ፕረዚደንት ቦሊቭያ ኢቮ ሞራለስ፡ ካብ ስልጣኑ ብፍቓዱ ለቒቁ

ፕረዚደንት ቦሊቭያ ኢቮ ሞራለስ፡ ብድሕሪ'ቲ ኣብ ዝሓለፈ ወርሒ ዝተኻየደ መረጻ ብዝተልዓለ ናዕቢ እዩ ካብ ስልጣኑ ወሪዱ።

ንሱ ከምዝተዓወተ ምስገለጸ ብምኽንያት ዝተልዓለ ናዕቢ፡ ኣዛዚ ምክልኻል ሰራዊት እታ ሃገር ስልጣን ክለቅቕ ጸቕጢ ገይሩሉ እዩ።

ኣጻረይቲ ኣብቲ መረጻ ዘይስሩዓት አካይዳታት ከምዝነበሩ ዝሓበሩ ኮይኖም፡ ንሱ ግን ዕልዋ ከምዝተፈጸሞ እዩ ዝገልጽ።

ብተወሳኺ ኣብ ልዕሊ ደገፍቱ ዝኾኑ ፖለቲከኛታትን ቤተሰቦምን ጥቕዓት ይፍጸም ስለዘሎ፡ ነዚ ንምክልኻል ስልጣኑ ከምዝገደፈ ሓቢሩ።

ፕረዚደንት ሞራለስ፡ እቶም ተቓወምቲ ኣብ ልዕሊ ወገናቶም ዝፍጽምዎ ዘለዉ ጥቕዓት ጠጠው ከብሉ ተማሕጺኑ።

ብተወሳኺ ምክትል ፕረዚደንት ኣልቫሮ ጋርሺያ ሊነራን፡ ፕረዚደንት ሰኔት ኣድርያና ቫልቫቴራን እውን ስልጣኖም ብፍቓዶም ለቒቖም ኣለዉ።

እቲ ፕረዚደንት ብፍቓዱ ስልጣኑ ብምግዳፉ እቶም ተቃወምቲ ሓጎሶም ገሊጾም።