گذشتہ روز کی اہم خبریں
سابق وزیر اعظم اور تحریک انصاف کے بانی عمران خان نے سنیچر کے روز لاہور کے جلسے کو تحریک انصاف کے لیے ’ ڈو اینڈ ڈائی‘ قرار دیا ہے اور کہا ہے کہ آئین ہمیں جلسے کا حق دیتا ہے۔ اگر جلسے سے روکا گیا تو جیلیں بھر دیں گے۔
پاکستان کے صوبہ سندھ میں توہین مذہب کے مقدمے میں نامزد ملزم ڈاکٹر شاہنواز کنبھار فائرنگ میں ہلاک ہو گئے ہیں۔میرپورخاص پولیس کا دعویٰ ہے کہ ملزم سے فائرنگ کا تبادلہ ہوا تاہم ملزم اپنے ساتھی کی فائرنگ میں ہلاک ہو گئے۔
سپیکر قومی اسمبلی ایاز صادق نے چیف الیکشن کمشنر کو الیکشنز ایکٹ میں کی جانے والی ترمیم سے متعلق واضح کیا ہے کہ الیکشن ایکٹ میں ترمیم کے بعد مخصوص نشستیں تبدیل نہیں کی جاسکتیں۔ ان کے مطابق الیکشن ایکٹ میں ترمیم کے بعد سپریم کورٹ کے فیصلے پر عملدر آمد نہیں ہوسکتا۔
چیئرمین پاکستان پیپلز پارٹی اور حکومتی اتحادی بلاول بھٹو کا کہنا ہے کہ ججوں کی عمر کے معاملے میں چھیڑچھاڑ سے لگے گا کہ ہم کسی خاص فرد کو عہدے سے باہر یا اندر رکھنا چاہتے ہیں جو نا مناسب ہوگا۔ بلاول کا کہنا تھا کہ ان کی جماعت نے مجوزہ آئینی ترمیم میں ججوں کی عمر کے معاملے پر کوئی بات نہیں کی۔ ان کا مزید حکومت نے چیف جسٹس کی زیادہ سے زیادہ عمر 67 سال کرنے کی تجویز دی تھی جبکہ جمعیت علمائے اسلام ججوں کی موجودہ عمر کی حد 65 سال برقرار رکھنے کے حق میں تھی۔