کچی آبادیوں میں وائرس پھیل گیا تو روکنا مشکل ہوجائے گا: مراد علی شاہ
صوبہ سندھ کے وزیرِ اعلیٰ مراد علی شاہ نے کہا ہے کہ اگر سندھ میں کچی آبادیوں میں کورونا وائرس پھیل گیا تو حکومت کے لیے بہت بڑی مشکل کھڑی ہوجائے گی۔
اپنے ایک ویڈیو پیغام میں انھوں نے اس بات کو خوش آئند قرار دیا کہ ابھی تک کچی آبادیوں سے کوئی کیس سامنے نہیں آئے۔
مراد علی شاہ نے کہا کہ ’سب سے زیادہ مشکل ہمیں ان علاقوں میں ہوجائے گی کیونکہ ایک ہی گھر اور کمرے میں کئی کئی افراد ساتھ رہتے ہیں اگر ان علاقوں میں کسی اور وجہ سے وائرس پھیل گیا تو ہمارے لیے کنٹرول کرنا مشکل ہوجائے گا اور ہمارا طبی نظام جواب دے جائے گا۔‘
انھوں نے کہا کہ اسی صورتحال سے بچنے کے لیے لاک ڈاؤن کیا گیا ہے۔ ’اس کا علاج یہی ہے کہ لوگوں سے نہ ملیں جلیں، اگر ہم نے 14 اپریل تک لاک ڈاؤن مکمل کر لیا تو ہم اس وبا کو روکنے میں کامیاب ہوجائیں گے۔‘
انھوں نے بتایا کہ ہر ضلعے میں ایک ریپڈ رسپانس ٹیم بنائی گئی ہے جس کا کام کورونا کے مریضوں کی نشاندہی، گھروں میں جا کر ٹیسٹ کرنا اور مثبت ٹیسٹ آنے کے نتیجے میں انھیں گھروں میں اور سرکاری مراکز میں قرنطینے میں منتقل کرنا ہے۔
انھوں نے عوام پر زور دیا کہ وہ اپنے گھروں میں رہیں اور کورونا کی علامات ظاہر ہونے کی صورت میں حکومت کے دیے گئے فون نمبرز پر رابطہ کریں، جس کے بعد سرکاری ٹیم خود گھر پر آئے گی اور جب تک ٹیم نہ آئے تب تک خود کو دوسروں سے دور رکھیں۔