چین کے نائب وزیر اعظم تین روزہ دورے پر پاکستان پہنچ گئے

لائیو کوریج

1. 27 جولائی 2023رضا ربانی کا ’اندھی قانون سازی‘ پر واک آؤٹ

   سینیٹ میں بغیر بحث متعدد یکے بعد دیگرے بلوں کی منظوری پر بعض ارکان نے واک آؤٹ کیا جن میں پیپلز پارٹی کے سینیٹر رضا ربانی بھی شامل ہیں۔

   انھوں نے واک آؤٹ سے قبل تقریر میں کہا کہ ان بلوں کی منظوری قوائد و ضوابط کو مدنظر رکھے بغیر کی گئی۔ ’جب بل ہی ہمیں صبح ملے گا تو دو روزہ نوٹس کا اصول کیسے لاگو ہوگا۔‘

   چیئرمین سینیٹ صادق سنجرانی کو مخاطب کر کے رضا ربانی نے کہا کہ ’جو ابھی تین یا چار بل پاس ہوئے ہیں، یہ پارلیمان کی تاریخ کا سیاہ دن ہے۔ یہ اندھی قانون سازی ہے کیونکہ ہمیں اس بات کا بالکل علم نہیں کہ کس بل میں کیا ہے، کتنی سیکشنز ہیں۔‘

   انھوں نے کہا کہ ’میں اس اندھی قانون سازی پر واک آؤٹ کرتا ہوں۔‘

   دوسری طرف سینیٹر ثانیہ نشتر نے کہا کہ انھیں حکومت کی نیت پر شک نہیں مگر آج کی گئی قانون سازی پر طریقہ کار کی پیروی نہیں کی گئی۔

2. 27 جولائی 2023سینیٹ میں آرمی ایکٹ ترمیمی بل منظور: ’حساس ڈیوٹی سے ریٹائرڈ شخص پر پانچ سال تک سیاست میں حصہ لینے پر پابندی‘

   پاکستان کے سینیٹ نے آرمی ایکٹ میں ترمیم کا بل کثرت رائے سے منظور کر لیا ہے جس کے تحت ایک فوجی اہلکار ریٹائرمنٹ کے دو سال بعد تک سیاسی سرگرمیوں میں حصہ نہیں لے سکے گا جبکہ حساس سرگرمیوں میں تعینات فوجی اہلکار پانچ سال تک سیاسی سرگرمیوں میں حصہ نہیں لے سکے گا۔

   پارلیمان کے ایوان بالا میں آرمی ایکٹ میں ترمیم کا بل وزیر دفاع خواجہ آصف نے پیش کیا۔

   آرمی ایکٹ ترمیمی بل میں کیا ہے؟

   • اس ترمیم کے مطابق آفیشل سیکرٹس ایکٹ اور آرمی ایکٹ کے تحت معلومات کے غیر مجاز انکشاف پر پانچ سال قید کی سزا دی جائے گی
   • الیکٹرانک ایکٹ کے تحت اگر کوئی فوج کو بدنام کرتا ہے تو اس کے خلاف بھی آرمی ایکٹ کے تحت کارروائی ہوگی جبکہ فوج مخالف نفرت انگیزی پھیلانے پر دو سال قید کی سزا دی جائے گی
   • سرکاری حیثیت میں پاکستان کی سلامتی اور مفاد میں حاصل معلومات کا غیر مجاز انکشاف کرنے والے شخص کو پانچ سال تک سخت قید کی سزا دی جائے گی
   • آرمی چیف یا بااختیار افسر کی اجازت سے انکشاف کرنے والے کو سزا نہیں ہو گی
   • پاکستان اور افواج پاکستان کے مفاد کے خلاف انکشاف کرنے والے سے آفیشل سیکرٹ ایکٹ اور آرمی ایکٹ کے تحت نمٹا جائے گا
   • اس قانون کے ماتحت شخص سیاسی سرگرمی میں حصہ نہیں لے گا۔ متعلقہ شخص ریٹائرمنٹ، استعفی، برطرفی کے دو سال بعد تک سیاسی سرگرمی میں حصہ نہیں لے گا
   • حساس ڈیوٹی پر تعینات شخص پانچ سال تک سیاسی سرگرمی میں حصہ نہیں لے سکتا
   • سیاسی سرگرمی میں حصہ لینے پر پابندی کی خلاف ورزی کرنے والے کو دو سال تک سخت سزا ہو گی
   • آرمی ایکٹ کے ماتحت شخص اگر الیکڑنک کرائم میں ملوث ہو جس کا مقصد فوج کو بدنام کرنا ہو تو اس کے خلاف الیکٹرانک کرائم کے تحت کارروائی کی جائے گی
   • آرمی ایکٹ کے تحت شخص اگر فوج کو بدنام کرے یا اس کے خلاف نفرت انگریزی پھیلائے اسے دو سال تک قید اور جرمانہ ہو گا

3. 27 جولائی 2023چینی بینک نے پاکستان کا 2.4 ارب ڈالر کا قرضہ رول اوور کیا: اسحاق ڈار

   وفاقی وزیر خزانہ اسحاق ڈار نے کہا ہے کہ چین کے ایگزم بینک نے پاکستان کا 2.4 ارب ڈالر کا قرضہ رول اوور کیا ہے۔

   ٹوئٹر پر اسحاق ڈار نے کہا کہ ان 2 ارب 40 کروڑ ڈالر میں سے ایک ارب 20 کروڑ ڈالر کا قرضہ مالی سال 24-2023 اور ایک ارب 20 کروڑ ڈالر کا مالی سال 25-2024 کے لیے روول اوور کیا ہے۔

   جبکہ پاکستان دونوں برسوں میں صرف سود کی ادائیگی کرے گا۔

4. 27 جولائی 2023ہفتہ وار مہنگائی کی شرح میں گذشتہ سال کے مقابلے 29 فیصد اضافہ, تنویر ملک، صحافی

   ملک میں مہنگائی کی شرح میں ہونے والا اضافہ موجودہ ہفتے میں بھی جاری رہا جب گذشتہ سال جولائی کے موجودہ ہفتے کے مقابلے میں مہنگائی کی شرح میں 29.21 فیصد کا اضافہ ریکارڈ کیا گیا۔

   وفاقی ادارہ شماریات کے مطابق موجودہ ہفتے میں جولائی کے مہینے کے گذشتہ ہفتے کے مقابلے میں بھی مہنگائی کی شرح 3.73 فیصد کی شرح سے بڑھ گئی۔

   ادارہ شماریات کے مطابق سالانہ بنیاد پر آٹے کی قیمت میں 132 فیصد اضافہ ہوا جبکہ چاول کی قیمت میں ستر فیصد سے زائد اضافہ ریکارڈ کیا گیا۔

   چینی کی قیمت میں ساٹھ فیصد سے زائد اور آلو اور ٹماٹر کی قیمت میں ساٹھ فیصد سے زائد اضافہ ریکارڈ کیا گیا۔ پیاز کی قیمت میں 27 فیصد اور دال مسور کی قیمت میں گیارہ فیصد کی کمی ہوئی۔

5. 27 جولائی 2023باڑہ تھانہ: خودکش حملہ آور سے کلاشنکوف چھیننے والا شخص

6. 27 جولائی 2023وزیر اعظم شہباز شریف گوادر دورے پر ’مختلف منصوبوں کا افتتاح کریں گے‘

   وزیر اعظم شہباز شریف ایک روزہ دورے پر اسلام آباد سے گوادر روانہ ہوگئے ہیں جہاں وہ گوادر میں متعدد ترقیاتی منصوبوں کا سنگِ بنیاد و افتتاح کریں گے۔

   وزیر اعظم آفس کے میڈیا ونگ سے جاری بیان کے مطابق ان منصوبوں میں 102 کلومیٹر بسیمہ۔خضدار روڈ، 55 کلومیٹر آواران۔جھلجاؤ روڈ، نیو گوادر انٹرنیشنل ائیرپورٹ اور 132 کے وی کی پنجگور ۔ ناگ۔بسیمہ۔نل ٹرانسمشن لائن سرِ فہرست ہیں۔

   اس کے مطابق وزیراعظم گوادر کے مستحق ماہی گیروں میں امدادی چیک تقسیم کریں گے۔ ’وزیراعظم گوادر یونیورسٹی کے ہونہار طلبا و طالبات میں لیپ ٹاپ بھی تقسیم کریں گے۔ وزیرِ اعظم ان تقاریب سے خطاب بھی کریں گے۔‘

7. 27 جولائی 2023ایلی کاٹ: ’غمِ حسین میں اسلام قبول‘ کرنے والے انگریز انسپکٹر جن کے نام سے آج بھی حیدرآباد میں ماتمی جلوس نکلتا ہے

8. 27 جولائی 2023پاکستان کے ٹیکس فری شہزادے: محمد حنیف کا کالم

9. 27 جولائی 2023انڈیا میں احمدی برادری کو غیر مسلم قرار دینے کے معاملے پر کیا تنازع چل رہا ہے؟

10. 27 جولائی 2023الیکشن ایکٹ میں کون سی ترامیم کی گئی ہیں اور ان پر کیا تنقید ہوئی؟

    حکمران اتحاد اور اپوزیشن جماعتوں کے درمیان اصل جھگڑا الیکشن ایکٹ کے سیکشن 230 میں مجوزہ ترامیم کا ہے۔

    سیکشن 230 نگراں حکومت کے اختیارات کی وضاحت کرتا ہے اور بتاتا ہے کہ نگراں حکومت کس نوعیت کے فیصلے لے سکتی ہے اور کون سے فیصلے کرنے کے حوالے سے بااختیار نہیں ہے۔ اور اب مسلم لیگ نواز کی حکومت چند ترامیم کے ذریعے نگراں حکومت کو اضافی اختیار دینا چاہتی ہے جس کا جواز یہ دیا جا رہا ہے کہ ستمبر میں پاکستان کو چند بین الااقوامی معاہدوں کی تکمیل کرنی ہے جن میں پرائیوٹائزیشن، پبلک پرائیویٹ پارٹنرشپ اور دیگر ممالک کے ساتھ معاہدے شامل ہیں۔

    سیکشن 230 پر سب سے بڑا اعتراض یہ کیا گیا کہ قانون کے مطابق نگراں حکومت کا کام محض روزمرہ کے معاملات کو اس وقت تک چلانا ہے جب تک نئی منتخب حکومت نہیں آ جاتی اور نگراں حکومت کو اضافی اختیارات دے کر ایک منتخب حکومت کے برابر لانا ’آئین کے قتل‘ کے مترادف ہے۔

    بہت سے اراکین نے اپنے تقریروں میں اس خدشے کا اظہار بھی کیا کہ نگراں حکومت کو بااختیار بنانے سے متعلق ترمیم ’دراصل آئی ایم ایف کو خوش کرنے کے لیے ہے۔‘

    الیکشن ایکٹ میں ترمیم: ’ابہام کا شکار‘ اراکین پارلیمان اور لیگی وزیر قانون کی یقین دہانیاں

11. 27 جولائی 2023نگران وزیر اعظم سیاستدان ہونا چاہیے، ریٹائرڈ جج یا ٹیکنوکریٹ نہیں: رانا ثنا اللہ

    وفاقی وزیر داخلہ رانا ثنا اللہ نے کہا ہے کہ پاکستان میں آئندہ انتخابات ایک ایسے نگران وزیر اعظم کی نگرانی میں ہونے چاہییں جو کہ سیاستدان ہو، نہ کہ کوئی ٹیکنوکریٹ، ریٹائرڈ جج یا بیوروکریٹ ہو۔

    اینکر ندیم ملک سے گفتگو میں رانا ثنا اللہ نے کہا کہ ’یہ قطعً غلط ہے کہ ہماری پارٹی نے یہ نام (اسحاق ڈار) چلایا۔ ایک سیاستدان نگران وزیر اعظم ہونا چاہیے، ٹیکنوکریٹ نہیں ہونا چاہیے۔ ریٹائرڈ جج یا بیوروکریٹ نہیں ہونا چاہیے۔‘

    وہ کہتے ہیں کہ ’یہ تجویز ہے کہ سیاستدان ہی ہونا چاہیے، اگر کسی سیاستدان نے ہی بننا ہے تو کوئی ایسا ہی نام ہوگا۔ ’اگر مسلم لیگ ن ہوگی تو اس میں ڈار صاحب کا نام ہوسکتا ہے، اگر پیپلز پارٹی ہو تو اس میں رضا ربانی کا نام ہوسکتا ہے۔ اسی طرح جے یو آئی میں سے کوئی نام ہوسکتا ہے۔‘

    وزیر داخلہ نے سوال کیا کہ ’کیا وہ ٹیکنوکریٹس جنھیں پارٹیاں نامزد کرتی ہیں وہ نیوٹرل ہوتے ہیں؟ ہم نے سب چیزیں مدنظر رکھ کر ہی دو نام دینے ہیں۔‘

    دریں اثنا ان کا کہنا تھا کہ عمران خان کو کسی کیس میں گرفتار کرنے سے بہتر ہے کہ ان کے کیسز کا ٹرائل ہو اور انھیں عدالت سزا دے۔ ’اس سزا میں وہ جیل بھی جائے اور نااہل بھی ہو۔‘

    ’اگر تحقیقاتی ادارے سمجھتے ہیں کہ ان کے پاس کافی شواہد موجود ہیں تو وہ گرفتاری کے لیے مجھ سے اجازت لینی کی پابند نہیں۔‘

    رانا ثنا اللہ نے کہا کہ ’جب سزا ہوجائے تو وہ نااہل ہو ہی جائیں گے۔‘ اس ضمن میں انھوں نے امریکی سائفر کے معاملے، توشہ خانہ اور برطانیہ سے 190 ملین پاؤنڈز کی آمد کے کیسز کا حوالہ دیا۔

12. 27 جولائی 2023بی بی سی کی نئی لائیو پیج کوریج میں خوش آمدید

    اب تک کی بڑی خبریں:

    • پارلیمنٹ کے مشترکہ اجلاس سے منظور الیکشن ترمیمی بل 2023 کے تحت نگران حکومت پہلی بار اضافی اختیارات استعمال کرنے کی مجاز ہو گی
    • سپریم کورٹ نے کوئٹہ میں وکیل کے مقدمۂ قتل میں عمران خان کو شاملِ تفتیش کرنے کی بلوچستان حکومت کی درخواست مسترد کرتے ہوئے انھیں نو اگست تک گرفتار نہ کرنے کے احکامات جاری کیے ہیں
    • کراچی میں نامعلوم افراد کی فائرنگ میں رکن صوبائی اسمبلی اسلم ابڑو کے بھائی اکرم ابڑو اور بھتیجا شہر یار ہلاک جبکہ دو افراد زخمی ہوگئے ہیں
    • ایبٹ آباد میں موسلا دھار بارشوں سے شہر میں سیلاب کی صورتحال پیدا ہوچکی ہے۔ ایبٹ آباد مانسہرہ روڈ پر کئی کئی فٹ پانی کھڑا ہے جبکہ ایوب میڈیکل ہسپتال سمیت کئی کالونیوں اور آبادیوں میں پانی داخل ہوا ہے۔

13. 27 جولائی 2023چین کے نائب وزیر اعظم تین روزہ دورے پر پاکستان پہنچ گئے

14. 26 جولائی 2023’ابہام کا شکار‘ اراکین پارلیمان اور لیگی وزیر قانون کی یقین دہانیاں: الیکشن ایکٹ میں کون سی ترامیم کی گئی ہیں اور ان پر کیا تنقید ہوئی؟

15. 24 جولائی 2023’اگر آئین کے مطابق جایا جائے تو اسحاق ڈار کے نگراں وزیر اعظم بننے کے امکانات صفر ہیں‘