መኽዘን ሓበሬታ (ብላክ ቦክስ) ናይታ ዝተሓምሸሸት ነፋሪት ተረኺቡ

ቀጥታዊ ሸፈነ

1. 10 መጋቢት 2019ቀዳማይ ሚኒስተር ጣልያን ሎሚ "መዓልቲ ሓዘን እዩ" ኢሉ

   ቀዳማይ ሚኒስተር ጣልያን ጁሰፔ ኮንተ ብዛዕባ ምሕምሻሽ ነፋሪት ኢትዮጵያ ኣብ ትዊተሩ ጽሒፉ'ሎ።

   እቲ ቀዳማይ ሚኒስተር፡ ሎሚ "መዓልቲ ሓዘን እዩ" ኢሉ።

   ኣብታ ዝተሓምሸሸት ነፋሪት፡ ሾሞንተ ዜጋታት ጣልያን ነይሮም።

2. 10 መጋቢት 2019ኣብራሪ ናይታ ነፋሪት፡ ሙኩር ነይሩ ተባሂሉ

   ኣብራሪ ናይታ ዝተሓምሸሸት ነፋሪት፡ ልምዲ በረራ 8,000 ሰዓታት ዘለዎ ሙኩር ምንባሩ መገዲ ኣየር ኢትዮጵያ ገሊጹ።

   ሓጋዚ ኣብራሪ ኣሕመድ ኑር መሓመድ ኑር ድማ፡ 200 ናይ በረራ ሰዓታት ዝነበሮ ምዃኑ ተገሊጹ።

3. 10 መጋቢት 2019ቤተሰብ ግዳያት፡ ብወግዒ መርድእ ተነጊርዎም

   ኣብ ናይሮቢ ዓለምለኸ መዕርፎ ነፈርቲ ክጽበዩ ዝጸንሑ ናይቶም ግዳያት ቤተሰብ፡ ብወግዒ መርድእ ተነጊርዎም።

   ካብዙይ ብተወሳኺ፡ ሓደ ኣባል ባይቶ ስሎቫክያ፡ ካብቶም በቲ ሓደጋ ዝሞቱ ኣርባዕተ ዜጋታት ሃገሩ፡ ሰበይቱን ክልተ ደቁን ከምዝርከብዎም ኣብ ፌስቡክ ጽሒፉ።

4. 10 መጋቢት 2019'ፕሮቶኮል' ቀዳማይ ሚኒስተር ሶማልያ፡ በዚ ሓደጋ ካብ ዝሞቱ ሓደ እዩ

   'ፕሮቶኮል' ቀዳማይ ሚኒስተር ሶማልያ ሻሃድ ዓብዲሸኩር፡ በዚ ሓደጋ ካብ ዝሞቱ ሓደ ከምዝኾነ፡ ዳልሳን ዝበሃል ናይ ሶማልያ ሬድዮ ጸብጺቡ።

5. 10 መጋቢት 2019ኣብቲ ሓደጋ ዘጋጠመሉ ቦታ ዝተረኸበት 'ላፕቶፕ'

   ኣብቲ ሓደጋ ዘጋጠመሉ ቦታ ዝርከብ ጋዜጠኛ ቢቢሲ፡ ገለ ዝተሰባበሩን ዝዓነዉን አቑሑት ርእዩ እዩ።

   ካብኣተን ሓንቲ እዛ ኣብዚ ስእሊ እትርእይዋ 'ላፕቶፕ' እያ።

6. 10 መጋቢት 2019ቤተሰብ መገደኛታት ኣብ ኣዲስ ኣበባ

   ኣብ ኣዲስ ኣበባ ኣብ ዝርከብ ቀጽሪ ትካል ሲቪል አቭየሽን ኢትዮጵያ፡ 'ማእኸል ህጹጽ ኩነት' ተኸፊቱ'ሎ።

   ኣብቲ ኣብ ጥቓ መዕርፎ ነፈርቲ ቦሌ ዝርከብ ማእኸል፡ ብርክት ዝበሉ ቤተሰብ መገደኛታት ይረኣዩ።

   ዝሓዘኑን ዝበኽዩን ብዙሓት እዮም፤ ሰራሕተኛታት መገዲ ኣየር'ውን ኣብ ሓዘን ጣንዮም ይረኣዩ።

7. 10 መጋቢት 2019ኣብዪ ኣሕመድ ናብቲ ሓደጋ ዘጋጠመሉ ቦታ በጺሑ

   ቀዳማይ ሚኒስተር ኢትዮጵያ ኣብዪ ኣሕመድ፡ ሎሚ ድሕሪ ቀትሪ እታ ነፋሪት ናብ ዝተሓምሸሸትሉ ቦታ ከምዝበጽሐ ተገሊጹ።

   ቤት ጽሕፈት ቀዳማይ ሚኒስተር ከምዝበሎ፡ መንቀሊ እቲ ሓደጋ ምጽራይ ክግበረሉን ንስድራ መወትቲ 'ዝግባእ ነገር ኩሉ' ክግበረሎምን መምርሒ ሂቡ።

8. 10 መጋቢት 2019መንግስቲ ኤርትራ ሓዘኑ ገሊጹ

   ሚኒስተር ዜና ሃገረ ኤርትራ የማነ ገብረመስቀል፡ በቲ ሓደጋ ዝተሰመዖ ሓዘን ገሊጹ።

   እቲ ሚኒስተር፡ ንመንግስቲ ኢትዮጵያን ንሕዙናት ስድራን ናይ ጽንዓት ይሃብኩም መልእኽቲ ኣብ ትዊተሩኣሕሊፉ።

9. 10 መጋቢት 2019እቲ ሓደጋ ዘጋጠመሉ ቦታ፡ እንታይ ይመስል?

10. 10 መጋቢት 2019ኣብራሪ ጸገም ከምዝገጠሞን ናብ ኣዲስ ኣበባ ክምለስ ከምዝደለየን ገሊጹ ነይሩ

    እቲ ኣብራሪ ጸገም ከምዝገጠሞን ናብ ኣዲስ ኣበባ ክምለስ ከምዝደለየን ንተቖጻጸርቲ ገሊጹ ምንባሩ፡ ንክምለስ'ውን ተፈቒድሉ ከምዝነበረ፡ ኣይተ ተወልደ ገብረማርያም ኣብ ጋዜጣዊ መግለጺ ተዛሪቡ።

    ኣይተ ተወልደ ገብረማርያም ከምዝበሎ፡ መገዲ ኣየር ኢትዮጵያ ሽድሽተ ተመሳሰልቲ ነፈርቲ ኣለውኦ።

11. 10 መጋቢት 2019ሓድሽ ዜና, ኣብዝሓ ካብቶም ዝሞቱ፡ ኬንያውያን እዮም

    ኣብታ ዝተሓምሸሸት ነፋሪት ካብ ዝነበሩ ተጉዓዝቲ

    • 32 ኬንያውያን
    • 18 ካናዳውያን
    • 9 ኢትዮጵያውያን
    • 8 ቻይናውያን
    • 8 ጣልያናውያን
    • 8 ኣመሪካውያን
    • 7 ፈረንሳውያን
    • 7 እንግሊዛውያን
    • 6 ግብጻውያን
    • 5 ጀርመናውያን
    • 1 ናይ ውድብ ሕቡራት ሃገራት ፓስፖርት ዝሓዘ
    • 4 ህንዳውያን
    • 4 ስሎቫክያውያን
    • 3 ዜጋታት ኣውስትርያ
    • 3 ሩስያውያን
    • 3 ስዊድናውያን
    • 2 ስፔናውያን
    • 2 ሞሮካውያን
    • 2 እስራኤላውያን
    • 2 ፖላንዳውያን
    • 1 ቤልጄማዊ
    • 1 ናይ ጅቡቲ ዜጋ
    • 1 ኢንዶኒዥያዊ
    • 1 ኣየርላንዳዊ
    • 1 ሩዋንዳዊ
    • 1 ናይ ሳውዲ ዜጋ
    • 1 ሶማልያዊ
    • 1 ሰርቢያዊ
    • 1 የመናዊ
    • 1 ኔፓላዊ
    • 1 ናይጄርያዊ
    • 1 ኡጋንዳዊ
    • 1 የመናዊ
    • 1 ሱዳናዊ
    • 1 ናይ ቶጎ ዜጋ
    • 1 ሞዛምቢካዊ
    • 1 ኖርዌያዊን እዮም።

12. 10 መጋቢት 2019ኣብራሪ ናይታ ነፋሪት ያሬድ ሙሉጌታ እዩ ዝበሃል ነይሩ

    ኣብራሪ ናይታ ዝተሓምሸሸት ነፋሪት፡ ያሬድ ሙሉጌታ ዝበሃል ኢትዮጵያዊ-ኬንያዊ ከምዝነበረ መገዲ ኣየር ኢትዮጵያ ገሊጹ።

    እታ ነፋሪት ካብ እትዕደግ ኣርባዕተ ወርሓ ክትከውን ከላ፡ ሎሚ ንጉሆ ካብ ጆሃንስበርግ ከምዝተመለሰት'ውን ተገሊጹ።

13. 10 መጋቢት 2019ቦይንግ ሓዘኑ ገሊጹ

    ነፈርቲ ዘፍሪ ትካል ቦይንግ፡ ኣብታ ዝተሓምሸሸት ነፋሪት ኢትዮጵያ ዝነበሩ ተጉዓዝትን ሰራሕተኛታትን ብምሟቶም "ጥልቂ ሓዘን" ከምዝተሰመዖ ገሊጹ።

14. 10 መጋቢት 2019ሸሞንተ ቻይናውያን ኣብታ ዝተሓምሸሸት ነፋሪት ነይሮም

    ሃገራዊ መራኸቢ ሓፋሽ ቻይና፡ ኣብታ ዝተሓምሸሸት ነፋሪት ኢትዮጵያ፡ ሾሞንተ ቻይናውያን ከምዝነበሩ ገሊጹ።

    ቅድም ክብል፡ መሳርሕቶም ኣብታ ነፋሪት ከምዝነበሩ ዝተገልጸ ቻይናውያን፡ ኣብ መዕርፎ ነፈርቲ ጆሞ ኬንያታ ሓበሬታ ክጽበዩ ተራእዮም እዮም።

15. 10 መጋቢት 2019ኣካያዲ ስራሕ መገዲ ኣየር ኢትዮጵያ ናብቲ ሓደጋ ዘጋጠመሉ ቦታ ከይዱ

    ዋና ኣካያዲ ስራሕ መገዲ ኣየር ኢትዮጵያ ኣይተ ተወልደ ገብረማርያም ናብቲ ሓደጋ ዘጓነፈሉ ቦታ ከይዱ ተዓዚቡ።

    በዚ ሓደጋ ዝተሰመዖ ሓዘን እውን ገሊጹ።

16. 10 መጋቢት 2019እታ ዝተሓምሸሸት ነፋሪት ቦይንግ '737 Max-8' ሓዳሽ ስርሓት እያ

    ነታ ዝተሓምሸሸት ነፋሪት ዝሰርሐ ትካል ቦይንግ፡ 'ነቲ ኩነታት ብቐረባ ይከታተሎ ከምዘሎ' ገሊጹ'ሎ።

    እዛ '737 Max-8' ዝተብሃለት ነፋሪቱ፡ ኣብ 2016 ናብ ዕዳጋ ዝኣተወት ሓዳሽ ስርሓት እያ። መገዲ ኣየር ኢትዮጵያ ድማ፡ ዝሓለፈ ዓመት ወርሒ ሓምለ እዩ ናብ ኣገልግሎት ዘእተዋ።

    ተመሳሳሊ ስርሓት ዘለዋ ነፋሪት ቅድሚ ሓሙሽተ ኣዋርሕ፡ 190 ሰባት ጽዒና ኣብ ጥቓ ኢንዶኒዥያ ናብ ባሕሪ ከምዝተሓምሸሸት ይዝከር።

17. 10 መጋቢት 2019ኣብታ ነፋሪት ናይ ዝነበሩ ተሳፈርቲ ስድራን መሓዙትን ሓበሬታ ይጽበዩ

    ኣብታ ነፋሪት ናይ ዝነበሩ ተሳፈርቲ ስድራን መሓዙትን፡ ኣብ ናይሮቢ ዓለምለኻዊ መዕርፎ ነፈርቲ ጆሞ ኬንያታ፡ ሓበሬታ ይጽበዩ

    እታ ነፋሪት፡ ብኣቆጻጽራ ኢትዮጵያ ሰዓት 4፡30 (10፡30) ኣብ ናይሮቢ ክትዓልብ እዩ መደብ ተታሒዙላ ነይሩ።

18. 10 መጋቢት 2019መሰኻኽር ዓይኒ እንታይ ይብሉ?

    ኣብቲ ሓደጋ ዘጋጠመሉ ቦታ ከምዝነበረ ዝገለጸ በቀለ ጉተማ ንቢቢሲ እንትዛረብ "እቲ ባርዕ ሰብ ኣየቕርብ ዝነበረ። ሕዲ ነዲዱ ወዲኡ እዩ። ... ሰራሕተኛታት ምክልኻል ባርዕ ኣብቲ ቦታ ዝበጽሑ፡ እቲ ሓዊ ነዲዱ ምስተወደአ እዩ" ኢሉ።

    እቲ ባርዕ ሓያል ብምንባሩ፡ ነበርቲ እቲ ኸባቢ ሓገዝ ክገብሩ ከምዘይከኣሉ ተዛሪቡ።

    ንቢቢሲ ዝተዛረቡ ነበርቲ ከተማ ቢሾፍቱ፡ ናብቲ ሓደጋ ዘጋጠመሉ 'ሮብ ገበያ ጊምቢቹ ጋራ ቀበሌ' ዝበሃል ቦታ ብዙሓት 'ኣምቡላንስ' መካይን ከምኡ ድማ መካይን ምክልኻል ባርዕ ክጓዓዛ ከምዝረኣዩ ገሊጾም።

19. 10 መጋቢት 2019መገዲ ኣየር ኢትዮጵያ ብዛዕባ እቲ ሓደጋ መግለጺ ክህብ እዩ

    ኣብታ ነፋሪት ዝነበሩ ኩሎም ተጉዓዝትን ሰራሕተኛታትን ከምዝሞቱ ዝገለጸ ውሃቢ ቃል መገዲ ኣየር ኢትዮጵያ ኣስራት በጋሻው እዩ። እቲ መገዲ ኣየር ብዛዕባ እቲ ሓደጋ ጋዜጣዊ መግለጺ ክህብ እዩ።

20. 10 መጋቢት 2019ፕረዚደንት ኬንያ ኡሁሩ ኬንያታ ሓዘኑ ብትዊተር ገሊጹ