’اگر تحریک انصاف کو بلے کا نشان نہ ملا تو امید ہے عدلیہ مداخلت کرے گی‘
چیئرمین تحریک انصاف بیرسٹر گوہر علی خان کا کہنا ہے کہ ’اگر ہمیں بلے کا انتخابی نشان نہ دیا گیا تو امید ہے عدلیہ اس معاملے میں مداخلت کرے گی۔‘
صحافیوں سے گفتگو کے دوران ان کا کہنا تھا کہ ’الیکشن کمیشن سے مطالبہ ہے کہ ہم نے انٹرا پارٹی الیکشن میں تمام قانونی کارروائی پوری کی ہے، ہمارا سرٹیفیکیٹ جاری کریں۔ آپ آئینی ادارہ ہیں، آپ کا فرض ہے صاف و شفاف الیکشن کرانا۔ الیکشن پراسس سے کسی کو باہر کرنا جمہوریت کے خلاف سازش ہوگی۔‘
انھوں نے کہا کہ ’ہم نے پہلی بار ورچوئل جلسہ کیا۔ چار ملین لوگوں نے اسے دیکھا۔ اتنی مقبولیت کسی اور پارٹی کے پاس نہیں۔۔۔ یہ مقبولیت سے گھبرائے ہوئے ہیں۔ اگر انٹرنیٹ سلو ڈاؤن کیا گیا تو بڑی غلط بات ہے۔‘
انھوں نے کہا کہ امیدواروں میں ٹکٹوں کی تقسیم پارٹی کا فیصلہ ہوگا۔
ِخیال رہے کہ الیکشن کمیشن میں تحریک انصاف کے انٹرا پارٹی الیکشن کا معاملہ زیر التوا ہے جس کے خلاف درخواستوں پر سماعت ہوئی ہے۔ تاحال پی ٹی آئی کو بلے کے انتخابی نشان کے لیے سرٹیفیکیٹ جاری نہیں کیا گیا جبکہ چند دن بعد سے امیدوار اپنے کاغذات نامزدگی جمع کرائیں گے۔