آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
تحریک انصاف کے جنرل سیکریٹری اسد عمر نے فیصل واوڈا کی پریس کانفرنس پر ردعمل دیتے ہوئے کہا کہ فیصل واوڈا کا بیان پارٹی پالیسی اور خیالات کی عکاسی نہیں کرتا ہے۔ انھوں نے کہا کہ تحریک انصاف کے سندھ کے صدر کو چیئرمین تحریک انصاف عمران خان کی ہدایات پر فیصل واوڈا کو پارٹی پالیسی کی خلاف ورزی کرنے پر شوکاز نوٹس بھیجنے کا کہا گیا ہے۔
اسلام آباد پولیس کے ترجمان نے کہا ہے کہ بعض شاہراہوں کو بند کرنے کی اطلاعات موصول ہوئی ہیں۔
ایک بیان میں کہا گیا ہے کہ ’شہر میں مختلف مقامات پر ایف سی کی بھاری نفری تعینات کر دی گئی ہے۔
’ اسلام آباد پولیس اور رینجرز کی مشترکہ پٹرولنگ شروع کر دی گئی ہے۔‘
تحریک انصاف کے رہنما حماد اظہر کہتے ہیں کہ لاہور میں بند روڈ بابوصابو چوکت ہربنز پورہ رنگ روڈ، ٹھوکر نیاز بیگ، شاہدرہ چوک، شنگھائی چوک فیروز پور روڈ اور بھٹہ چوک کینٹ پر احتجاج کی کال دی گئی ہے۔
ترجمان اسلام آباد پولیس نے ایک بیان میں کہا ہے کہ وفاقی دارالحکومت میں سکیورٹی ’ہائی الرٹ‘ کر دی گئی ہے۔
اس بیان میں کہا گیا کہ ’ریڈ زون میں پولیس، رینجرز اور ایف سی کی بھاری نفری تعینات کردی گئی۔ قانون کی خلاف ورزی کرنے والوں کے خلاف سخت ایکشن لیا جائے گا۔ اس وقت تمام راستے کھلے ہیں، آمدورفت میں کوئی رکاوٹ نہیں۔‘
الیکشن کمیشن نے چیئرمین تحریک انصاف عمران خان کو نااہل قرار دے دیا ہے۔
مزید جانیے ہمارے فیس بُک لائیو میں۔۔۔
وفاقی وزیر خارجہ بلاول بھٹو زرداری نے کہا ہے کہ ’الیکشن کمیشن آف پاکستان نے عمران خان کو کرپٹ پریکٹسز کا مجرم قرار دیا ہے۔
’اب وہ نااہل ہیں۔ اپنے سیاسی مخالفین کی مبینہ کرپشن کے بارے میں جھوٹ پھیلانے والے کو رنگے ہاتھوں پکڑا گیا۔‘
تحریک انصاف کے رہنما اور وکیل بابر اعوان نے کہا ہے کہ ’عمران خان کے خلاف غیر آئینی فیصلہ، وفاقِ پاکستان کی بنیاد پر حملہ ہے۔ کپتان نے مافیا الیون کو کُھلے میدان میں ہرایا۔
’اُس شکست کا بدلہ بند کمروں سے نہیں لیا جاسکتا۔ ملک کو تیزی سے تصادم کی طرف دھکیلا جا رہا ہے۔ قوم سختی سے فیصلہ مسترد کرتی ہے۔‘
مسلم لیگ ن کی نائب صدر مریم نواز کہتی ہیں کہ الیکشن کمیشن کے فیصلے سے ثابت ہوتا ہے کہ عمران خان اور ان کی اہلیہ بشریٰ بی بی نے ’مل کر قومی خزانے کو لوٹا۔‘
ٹوئٹر پر پیغام میں وہ کہتی ہیں کہ ’پاکستان کا پہلا سرٹیفائیڈ جھوٹا اور سند یافتہ چور جو چوری کے ناقابل تردید ثبوتوں کے ساتھ نااہل ہوا۔
’میاں بیوی نے مل کر قومی خزانے کو لوٹا۔ جتنی بڑی چوری ہے اس کی سزا صرف نااہلی پر ختم نہیں ہونی چاہیے۔ اس کو گرفتار کر کے قانون کے سامنے پیش کرنا چاہیے اور لوٹا پیسہ واپس لینا چاہیے۔‘
تحریک انصاف کے رہنما شفقت محمود کہتے ہیں کہ ’تاریخ بتاتی ہے کہ مقبول رہنماؤں کو نااہلی یا کسی اور زبردستی کے ذریعے عوامی شعور سے دور نہیں کیا جا سکتا۔
’عمران خان عوام کے درمیان رہتے ہیں اور یہ مضحکہ خیز فیصلے انھیں نہیں روک سکتے۔‘
پاکستان تحریک انصاف کے نائب چیئرمین شاہ محمود قریشی نے عمران خان کی نااہلی کے فیصلے کے بعد صحافیوں کے سوالوں کے جواب میں کہا کہ مشاورت کے بعد آئندہ کا لائحہ عمل طے کریں گے۔
جب ان سے پوچھا گیا کہ آیا تکنیکی اعتبار سے وہ اب جماعت کے چیئرمین ہیں تو انھوں نے جواب دیا کہ ’تحریک انصاف عمران خان کی پارٹی ہے اور رہے گی۔‘
توشہ خانہ ریفرنس پر رہنما تحریک انصاف فواد چوہدری کا ردعمل: ’چیف الیکشن کمشنر کو آفیشل پی ڈی ایم میں شامل کیوں نہیں کیا جا رہا۔ الیکشن کمشن کا بدترین، جانبدار اور شرمناک رویہ آج سے پہلے دیکھا ہی نہیں گیا۔
’الیکشن کمیشن کا فیصلہ ظاہر کرتا ہے جو ہمیں ان سے امید تھی۔ مسلم لیگ ن اور پیپلز پارٹی کی فارن فنڈنگ کے کیس نہیں سنے گئے۔ کیا یہ پاکستان کے 22 کروڑ عوام کو نااہل قرار دے سکتے ہیں؟ یہ عمران خان پر نہیں آئین و قانون پر حملہ ہے۔‘
وہ کہتے ہیں کہ ’ایک دن پہلے عمران خان دو تہائی اکثریت سے جیت کر واپس آئے۔ الیکشن کمیشن اور اس کے رکن آئینی عہدوں کے حق دار نہیں۔ عوام باہر نکلیں۔ اپنے حق کے لیے باہر نکلیں۔ پورا پاکستان اسے مسترد کرتا ہے۔ ان ایوانوں کو الٹا کر ہی پاکستان کے آئین کو بچایا جاسکتا ہے۔‘
مسلم لیگ نے ٹوئٹر پر پیغام میں کہا ہے کہ عمران خان اب ’سرٹیفائیڈ چور‘ ہیں۔
الیکشن کمیشن نے سابق وزیر اعظم عمران خان کو نااہل قرار دے دیا ہے۔
بینچ نے متفقہ طور پر عمران خان کو بدعنوانی کا مرتکب قرار دیا گیا ہے اور وہ اب رکن قومی اسمبلی نہیں رہے۔
شاہ محمود قریشی، شیریں مزاری سمیت دیگر پی ٹی آئی رہنما الیکشن کمیشن کے دفتر پہنچ گئے ہیں۔
سابق وزیر اعظم عمران خان کے خلاف توشہ خانہ ریفرنس میں فیصلے کی کارروائی کے لیے شاہ محمود قریشی، شیریں مزاری، ملائکہ بخاری، سینیٹر فیصل جاوید سمیت دیگر پی ٹی آئی رہنما الیکشن کمیشن پہنچ گئے ہیں۔
مقامی ذرائع ابلاغ کی خبروں کے مطابق فواد چوہدری اور اسد عمر سمیت بعض رہنماؤں کو گیٹ پر روک لیا گیا ہے۔
توشہ خانہ ریفرنس کی کارروائی کا آغاز اب سے کچھ دیر بعد ہو گا۔
رہنما تحریک انصاف اسد عمر نے کہا کہ عمران خان کے خلاف توشہ خانہ کا کوئی کیس نہیں بنتا۔
ٹوئٹر پر ان کا کہنا ہے کہ ’تمام قانونی تقاضے پورے ہوچکے ہیں۔ الیکشن کمیشن کے پاس یہ اختیار نہیں کہ اس ریفرنس پر فیصلہ کرے۔ الیکشن کمیشن پی ڈی ایم کا سیاسی حلیف بنا ہوا ہے۔‘
وزیر خزانہ اسحاق ڈار کا کہنا ہے کہ ایشین ڈیویلپمنٹ بینک کے بورڈ نے 1.5 ارب امریکی ڈالر کی بریس فیسلٹی منظور کی ہے۔ ان کا کہنا ہے کہ اس حوالے سے معاہدوں پر دستخط اور فنڈز کی منتقلی پیر سے شروع کی جائے گی۔
تحریک انصاف کے وکیل بیرسٹر علی ظفر کا کہنا ہے کہ عدالت کے علاوہ کوئی ادارہ کسی سیاستدان کو نااہل قرار نہیں دے سکتا۔
انھوں نے توشہ خانہ ریفرنس کے فیصلے سے قبل صحافیوں سے گفتگو کے دوران کہا کہ ’الیکشن کمیشن ایک آئینی ادارہ ہے مگر عدالت نہیں، عمران خان کو آرٹیکل 62 ون ایف کے تحت نااہل قرار نہیں دیا جاسکتا۔‘
سابق گورنر سندھ عمران اسماعیل کہتے ہیں کہ ’عمران خان ہماری ریڈ لائن ہے۔ اسے کراس کرنی کی کوشش نہ کی جائے۔ متعصبانہ، جانبدارانہ فیصلوں ای سی پی اپنا معیار، اعتماد کھوچکا ہے۔ کیا چیف الیکشن کمشنر شریفوں اور زرداری پر کیس بنائیں گے؟
’یا اس قانون کا اطلاق صرف ایک آدمی کے لیے ہے؟ کچھ بھی کر لو عمران خان صادق و امین تھے اور رہیں گے۔‘
ادھر رہنما تحریک انصاف فواد چوہدری نے کہا ہے کہ ’اسلام آباد اس وقت ایسے قلعے کا منظر پیش کر رہا ہے جو بڑی فوج کے محاصرے میں ہو، ابھی تو جنگ کا آغاز ہوا ہے ابھی سے گھبرا گئے؟
’لاکھوں لوگ جب گھیراؤ کریں گے تو بھاگنے کی جبکہ نہیں رہنی معاملات کو پوائنٹ آف نو ریٹرن پر نہ لے کر جاؤ۔‘