امریکہ کا وسط مدتی الیکشن: ٹرمپ کا بڑی فتح کا دعویٰ مگر صدر بائیڈن نتائج سے مطمئن

امریکہ میں وسط مدتی انتخابات کے نتائج آنے کا سلسلہ جاری ہے اور ریپبلکن اور ڈیموکریٹ دونوں جماعتیں امریکی کانگریس میں برتری حاصل کرنے کی دوڑ میں اب بھی شامل ہیں۔ امکان ہے کہ ریپبلکن جماعت ایوان نمائندگان میں برتری حاصل کر سکتی ہے تاہم سینیٹ میں کڑا مقابلہ دیکھا جا رہا ہے۔

سینیٹ میں دونوں جماعتوں کے پاس اب تک 48، 48 سیٹیں ہیں۔ تازہ نتائج کے مطابق ڈیموکریٹس کو سینیٹ میں پنسلوینیا کی اہم نشست ملی ہے جبکہ باقی دو سیٹوں پر کانٹے کا مقابلہ ہے اور ایک سیٹ پر آئندہ ماہ رن آف الیکشن ہو سکتا ہے۔

دوسری طرف ریپبلکن جماعت کو اب تک ایوان نمائندگان میں 210 جبکہ ڈیموکریٹس کو 192 نشستیں حاصل ہوئی ہیں۔

ایوان نمائندگان کی 435 اور سینٹ کی ایک تہائی سیٹوں پر الیکشن ہوا ہے۔ ایوان میں جیت سے ریپبلکن جماعت کو اس کا کنٹرول ملنے کی امید ہے۔ تاہم سادہ اکثریت کے لیے ایوان میں 218 سیٹیں درکار ہوتی ہیں۔

بدھ کو اس پر بات کرتے ہوئے صدر جو بائیڈن نے کہا کہ یہ انتخابات امریکہ کی جمہوریت کے لیے اچھا دن رہا اور نتائج دیکھ کر انھوں نے سکھ کا سانس لیا ہے۔ اس سے قبل ایک بیان میں انھوں نے کہا تھا کہ ریپبلکن جماعت کی جیت سے جمہوریت کمزور ہو سکتی ہے۔

حالیہ بدترین مہنگائی کے باعث جو بائیڈن کی مقبولیت میں کمی آئی ہے۔ انھوں نے ادویات کی قیمتوں میں کمی، ماحول دوست توانائی کے استعمال اور امریکی انفراسٹرکچر کی تعمیر نو جیسے وعدوں کی تکمیل کے لیے کام کیا ہے۔

اس الیکشن میں ووٹروں کے لیے معیشت اور اسقاط حمل کا حق دو بڑے مسائل بتائے گئے ہیں۔

ٹرمپ کا بڑی فتح کا دعویٰ

خیال ہے کہ امریکہ کے وسط مدتی انتخابات سابق صدر ڈونلڈ ٹرمپ کی 2024 میں وائٹ ہاؤس میں واپسی کی تیاریوں کا حصہ ہوسکتے ہیں۔ ان کا دعویٰ ہے کہ یہ ان کی جماعت کی بڑی فتح ہے۔

مڈٹرم الیکشن پر ایک سوال پر ٹرمپ نے قدامت پسند میڈیا نیٹ ورک نیوز نیشن کو بتایا تھا کہ ’مجھے لگتا ہے کہ اگر ریپبلکن جیتیں گے تو اس کا کریڈٹ مجھے ملنا چاہیے۔ اگر وہ ہارتے ہیں تو مجھے اس کا قصوروار نہیں ٹھہرایا جانا چاہیے۔‘

اب تک کی اہم پیشرفت

یہ بھی پڑھیے

امریکہ: مڈ ٹرم الیکشن میں مہنگائی اور معیشت عوام کے لیے سب سے اہم

وسط مدتی امریکی انتخابات آج، وہ پانچ وجوہات جنھوں نے اس دوڑ کو دلچسپ بنا دیا

وہ پانچ وجوہات جنھوں نے امریکی الیکشن کو دلچسپ بنایا

8 نومبر کو ہونے والے امریکی انتخابات امریکی قوم کی سمت کے ساتھ ساتھ وائٹ ہاؤس میں برسراقتدار شخص اور پارٹی کی قسمت پر بھی بہت زیادہ اثر ڈالیں گے۔

کانگریس کی تشکیل نو ملک بھر میں امریکیوں کی روزمرہ کی زندگیوں کو براہ راست متاثر کر سکتی ہے۔ اسقاط حمل اس کی ایک بہترین مثال ہو سکتی ہے۔

وسط مدتی انتخابات کا اثر پالیسیوں کی حد سے بھی بڑھ کر ہو گا۔ کانگریس میں اکثریت حاصل کرنے کا مطلب یہ کہ اکثریتی جماعت کو کمیٹی کے ذریعے تحقیقات شروع کرنے کا اختیار حاصل ہو جاتا ہے۔

وسط مدتی انتخابات کو عام طور پر صدارتی مدت کے پہلے دو سالوں پر ہونے والا ریفرنڈم سمجھا جاتا ہے، جس میں اقتدار میں پارٹی اکثر شکست کھاتی ہے۔

حالیہ شکست خوردہ صدور کے برعکس سابق صدر ٹرمپ نے خاموشی سے سیاست نہیں چھوڑی۔ ایسا لگتا ہے کہ وہ اب بھی سنہ 2024 میں وائٹ ہاؤس میں واپس آنے میں دلچسپی رکھتے ہیں اور وسط مدتی انتخابات ان کے ہاتھ مضبوط کر سکتا ہے یا ان کی امیدوں کو ختم کر سکتا ہے۔ 

سنہ 2022 کے وسط مدتی انتخابات 6 جنوری کو امریکی کیپیٹل بلڈنگ پر حملے کے بعد سے پہلے وفاقی انتخابات ہوں گے، جب ٹرمپ کے حامیوں نے جو بائیڈن کی انتخابی فتح کے اعلان کو روکنے کی کوشش کی تھی۔

ہنگامہ آرائی سے بچائے جانے سے دور ڈونلڈ ٹرمپ نے اس الیکشن کے نتائج پر سوال اٹھانا جاری رکھا ہے اور ریپبلکن امیدواروں کی فعال حمایت کی ہے جو کہتے ہیں کہ ٹرمپ کا مینڈیٹ چوری کیا گیا ہے۔

امریکہ میں مڈٹرم الیکشن یا وسط مدتی انتخابات سے کیا مراد ہے؟

مڈٹرم الیکشن کا تعلق امریکی کانگریس سے ہے جس کے دو حصے ہوتے ہیں: ایوان نمائندگان اور سینیٹ۔

یہ الیکشن ہر دو سال بعد ہوتا ہے، یعنی کسی صدارتی دور کے نصف میں۔ اسی لیے اسے وسط مدتی انتخابات کہتے ہیں۔

کانگریس میں ملکی سطح پر قوانین بنتے ہیں۔ ایوان نمائندگان یہ طے کرتا ہے کہ کن قوانین پر ووٹنگ ہوگی جبکہ سینیٹ ان کی منظوری دیتا ہے یا انھیں روک دیتا ہے۔ سینیٹ کسی صدر کی تعیناتیوں کی تصدیق کرتا ہے یا ان کے خلاف تحقیقات شروع کرسکتا ہے، جو کہ کم دیکھنے میں آتا ہے۔

امریکہ کی 50 ریاستوں میں سے ہر ریاست کے دو سینیٹر ہوتے ہیں جو چھ سال اس عہدے پر رہتے ہیں۔ نمائندگان دو سال کے لیے آتے ہیں اور چھوٹے ضلعوں کی نمائندگی کرتے ہیں۔

نومبر کے اس الیکشن میں ایوان نمائندگان کی تمام نشستوں جبکہ ایک تہائی سینیٹ پر نئے عہدیداروں کے لیے ووٹنگ ہو رہی ہے۔

کئی بڑی ریاستوں میں گورنر اور مقامی اہلکاروں کے لیے بھی الیکشن ہو رہا ہے۔