🔴ቀጥታ፡ ሓይልታት እስራኤል ጸረ-መጥቃዕቲ ብምክያድ ኣብ ውሽጢ ቓዛ ስርሒታት ጀሚሮም

ንሎሚ ከነመሓላልፎ ዝወዓልና ቀጥታዊ ሸፈነ ኩነታት እስራኤልን ፍልስጤማውያን ወሽመጥ ቓዛን ቅድሚ ምዝዛምና፡ ምስዞም ዝስዕቡ ቀንዲ ምዕባለታት ንሓደገኩም፣

ኣብ ናይ ጽባሕ ሰሉስ ሸፈነና ክሳብ ንራኸብ ድሓን ሕደሩ፡ ንገሌኹም ድማ ድሓን ውዓሉ. . . ።

ኣብ እስራኤል ዝርከቡ ኤርትራውያን ስደተኛታት ንግዳያት መጥቃዕቲ ሓማስ ዝኾኑ እስራኤላውያን ንምድጋፍ ጻዕርታት የካይዱ ኣለዉ።

ዕጡቓት ሓማስ ካብ ውሽመጥ ቓዛ ተበጊሶም ብባሕሪ፡ ምድርን ኣየርን ከካይድዎ ኣብ ዝጸንሑ መጥቃዕቲ ብውሕዱ 900 እስራኤላውያን ቀቲሎም ኣለዉ። ቁጽሮም ዘይተፈልጡ ካልኦት ከምዝቖሰሉን ጅሆ ተታሒዞም ከምዝተወስዱን ይግለጽ ኣሎ።

እስራኤል ኣብ ዝወሰደቶ ሕነ ናይ ምፍዳይ መጥቃዕቲ ድማ ብውሕዱ 600 ፍሊስጤማውያን ኣብ ወሽመጥ ቓዛ ተቐቲሎም፡ ካልኦት ኣሽሓት ድማ ቆሲሎም።

ገለ ኤርትራውያን ነቶም ኣብ ደቡብ እስራኤል በቲ መጥቃዕቲ ዝተሃስዩ ዜጋታት እታ ሃገር ዝኸውን ክዳውንቲ፡ ማይን ካልእ ኣገደስቲ ቀረባትን የተኣኻኽቡ ምህላዎም ንቢቢሲ ሓቢሮም።

ኣብ ከተማ ተል ኣቪቭ ዝነብር ወዲ 43 ዓመት ሓለፎም ሱልጣን ከምዝበሎ፡ እቲ ስጉምቲ ነቲ እስራኤላውያን ኣብ ልዕሊኦም ዘለዎም ኣሉታዊ ኣራኣእያ ክቕይር ተስፋ ከምዘለዎ ይዛረብ።

እስራኤል ብዕጡቓት ሓማስ ተታሒዙ ዝጸንሐ መዳውብቲ ውሽመጥ ቓዛ ዝኾነ መሬታ ምሉእ ብምሉእ ከምዝተቖጻጸረቶ ሰራዊት እታ ሃገር ኣፍሊጡ።

ሎሚ ንጉሆ ኣብ ዝተፋለለዩ ከባቢታት እስራኤል ኣብ መንጎ ሓይልታት እስራኤልን ፍልስጤማውያንን ዕጡቓት “ሓሓሊፉ” ውግእ ከምዝተኻየደ ኣፈኛ እቲ ሰራዊት ተዛሪቡ።

ዛጊት ብውሕዱ 700 እስራኤላውያን ተቐቲሎም ኣለዉ።

ብወገን ቓዛ ድማ ዛጊት 560 ሰባት ብደብዳባት ኣየር እስራኤል ከምዝተቐትሉ ጸብጻባት ካብታ ተኸርዲና ዘላ ዞባ ሓቢሮም።

ሚኒስትሪ ምክልኻል እስራኤል፡ ነታ ዞባ ኣብ ምሉእ ዕጽዋ ክትኣቱ ኣዚዙ’ሎ።

እስራኤል ዛጊት ኣስታት 300,000 ኣባላት ዕቑር ሰራዊት ኣኽቲታ ከምዘላ ይግለጽ ኣሎ።

ካብ ዝሓለፈ ቀዳም ጀሚሩ ልዕሊ 4000 ተወንጫፊ ሮኬታት ካብ ቓዛ ናብ እስራኤል ከምዝተተኮሰ ኣፈኛ ሰራዊት እስራኤል ሪር ኣድሚራል ዳኒኤል ሃጋሪ ጠቒሱ።

ዋጋ ነዳዲ ዓለም ብሰንኪ ኣብ ማእከላይ ምብራቕ ኣጋጢሙ ዘሎ ግጭት ፍሊስጤማውያንን እስራኤልን ዓቢ ናህሪ ኣርእዩ።

ሓደ በርሚል ዘይተጻረየ ነዳዲ ካብ 2.25 ዶላር ናብ 86.83 ዶላር ክብ ኢሉ’ሎ።

ዋላ’ኳ ብቐጥታ ካብ እስራኤልን ፍልስጤምን ንዕዳጋ ዓለም ዝወጽእ ነዳዲ’ኳ እንተዘየሎ፡ ብሓፈሻ ሓደ ሲሶ ነዳዲ ዓለም ካብ ማእከላይ ምብራቕ’ዩ ዝቐርብ።

ብባሕሪ፡ ኣየርን ምድርን ዝተፈነወ መጥቃዕቲ ሓማስ ኣብ ልዕሊ እስራኤል፡ ድሕሪ’ቲ ኣብ 1973 ዝተኻየደ ኲናት ‘ዩም ኩፑር’፡ እቲ ዝሓየለ ምዃኑ ይንገር ኣሎ።

ኣብ 1973 ግብጺን ሶርያን ዝርከባአን ሃገራት ዓረብ ኣብ ልዕሊ እስራኤል ሃንደበታዊ መጥቃዕቲ ብምፍናው ኣብ ልዕሊ ሰራዊት እስራኤል ከቢድ ጉድኣት ብምውራድ ሰፊሕ ከባቢታት ተቖጻጺረን ነይረን።

ብሰኑይ፡ ሚኒስትሪ ጸዓት እስራኤል ኣመሪካዊ ኩባንያ ነዳዲ ዘካይዶ ዝነበረ ምፍራይ ነዳዲ ከቋርጾ ኣዚዙ’ሎ። ኣብ ማያት ዝግበር ምፍራይ ባህርያዊ ጋዝ ግን ይቕጽል ኣሎ።

ምውሳኽ ዋጋ ነዳዲ ዓለም እቲ ኩነታት ናብ ዝሰፍሐ ግጭት ከየስዕብ ብምስግኡ ዝሰዓበ ምዃኑ ቁጠባዊ ተንተንቲ ይገልጹ።

ሚኒስተር ምክልኻል እስራኤል ዮኣቭ ጋላንት፡ ኣብ ምድረበዳ ቓዛ "ምሉእ ብምሉእ ኣብ ከበባ" ክኣቱ ከምዝኣዘዘ ኣፍሊጡ።

ነዚ ስዒቡ "ኤሌክትሪክ፣ መግቢን ነዳዲን ኣይክህሉን" ኢሉ።

እስራኤል ኣብ ልዕሊ ቓዛን ገማግም ባሕራን ዝርከብ ክሊ ኣየር ኣብ ምቁፅፃር ትርከብ።

ብመሳገሪ ዶባታ ድማ መንን እንታይ ሸቐጣትን ክኣቱን ክወጽእን ከም ዝሓልፍ ደሪታ።

ግብጺ'ውን ምስ ጋዛ ኣብ ዘራኽባ ዶብ መን ይኣቱን ይወጽእን ትቆፃፀር ኣላ።

ሓይልታት ጸጥታ እስራኤል ትማሊ ቀዳም ብፍልስጤማውያን ዕጡቓት ጅሆ ዝተወስዱ ንምድሓንን ከባቢታት ንምጽራይን ስርሒታት የካይዱ ኣለዉ።

እስራኤል፡ ድሕሪ ሃንደበታዊ መጥቃዕቲ ሓማስ ብዕጡቓት ፍልስጤማውያን ዝተወረሩ 22 ቦታታት ዳግማይ ከም ዝተቘጻጸሩን ኣብ ካልኦት ሸሞንተ ድማ ገና ስርሒት ይካየድ ከም ዘሎን ሰራዊት ሓቢሩ።

ድሕሪ ሓምሳ ዓመት፡ ካብቲ ብግብጽን ሶርያን ኣብ ልዕሊ እስራኤል ሃንደበታዊ መጥቃዕቲ ዝተካየደሉ ኲናት 'ዮም ኪፑር'፡ ዕጡቓት ፍልስጤም ዓቢ መጥቃዕቲ እዮም ኣካይዶም።

እዚ ናይ ሕጂ መጥቃዕቲ እውን ዘይተገመተ ሃንደበታዊ ኰይኑ፣ ኣብ መዓልቲ በዓል ኣይሁድ እዩ ተፈጺሙ ዘሎ።

ወሃቢ ቃል ሓይልታት ምክልኻል እስራኤል ከም ዝሓበሮ፡ ቍጽሪ እቶም ዕጡቓት ልዕሊ ኣማኢት ክኸውን እንከሎ፡ ልዕሊ 3 ሽሕ ሮኬታት ድማ ኣብ መላእ እስራኤል ናብ ዝርከባ ከተማታት ተተኲሱ’ዩ።

ሌተና ኮሎነል ጆናታን ኮንሪከስ፡ ትማሊ ቀዳም ኣብ ኤክስ ኣብ ዘካፈሎ ጽሑፍ፡ "ንዓሰርተታት ማሕበረሰባት እስራኤልን መደበራት ሰራዊት ምክልኻል እስራኤልን ኣጥቂዖም" ኢሉ።

ኣብ ዝተፈላለየ እዋን ብዝተፈላለየ ምኽንያት እስራኤላውያን ኣብ መላእ ዓለም ተበታቲኖም እዮም።

ጽዮናውነት ድማ ኣብ እስራኤል ንህዝቢ ኣይሁድ ዝኸውን ውሑስ ሃገር ንምፍጣር ዝዓለመ ብምዃኑ ምትእኽኻብ ኣይሁድ ዘተባብዕ እዩ።

ስለዝዀነ፡ ኣብ 1950 ንነፍሲ ወከፍ ኣይሁዳዊ ናይ ‘ዓልያ’ መሰል ዝህብ ሕጊ ምምላስ ኣይሁዳውያን ኣጽዲቓ።

እዚ፡ ዝዀነ ይዅን ኣይሁድ ናብ እስራኤል ክምለስን ብቐጥታ እስራኤላዊ ዜግነት ክረክብን መሰል ዝህብ እዩ።

እስራኤል፡ መዕቆቢ ኣይሁድ ክትከውን ጽዮናዊ ሕልሚ ነይርዋ።

ብምዃኑ ድማ ነዚ ሕልሚ ክተግህድ፡ ኣብ 1980ታትን 1990ታትን ኣብ መላእ ዓለም ዝርከቡ ኣይሁድ ናይ ምትእኽኻብ ስርሒታት ጀሚራ።

ኢትዮጵያውያን ኣይሁድ መን እዮም?

ኣብ መንጐ ወተሃደራት እስራኤልን ሓማስን ዝካየድ ውግእ ካልኣይ መዓልቱ ሒዙ ኣሎ።

እቲ ግጭት ብዝምልከት፡ ሓደስቲ ዓበይቲ ምዕባለታት እነሆ፤

እስራኤል፡ ሓማስ መጥቃዕቲ ምክያድ ካብ ዝጀመረሉ እዋን ኣትሒዙ ዛጊድ 1000 ሰባት ከም ዝተቐተሉ ተገሊፁ።

ብተወሳኺ ልዕሊ100 ሰባት ጅሆ ከም ዝተተሓዙን ልዕሊ 2000 ድማ ከም ዝቖሰሉን እስራኤል ኣፍሊጣ።

ሰበስልጣን ፍልስጤም ብወገኖም፡ ነፈርቲ እስራኤል ኣብ ምድረበዳ ቓዛ ልዕሊ 400 ሰላማውያን ሰባት ከም ዝቐተለ ሓቢሮም።

ዕጡቓት ፍልስጤማውያን ብቐዳም ናብ እስራኤል ድሕሪ ምእታዎም ብዝተፈጸመ መጥቃዕቲን ዝተወንጨፈ ኣሽሓት ሮኬታትን እስራኤላውያን ከም ዝተቐተሉ ተገሊፁ ነይሩ።

ኦፊር ሊብስታይን ዝተበሃለ መራሒ ሓደ ዞባዊ ባይቶ ደቡባዊ እስራኤል ምስ ዕጡቓት ብዝተገብረ ምልውዋጥ ተዅሲ ተቐቲሉ።