کورونا: پاکستان میں 2426 متاثرین، سندھ میں پابندیاں مزید سخت

لائیو کوریج

1. 26 مار چ 2020سندھ: لاک ڈاؤن کی خلاف ورزی، 1,362 افراد گرفتار

   صوبہ سندھ میں پولیس نے گذشتہ 24 گھنٹوں کے دوران لاک ڈاؤن کی خلاف ورزی کے مرتکب 408 افراد کو گرفتار کیا ہے۔

   سندھ پولیس کے مطابق لاک ڈاؤن کی خلاف ورزی پر گذشتہ روز 108 مقدمات درج کیے گئے ہیں۔ مجموعی طور پر گذشتہ تین روز میں سندھ پولیس نے خلاف ورزی کے مرتکب 1,362 افراد کو گرفتار کیا جا چکا ہے جبکہ مقدمات کی تعداد 351 تک جا پہنچی ہے۔

   صوبائی دارالحکومت کراچی میں اب تک 712 افراد گرفتار ہوئے ہیں، لاڑکانہ میں 390، سکھر میں 116، حیدرآباد میں 98، میرپور خاص میں 37 جبکہ بینظیر آباد میں نو افراد کو گرفتار کیا گیا ہے۔

2. 25 مار چ 2020پشاور: کورونا وائرس پھیلاؤ کو روکنے کے لیے دفعہ 144 نافذ

   پاکستان کے صوبے خیبر پختونخوا میں ضلعی انتظامیہ نے دفعہ 144 نافذ کرتے ہوئے شہر میں دو ہفتوں کے لیے پابندی عائد کر دی۔

   پشاور شہر میں ہر قسم کے سماجی، مذہبی یا دیگراجتماعات پر پابندی عائد ہو گی۔

   ڈپٹی کمشنر کے ترجمان کے مطابق آئندہ دو ہفتوں کے دوران سرکاری یا ذاتی جگہوں پر ہر قسم کے مقاصد کے لیے جمع ہونے پر پابندی ہوگی۔ پابندی کا اطلاق7 اپریل تک ہو گا۔

   ترجمان کے مطابق خلاف ورزی کرنے والوں کے خلاف دفعہ 188 کے تحت کاروائی کی جائے گی۔

   پابندی کا اطلاق ہسپتالوں، کلینکس، لیبارٹری، فارماسیوٹیکل فیکٹری اور میڈیکل سٹوروں کے دوران ڈیوٹی ملازمین پر نہیں ہو گا۔ پابندی کا اطلاق قانونی نافذ کرنے والے اداروں کے افراد پر نہیں ہو گا۔

   اس کے علاوہ اپنے رہائشی علاقوں میں اشیا خورد نوش اور ادویات خریدنے والے اور دکانوں پر کام کرنے والے افراد بھی مثتشنیٰ ہوں گے۔

3. 25 مار چ 2020سندھ میں رات کو باہر نکلنے پر پابندی، ’کرفیو بھی لگا سکتے ہیں‘

   پاکستان میں محکمہ داخلہ سندھ نے اعلان کیا ہے کہ رات 8 بجے کے بعد کسی کو گھر سے نکلنے کی اجازت نہیں ہوگی۔

   محمکہ داخلہ کی جانب سے جاری بیان کے مطابق تمام گلی، محلہ، بازاروں میں رات 8 بجے کے بعد کسی بھی قسم کے کاروبار کی اجازت نہیں ہوگی، نہ ہی کسی کو بھی سڑکوں پر آنے کی اجازت ہو گی۔ سندھ حکومت نے کورونا وائرس کے پھیلاؤ کو روکنے کے لیے پورے صوبے میں 23 مارچ سے 15 روز کے لیے لاک ڈاؤن کر رکھا ہے، اس دوران تمام تجارتی مراکز، پارکس اور تفریحی مقامات بند ہیں۔

   اب سندھ حکومت نے شہریوں کی نقل و حرکت کو مزید محدود کرنے لے لیے لاک ڈاؤن مزید سخت کردیا ہے۔ محکمہ داخلہ سندھ کی جانب سے جاری کردہ نوٹیفکیشن کے مطابق بدھ سے 13 روز کے لیے صوبے میں رات 8 سےصبح 8 بجےتک کھانے پینے کی اشیا اور پرچون کی دکانیں بھی بند رہیں گی تاہم ہسپتال 24 گھنٹے کام کرتےرہیں گے جب کہ صرف ہسپتالوں کے قریب واقع میڈیکل سٹورز کو ہی کھلنے کی اجازت ہوگی۔

   محکمہ داخلہ سندھ کے مطابق تمام فیکٹریاں بھی 13 روز تک بند رہیں گی تاہم کھانے پینے کی اشیا بنانے والی فیکٹریوں کو کام کرنے کی اجازت ہوگی جب کہ ادویات بنانے والی فیکٹریاں بھی کام جاری رکھ سکیں گی۔

   محکمہ داخلہ کا کہنا ہے کہ خلاف ورزی کرنے والوں کے خلاف سخت کارروائی کی جائے گی۔

   دوسری جانب وزیر ٹرانسپورٹ سندھ اویس قادر شاہ کا کہنا ہے کہ اگر شہری گھروں میں نہ بیٹھے تو ایک ماہ تک کرفیو لگا سکتے ہیں۔

   اویس قادر شاہ نے اپنے ویڈیو بیان میں کہا کہ سندھ حکومت لوگوں کو کورونا وائرس سے بچانا چاہتی ہے لیکن کچھ لوگ لاک ڈاؤن کی خلاف ورزی کررہے ہیں۔

4. 25 مار چ 2020مذہبی علما کا مساجد کھلی رکھنے اور باجماعت نماز جاری رکھنے پر اتفاق

   پاکستان میں پانچوں مکاتب فکر کے علما اور مدارس نے متفقہ اعلامیہ جاری کرتے ہوئے کہا ہے کہ ملک بھر میں مساجد کھلی رکھی جائیں گی جن میں پانچ وقت نماز باجماعت ادا کی جائے گی۔

   اعلامیے کے مطابق مسجد میں نماز پرھنے والے لوگ وضو گھر سے کر کے آئیں گے۔ اور نماز کی سنتیں گھر میں پڑھی جائیں گی تاکہ مساجد میں نماز کے مختصر دورانیے سے بیماری کے پھیلاؤ کے اندیشے کو کم کیا جا سکے۔

   اعلامیے کے مطابق اگر طبی وجوہات کی وجہ سے نمازیوں کی تعداد پر حکومت کی جانب سے پابندی عائد کی جاتی ہے یا کسی خاص عمر کے افراد کو مسجد جانے سے منع کیا جاتا ہے تو ان افراد کو معذور سمجھا جائے گا۔

   اعلامیہ میں ایسے شہریوں سے مساجد میں نہ آنے کی اپیل کی گئی جنہیں خود میں وائرس کا شبہ ہو، یا انہیں کھانسی، نزلہ اور بخار ہو۔ جبکہ ایسے افراد کو بھی منع کیا گیا جو پچاس سال سے زائد العمر ہیں یا بیمار ہیں۔ انہیں ترکِ جماعت کا گناہ نہیں ہوگا۔

   علما کے اعلامیے کے مطابق ایسے نوجوان جو بزرگوں کی تیمارداری میں مصروف ہیں وہ بھی گھروں پر نماز پڑھیں۔

   علما کے اعلامیے کے مطابق ’جماعت گھر والوں بلکہ کسی ایک محرم خاتون کے ساتھ بھی ہو سکتی ہے تاہم اگر کسی کو مزید عذر ہو تو تنہا نماز پڑھ لے۔‘

   اعلامیے میں مساجد کی صفائی اور سینیٹائزرز کی فراہمی کی ہدایت کی گئی۔

   اعلامیے مںی کہا گیا ہے کہ جمعے کی نماز سے قبل مختصر خطبے میں صرف پانچ منٹ کے لیے کورونا وائرس سے متعلق رہنمائی کی فراہمی پر بات کی جائے۔

   علما نے نابالغ بچو کو مساجد میں لانے سے بھی منع کیا۔

5. 25 مار چ 2020خیبر پختونخوا: قرنطینہ میں لڈو اور کرکٹ

6. 25 مار چ 2020بی بی سی اردو کا خصوصی کورونا بلیٹن

7. 25 مار چ 2020بلوچستان میں نجی ہسپتال حکومت کے حوالے

   پاکستان کے صوبہ بلوچستان میں نجی ہسپتالوں کے مالکان نے کورونا وائرس سے نمٹنے کے لیے اپنے ہسپتال حکومت کے حوالے کرنے کا فیصلہ کیا ہے۔

8. 25 مار چ 2020پولیس لاک ڈاؤن پر عملدرآمد کیسے کروا رہی ہے؟

   پاکستان کے مختلف علاقوں میں کورونا وائرس کی وجہ سے ہونے والے لاک ڈاؤن پر عملدرآمد کروانے کے لیے پولیس اور انتظامیہ متحرک ہو گئی ہے۔ پولیس اس کام کے لیے کیا طریقے اختیار کر رہی ہے، دیکھیے ہماری اس ویڈیو میں۔۔۔

9. 25 مار چ 2020اسلام آباد: بھارہ کہو میں کیا ہو رہا ہے؟

   پاکستان کا دارالحکومت اسلام آباد منگل کی شب سے جزوی لاک ڈاؤن میں ہے لیکن شہر کے نواحی علاقے بارہ کہو کو بدھ سے مکمل طور پر سیل کر دیا گیا ہے۔ اس کی وجہ اور علاقے کے حالات سنیے ہماری نامہ نگار اور بھارہ کہو کی رہائشی تابندہ کوکب کی زبانی۔

10. 25 مار چ 2020بریکنگ, پاکستان میں متاثرین کی تعداد 1065 سے بڑھ گئی

    بدھ کو اسلام آباد، پنجاب، سندھ، بلوچستان اور خیبر پختونخوا میں کووڈ-19 کے نئے مریض سامنے آنے کے بعد ملک میں اس وائرس سے متاثرہ افراد کی تعداد 1067 تک پہنچ گئی ہے۔

    اسلام آباد میں اب کورونا کے مریضوں کی تعداد 20 ہو گئی ہے جبکہ بدھ کی دوپہر پنجاب کے محکمۂ صحت کی جانب سے جاری کردہ اعدادوشمار کے مطابق صوبے میں مزید 16 مریض سامنے آئے ہیں جس کے بعد وہاں متاثرین کی کل تعداد 312 ہو گئی ہے۔

    ان متاثرین میں 176 ایران سے آنے والے زائرین ہیں جبکہ اس کے علاوہ 77 متاثرین کا تعلق لاہور، 21 کا گجرات، 19 کا جہلم، آٹھ کا گوجرانوالہ، تین کا ملتان سے ہے۔

    اس کے علاوہ فیصل آباد اور راولپنڈی میں دو، دو جبکہ منڈی بہاوالدین، ناروال، رحیم یار خان اور سرگودھا میں ایک ایک مریض سامنے آیا ہے۔

    سندھ کے محکمۂ صحت کے مطابق صوبائی دارالحکومت کراچی میں تین نئے مریض سامنے آنے کے بعد وہاں متاثرین کی تعداد 147 ہو گئی ہے جن میں سے 14 صحت یاب ہو گئے ہیں جبکہ ایک ہلاکت بھی ہوئی ہے۔

    کراچی میں 94 افراد میں یہ وائرس مقامی طور پر منتقل ہوا ہے۔

    سندھ میں اب تک مجموعی طور پر 413 متاثرین سامنے آ چکے ہیں اور سب سے زیادہ متاثرین سکھر میں بنائے گئے قرنطینہ میں ہیں جہاں ایران سے آنے والے 265 زائرین میں اب تک وائرس کی تصدیق ہوئی ہے۔

    بلوچستان میں بھی چیف سیکریٹری فضیل اصغر نے مزید چار افراد میں وائرس کی تصدیق کرتے ہوئے بتایا ہے کہ صوبے میں اب متاثرین کی تعداد 119 تک پہنچ گئی ہے۔

    خیبر پختونخوا کے محکمۂ صحت کے مطابق گذشتہ 24 گھنٹے میں صوبے میں 43 نئے مریض سامنے آئے ہیں جس کے بعد یہ تعداد 121 ہو گئی ہے۔ ان نئے مریضوں میں سے 39 کا تعلق مردان کے ایک ہی علاقے منگا سے ہے۔

    اس کے علاوہ گلگت بلتستان میں 81 جبکہ پاکستان کے زیر انتظام کشمیر میں ایک متاثرہ شخص موجود ہے۔

11. 25 مار چ 2020بنوں میں سماجی دوری اختیار نہ کرنے پر گرفتاریاں

12. 25 مار چ 2020بریکنگ, کورونا کے پھیلاؤ سے بچنے کے لیے کوئٹہ کو دیگر علاقوں سے منقطع کرنے کا فیصلہ

    چیف سیکرٹری بلوچستان فضیل اصغر نے بتایا ہے کہ پورے بلوچستان میں 119 کورونا کے مریضوں کی تعداد 119 ہے اور اس تعداد میں روز بہ روز اضافہ ہو رہا ہے۔

    ایپکس کمیٹی کے اجلاس کے فیصلوں کے حوالے سے پریس کانفرنس میں ان کا کہنا تھا کہ ’اب تک بلوچستان میں رپورٹ ہونے والے کورونا کے کیسز صرف کوئٹہ میں ہیں۔ اس لیے چاہتے ہیں کہ کورونا کو کوئٹہ تک محدود کیا جائے۔‘

    چیف سیکرٹری بلوچستان کا کہنا تھا کہ ’مری آباد اور ہزارہ ٹاون کو بند کرنا چاہتے ہیں۔ ہماری ٹیمیں جاکر وہاں سروے کریں گی۔ اور پورے شہر میں 8 پوائنٹس ہر پکٹس پوائنٹ لگانے کا فیصلہ کیا ہے۔‘

    انھوں نے بتایا کہ ’2064 لوگ جہازوں کے ذریعہ کوئٹہ آئے ہیں۔ ان سے گزارش کرتا ہوں کہ یہ لوگ خود کو رجسٹر کرائیں۔‘

    ان کا مزید کہنا تھا کہ ٹیسٹنگ کٹس اور آلات منگوارہے ہیں کیونکہ صوبے میں ٹیسٹنگ کٹس، ماسک، وینٹی لیٹر سمیت دیگر آلات کی بہت ضرورت ہے۔

    چیف سیکرٹری بلوچستان کے مطابق ڈاکٹروں اور پیرامیڈیکس کی کمی کو پر کرنے کے لیے نئی بھرتیاں کی جا رہی ہیں۔ اور جو ڈاکٹرز کام سے انکار کر رہے ہیں ان کے خلاف محکمانہ کارروائی عمل میں لائی جارہی ہے۔

    اس موقعے پر حکومت بلوچستان کے ترجمان لیاقت شاہوانی نے کہا کہ کوئٹہ کو سیل کیا جارہا ہے تاکہ دوسرے علاقوں سے رابطہ نہ ہوسکے۔ انھوں نے مخیر حضرات اور اداروں سے تعاون کی اپیل کی۔

13. 25 مار چ 2020عمران خان کے اجلاس سے چلے جانے پر اپوزیشن رہنما ناراض

    پاکستان کے وزیراعظم عمران خان کی جانب سے پارلیمان میں موجود جماعتوں کے رہنماؤں کا ویڈیو لنک پر بلایا گیا اجلاس چھوڑ کر چلے جانے پر اجلاس میں شامل مسلم لیگ ن کے صدر شہباز شریف اور پیپلز پارٹی کے چیئرمین بلاول بھٹو زرداری بھی اجلاس سے واک آؤٹ کر گئے۔

    میاں شہباز شریف کا کہنا ہے کہ اتنی بڑی وبا نے پاکستان کو متاثر کیا ہے اور ملک کے سربراہ کی سنجیدگی کا عالم یہ ہے کہ وہ اپوزیشن کے ساتھ بیٹھنے کو تیار نہیں۔

    ان کا کہنا تھا کہ ایسی صورتحال میں اجلاس میں بیٹھنا مناسب نہیں اس لیے وہ واک آؤٹ کرتے ہیں۔

14. 25 مار چ 2020ارکانِ اسمبلی اور مسلم لیگ کے کارکنوں کو امدادی سرگرمیوں میں شمولیت کی ہدایت

15. 25 مار چ 2020بریکنگ, اسلام آباد میں مزید نو افراد میں کورونا کی تصدیق

    اسلام آباد کے ڈپٹی کمشنر حمزہ شفقات نے شہر میں کورونا سے متاثرہ علاقے بھارہ کہو میں مزید نو افراد میں وائرس کی تصدیق کرتے ہوئے پورے علاقے کو سیل کرنے کا اعلان کیا ہے۔

    ڈپٹی کمشنر کے مطابق ان افراد کا تعلق اسی گروپ سے ہے جس کے پانچ ارکان میں پہلے ہی وائرس کی تصدیق ہوئی ہے۔

    یہ افراد ایک تبلیغی جماعت سے تعلق رکھتے ہیں اور ان میں غیرملکی بھی شامل ہیں۔

    اس جماعت کے 14 ارکان میں کورونا کی تصدیق ہوئی ہے جبکہ دیگر دو افراد کا تعلق کوٹ ہتھیال سے ہے جہاں کی مسجد میں یہ جماعت ٹھہری تھی۔

16. 25 مار چ 2020بیرون ملک اور گلگت، سکردو جانے والے مسافروں کے لیے انسانی بنیادوں پر خصوصی پروازیں

    پاکستان ائیر لائنز نے انسان ہمدردی کی بنیادوں پر چار خصوصی پروازیں چلانے کا فیصلہ کیا ہے۔ پاکستان کے مختلف علاقوں میں پھنسے وہ مسافر جو واپس اپنے گھروں کو لوٹنا چاہ رہے ہیں ان کے کے لیے خصوصی اقدامات کیے جارہے ہیں۔

    پی آئی اے کی تین پروازیں برطانیہ اور ایک کینیڈا جائیں گی۔

    • پی کے 781 بروز جمعہ 27 مارچ کو لاہور سے ٹورنٹو کیلئے روانہ ہوگی۔
    • پی کے 709 بروز ہفتہ 28 مارچ اسلام آباد سے مانچسٹر روانہ ہوگی۔
    • پی کے 757 بروز ہفتہ 28 مارچ اسلام آباد سے لندن جائے گی۔
    • پی کے9791 بروز ہفتہ 28 مارچ اسلام آباد سے برمنگھم جائے۔

    ترجمان پی آئی اے کے مطابق مسافروں کو پہنچانے کے بعد یہ تمام پروازیں خالی واپس آئیں گی۔ ان کے مطابق ان پروازوں پر بکنگ شروع ہوگئی ہے اور پہلے آئیے کی بنیاد پر ٹکٹوں کی فروخت جاری ہے۔

    دوسرے جانب ایوی ایشن ڈویژن کے ترجمان کا کہنا ہے کہ حکومت پاکستان نے اسلام آباد کے ہوائی اڈے سے گلگت اور سکردو کے لیے پی آئی اے کو پروازیں برقرار رکھنے کی اجازت دے دی ہے۔

    سی اے اے نوٹم کے تحت تمام علاقائی پروازوں پر 26 مارچ سے پابندی عائد کر دی گئی ہے البتہ گلگت اور سکردو کو استثنیٰ حاصل ہے۔

    ترجمان پی آئی اے کے مطابق وزیر اعظم کی خصوصی اجازت کا مقصد شمالی علاقہ جات سے رابطہ فعال رکھنا ہے کیونکہ ان علاقہ جات کی بنیادی ضروریات اور ہنگامی صورتحال کا بڑا دارومدار فضائی رابطے پر ہے۔

17. 25 مار چ 2020بریکنگ, پاکستان میں کورونا کے متاثرین 1059 ہو گئے, پنجاب میں 16، بلوچستان میں چار اور سندھ میں تین نئے مریض

    بدھ کو پنجاب، سندھ، بلوچستان اور خیبر پختونخوا میں کووڈ-19 کے نئے مریض سامنے آنے کے بعد ملک میں اس وائرس سے متاثرہ افراد کی تعداد 1059 تک پہنچ گئی ہے۔

    بدھ کی دوپہر پنجاب کے محکمۂ صحت کی جانب سے جاری کردہ اعدادوشمار کے مطابق صوبے میں مزید 16 مریض سامنے آئے ہیں جس کے بعد وہاں متاثرین کی کل تعداد 312 ہو گئی ہے۔

    ان متاثرین میں 176 ایران سے آنے والے زائرین ہیں جبکہ اس کے علاوہ 77 متاثرین کا تعلق لاہور، 21 کا گجرات، 19 کا جہلم، آٹھ کا گوجرانوالہ، تین کا ملتان سے ہے۔

    اس کے علاوہ فیصل آباد اور راولپنڈی میں دو، دو جبکہ منڈی بہاوالدین، ناروال، رحیم یار خان اور سرگودھا میں ایک ایک مریض سامنے آیا ہے۔

    سندھ کے محکمۂ صحت کے مطابق صوبائی دارالحکومت کراچی میں تین نئے مریض سامنے آنے کے بعد وہاں متاثرین کی تعداد 147 ہو گئی ہے جن میں سے 14 صحت یاب ہو گئے ہیں جبکہ ایک ہلاکت بھی ہوئی ہے۔

    کراچی میں 94 افراد میں یہ وائرس مقامی طور پر منتقل ہوا ہے۔

    سندھ میں اب تک مجموعی طور پر 413 متاثرین سامنے آ چکے ہیں اور سب سے زیادہ متاثرین سکھر میں بنائے گئے قرنطینہ میں ہیں جہاں ایران سے آنے والے 265 زائرین میں اب تک وائرس کی تصدیق ہوئی ہے۔

    بلوچستان میں بھی چیف سیکریٹری فضیل اصغر نے مزید چار افراد میں وائرس کی تصدیق کرتے ہوئے بتایا ہے کہ صوبے میں اب متاثرین کی تعداد 119 تک پہنچ گئی ہے۔

    اس کے علاوہ خیبر پختونخوا میں 117، گلگت بلتستان میں 81،وفاقی دارالحکومت اسلام آباد میں 16 جبکہ پاکستان کے زیر انتظام کشمیر میں ایک متاثرہ شخص موجود ہے۔

18. 25 مار چ 2020میڈیا کے دباؤ پر لاک ڈاؤن کیا گیا: عمران خان

    وزیراعظم عمران خان کا کہنا ہے کہ لاک ڈاؤن کےمعاملے میں صوبے بااختیار ہیں لیکن اس حوالے سے پاکستان میں کنفیوژن ہے۔

    ان کا کہنا تھا کہ جب گھبراہٹ اور خوف میں فیصلے کیے جاتے ہیں تو اس کے اثرات کا جائزہ نہیں لیا جاتا جس کے باعث دوسری جانب مشکلات پیدا ہو جاتی ہیں۔

    انھوں نے کہا کہ میڈیا کی طرف سے دباؤ پڑا جس پر خیبر پختونخوا، بلوچستان اور پنجاب نے لاک ڈاؤن شروع کر دیا۔

    عمران خان نے کہا کہ لاک ڈاؤن سے تعمیراتی شعبہ متاثر ہو رہا ہے اور اس کا اثر یومیہ اجرت کے ملازمین پر پڑ رہا ہے۔ ان کا کہنا تھا کہ ملک میں 25 فیصد افراد غربت کی لکیر کے نیچے ہیں۔

19. 25 مار چ 2020پاکستان میں صرف 153 افراد کو مقامی سطح پر وائرس منتقل ہوا، عمران خان

    وزیراعظم عمران خان کے مطابق پاکستان میں صرف 153 افراد کو مقامی سطح پر وائرس منتقل ہوا جبکہ بقیہ کیسز باہر سے آئیں ہیں مقامی سطح پر کیسز کی تعداد کم ہونا خوش آئند بات ہے۔ انھوں نے بتایا کہ اب تک پاکستان ایئرپورٹس پر 9 لاکھ افراد کی سکرینننگ کرچکا ہے۔

20. 25 مار چ 2020کورونا وائرس کی جنگ صرف قوم جیت سکتی ہے، وزیر اعظم عمران خان

    پاکستان کے وزیر اعظم عمران خان نے کہا ہے کہ کورونا وائرس کی جنگ صرف قوم جیت سکتی ہیں حکومت نہیں اور ہم سب مل کر اس جنگ کو جیتیں گے جس کا سہرا تمام پاکستانیوں اور تمام صوبوں کے سر ہو گا۔

    پارلیمانی رہنماؤں سے ویڈیو لنک کے ذریعے خطاب کرتے ہوئے انھوں نے کہا کہ 15 جنوری کو کورونا وائرس کے متعلق پہلا اجلاس طلب کیا گیا تھا جس وقت یہ وبا صرف چین تک محدود تھی۔