ጀርመን: 'ብሽበራ' ዝተኸሱ ኣባላት ሕሉፍ የማናይ ‘ጉጅለ ኤስ’ ቤት ፍርዲ ቀሪቦም

ከይዲ ፍርዲ ብኣባልነት ሕሉፍ የማናይ ጉጅለ ‘‘ራዕዲ’’ ዝተጠርጠሩ 11 ሰባት ኣብ ጀርመናዊት ከተማ ሽቱትጋርት ተጀሚሩ፡፡

እቶም ኣብ ክሊ ዕድመ 32 ክሳብ 61 ዝርከቡ ኣባላት ጉጅለ ኤስ ተባሂሉ ዝጽዋዕ ሕሉፍ የማናይ ጉጅለ ከምዝኾኑ ዝተኸሰሱ ጀርመናውያን፡ ኣብ ለካቲት ናይቲ ዝሓለፈ ዓመት እዮም ተኣሲሮም፡፡

እቲ ጉጅለ ኣብ ልዕሊ ስደተኛታት፣ ኣስላምን ምስኦም ዝደናገጹ ፖለቲከኛታትን መጥቃዕቲ ብፍጻም: ኲናት ሓድሕድ ንምውላዕ ዝዓለመ ከምዝኾነ እዮም ኣኽበርቲ ሕጊ ዝገልጹ፡፡

ነቶም ጥርጡራት ሓገዝ ናውቲ ብምቕራብ ዝተኸሰሰ ሓደ ፖሊስ ነበር እውን ናብ ፍርዲ ቀሪቡ ኣሎ፡፡ ሓደ ካልእ ኣባል ድማ ኣብዘየለሉ ክሲ ቀሪብሉ፡፡

እቶም ጥርጡራት ብምንታይ ተኸሲሶም?

ዕላማ ኣባላት ጉጅለ ኤስ ኣብ ጀርመን ዘሎ ‘‘መንግስትን ስርዓትን ምምዝባልን ኣብ መወዳእትኡ ድማ ምዕላውን’’ ከምዝኾነ ዝቐረበሎም ክሲ የመልክት፡፡

ቀንዲ መራሒ እቲ ጉጅለ: ዋርነር ኤስ፡ ምስ ካልኦት ሸውዓተ መስረትቲ እቲ ጉጅለ ኣብ መስከረም 2019 ኣብ ባደን-ወርተምበርግ ኣኼባ ኣካይዶም ነይሮም፡፡

ኣብ ዝቕጽል ኣዋርሕ ካልኦት ኣባለት ዝተሓወሱዎም ኮይኖም ብስልክን ኢንተርነትን ምርኻብ ቀጺሎም፡፡

ብመሰረት ጸብጻብ ፖሊስ፡ መራሒ እቲ ጉጅለ ክላሺንኮቭ ንምርካብ ከምዝነበረን፤ እቲ ጉጅለ ዝበዝሑ ሽጉጣት ዝኾኑ 27 መሳርሒታት ኲናት ከምዝነበሮ ተገሊጹ፡፡

እቲ ሓበሬታ፡ ኣብዚ እዋን ቀንዲ ምስክር ኮይኑ ብፖሊስ ሓለዋ ይግበረሉ ብዘሎ ሓደ ውልቀ ሰብ ናብ እዝኒ ፖሊስ ከምዝበጸሐ ማዕከናት ዜና ጀርመን ሓቢረን፡፡ ኣብ ለካቲት 2020 ፖሊስ ን13 ሰባት ኣብ ትሕቲ ቀይዲ ዘውዓለ ኮይኑ ሓደ ሰብ ኣብ ቤት ማእሰርቲ ሞይቱ፡፡

መብዛሕተኦም እቶም ኣብ ጉጅለ ኤስ ዘለዉ ሰባት፡ ኣባላት ናይ ከም ‘ ጀርመን ብራዘርሁድ’ ዝኣመሰሉ ሕሉፋት የማናውያን ጉጅለታት ከምዝኾኑ ጸብጻብ ሚድያ ጀርመን ኤኣርዲ የመልክት፡፡

ኣብ ጀርመን ብሕሉፋት የማናውያን ዝተፈጸሙ መጥቃዕቲታት