواز کروا رہے ہیں جبکہ انگلینڈ کی جانب سے فل سالٹ اور ایلکس ہیلز نے اننگز شروع کی۔
پہلے اوور کے اختتام پر انگلینڈ نے کسی نقصان کے بغیر 13 رنز بنا لیے ہیں۔
پاکستان نے ٹاس جیت کر پہلے بولنگ کروانے کا فیصلہ کیا ہے۔ انگلینڈ کے خلاف آخری ٹی ٹونٹی انٹرنیشنل میچ کے لیے پاکستانی کرکٹ ٹیم میں چار تبدیلیاں کی گئی ہیں۔
وکٹ کیپر بیٹر محمد رضوان، خوشدل شاہ، فاسٹ باؤلرز حارث رؤف اور محمد حسنین کی فائنل الیون میں واپسی ہوئی ہے جبکہ محمد حارث، حیدر علی، عامر جمال اور شاہنواز دھانی کو آج آرام دیا گیا ہے۔
پاکستان نے اس سیریز میں سوائے ایک کرکٹر لیگ سپنر ابرار احمد کے تمام کھلاڑیوں کو موقع دیا ہے۔
پاکستانی پلیئنگ الیون: کپتان بابر اعظم، نائب کپتان شاداب خان، محمد رضوان، شان مسعود، افتخار احمد، آصف علی، خوشدل شاہ، محمد نواز، محمد وسیم جونیئر، حارث رؤف، محمد حسنین۔
انگلینڈ نے اپنی ٹیم میں رچرڈ گلیسن کی جگہ کرس ووکس کو شامل کیا ہے۔
انگلش پلیئنگ الیون: فل سالٹ، ایلکس ہیلز، ڈیوڈ ملان، بین ڈکیٹ، ہیری بروک، معین علی (کپتان)، سیم کرن، ڈیوڈ ولی، کرس ووکس، عادل رشید، ریس ٹوپلی
چھٹے میچ میں پاکستان نے اپنے گذشتہ میچ سے بہتر بیٹنگ کا مظاہرہ کرتے ہوئے 169 رنز تو بنائے تھے مگر پاکستانی بولرز انگلینڈ کے بیٹرز کو ہدف حاصل کرنے سے نہ روک سکے۔
پڑھیے سمیچ چوہدری کا کالم، قسمت بھی سالٹ کی طرف دار تھی۔
انگلینڈ کے کپتان معین علی کو ٹی ٹوئنٹی انٹرنیشنل میں ایک ہزار رنز کی تکمیل کے لیے 67 رنز درکار ہیں۔
سپنر عادل رشید اب تک ٹی ٹوئنٹی انٹرنیشنل میں 87 وکٹیں حاصل کر چکے ہیں۔ اُنھیں انگلینڈ کی طرف سے سب سے زیادہ 90 وکٹیں حاصل کرنے والے کرس جارڈن سے آگے نکلنے کے لیے چار وکٹیں درکار ہیں۔
لیگ سپنر شاداب خان کو ٹی ٹوئنٹی انٹرنیشنل میں پاکستان کی طرف سے سب سے زیادہ وکٹیں لینے والے بولرز میں دوسرے نمبر پر آنے کے لیے صرف 2 وکٹیں درکار ہیں۔
شاداب اب تک 84 وکٹیں لے چکے ہیں۔ ان سے آگے سعید اجمل اور عمر گل 85 وکٹیں حاصل کر چکے ہیں۔ سب سے زیادہ 97 وکٹوں کا پاکستانی ریکارڈ شاہد آفریدی کا ہے۔
پاکستان اور انگلینڈ آج لاہور کے قذافی سٹیڈیم میں ٹی ٹوئنٹی سیریز کا ساتواں میچ کھیلیں گے۔ دونوں ہی ٹیمیں اب تک تین تین میچز جیت چکی ہیں چنانچہ آج کا میچ ہی سیریز کے فاتح کا تعین کرے گا۔
انگلینڈ نے آخری میچ میں پاکستان کو آٹھ وکٹوں سے شکست دی تھی اور پاکستان کا دیا گیا ہدف باآسانی دو وکٹوں کے نقصان پر حاصل کر لیا تھا۔
یہ پہلی مرتبہ ہے کہ آئی سی سی کے رکن دو ممالک کے درمیان سات میچز پر مبنی ٹی ٹوئنٹی سیریز کھیلی جا رہی ہے۔
نان ٹیسٹ رکن ممالک کے درمیان سات میچوں کی سیریز اب تک ملاوی اور موزمبیق کے درمیان کھیلی گئی تھی۔