መጥቃዕቲ ኢራን ይገድድ፡ መጻረዪ ነዳዲ እስራኤል ይነድድ፡ ትራምፕ ተስፋን መጠንቀቕታን ይሰድድ

ቀጥታዊ ሸፈነ

1. 28 ለካቲት 2026ኢራን ኣብ ቤት-ትምህርቲ ደቀንስትዮ ብዝተፈጸመ መጥቃዕቲ 40 ሰባት መይቶም

   ሓደ ብዓል ስልጣን ናይቲ ከባቢ ንመንግስታዊ ማዕከን ዜና ኢርና ኣብ ዝሃቦ መግለጺ፡ እስራኤል ብ28 ለካቲት ኣብ ደቡባዊ ኣውራጃ ሚናብ ኢራን ኣብ ግዝኣት ሆርሞዝጋን ኣብ ዝርከብ መባእታ ቤት ትምህርቲ ኣዋልድ ብዝፈጸመቶ መጥቃዕቲ 40 ሰባት ከም ዝተቐትሉ ሓቢሩ።

   ኣመሓዳሪ መሓመድ ራድመህር፡ ካልኦት 48 ሰባት’ውን ከም ዝቘሰሉ፡ ኣብ ልዕሊ ቤት ትምህርቲ ሻጃርህ ጣየበህ ብዝተፈጸመ መጥቃዕቲ ቍጽሪ ሞት ይውስኽ ከም ዘሎ ገሊጹ።

   ቢቢሲ ነዚ ሓበሬታ ብናጻ ኣካል ከረጋግጾ ኣይከኣለን - ኣህጉራውያን ትካላት ዜና መብዛሕትኡ ግዜ ናብ ኢራን ክኣትዋ ቪዛ ስለ ዝኽልከላ፡ ኣብ ውሽጢ እታ ሃገር እንታይ ይካየድ ከም ዘሎ ሓበሬታ ናይ ምእካብ ዓቕመን ዝተደረተ ይኸውን።

   ብሕልፊ ኣብዚ ግዜ’ዚ፡ ዳርጋ ምሉእ ብምሉእ ምቍራጽ ኢንተርነት ኣሎ፣ መጥቃዕቲ ሳይበር’ውን ተፈጺሙ ነይሩ።

2. 28 ለካቲት 2026ምኒስተር ጉዳያት ወጻኢ ኢራን፡ ኣመሪካን እስራኤል ኢራን ከይተንከፈቶም ‘ዘይሕጋዊ’ መጥቃዕቲ ከም ዝፈጸሙ ከሲሱ

   ምኒስተር ጉዳያት ወጻኢ ኢራን ዓባስ ኣራግቺ፡ እቲ ኣመሪካን እስራኤልን ዘካይድኦ ዘለዋ ሓባራዊ መጥቃዕቲ ኢራን ከይቀስቀሰቶም ዝወሰድዎ ዘይሕጋዊ ስጕምቲ ምዃኑ ገሊጹ።

   እቲ ምኒስተር ኣብ ኤክስ ኣብ ዘስፈሮ ጽሑፍ፡ ዶናልድ ትራምፕ “ካብ ቅድም ኣመሪካ ናብ ቅድም እስራኤል፡” ከም ዝቐየረን እዚ ማለት ድማ “ኣመሪካ ኵሉ ሳዕ ኣብ መጠረሽታ፡” ማለት እዩ ኢሉ።

   ቀጺሉ፡ ሓያል ሰራዊት ኢራን “ንኸምዚኦም መዓልታት ከም ዝተዳለዉን ነቶም ወረርቲ ዝግብኦም ትምህርቲ ከቕስሙዎም እዮም፡” ክብል ተሓንዩ።

3. 28 ለካቲት 2026ኢራን፡ ‘ሕጋዊ መሰል ርእሰ-ምክልኻል’ ናብ ሃርራት ወሽመጥ ዓረብ ዘቕንዐ መግለጺ ኣውጺኣ

   ምኒስተር ጉዳያት ወጻኢ ኢራን ዓባስ ኣራግቺ፡ ሃገሩ ነብሳ ናይ ምክልኻል ብዘለዋ መሰል መሰረት ኵሉ ዘለዋ ወተሃደራዊ ኣማራጺታት ከም እትጥቀም ገሊጹ።

   ኣራግቺ ንኸም ስዑዲ ዓረብ፡ ኢማራት ዓረብ፡ ቐጠር፡ ኩዌት፡ ባሕሬንን ዒራቕን ዝርከብአን መሓዙት ሃገራት ተለፎን ብምድዋል፡ ሓድነት ኢራን ንምሕላው፡ ኣብ ዘለዋ “ሕጋዊ መሰል ርእሰ-ምክልኻል፡” ተመርኲሳ፡ “ኵሉ ናይ ምክልኻል ወተሃደራዊ ዓቕሚታት፡” ክትጥቀመሉ ምዃና ገሊጹሎም።

   ኣራግቺ፡ ኣመሪካን እስራኤል ኣብ ዘካይድኦ መጥቃዕቲታት “መሳለጥያታተንን ግዝኣታተንን ብዘይግቡእ ከይጥቀማ” ክከላኸላ ንዘለወን ሓላፍነታት ኣዘኻኺሩ።

4. 28 ለካቲት 2026ሕጋዊ ምኽንያት ክትረኽበሉ ዘጸግም ኲናት

   ኣመሪካን እስራኤልን ምስ ኢራን ኣብ ሓድሽ ኲናት ንምእታው ዝወሰድኦ ውሳነ፡ እዚ እዩ ኢልካ ክግመት ዘይክእል ሓደገኛ ሳዕቤን ዘለዎ ኵነታት ክፈጥር ምዃኑ ኣይተርፍን። እስራኤል ንመጥቃዕታ ንምምኽናይ "ቅድመ-ምክልኻል" ዝብል ቃል እያ ተጠቒማ።

   እዚ መግለጺ ግን ነቲ ንኢራን ከም ስግኣት ዘቕርብ ትረኻታት ዝኸውን መርትዖ ኣይኰነን። ተቐዳዲምካ ምጥራዕ ዝዓይነቱ ኰይኑ፡ ብሓፈሻኡ እቲ ኲናት ናይ ምርጫ ጉዳይ እዩ።

   እስራኤልን ኣመሪካን ኣብ ኢራን ዘሎ እስላማዊ ስርዓት ኣብ ቀረባ ኣሎ ዝብል ቅማረ እዩ ዘለወን፤ ብሰንኪ ከቢድ ቍጠባዊ ቅልውላው፣ ኣብ ዝሓለፈ ሰሙናት ዘጋጠመ ሰፊሕ ሰልፊታት ጸረ-መንግስትን፡ ዝተወስደ ጨፍላቒ ስጕምትን ኣብ ርእሲኡ ድማ ዝሓለፈ ሰነ ኣብ ዝተኻየደ ኲናት ኣዝዩ ተሃስዩ ተዳኺሙን እዩ ዝብል ገምጋም እዩ ዘለወን። በዚ ድማ እዚ ክባኽን ዘይግብኦ ዕድል እዩ ነይሩ ዝብል መደምደምታ ኣለወን።

   እዚ ድማ ነቲ ተዳኺሙ ዘሎ ስርዓት ኣህጉራዊ ሕጊ ካልእ ጽፍዒት እዩ።

   ክልቲኦም - ፕረዚደንት ትራምፕን ቀዳማይ ምኒስተር በንያሚን ናታንያሁን - ኣብ ዝሃብዎ መግለጺ፡ ኢራን ንሃገራቶም ሓደጋ ምዃና ገሊጾም - ትራምፕ፡ “ኢራን ዓለምለኻዊ ሓደጋ ምዃና” እውን ገሊጹ።

   እስላማዊ ስርዓት ኢራን ብርግጽ ተሪር ጸላኢኦም እዩ። ኣብ መንጎ ኣመሪካን እስራኤልን ብሓደ ወገን፡ ኢራን ድማ በቲ ካልእ ወገን ዘሎ ዓቢ ናይ ሓይሊ ፍልልይ ኣብ ግምት ብምእታው ግን፡ እቲ “ርእስና ንከላኸል ኣለና” ዝብል ምጕት፡ ብመንጽር ሕጊ ብኸመይ ምኽንያት ክርከቦ ይኽእል ንምርኣይ ኣዝዩ ኣጸጋሚ እዩ።

5. 28 ለካቲት 2026መራሕቲ ዓለም ዝሃቡዎ ግብረመልሲ

   ኣመሪካን እስራኤልን ኣብ ልዕሊ ኢራን ንዘካይድዎ ዘለዉ፣ ከምኡ’ውን ኢራን ንዘውስዱዎ ዘለዉ ፋዳይ ሕነ ስጕምቲ ስዒቡ ዝተፈላለዩ መራሕቲ ዓለም ግብረመልሲ ሂቦም ኣለዉ።

   ፕረዚደንት ኮምሽን ሕብረት ኤውሮጳ ኡርሱላ ፎን ደር ሌየን፡ ሕብረት ኤውሮጳ ኣንጻር “ቀታሊ ስርዓት” ስርዓት ኢራን “ሰፊሕ እገዳ፡” ከም ዘንበረ ብምዝኽኻር፡ "ኵሎም ወገናት ዝለዓለ ነብሰ-ግትኣት ክገብሩ፡ ንሰላማውያን ሰባት ክከላኸሉን ኣህጉራዊ ሕጊ ምሉእ ብምሉእ ከኽብሩን ንጽውዕ፡" ኢላ።

   ወሃቢ-ቓል መንግስቲ ዓባይ ብሪጣንያ፡ ሃገሩ “ናብ ዝሰፍሐ ዞባዊ ግጭት ዓሪጉ፡” ክትርኢ ከም ዘይትደሊ ገሊጹ። ቀጺሉ፡ "ረብሓታትና ንምሕላው ድልዋት ኢና፡" ኢሉ።

   ቤት ጽሕፈት ቀዳማይ ምኒስተር ኢጣልያ ጆርጅያ ሜሎኒ፡ ኢጣልያ ኣብ ጐድኒ ሰለማዊ ህዝቢ ኢራን ምዃና ብምግላጽ፡ ስቪላውን ፖለቲካውን መሰላት ክኽበር ከም ዝግባእ ይገልጽ።

   እቲ ቤትጽሕፈት ወሲኹ፡ ቀዳመይቲ ምኒስተር ሜሎኒ ምስ መሓዙትን ዞባውያን መራሕትን ብምልዛብ ነቲ ወጥሪ ኣብ ምዝላቕ ንዝግበር ጻዕሪታት ክትድግፍ ምዃና ሓቢሩ።

   ቀዳማይ ምኒስተር ኣውስትራልያ ኣንቶኒ ኣልባነዝ ሃገሩ “ኣንጻር ጭቆና ኣብ ዝገብሩዎ ቃልሲ ምስ ተባዕ ህዝቢ ኢራን ደው ኢላ ኣላ” ብምባል፡ ኢራን ንዩክለሳዊ ኣጽዋር ንኸይትውንን ኣመሪካ ንእትገብሮ ጻዕሪ ከም እትድፍ ገሊጹ።

   ምኒስትሪ ጉዳያት ወጻኢ ሩስያ፡ ንተግባራት ኣመሪካን እስራኤልን “ግዲ ኣልቦ” ክብል ድሕሪ ምግላጽ፡ ኣህጉራዊ ሕጊ ዝጥሕስ ምዃኑ ሓቢሩ። ሩስያ እቲ ኵነታት ናብ ፖለቲካውን ዲፕሎማስያውን ፍታሕ ክምለስ ትጽውዕ።

6. 28 ለካቲት 2026ቤትጽሕፈት ላዕለዋይ መራሒ ኢራን መጥቃዕቲ ተፈጺምዎ

   ኣብ ቴህራንን ካልኦት ከተማታትን ብርክት ዝበሉ ፍንጀራታት ተሰሚዖም።

   ቤትጽሕፈት ላዕለዋይ መራሒ ኢራን ከምኡ’ውን ኣብ ቴህራን ዝርከብ ቤትጽሕፈት ፕረዚደንት’ውን ዒላማ ከም ዝተገብረ ይግለጽ ኣሎ።

   ወተሃደራዊ ቦታታት ኣብ ከርማሻን፡ ቁም፡ እስፋሃን፡ ታብሪዝ፡ ካራጅ ከምኡ’ውን ኣብ ደቡብ እታ ሃገር ኣብ ዝርከብ ከናራክ ኣብ ዝርከቡ መሳለጥያታት ሓይሊ ባሕሪ ኢራን ዒላማ ተገይሩ’ሎ።

   ሰራዊት ምክልኻል እስራኤል ቅድሚ እቲ መጥቃዕቲ፡ ሰለማውያን ሰባት ካብ ጥቓ ወተሃደራዊ ቦታታትን ትካላትን ዝርከቡ ከባቢታት ክወጽኡ ኣጠንቂቑ።

   ኣብ ቴህራን ዝርከብ መንበሪ ገዛ ፕረዚደንት ነበር ማሕሙድ ኣሕማዲነጃድ ከም ዝተሃርመ ካብ ቴህራን ዝወጽኡ ምስልታት ኣለዉ። እቲ ፕረዚደንት ነበር ተጐዲኡ ድዩ ኣይተጐድአን ንጹር ኣይኰነን።

   ምኒስትሪ ውሽጣዊ ጉዳያት ኢራን፡ ሓይልታት ጸጥታ ነቲ ኵነታት ብህድኣት ይከታተሎ ከም ዘሎን ኣብ መላእ እታ ሃገር ዝርከባ ብዙሓት ሆስፒታላት ክዳለዋን ሓቢሩ።

7. 28 ለካቲት 2026ሓለዋ ሰውራ ኢራን ኣብ ቐጠርን ኢማራትን ኣብ ዝርከባ መደበራት ኣመሪካ ብሚሳይላትን ድሮናትን ከምዘጥቅዐ ኣፍሊጡ

   ሓለዋ ሰውራ ኢራን ኣብ ቐጠርን ኢማራትን ኣብ ዝርከባ መደበራት ኣመሪካ ብሚሳይላትን ድሮናትን መጥቃዕቲ ከም ዝፍጸመ ኣፍሊጡ።

   መግለጺ ሓለዋ ሰውራ ኢራን፡ ሚሳይላቶምን ድሮናትን ኣብ ባሕሬን ንዝርከብ ዋና ቤትጽሕፈት ሓይሊ ባሕሪ ኣመሪካን ካልኦት ኣብ ቐጠርን ኢማራትን ዝርከብ መደበራት ኣመሪካ፡ ከምኡ'ውን ኣብ እስራኤል ንዝርከቡ "ወተሃደራውን ጸጥታውን ማእከላት" ዒላማ ከም ዝገበሩ ሓቢሩ።

   ብመሰረት እቲ ኣዋጅ፡ መጥቃዕቲ ሚሳይላትን ድሮናትን ኢራን ክቕጽል ምዃኑ ኣፍሊጡ።

8. 28 ለካቲት 2026ፍቕርን ምሕዝነትን ኢራንን ኣመሪካን ዘፍረሰ እንታይ'ዩ?

9. 28 ለካቲት 2026ኣብ ኢራን ‘ዳርጋ ምሉእ ብምሉእ’ ኢንተርነት ጠፊኡ

   ኣመሪካን እስራኤልን ኣብ ልዕሊ ኢራን መጥቃዕቲ ኣብ ዘካይዳሉ ዘለዋ እዋን፡ ኣብዚ ግዜ’ዚ ኢራን ዳርጋ ምሉእ ብምሉእ ምጥፋሕ ኢንተርነት ከም ዘጓነፈ ትካል ምክትታል ኢንተርነት ኔትብሎክስ ሓቢሩ።

   ኣብታ ሃገር ኢንተርነት ክጠፍእ እዚ ናይ ፈለማ ኣይኰነን።

   ኣብ ዝሓለፈ ጥሪ ጥራይ፡ መንግስቲ ነቲ ዝካየድ ዝነበረ ተቓውሞታት ኣብ ዝጭፍልቐሉ ዝነበረ እዋን ዳርጋ ምሉእ ብምሉእ ኢንተርነት ኣጥፊኡዎ ነይሩ።

   ገለ ሰባት ንሓጺር እዋን ስፔስ-ኤክስ ስታርሊንክ ሳተላይትን ቪፒኤንን ዝኣመሰሉ ሜላታት ተጠቒሞም ክጥቀሙ ክኢሎም ነይሮም። እቶም ከምኡ ዝኣመሰለ መሳርሒታት ዘለዎም ሰባት ተመሳሳሊ ሜላታት ዳግማይ ክፍትኑ ተኽእሎ ኣሎ።

10. 28 ለካቲት 2026ኣብ ባሕሬን ፍንጀራ ተሰሚዑ

    ኣብታ ሓምሻይ ጭፍራ መራኽብ ሓይሊ ባሕሪ ኣመሪካ ተጸጊዑላ ዘሎ ርእሰ ከተማ ባሕሬን ሓያል ፍንጀራታት ከም ዝተሰምዐ ተገሊጹ።

    ወኪል ኣገልግሎት ዜና ኣጃንስ ፍራንስ ፕረስ - ኤኤፍፒ - ኣብ ባሕሬን፡ ኣብ ርእሰ ከተማ ማናማ ፍንጀራ ከም ዝሰምዑ ኣረጋጊጾም።

    እዚ ፍንጀራ፡ ምኒስትሪ ውሽጣዊ ጉዳያት ባሕሬን ኣብ ኤክስ ኣብ ዝሃቦ ተኸታታሊ መጠንቀቕታታት ህጹጽ እዋንን ስዒቡ ዝተሰምዐ ሳይረን ዝተፈጸመ ምዃኑ ተገሊጹ።

    እቲ ምኒስተር፡ ነበርቲ ዘድሊ ጥንቃቐታት ክገብሩ ኣተሓሳሲቡ።

    ድሒሩ ድማ፡ መንግስታዊ ማዕከን ዜና እታ ሃገር፡ ኣብ ባሕሬን ዝርከብ ማእከል ኣገልግሎት ሓይሊ ባሕሪ ኣመሪካ 'ብሚሳይል መጥቃዕቲ ተቓሊዑ' ክብል ኣፍሊጡ።

    ማእከል ኣገልግሎት 5ይ ጭፍራ መራኽብ ሓይሊ ባሕሪ ኣመሪካ “መጥቃዕቲ ሚሳይል ተፈጺምዎ'ሎ” ዝበለ መንግስታዊ ማዕከን ዜና ባሕሬን (BNA)፡ "ተወሳኺ ዝርዝር ሓበሬታ ኣብ ግዚኡ ክቐርብ'ዩ" ይውስኽ፡ ነቲ መጥቃዕቲ ግን ምስ ዝኾነት ሃገር ኣየተሓሓዞን ዘሎ።

    “ህዝቢ ብዝምልከቶም ወግዓዊ ኣካላት ዝወሃብ መምርሒታት ክኽተልን ካብ ወግዓዊ ምንጭታት ጥራይ ሓበሬታ ክረክብን" ይምሕጸን።”

    ባሕሬን ዋና ቤት ጽሕፈት 5ይ ጭፍራ መራኽብ ዝነብረላ ኰይና፡ እቲ ጭፍራ ንወሽመጥ፡ ቀይሕ ባሕሪ፡ ባሕሪ ዓረብን ገለ ክፋል ህንዳዊ ውቅያኖስን ዘጠቓልል ከባbኢታt ሕላፍነት ይስከም።

    ኤምባሲ ኣመሪካ ኣቐዲሙ ኣብ ልዕሊ ባሕሬን መጥቃዕቲ ሚሳይላትን ድሮናትን ክፍጸም ከም ዝኽእል ብምግላጽ፡ ዜጋታት ክጥንቀቑ ኣተሓሳሲቡ'ኳ እንተነበረ፡ ካብ ወተሃደራዊ ሓይሊ ኣመሪካ ዝተዋህበ ርእይቶ ግን የለን።

    ኢራን፡ ዝዀነ ይዅን መጥቃዕቲ ኣመሪካ እንተ ኣጋጢሙዋ፡ ንዅሉ እቲ ኣብ ዞባ ማእከላይ ምብራቕ ዘሎ መደበራትን ረብሓታትን ኣመሪካ ዒላማ ገይራ ሕነኣ ክትፈዲ ምዃና ከተጠንቅቕ ጸኒሓ እያ።

11. 28 ለካቲት 2026ትራምፕ፡ ንኢራናውያን “መንግስትኹም እለዩ” ክብል ጸዊዑ

    ፕረዚደንት ትራምፕ ኣቐድም ኣቢሉ ብቪድዮ ኣብ ዘመሓላለፎ መልእኽቲ፡ ኢራናውያን ነቲ ኣመሪካን እስራኤልን ዘካይድኦ ዘለዋ መጠነ ሰፊሕ መጥቃዕቲ ተጠቒሞም ኣብቲ ሃገር ንዝርከብ ሃማኖታዊ ስርዓት ክኣልዩ ጸዊዑ።

    “ምስ ወዳእና፡ ንመንግስትኹም ኣልግሱዎ። ክትኣልዩዎ ናትኩም ግደ ክኸውን እዩ። እዚ ምናልባት ኣብ ወለዶታት ዝርከብ እንኮ ዕድልኩም ክኸውን ይኽእል እዩ፡” ክብል ገሊጹ።

    ብተወሳኺ፡ ንኣባላት ሓይልታት ጸጥታ ኢራን፡ ኣጽዋሮም እንተ ኣቐሚጦም “ከለላ” ከም ዝወሃቦም፣ እንተ ዘየሎ ግና “ሞት ከም ዘጋጥሞም፡” ኣጠንቂቑ።

    ትራምፕ ኣብ ፈለማ ጥሪ፡ ሓይልታት ጸጥታ ነቲ ኣብ መላእ እታ ሃገር ዝካየደ ንዝነበረ ተቓውሞ ጸረ-መንግስቲ ኣብ ዝጨፍለቕሉ እዋን፡ ንኢራን ከጥቅዓ ምዃኑ ኣፈራሪሑ ነይሩ።

    ኣብቲ ሰልፊ ተቓውሞ፡ ብውሕዱ 6,480 ሰባት ከም ዝሞቱ ተጣበቕቲ ሰብኣዊ መሰላት ይገልጹ።

    ትራምፕ፡ እቶም ነቲ ተግባራት ዝፈጸሙ፡ እቲ ሕነ ክፍደዩዎ ምዃኖም ብምጥንቃቕ፡ ነቶም ሰልፈኛታት “ሓገዝ ኣብ መንገዲ ከም ዘሎ” ኣተስፍዩዎም ነይሩ።

    እንተዀነ እቲ ፕረዚደንት፡ ድሕሪ መዓልታት እቲ ቅትለታት “ደው ከም ዝበለ” ካብ መንግስቲ መረጋገጺ ከም ዝተቐበለ ብምግላጽ፡ ኣተኵሮኡ ናብቲ ዘሰሓሕቦም ዝነበረ ጉዳይ ምምዕባል ንዩክለስ ኣዚሩ።

12. 28 ለካቲት 2026መጥቃዕቲ ሳይበር ኣብ ልዕሊ ኢራን

    ኣመሪካን እስራኤልን ብሓባር ኣብ ልዕሊ ኢራን ወተሃደራዊ መጥቃዕቲ ኣብ ዝኸፈታሉ፡ ምስ መንግስቲ ኢራን ዝተኣሳሰራ ማዕከናት ዜናን መርበባት ሓበሬታን ዒላማ ሳይበራዊ መጥቃዕቲ ከም ዝዀና ቻነል ተለግራም ናይቲ ጽኑዕ መርገጺ ዘለዎ መርበብ ሃምሻህሪ ሓቢሩ።

    እቲ ጸብጻብ፡ ጐድኒ ጐድኒ እቲ ወተሃደራዊ ምዕባለ፡ "ሰፊሕ ማዕበል" ስርሒታት ሳይበር ከም ዝተጀመረን ብርክት ዝበሉ ዓበይቲ መርበባት ሓበሬታ ውሽጢ ዓዲ ምዝባዕን ወይ ስርሒታዊ ጸገማት ከም ዘጋጠሞምን ገሊጹ።

    ብመሰረት እቲ ቻነል፡ መንግስታውን ሓውሲ መንግስታውን መርበባት ሓበሬታ ተጠቒዖም ኣለዉ፤ እዚ ማለት መንግስታዊ ማዕከን ዜና ኢርናን ሓውሲ ወግዓዊ ማዕከን ዜና ኢስናን ካብቶም ብሳይበራዊ መጥቃዕቲ ዝተሃርሙ ማዕከናት ዜና እዮም።

    ብተወሳኺ፡ ኣብ ኢራን ብሰፊሑ ዝጥቀምሉ መተግበሪ ዝጸሉ ምትዕንቓፍ ከም ዘሎ ዝሕብር ጸብጻባት ኣሎ፤ ብዛዕባ እንታይነት ወይ ምንጪ ናይቲ መጥቃዕቲ ግን ተወሳኺ ዝርዝር ሓበሬታ ኣይተዋህበን።

13. 28 ለካቲት 2026ድሕሪ መጥቃዕቲ እስራኤልን ኣመሪካን ኣብ ልዕሊ ቴህራን ዒግታ ትኪ ይርአ

14. 28 ለካቲት 2026ብማዕከናት ዜና ኢራን ዝተዘርግሑ ስእልታት ብዛዕባ እቲ ኣብ ቴህራን ዝተፈጸመ ፍንጀራታት

15. 28 ለካቲት 2026ናታንያሁ፡ ኣብ ኢራን ዘሎ ስርዓት ‘ንዩክለሳዊ ኣጽዋር ክዓጥቕ የብሉን’ ኢሉ

    ቀዳማይ ምኒስተር እስራኤል በንጃሚን ናታንያሁ ኣብ ዘውጽኦ መግለጺ፡ “ኣሕዋተይን ኣሓተይን ዜጋታት እስራኤል፡ እስራኤልን ኣመሪካን ነቲ ኣብኢራን ዘሎ ግብረሽበራዊ ስርዓት ዘስዕቦ ናይህላወ ስግኣት ንምእላይ ስርሒትጀሚረን ኣለውዋ፡" ኢሉ።

    “ንብሉጽ ዓርክና ፕረዚደንት ዶናልድ ትራምፕ ስለቲ ታሪኻዊ መሪሕነቱ አመስግኖ። ስርዓት ኣያቶላህ ን47 ዓመታት ‘ሞት ንእስራኤል’፡ ‘ሞት ንኣመሪካ’ እናበለ ክጭድር ጸኒሑ እዩ።”

    "ደምና ክዕዩ፡ ሓያሎ ኣመሪካውያን ቀቲሉ፡ ናይ ገዛእ ርእሱህዝቡ ድማኣህሊቑ። እዚ ቀታሊ ግብረሽበራዊ ስርዓት ንዅሉ ሰብኣውነት ኣብ ሓደጋ ከእቱ ዘኽእሎ ንዩክለሳዊ ኣጽዋር ክዓጥቕ የብሉን። ብሓባር እንወስዶ ስጕምትና ነቲ ተባዕ ህዝቢ ኢራን ዕድሉ ኣብ ኢዱ ዝጭብጠሉ ኵነታት ክፈጥር እዩ።"

    "ኵሎም ክፋላት ህዝቢ ኢራን - ፋርሳውያን፡ ኩርዳውያን፡ ኣዘርውያን፡ ባሉቺታውያን ኣሕዋዛውያን - ኣርዑት ምልኪ ደርብዮም ናጻን ሰላማዊትን ኢራን ዘምጽእሉ እዋን በጺሑ'ሎ።"

    "ዜጋታት እስራኤል ንመምርሒታት ትእዛዝ ግንባር ውሽጢ ሃገር ክትሰምዑ ጻውዒት እገብር። ኣብ ዝመጽእ መዓልታት፡ ኣብ ስርሒት 'ምጕዛም ኣንበሳ'፡ ኵላትና ኒሕን ጽንዓትን ክህልወና ክንሕተት ኢና።"

    "ብሓባር ደው ክንብል ኢና፣ ብሓባር ክንቃለስ ኢና፣ ብሓባር ድማ ዘልኣለማውነት እስራኤል ከነረጋግጽ ኢና።"

16. 28 ለካቲት 2026ሓሙሽተ ከተማታት ኢራን ብመጥቃዕቲ ኣመሪካን እስራኤልን ተሃሪመን

    ማዕከን ዜና ፋርስ ኢራን ኣብ ከተማታት እስፋሃን፡ ቁም፡ ካራጅን ከርማሻንን ከምኡ’ውን ኣብ ርእሰ ከተማ ቴህራን ፍንጀራ ከም ዝተሰምዐ ኣቕድም ኣቢላ ሓቢራ።

17. 28 ለካቲት 2026መጠንቀቕታ ሳይረን ኣብ እስራኤል ተሰሚዑ

    ኣብ መላእ እስራኤል፡ ብኣቈጻጽራ እቲ ከባቢ ሰዓት 08፡15፡ ስግኣት መጥቃዕቲ ሚሳይላት ዝሕብር መጠንቀቕታ ደወላት ‘ሳይረን’ ተሰሚዑ።

    እዚ እስራኤል ኣብ ልዕሊ ኢራን ዝገበረቶ መጥቃዕቲ፡ ኣብ መንጎ ሰበስልጣን ኣመሪካን ኢራንን ንንዩክለሳዊ መደባት ኢራን ንምግታእን ኲናት ንምክልኻልን ዘኽእል ስምምዕ ንብምብጻሕ ዲፕሎማስያዊ ጻዕርታት ኣብ ዝግበረሉ ዘሎ ግዜ ኰይኑ፡ ዝመጽእ ሰሙን እቲ ዘተ ክቕጽል ትጽቢት ነይሩ።

    ኢራን ኣብቲ ዝርርብ ገለ ሕድገታት ከም ዝገበረት እዩ ክግለጽ ጸኒሑ። እቲ ሰበስልጣን ኢራን ነቲ ዝቐረበ እማመታት ክቕበሉ እንተ ዘይኰይኑ ወተሃደራዊ መጥቃዕቲ ክግበር ምዃኑ ከፈራርሕ ዝጸንሐ ፕረዚደንት ኣመሪካ ዶናልድ ትራምፕ ብዙሕ ሕጉስ ከም ዘይኰነ ግን ትማሊ ገሊጹ ነይሩ።

    ትራምፕ፡ ድሕሪ’ቲ ኣብ 2003 ኣብ ልዕሊ ዒራቕ ዝተኻየደ ብኣመሪካ ዝምራሕ ወራር፡ ኣብ ማእከላይ ምብራቕ ዝዓበየ ወተሃደራዊ ህላወ ኣመሪካ ክህነጽ’ኳ እንተ ኣዘዘ፡ ኣድላይነት ናይዚ ሕጂ ዝካየድ ወተሃደራዊ ስጕምቲ ግን ክገልጽ ኣይከኣለን።

    ኢራን ብወገና፡ ንዝፍጸም ዝዀነ ይዅን መጥቃዕቲ ብሓይሊ ግብረመልሲ ክትህበሉ ምዃና እያ ክትገልጽ ጸኒሓ።

    ምኒስተር ምክልኻል እስራኤል - እስራኤል ካዝ፡ እቲ “መጥቃዕቲ ቅድመ-ምክልኻል”፡ “ኣብ ልዕሊ እስራኤል ክወርድ ዝነበረ ስግኣታት ንምእላይ እዩ፡” ኢሉ።

    ኣብ ዝሓለፈ ሰነ፡ እስራኤል ኣብ ልዕሊ ኢራን መጥቃዕቲ ብምፍጻማ፡ ናብቲ ናይ 12 መዓልታት ኲናት ኣምሪሑ። ኣመሪካ ኣብ መወዳእታ ምስ እስራኤል ኣብቲ ግጭት ብምጽንባር ንንዩክለሳዊ ትካላት ኢራን ዒላማ ገይራ።

    ቀዳማይ ምኒስተር በንጃሚን ናታንያሁ፡ ባሊስቲክ ሚሳይላት ኢራን ኣብ ልዕሊ ሃገሩ ዘስዕቦ ሓደጋ ብምግላጽ፡ ነቲ ኣብ ንዩክለሳዊ መደባት ኢራን ጥራይ ዘተኰረ ስምምዕ ተቓውሞኡ፡ ኣብ ዝሓለፈ ሰሙን ገሊጹ።

    ኢራን መደባት ባሊስቲክ ሚሳይል ንምድራት፡ ከምኡ’ውን ኣብ ቓዛ ንዝርከቡ ዕጡቓት ሓማስ፡ ኣብ ሊባኖስ ንሕዝቦላህ፡ ኣብ ዒራቕ ንዝርከቡ ምልሻታትን ኣብ የመን ከኣ ንሑቲን ንዝኣመሰሉ ወከልቲ ዕጡቓት እትገብሮ ደገፍ ከተቋርጽ ዝቐረበላ ሕቶ፡ ንልዑላውነታ ዝጥሕስ ብምዃኑ ብምግላጽ ነጺጋቶ እያ።

18. 28 ለካቲት 2026እስራኤል ንኢራን ኣጥቂዓ፡ ኣዋጅ ህጹጽ እዋን ኣዊጃ

    እስራኤል ኣብ ልዕሊ ኢራን ድሕሪ ዝተፈጸመ መጥቃዕቲ ክሊ ኣየርራ ንኹለን በረራታት ከም ዝዓጸወት ኣፍሊጣ።

    ሓያሎ ሃገራት ኣመሪካ ኣብ ልዕሊ ኢራን መጥቃዕቲ ከተካይድ ከም እትኽል ብምስጋእ፡ ኣብቲ ዞባ ንዝርከቡ ዜጋታተን ብዓርቢ መጠንቀቕታ ኣውጺአን።

19. 28 ለካቲት 2026እስራኤል ንኢራን ኣጥቂዓ

    እስራኤል፡ ሎሚ ቀዳም ንግሆ ‘ቅድመ-ምክልኻል’ ዝበለቶ መጥቃዕቲ ኣብ ልዕሊ ኢራን ከምዝፈጸመት፡ ኣፍሊጣ።

    ምኒስተር ምክልኻል እስራኤል ካዝ ኣብ መላእ እታ ሃገር “ፍሉይን ቀዋምን ኣዋጅ ህጹጽ እዋን” ኣዊጁ።

    በቲ ዝተኻየደ መጥቃዕቲ ኣብ ማእከል ከተማ ቴህራን ሰለስተ ፍንጀራታት ከም ዝተሰምዐ ማዕከናት ዜና ኢራን ኣቃሊሐን።

    ማዕከን ዜና ፋርስ፡ ሓያለ ሚሳይላት ኣብ ከባቢ ሪፓብሊክ ርእሰ ከተማ ኢራን ከም ዝተሃርመ ዝገልጽ ጸብጻባት ከምዝበጽሖ ገሊጹ።

20. 27 ለካቲት 2026ስእላዊ መግለጺ ናይቲ ኣብ ትግራይ ኣንጻር ቦርድ መረጻ ኢትዮጵያ ዝካየድ ዘሎ ሰለማዊ ሰልፊ

    ቦርድ መረጻ ኢትዮጵያ፡ ኣብተን ካብ ክልል ኣምሓራ ሕቶ ይግበኣኒ ዝልዓለለን ኣብ ትሐዕቲ ምምሕዳር ክልል ትግራይ ዝነበራ ከባቢታት፡ ካብ ግዝያዊ ምምሕዳር እቲ ክልል ወጻኢ ኮይነን ንባይቲ ተወከልቲ ህዝቢ መረጻ ከካይዳ ምውሳኑ ንምዅናን ኣብ ሓያለ ከተማታት ትግራይ ሰለማዊ ሰልፊ ይካየድ ኣሎ።

    ንገለ ካብቲ ዝውዓለ ሰለማዊ ሰልፊ ብስእሊ ከነካፍለኩም።