بائیڈن نے یوکرین کو روس کے خلاف امریکی ساختہ لانگ رینج میزائلوں کے استعمال کی اجازت دے دی

لائیو کوریج

1. 15 نومبر 2024’آئینی بینچ ازخود نوٹس لے سکتا ہے‘ انسدادِ دہشت گردی کیس کی سماعت کے دوران جسٹس محمد علی مظہر کے ریمارکس

   انسداد دہشت گردی کے ایک کیس کی سماعت کے دوران سپریم کورٹ کے چھ رکنی آئینی بینچ میں شامل جسٹس محمد علی مظہر نے ریمارکس دیتے ہوئے کہا ہے کہ یہ بات ذہن نشین کر لیں کہ آئینی بینچ ازخود نوٹس لے سکتا ہے۔

   آج سپریم کورٹ میں آئینی بینچ کے سامنے انسداد دہشت گردی کے ایک کیس پر ازخود نوٹس کیس کی سماعت ہوئی۔

   وکیل درخواست گزار منیر پراچہ نے کہا کہ اس کیس میں مزید کارروائی کی ضرورت نہیں ہے کیونکہ 26ویں آئینی ترمیم کے بعد اب سپریم کورٹ ازخود نوٹس لے ہی نہیں سکتی۔

   جس پر جسٹس محمد علی مظہر نے ریمارکس دیے کہ ترمیم کے بعد صرف پروسیجر تبدیل ہوا ہے لیکن سپریم کورٹ اب بھی ازخود نوٹس لے سکتی ہے، فرق صرف یہ ہے کہ اب ازخود نوٹس آئینی بینچ میں چلے گا اور یہ بات ذہن نشین کر لیں آئینی بینچ ازخود نوٹس لے سکتا ہے۔

   جسٹس جمال خان مندوخیل نے ریمارکس دیے کہ ہم اس ایشو کو کسی اور کیس میں سنیں گے جب کوئی کیس آئے گا۔

   عدالت نے وکیل کے دلائل کے بعد کیس نمٹا دیا۔

2. 15 نومبر 2024سموگ کی وجہ سے لاہور اور ملتان میں ہیلتھ ایمرجنسی نافذ، پنجاب میں تعلیمی ادارے مزید ایک ہفتے کے لیے بند

   پاکستان کے صوبہ پنجاب کی حکومت نے سموگ کی وجہ سے لاہور اور ملتان میں ہیلتھ ایمرجنسی کے نفاذ کا اعلان کیا ہے۔

   اس بات کا اعلان پنجاب کی سینیئر وزیر مریم اورنگزیب نے جمعے کو لاہور میں ایک پریس کانفرنس میں کیا۔

   مریم اورنگزیب کا کہنا تھا کہ سموگ اب صحت کے بحران کی شکل اختیار کر چکا ہے اور اس کی وجہ سے پنجاب میں سانس کی بیماریوں سے متاثرہ افراد کی تعداد میں بڑا اضافہ دیکھنے میں آیا ہے اور گذشتہ ڈیڑھ ماہ میں ایسے مریضوں کی تعداد ڈیڑھ لاکھ تک پہنچ گئی ہے۔

   سینیئر وزیر نے بتایا کہ صرف گذشتہ ایک ہفتے میں 25 ہزار نئے مریض سامنے آئے جن میں سے سات ہزار سے زیادہ لاہور میں تھے۔

   مریم اورنگزیب کا کہنا تھا کہ لوگوں کو سمجھنا ہو گا کہ ’سموگ موت ہے۔‘ مریم اورنگزیب نے سموگ کی صورتحال میں بہتری نہ آنے کی وجہ سے درج ذیل اقدامات کا اعلان کیا ہے:

   • ہسپتالوں میں سٹاف کی چھٹیاں منسوخ اور محکموں کو ادویات وافر کرنے کی ہدایت کی گئی ہے۔
   • سکولوں کی بندش اور آن لائن تعلیم کا سلسلہ مزید ایک ہفتے کے لیے بڑھا دیا گیا ہے اور اب صوبے بھر میں تمام نجی اور سرکاری تعلیمی ادارے جن میں کالج اور یونیورسٹیاں بھی شامل ہیں آئندہ جمعے تک آن لائن تعلیم ہی دیں گے۔ خیال رہے کہ اس سے قبل رواں ہفتے کے لیے آن لائن تعلیم کی شرط پنجاب کے نو ڈویژنز میں 12ویں جماعت تک کے لیے تھی۔
   • لاہور اور ملتان میں جمعہ، ہفتہ اور اتوار کو لاک ڈاؤن لگایا جائے گا اور دونوں شہروں میں ایک ہفتے کے لیے تعمیراتی سرگرمیوں پر پابندی ہو گی۔
   • ریستورانوں کو شام چار بجے تک کا وقت دیا گیا ہے اس کے بعد رات آٹھ بجے تک ٹیک اوے کی اجازت ہو گی۔
   • شہریوں سے کہا گیا ہے کہ باہر نکلتے ہوئے ماسک استعمال کریں اور موٹرسائیکل پر انتہائی ضرورت کے بغیر باہر نہ نکلیں۔

3. 15 نومبر 2024بجٹ کا 60 فیصد قرضوں پر سود کی ادائیگی میں خرچ، آئی ایم ایف کی پاکستان کو بجٹ پر سخت کنٹرول کی تجویز, تنویر ملک، صحافی

   بین الاقوامی مالیاتی فنڈ (آئی ایم ایف) کا کہنا ہے کہ پاکستان کو آئندہ سالوں میں بجٹ پر سخت کنٹرول کی ضرورت ہے کیونکہ ملک میں ٹیکسوں سے جمع ہونے والے ریونیو کا 60 فیصد قرضوں پر سود کی ادائیگی میں خرچ ہو رہا ہے۔

   پاکستان کے لیے آئی ایم ایف کی جاری کردہ ٹیکنیکل اسسٹنس رپورٹ میں بتایا گیا ہے کہ پاکستان کو پبلک فسکل مینجمنٹ پر فوکس کرنے کی ضرورت ہے اس کے ساتھ ملکی ریونیو کو بڑھانے کے لیے کام کرنا ہو گا۔

   ’خدایا آئی ایم ایف کو ہیضہ ہو جائے‘

   پاکستان کے نئے بجٹ پر آئی ایم ایف شرائط کس طرح اثر انداز ہوں گی اور عام فرد اس سے کیسے متاثر ہو گا؟

   بین الاقوامی ادارے کی جانب سے کہا گیا ہے کہ پاکستان کی قرضوں پر ادائیگی مالی سال 2017 سے لے کر اب تک دوگنا ہو چکی ہے جس کی وجہ سے پاکستانی حکام کو مالی سال 2023 کے پرائمری خسارے کو مالی سال 2024 میں سرپلس میں لانے کے لیے سخت محنت کرنا پڑی۔

   ادارے کی جانب سے کہا گیا ہے کہ حالیہ برسوں میں ترقیاتی شعبے کے بجٹ میں کٹوتی کے باوجود حکومت کو اخراجات پر کنٹرول میں ناکامی کا سامنا کرنا پڑا۔

4. 15 نومبر 2024انڈیا کے چیمپیئنز ٹرافی کے لیے پاکستان آنے سے انکار کا معاملہ: پاکستان اور انڈیا کو آپس میں بات کرنی چاہیے، امریکہ

   پاکستان میں ہونے والی چیمپیئنز ٹرافی کے دوران انڈین حکومت کے اپنی ٹیم پاکستان بھیجنے سے انکار پر امریکہ کا کہنا تھا کہ دونوں ممالک کو آپس میں بات کرنی چاہیے۔

   انڈیا کی جانب سے سیاسی اختلافات کو کھیل کی راہ میں رکاوٹ بنائے جانے کے سوال پر سٹیٹ ڈپارٹمنٹ کے ترجمان کا کہنا تھا کہ ’یقینی طور پر ہم ان کے درمیان نہیں آئیں گے لیکن کھیل یقینی طور پر جوڑنے کی طاقت رکھتا ہے۔‘

   انھوں نے بتایا کے امریکہ سمجھتا ہے کے لوگوں کو جوڑنے کے لیے سپورٹس ڈپلومیسی کافی اہم کردار ادا کرتی ہے۔ ’کھیل بہت سے لوگوں کو جوڑتے ہیں اور یہ ان انسانوں سے انسانوں اور لوگوں سے لوگوں کے تعلقات کے لیے ایک بہترین طریقہ ہے جسے اس انتظامیہ نے واقعی ترجیح دی ہے۔‘

   یاد رے کہ انٹرنیشنل کرکٹ کونسل (آئی سی سی) نے نو نومبر کی شام پاکستان کو تحریری طور پر آگاہ کیا تھا کہ انڈیا نے پاکستان آ کر چیمیئنز ٹرافی کھیلنے سے انکار کر دیا ہے۔

   پاکستان کرکٹ بورڈ (پی سی بی) کے ترجمان نے بی بی سی کو بتایا کہ آئی سی سی نے اتوار کو بذریعہ ای میل پی سی بی کو مطلع کیا اور انڈین کرکٹ بورڈ (بی سی سی آئی) نے تحریری طور پر آئی سی سی کو آگاہ کیا کہ چیمپیئنز ٹرافی کے لیے ان کی ٹیم پاکستان نہیں آ سکے گی۔

   انڈیا نے آخری مرتبہ پاکستان میں کھیلے جانے والے سنہ 2008 کے ایشیا کپ میں شرکت کی تھی۔ انڈیا نے پاکستان میں سنہ 2006 میں آخری مرتبہ سیریز کھیلی تھی جس کے بعد سے پاکستان نے سنہ 2008 اور 2013 میں انڈیا کے دورے تو کیے لیکن انڈیا نے پاکستان میں کھیلنے سے انکار ہی کیا۔

   اس حوالے سے اب پاکستان کی حکومت کیا فیصلہ کرتی ہے اس بارے میں آئندہ چند روز کے دوران صورتحال واضح ہو جائے گی کہ آیا پاکستان ٹورنامنٹ گذشتہ برس کے ایشیا کپ کے طرح ’ہائبرڈ ماڈل‘ پر کھیلے گا یا کسی دوسرے آپشن پر غور کر سکتا ہے۔

   پی سی بی نے چیمپیئنز ٹرافی کی میزبانی کے لیے نیشنل سٹیڈیم کراچی اور قذافی سٹیڈیم لاہور کی تعمیر نو کے لیے لاکھوں ڈالر خرچ کیے ہیں۔ اس حوالے سے اگلے دو ماہ کے اندر کام مکمل ہونے کی امید کی جا رہی ہے۔

   چیمپیئنز ٹرافی میں پاکستان اور انڈیا کے علاوہ، بنگلہ دیش، انگلینڈ، آسٹریلیا، جنوبی افریقہ، نیوزی لینڈ اور افغانستان شرکت کریں گے۔

   ون ڈے رینکنگز میں پہلی آٹھ پوزیشنز پر نہ آنے کے باعث سری لنکن ٹیم ٹورنامنٹ کا حصہ نہیں ہوگی۔

   خیال رہے کہ جب سنہ 1996 کے ایشیا میں ہونےوالے ون ڈے ورلڈ کپ میں آسٹریلیا اور ویسٹ انڈیز نے سری لنکا میں اپنے میچ سکیورٹی وجوہات کے باعث کھیلنے سے انکار کیا تھا تو انھیں ان میچوں کے پوائنٹس گنوانے پڑے تھے۔

   پاکستان میں انٹرنیٹ پر متنازع پابندی اور بد امنی

   پریس بریفینگ کے دوران ایک سوال کے جواب میں پاکستان میں انٹرنیٹ اور سماجی رابطے کی سائٹ ایکس (سابقہ ٹوئٹر) پر متنازع پابندیوں اور اب وی پی این کی رجسٹریشن کے حوالے سے امریکہ کا کہنا ہے کہ اس حوالے سے پاکستان اور دنیا بھر کی حکومتوں سے بات کی جار ہی ہے۔

   بلوچستان کے ریلوے سٹیشن پر دھماکے 35 افراد کی ہلاکت کے واقعے پر امریکی سٹیٹ ڈپارٹمنٹ کہنا تھا کہ ’ہم سختی سے بی ایل اے کی مجید بریگیڈ کی مذمت کرتے ہیں۔ پاکستان کے ساتھ اس قسم کے خطرات کا مقابلہ کرنے میں ہمارے مشترکہ مفادات ہیں۔ ہم علاقائی سلامتی کے لیے مشترکہ عزم رکھتے ہیں۔ خود امریکہ نے بی ایل اے کو خصوصی طور پر 2019 میں عالمی دہشت گرد تنظیم قرار دیا ہے۔ ہم دہشت گردی اور پرتشدد انتہا پسندی کے خلاف جنگ میں پاکستان کے شانہ بشانہ کھڑے رہیں گے۔‘

5. 15 نومبر 2024گذشتہ روز کی اہم خبروں کا خلاصہ

   • پاکستان پیپلز پارٹی کے چیئرمین بلاول بھٹو زرداری نے وفاقی حکومت کی پالیسیوں اور طرزِ حکومت پر عدم اطمینان کا اظہار کرتے ہوئے کہا ہے کہ اس وقت وفاق میں عزت کی جاتی ہے نہ ہی سیاست کی جا رہی ہے۔ ان کا مزید کہنا ہے کہ مسلم لیگ ن پیپلز پارٹی کے ساتھ معاہدے کی خلاف ورزی کر رہی ہے۔ بلاول ہاؤس سے جاری بیان کے مطابقوفاقی حکومت سے پیپلز پارٹی کی ناراضگی کے متعلق پوچھے گئے سوال کے جواب میں چیئرمین بلاول بھٹو زرداری نے کہا کہ ’حکومت کے ساتھ ناراضی کا سوال ہی نہیں ہے، ناراض ہونے پر سیاست نہیں کی جاتی۔ سیاست تو عزت کے لیے کی جاتی ہے۔ معذرت کے ساتھ، اس وقت وفاق میں نہ عزت کی جاتی ہے، نہ سیاست کی جا رہی ہے۔‘انھوں نے کہا کہ ’دنیا میں جہاں بھی اقلیتی حکومت ہو اور ان کا اتحاد جس جماعت کے ساتھ ہوتا ہے تو اس معاہدے پر عمل درآمد ہوتا ہے۔ ہم اخلاقی حمایت فراہم کرنے کے لیے حکومتی بینچ پر بیٹھے ہیں، ہم ضرور چاہیں گے کہ طے شدہ معاہدے پر عمل کیا جائے۔‘
   • بلوچستان کے ضلع زیارت میں بارودی سرنگ کے دھماکے میں ایک میجر سمیت کم از کم دو سکیورٹی اہلکار ہلاک ہوگئے۔ پاکستانی فوج کے شعبہ تعلقاتِ عامہ کی جانب سے جاری ہونے والے ایک بیان میں ضلع زیارہ میں پیش آنے والے واقع میں میجر محمد حسیب اور حولدار نور محمد کی ہلاکت کی تصدیق کی گئی ہے۔ بلوچستان میں ایک سینیئر سرکاری اہلکار نے اس کی تصدیق کرتے ہوئے بتایا کہ یہ واقعہ ضلع کے علاقے مانگی میں پیش آیا۔
   • توشہ خانہ کے دوسرے کیس میں سابق وزیر اعظم و بانی چیئرمین پی ٹی آئی عمران خان اور ان کی اہلیہ بشریٰ بی بی کی بریت کی درخواستیں مسترد کر دی گئیں ہیں۔ جمعرات کو توشہ خانہ کیس ٹو میں عمران خان اور بشریٰ بی بی کی بریت کی درخواستوں پر سماعت اڈیالہ جیل میں ہوئی۔ سپیشل جج سینٹرل شاہ رخ ارجمند نے بریت کی درخواستوں پر پہلے سے محفوظ فیصلہ سناتے ہوئے عمران خان اور بشریٰ بی بی کی درخواستیں مسترد کرتے ہوئے خارج کر دیں ہیں۔ عدالت نے بانی پی ٹی آئی اور بشریٰ بی بی پر فرد جرم عائد کرنے کے لیے 18 نومبر کی تاریخ مقرر کر دی ہے۔
   • سکیورٹی فورسز نے شمالی وزیرستان کے ضلع میران شاہ میں انٹیلی جنس بیسڈ آپریشن کرتے ہوئے آٹھ شدت پسندوں کو ہلاک کر دیا۔ پاکستان کی فوج کے شعبہ تعلقات عامہ (آئی ایس پی آر) کے مطابق سکیورٹی فورسز کے آپریشن کے دوران چھ شدت پسند زخمی بھی ہوئے جبکہ علاقے میں کلیئرنس آپریشن جاری ہے۔دوسری طرف صوبہ بلوچستان کے ضلع کیچ کے علاقے بالگتر میں بھی سکیورٹی فورسز نے خفیہ اطلاع پر آپریشن کے دوران چار شدت پسندوں کو ہلاک کر دیا ہے۔

6. 15 نومبر 2024

   بی بی سی اردو کے لائیو پیج پر خوش آمدید جمعرات 14 نومبر تک کی خبریں پڑھنے کے لیے یہاں کلک کریں