تیراہ سے نقل مکانی کا معاملہ: سہیل آفریدی کا گرینڈ جرگہ بلانے کا اعلان ’بند کمروں میں کیے فیصلوں کے نتائج عوام کو بھگتنا پڑ رہے ہیں‘

لائیو کوریج

1. 26 جنوری 2026گل پلازا میں ریسکیو کا عمل مکمل، کل 73 لاشیں نکالی گئیں: ڈپٹی کمشنر ساؤتھ

   پاکستان کے سب سے بڑے شہر کراچی کے شاپنگ سینٹر گُل پلازہ میں آتشزدگی کے تقریباً نو روز بعد ریسکیو کا عمل بند کر دیا گیا ہے۔

   ڈپٹی کمشنر ساؤتھ جاوید نبی کھوسو نے بی بی سی کو بتایا کہ گل پلازا میں جاری ریسکیو آپریشن ختم کردیا گیا ہے جس کے بعد عمارت سندھ بلڈنگ کنٹرول اٹھارتی کے حوالے کر دی گئی ہے اور مزید کارروائی وہ کریں گے۔

   جاوید نبی کھوسو نے بتایا کہ آخری وقت تک عمارت سے 73 لاشیں برآمد ہوئی تھیں۔

   یاد رہے کہ وزیر اعلی سندھ مراد علی شاہ کہہ چکے ہیں کہ اس عمارت کو مسمار کرکے جتنی دکانیں موجود تھیں اتنی ہی تعمیر کی جائیں گی اور اس عمل کی نگرانی حکومت سندھ خود کرے گی۔

   اس کے علاوہ انھوں نے ہر دکاندار کو پانچ پانچ لاکھ روپے امداد اور ایک کروڑ روپے تک بلا سود قرضہ فراہم کرنے کا بھی اعلان کیا تھا۔

2. 26 جنوری 2026پی ڈی ایم اے کی 27 جنوری تک مری، گلیات اور گردونواح میں شدید بارش اور برفباری کی پیشگوئی

   پاکستان کے صوبہ پنجاب میں قدرتی آفات سے نمٹنے کے ادارے پی ڈی ایم اے کا کہنا ہے کہ 27 جنوری تک مری، گلیات اور گردونواح کے علاقوں میں برفباری کے امکانات ہیں۔

   پی ڈی ایم اے کی جانب سے جاری بیان میں کہا گیا ہے کہ آئندہ دو روز کے دوران پنجاب کے بیشتر اضلاع میں بارشوں کی بھی پیشگوئی ہے۔

   ڈی جی پی ڈی ایم اے عرفان علی کاٹھیا نے سیاحوں کو مشورہ دیا ہے سفر سے پہلے موسم کی صورتحال کا جائزہ لیں۔

   دوسری جانب ریلیف کمشنر پنجاب نبیل جاوید نے متعلقہ اداروں کو ہدایات جاری کرتے ہوئے کہا ہے کہ کسی بھی ناگہانی آفت سے بچنے کے لیے انتظامیہ 24 گھنٹے الرٹ رہے۔

   ریلیف کمشنر کا کہنا ہے کہ بارش اور برفباری کے باعث سڑکوں پر ٹریفک کی روانی متاثر ہو سکتی ہے۔ ٹریفک کی روانی بحال رکھنے کے متعلقہ حکام کو پیشگی انتظامات مکمل کرنے کی ہدایت کی ہے۔

   پی ڈی ایم اے کے ترجمان کا کہنا ہے کہ شہری کسی بھی ہنگامی حالت کی صورت میں پی ڈی ایم اے کی ہیلپ لائن 1129 پر رابطہ کریں۔

3. 26 جنوری 2026بلوچستان میں دو روز کے وقفے کے بعد بارش اور برفباری کا سلسلہ شروع، اہم شاہراہوں سے برف ہٹانے کا کام جاری

   پاکستان کے صوبہ بلوچستان کے دارالحکومت کوئٹہ سمیت وسطی اور شمالی بلوچستان میں دو روز کے وقفے کے بعد ایک مرتبہ پھر بارش اور برفباری کا سلسلہ شروع ہو گیا ہے۔

   کوئٹہ شہر اور اس کے نواحی علاقوں میں ہلکی بارش اور برفباری کا سلسلہ گذشتہ شب شروع ہوا۔

   صوبائی دارالحکومت کے ساتھ ساتھ قلات، مستونگ، خانوزئی، کان مہترزئی، مسلم باغ اور بلوچستان کے دیگر علاقوں میں بھی ہلکی بارش اور برفباری کا سلسلہ جاری ہے۔

   دوسری جانب نیشنل ہائی ویز اتھارٹی اور پی ڈی ایم اے کا کہنا ہے کہ حکام کوئٹہ چمن شاہراہ، لکپاس کے علاقے میں کوئٹہ کراچی شاہراہ، کوئٹہ ڈیرہ اسماعیل خان شاہراہ سے برف ہٹانے اور ٹریفک کو رواں دواں رکھنے کے لیے کوششیں جاری رکھے ہوئے ہیں۔ این ایچ اے کے مطابق، ان شاہراہوں پر ٹریفک رواں دواں ہے۔

   اس کے علاوہ افغانستان سے متصل توبہ اچکزئی میں اغبرگ دوبندی سمیت بعض علاقوں سے شاہراہوں کی بندش کی اطلاعات موصول ہوئی ہیں۔ تاہم قلعہ عبداللہ اور چمن انتظامیہ کا کہنا ہے شاہراہوں کو کھولنے کے لیے اقدامات جاری ہیں ۔

   گذشتہ روز زیارت اور کچھی کی انتظامیہ نے شدید سردی اور موسمی حالات کے باعث تفریحی مقامات پر جانے پر پابندی عائد کردی گئی تھی۔ دونوں اضلاع کے ڈپٹی کمشنرز دفعہ 144 کے تحت یہ پابندیاں نافذ کی ہیں۔

4. 26 جنوری 2026آئی سی سی ٹی20 ورلڈ کپ میں پاکستان کی شرکت کے حوالے سے فیصلہ آج متوقع

   پاکستان کرکٹ بورڈ کی جانب سے آئندہ ماہ انڈیا اور سری لنکا میں شیڈول ٹی20 ورلڈ کپ کے لیے پاکستان کے 15 رُکنی سکواڈ کا اعلان تو گذشتہ روز کر دیا گیا تھا لیکن پاکستان کی ایونٹ میں شرکت کے حوالے سے حتمی فیصلہ اب تک نہیں کیا گیا ہے۔

   وزارتِ داخلہ کی جانب سے جاری ایک بیان کے مطابق، وزیر داخلہ اور چیئرمین پی سی بی محسن نقوی کی آج وزیراعظم شہباز شریف سے ملاقات کا امکان ہے۔

   وزارتِ داخلہ کا کہنا ہے کہ اس ملاقات میں پاکستان کرکٹ ٹیم کی ورلڈ کپ میں شرکت کا فیصلہ لیا جائے گا۔

   بیان میں کہا گیا ہے کہ چیئرمین پی سی بی بنگلہ دیش کرکٹ ٹیم کو ورلڈ کپ سے باہر کرنے پر وزیراعظم کو تمام تر صورت حال سے آگاہ کریں گے اور اپنی سفارشات سے بھی وزیراعظم کو آگاہ کریں گے۔

   وزارتِ داخلہ کا کہنا ہے کہ اروار کی شب وفاقی وزیر داخلہ محسن نقوی کی پاکستانی کھلاڑیوں سے ملاقات ہوئی تھی۔

   یاد رہے کہ بنگلہ دیش کرکٹ بورڈ کی جانب سے انڈیا میں ٹی ٹوئنٹی ورلڈ کپ کے میچز کھیلنے سے انکار کے بعد سنیچر کے روز انٹرنیشنل کرکٹ کونسل (آئی سی سی) نے بنگلہ دیش کی جگہ سکاٹ لینڈ کو ایونٹ میں شامل کرنے کا اعلان کیا تھا۔

   آئی سی سی کے اعلان سے قبل پاکستان کرکٹ بورڈ کے چیئرمین محسن نقوی نے کہا تھا کہ پاکستان اس معاملے میں بنگلہ دیش کے ساتھ کھڑا ہے اور پاکستان ٹیم آئی سی سی ٹی ٹوئنٹی ورلڈ کپ میں شرکت کے لیے انڈیا بھیجنے کا فیصلہ حکومت کرے گی۔

   محسن نقوی کا کہنا ہے کہ ان کے خیال میں بنگلہ دیش کے ساتھ زیادتی ہوئی ہے۔ ’میں نے آئی سی سی کی بورڈ کی میٹنگ میں بھی یہی کہا تھا کہ آپ دہرا معیار نہیں اپنا سکتے کہ ایک ملک کے لیے کہیں کہ جب مرضی فیصلہ کر لے اور دوسرے ملک کے لیے بالکل الگ فیصلہ کریں۔‘

5. 26 جنوری 2026امریکہ میں طوفانی سردی کے باعث کم از کم تین افراد ہلاک، نو لاکھ گھروں کو بجلی کی فراہمی معطل

   موسم سرما کے ایک خطرناک طوفان نے پورے امریکہ کو اپنی لپیٹ میں لے لیا ہے جس سے کم از کم تین افراد ہلاک جبکہ لاکھوں گھروں کو بجلی کی فراہمی منقطع ہو گئی ہے۔

   امریکہ کی نیشنل ویدر سروس کے مطابق، ٹیکساس سے نیو انگلینڈ تک پھیلے ’جان لیوا‘ حالات کے باعث ملک بھر میں سکول اور سڑکیں بند کر دی گئی ہیں جبکہ پروازیں بھی منسوخ کر دی گئی ہیں۔

   لوزیانا میں کم از کم دو افراد ہائپوتھرمیا کی وجہ سے ہلاک ہوئے ہیں۔ حکام کے مطابق ان کی موت طوفان کے باعث ہوئی ہے جبکہ ٹیکساس سے بھی ایک ہلاکت کی اطلاع ملی ہے۔

   اس کے علاوہ نیو یارک شہر کے میئر زہران ممدانی نے ایکس پر ایک پیغام میں لکھا ہے کہ سنیچر کے روز شہر میں کم از کم پانچ افراد کی موت ہوئی ہے تاہم ابھی ان کی موت کی وجہ کا تعین ہونا باقی ہے۔

   ان کا کہنا تھا کہ یہ ہمارے لیے ایک یاد دہانی ہے کہ ہر سال نیو یارک میں سردی کے باعث لوگوں کی اموات ہوتی ہیں۔

   امریکہ میں بجلی کے بریک ڈاؤن پر نظر رکھنے والی ویب سائٹ پاور آؤٹیج کے مطابق، تقریباً نو لاکھ گھروں کو بجلی کی فراہمی منقطع ہے۔ اس دوران، 10,000 سے زیادہ پروازیں بھی منسوخ ہو چکی ہیں۔

6. 26 جنوری 2026شیخ حسینہ کو انڈیا میں تقریر کی اجازت دینے پر بنگلہ دیش کی تشویش: ’اس سے دونوں ملکوں کے مستقبل کے تعلقات خطرے میں پڑ سکتے ہیں‘

   انڈیا کے دارالحکومت نئی دہلی میں ایک تقریب کے دوران بنگلہ دیش کی معزول وزیرِ اعظم شیخ حسینہ کی تقریر نشر کیے جانے پر بنگلہ دیش نے مایوسی اورحیرت کا اظہار کرتے ہوئے کہا ہے کہ ایسی اشتعال انگیر تقاریر بنگلہ دیش کی جمہوریت اور سلامتی کے لیے خظرہ بن سکتی ہیں۔

   بنگلہ دیش کی وزارتِ خارجہ کی جانب سے جاری ایک بیان میں کہا گیا ہے کہ ایسے بیانات سے انڈیا اور بنگلہ دیش کے مستقبل کے تعلقات خطرے میں پڑ سکتے ہیں۔

   سنیچر کے روز نئی دہلی میں 'بنگلہ دیش میں جمہوریت بچاؤ' کے عنوان سے منعقدہ ایک تقریب میں بنگلہ دیش کی معزول وزیر اعظم کی ایک ریکارڈ شدہ آڈیو تقریر چلائی گئی تھی۔

   خیال رہے کہ بنگلہ دیش کی سابق وزیرِ اعظم شیخ حسینہ 2024 میں اپنی حکومت گرائے جانے کے بعد سے انڈیا میں مقیم ہے اور بنگلہ دیش کی عبوری حکومت نئی دہلی سے متعدد مرتبہ ان کی حوالگی کا مطالبہ کر چکی ہے۔

7. 26 جنوری 2026وفاقی حکومت کا تیراہ سے لوگوں کی رضاکارانہ نقل مکانی کا بیانیہ گمراہ کن ہے: وزیرِ اعلیٰ خیبر پختونخوا

   پاکستان کی وفاقی حکومت کی جانب سے اتوار کے روز تیراہ سے لوگوں کی نقل مکانی کے متعلق بیان پر خیبر پختونخوا حکومت کا سخت ردِ عمل سامنے آیا ہے اور خیبر پختونخوا کے وزیرِ اعلیٰ نے اسے سراسر غلط اور گمراہ کن بیانیہ قرار دیا ہے۔

   اتوار کے روز وفاقی وزارتِ اطلاعات کے ایکس اکاؤنٹ سے جاری کردہ ایک بیان میں کہا گیا تھا کہ حکومت یا فوج کی جانب سے خیبر پختونخوا کے علاقے وادی تیراہ کو خالی کروانے کا کوئی حکم جاری نہیں کیا گیا۔

   وزارتِ اطلاعات کا کہنا تھا کہ حکومت نے ان گمراہ کن خبروں کا نوٹس لے لیا ہے جس میں دعوی کیا گیا ہے کہ وادی تیراہ کو فوج کے احکامات پر خالی کروایا جا رہا ہے۔

   وزارتِ اطلاعات نے ان دعوؤں کو ’بے بنیاد‘ اور ’بدنیتی پر مبنی‘ قرار دیتے ہوئے کہا کہ ان خبروں کا ’مقصد عوام میں خوف و ہراس پھیلانا، سکیورٹی اداروں کے خلاف غلط معلومات دینا اور ذاتی و سیاسی مفادات کا حصول ہے۔‘

   وفاقی حکومت کی جانب سے تیراہ متاثرین کے متعلق جاری نوٹیفکیشن پر شدید ردِ عمل دیتے ہوئے خیبر پختونخوا کے وزیر اعلی سہیل آفریدی نے کہا ہے کہ وفاقی حکومت کا یہ دعویٰ کہ تیراہ متاثرین اپنی مرضی سے نقل مکانی کر رہے ہیں، سراسر غلط اور گمراہ کن بیانیہ ہے۔

   وزیرِ اعلیٰ کے دفتر سے جاری ایک بیان کے مطابق، مینگورہ میں ایک ریلی سے خطاب کرتے ہوئے سہیل آفریدی نے وفاقی حکومت سے نوٹیفکیشن واپس لینے اور اس پر معافی کا مطالبہ کیا۔ ان کا کہنا تھا کہ اگر ایسا نہیں کیا گیا تو وہ جرگہ بلائیں گے۔ ’اگر بات غلط ثابت ہوئی تو نقل مکانی کرنے والے متاثرین کو خود تیراہ واپس لے کر جاؤں گا۔‘

   ان کا کہنا تھا کہ کہ وفاقی حکومت کے نوٹیفکیشن کا مقصد صوبائی حکومت اور اداروں کے درمیان تصادم پیدا کرنا ہے۔

   وزیرِ اعلیٰ نے کہا کہ آج کے بعد وفاق کے ساتھ جو بھی بات ہو گی وہ تحریری اور ثبوت کے ساتھ ہو گی۔

   دریں اثنا جیو نیوز کے پروگرام نیا پاکستان میں بات کرتے ہوئے، وزیرِ اعلیٰ کے مشیر شفیع جان نے دعویٰ کیا کہ 24 رکنی جرگہ، جس نے آپریشن سے قبل تیراہ سے نقل مکانی پر اتفاق کیا تھا، اسے دستخط کرنے پر ’مجبور‘ کیا گیا تھا۔

   یاد رہے کہ رواں ماہ کی آٹھ تاریخ کو سرکاری خبر رساں ادارے ایسوسی ایٹڈ پریس نے خبر دی تھی کہ تیراہ کے 24 رکنی جرگے سے ہونے والے مذاکرات کی کامیابی کے بعد فوجی آپریشن کے پیشِ نظر 10 جنوری سے تیراہ سے مقامی آبادی کا انخلا شروع ہو گا جو 25 جنوری تک جاری رہے گا۔

   وفاقی حکومت کے اس دعوے پر کہ حکومت یا فوج نے تیراہ سے انخلا کا کوئی کوئی حکم جاری نہیں کیا شفیع جان کا کہنا تھا کہ تیراہ میں معمول کی انٹیلی جنس پر مبنی کارروائیوں کے بجائے بڑے پیمانے پر فوجی آپریشن ’مسلط‘ کیا جا رہا ہے۔

   وزارتِ اطلاعات کی جانب سے خیبر کے ڈپٹی کمشنر کے دستخطوں کے بارے میں ایک سوال کے جواب میں ان کا کہنا تھا کہ ڈی سی نے صرف لوگوں کو سہولت فراہم کرنے کے لیے معاہدے پر دستخط کیے، کیونکہ حکومت ’جانتی تھی کہ لوگوں کو نکالا جائے گا‘۔

   ان کا مزید کہنا تھا کہ صوبائی کابینہ نے تیراہ کے لوگوں کے لیے چار ارب روپے کی منظوری اس لیے دی ’کیونکہ ہمیں معلوم تھا کہ وہ بے گھر ہونے والے ہیں‘۔

   وفاقی وزارتِ اطلاعات کی جانب سے اتوار کے روز جاری بیان میں دعویٰ کیا گیا تھا کہ خیبر پختونخوا کی حکومت کے ریلیف، بحالی اور آبادکاری کے محکمے نے 26 دسمبر 2025 کو ایک نوٹیفکیشن جاری کیا جس کے تحت اطلاعات کے مطابق چار ارب روپے جاری کیے گئے۔

   وزارتِ اطلاعات کا کہنا تھا کہ یہ رقم تیراہ (باغ) کے بعض علاقوں سے ممکنہ، عارضی اور رضا کارانہ طور پر آبادی کی نقل و حرکت کے پیش نظر جاری کی گئی تاکہ پیشگی تیاری اور امدادی اقدامات کیے جا سکیں۔

   بیان میں کہا گیا کہ نوٹیفکیشن میں یہ بھی واضح کیا گیا ہے کہ ’ڈپٹی کمشنر خیبر کے مطابق یہ مجوزہ رضا کارانہ نقل مکانی مقامی آبادی کی رائے اور خواہشات کی عکاسی کرتی ہے، جو ضلعی سطح پر منعقد ہونے والے نمائندہ جرگے کے ذریعے سامنے آئی۔‘

8. 26 جنوری 2026بلوچستان کے ضلع پنجگور میں ایک کارروائی میں تین شدت پسند ہلاک: پاکستانی فوج

   پاکستانی فوج کا کہنا ہے کہ بلوچستان کے ضلع پنجگور میں کیے گئے ایک آپریشن کے دوران اس کے اہلکاروں نے تین شدت پسندوں کو ہلاک کیا ہے۔

   اتوار کو پاکستانی فوج کے شعبہ تعلقات عامہ کا ایک بیان میں کہنا تھا کہ یہ کارروائی علاقے میں شدت پسندوں کی موجودگی کی اطلاعات موصول ہونے کے بعد کی گئی تھی۔

   پاکستانی فوج کے مطابق فائرنگ کے شدید تبادلے میں شدت پسند کمانڈر فاروق عرف سورو، عدیل اور وسیم نامی مسلح افراد ہلاک ہوئے۔

   بیان میں مزید کہا گیا ہے کہ ہلاک ہونے والے شدت پسند دہشتگردی کی متعدد کارروائیوں میں ملوث تھے اور ان کے قبضے سے اسلحہ اور بارودی مواد بھی برآمد کیا گیا ہے۔

9. 26 جنوری 2026گذشتہ روز کی اہم خبریں

   • پاکستان کی وفاقی حکومت کا کہنا ہے کہ حکومت یا فوج کی جانب سے خیبر پختونخوا کے علاقے وادی تیراہ کو خالی کروانے کا کوئی حکم جاری نہیں کیا گیا۔
   • انڈیا کی ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) نے 26 جنوری کو یوم جمہوریہ کی پریڈ میں طویل فاصلے تک مار کرنے والے اینٹی شپ ہائپر سونک میزائل کی نمائش کا اعلان کیا ہے۔
   • قدرتی آفات سے نمٹنے کے ادارے پی ڈی ایم اے نے صوبہ خیبر پختونخوا میں 25 سے 27 جنوری کے دوران مزید بارشوں اور پہاڑی علاقوں میں برفباری کی پیشگوئی کے پیشِ نظر مقامی انتظامیہ سے تمام حفاظتی اقدامات یقینی بنائے کی ہدایت کی ہے اور سیاحوں کو اس دوران بالائی علاقوں کا رخ نہ کرنے کا مشورہ دیا ہے۔
   • پاکستان کی وزارتِ نجکاری کا کہنا ہے کہ ملک کے تین بڑے ہوائی اڈوں کے آپریشنز کی آؤٹ سورسنگ کے لیے عام بولی کروانے کا فیصلہ کیا گیا ہے۔
   • چین کی وزارت دفاع کا کہنا ہے کہ اس نے ملک کے اعلیٰ ترین جنرل کے خلاف ’ڈسپلن اور قانون کی سنگین خلاف ورزیوں‘ کے معاملے پر تحقیقات کا آغاز کر دیا ہے۔

10. 26 جنوری 2026بی بی سی کے لائیو پیج میں خوش آمدید!

    بی بی سی کے لائیو پیج میں خوش آمدید۔ پاکستان سمیت دنیا بھر کی اہم خبروں اور تجزیوں کے متعلق جاننے کے لیے بی بی سی کی لائیو پیج کوریج جاری ہے۔

    گذشتہ روز تک کی خبریں جاننے کے لیے یہاں کلک کریں۔