چوتھا ٹی 20: انگلینڈ 163 پر آل آؤٹ، پاکستان نے آخری اوور میں سیریز برابر کر دی

لائیو کوریج

بلال کریم مغل

1. 25 ستمبر 2022لائیو کوریج کا اختتام

   پاکستان اور انگلینڈ کے درمیان چوتھا ٹی 20 میچ پاکستان نے جیت لیا ہے۔ اب پانچواں میچ 28 ستمبر کو لاہور میں کھیلا جائے گا۔

   آج کے لیے ہماری لائیو کوریج ختم ہو چکی ہے۔ مزید خبروں کے لیے ہمارا ہوم پیج وزٹ کیجیے۔

2. 25 ستمبر 2022حارث رؤف پلیئر آف دی میچ قرار

   انتہائی دباؤ بھرے لمحات میں حارث رؤف نے دو وکٹیں حاصل کر کے انگلینڈ کے لیے جیت ناممکن نہیں تو مشکل ضرور بنا دی تھی۔

   اُنھوں نے چار اوورز میں 32 رنز دے کر کُل تین وکٹیں حاصل کیں جس پر اُنھیں پلیئر آف دی میچ کا اعزاز دیا گیا ہے۔

3. 25 ستمبر 2022حسنین کا ’مہنگا‘ اوور، حارث کی دو وکٹیں اور شان کا رن آؤٹ

   محمد حسنین نے جب ایک اوور میں لگاتار چوکے کھائے تو کئی شائقین سٹیڈیم سے اٹھ کر جانے لگے تھے کیونکہ اس وقت سبھی کو لگ رہا تھا کہ میچ انگلینڈ جیتنے والا ہے۔

   مگر پھر حارث رؤف آئے اور آتے ہی لیام ڈاسن اور اولی سٹون کو پویلین لوٹا دیا جس سے پاکستان نے انگلینڈ کے لیے مشکلات پیدا کر دیں۔ مگر تب بھی انگلینڈ کے لیے فتح صرف ایک چوکا ہی دور تھی۔

   اس کے بعد جب محمد وسیم نے آخری اوور کروایا تو ایک مرتبہ عادل رشید کو رن آؤٹ کی کوشش کر کے انگلینڈ پر دباؤ بڑھایا۔ اگلی ہی گیند پر شان مسعود نے ریس ٹوپلی کو صفر پر رن آؤٹ کر دیا۔

4. 25 ستمبر 2022پاکستان تین رنز سے فاتح، سیریز 2-2 سے برابر

   محمد وسیم کی گیند پر ریس ٹوپلی رن آؤٹ ہوئے تو پاکستان یہ میچ جیت گیا۔ تین رنز سے میچ میں فتح کے بعد اب یہ سیریز 2-2 سے برابر ہو چکی ہے۔

5. 25 ستمبر 2022حارث رؤف نے اولی سٹون کو بھی آؤٹ کر دیا

   کلین بولڈ۔ لیام ڈاسن کے بعد حارث رؤف کا نشانہ اولی سٹون بنے جو کوئی رن نہ بنا سکے۔

6. 25 ستمبر 2022حارث رؤف کی گیند پر لیام ڈاسن کیچ آؤٹ

   پانچ چوکوں سے پاکستان کے لیے یہ میچ دشوار بنا دینے والے لیام ڈاسن 34 رنز بنا کر آؤٹ ہو گئے ہیں۔

7. 25 ستمبر 2022لیام ڈاسن کے دو گیندوں پر 10 رنز، اور فری ہٹ

   محمد حسنین نے لیام ڈاسن کو دو گیندیں کروائیں جن پر اُنھوں نے ایک چھکا اور ایک چوکا مارا۔ وہ گیند نو بال قرار پائی اور اگلی ہی گیند پر لیام ڈاسن نے ایک چوکا اور مار کر میچ کا پانسہ پلٹ دیا۔

   اب انگلینڈ کو جیتنے کے لیے 15 گیندوں پر 14 رنز درکار ہیں۔

8. 25 ستمبر 2022ڈیوڈ ولی حارث رؤف کی یارکر کھیلنے میں ناکام

   ڈیوڈ ولی نے اب سے پہلے جب دو چوکے لگائے تو یوں محسوس ہوا جیسے وہ میچ کی بازی انگلینڈ کے حق میں پلٹ دیں گے۔ لیکن حارث رؤف کی یارکر کھیلنے کی کوشش میں وہ بولڈ ہو گئے۔

   اُنھوں نے اپنی ٹیم کو 11 رنز فراہم کیے۔

9. 25 ستمبر 2022میچ ایک بار پھر پاکستان کی گرفت میں

   انگلینڈ کی ٹیم کے مشکل آغاز کے بعد ایک وقت ایسا آیا تھا جب جیت کا امکان کیلکولیٹ کرنے والے سسٹمز میں انگلینڈ کا پلڑا بھاری دکھائی دے رہا تھا مگر معین علی اور ہیری بروک کی پے در پے گرنے والی وکٹوں نے ایک مرتبہ پھر میچ پر پاکستان کی گرفت مضبوط کر دی ہے۔

   اب انگلینڈ کو 28 گیندوں پر 47 رنز درکار ہیں۔

10. 25 ستمبر 2022ایک کیچ آؤٹ سے بچنے کے بعد ہیری بروک بالآخر کیچ آؤٹ

    اننگز کی شروعات میں جب ہیری بروک نے چار رنز بنائے تھے اس وقت محمد نواز نے ان کا کیچ ڈراپ کیا تھا۔ 34 رنز بنانے کے بعد وہ وسیم کی گیند پر حسنین کے ہاتھوں کیچ آؤٹ ہو گئے۔

11. 25 ستمبر 2022معین علی 29 رنز بنا کر آؤٹ

    20 گیندوں پر 29 رنز بنانے کے بعد معین علی محمد نواز کی گیند پر کلین بولڈ ہو گئے۔

    محمد نواز نے اس میچ میں تین وکٹیں حاصل کر لی ہیں۔

    اس وقت انگلینڈ کا سکور 108 ہے اور اس کے پانچ کھلاڑی آؤٹ ہو چکے ہیں۔

12. 25 ستمبر 2022انگلش اننگز کا نصف، 10 اوورز میں 82 رنز

    انگلینڈ کی ٹیم کے 10 اوورز مکمل ہو گئے ہیں۔ انگلینڈ کا اوپننگ آرڈر ٹیم کو خاطر خواہ سہارا نہیں فراہم کر سکا ہے اور اس نے چار وکٹوں کے نقصان پر صرف 82 رنز بنائے ہیں۔

    اب انھیں جیت کے لیے 60 گیندوں پر 85 رنز درکار ہیں۔

13. 25 ستمبر 2022بین ڈکیٹ 33 رنز بنا کر ایل بی ڈبلیو

    محمد نواز کی گیند پر بین ڈکیٹ آؤٹ ہو گئے ہیں۔ حالانکہ امپائر نے انھیں آؤٹ قرار دیا مگر انگلینڈ کی جانب سے ریویو لیا گیا۔ تھرڈ امپائر نے بھی اصل فیصلے کو برقرار رکھا۔

    وہ 24 گیندوں پر 33 رنز بنا پائے۔

14. 25 ستمبر 2022انگلینڈ کے سات اوورز میں 55 رنز

    انگلینڈ نے سات اوورز کے آخر میں 55 رنز بنا لیے ہیں۔ اب تک اس کے تین کھلاڑی آؤٹ ہو چکے ہیں۔ حارث رؤف کی گیند پر ہیری بروک کا کیچ محمد نواز نے ڈراپ کیا۔

15. 25 ستمبر 2022محمد حسنین کی گیند پر وِل جیکس کلین بولڈ

    پاکستان کی جانب سے محمد حسنین نے تیسری وکٹ حاصل کر لی ہے۔ ول جیکس صفر رنز پر آؤٹ ہوئے۔

    انگلینڈ نے اب تک 18 رنز بنا لیے ہیں۔

16. 25 ستمبر 2022انگلینڈ کو ایک اور نقصان، ایلکس ہیلز بھی آؤٹ

    13 رنز پر انگلینڈ کی دو وکٹیں گر چکی ہیں۔ اب کی بار آؤٹ ہونے والے کھلاڑی ایلکس ہیلز ہیں جو محمد حسنین کی گیند پر آؤٹ ہوئے۔ ان کا کیچ عثمان قادر نے پکڑا۔

17. 25 ستمبر 2022انگلینڈ کو آغاز میں ہی نقصان، آٹھ رنز پر فل سالٹ واپس

    انگلینڈ کی اننگز کی شروعات ہو چکی ہے۔ آٹھ رنز بنا کر اوپنر فل سالٹ محمد نواز کی گیند پر محمد وسیم کے ہاتھوں کیچ آؤٹ ہوئے۔

18. 25 ستمبر 2022محمد آصف کے چھکے سے پاکستان کی اننگز کا اختتام

    محمد آصف نے چار وکٹوں کے نقصان پر 166 رنز بنا لیے ہیں۔ اننگز کی آخری گیند محمد آصف نے کھیلی جنھوں نے انتہائی بلند چھکا لگا کر اننگز کو شاندار اختتام فراہم کیا۔

19. 25 ستمبر 2022ٹیم کو 88 رنز دینے کے بعد رضوان بھی پویلین واپس

    نو چوکوں اور ایک چھکے کی مدد سے 88 رنز بنانے کے بعد محمد رضوان ریس ٹوپلی کی گیند پر ایلکس ہیلز کے ہاتھوں کیچ آؤٹ ہو گئے ہیں۔

20. 25 ستمبر 2022خوشدل شاہ بھی آؤٹ

    پاکستان کے بلے باز خوشدل شاہ دو گیندوں پر دو رنز بنا کر آؤٹ ہو گئے ہیں۔ وہ ریس ٹوپلی کی گیند پر معین علی کے ہاتھوں کیچ آؤٹ ہوئے۔