ካብ ሽልማት ግራሚ ናብ ቤት ማእሰርቲ፡ ዓበይቲ ፍጻመታት ሽልማት ግራሚ 2024

መበል 66 ዓመታዊ ሽልማት ግራሚ 2024 ብድምቀት እዩ ተዛዚሙ።

ቴይለር ስዊፍት ናይዚ ዓመት ብልጽቲ ኣልበም ንራብዓይ ግዜ ብምዕዋት ሓንቲ ካብተን ዓበይቲ ደረፍቲ ናይዚ ዘመና ምዃና ኣረጋጊጻ እያ።

ቴይለር ነታ ቀንዲ ሽልማት እኳ እንተወሰደት፡ ብመዐቀኒ ግራሚ ግን ናይ’ዚ ዓመት ሽልማት ብመጠኑ ምዕሩይ እዩ።

ከም በዓል ማይሊ ሳይረስ፡ ቢሊ ኣይሊሽ፡ ኤስዜኤን ቦይጂንየስን ዝኣመሰላ ፍቱዋት ሕጹያት ኵለን ሽልማት ረኺበን እየን።

ካልኦት ትጽቢት ዘይተገብረሎም ፍጻመታት’ውን ኣጋጢሞም እዮም።

ገለ ካብቶም ፍጻመታት እቲ "ድሙቕ ምሸት" እነሆ...

ቀንዲ ተሸለምቲ ግራሚ

ብልጽቲ ኣልበም ናይዚ ዓመት - ‘ሚድናይትስ’ ብቴይለር ስዊፍት

ቀረጻ ናይዚ ዓመት - ‘ፍላወርስ’ ብማይሊ ሳይረስ

ብልጽቲ ደርፊ ናይዚ ዓመት - ‘ዋት ዎዝ ኣይ ሜድ ፎር’ ብቢሊ ኣይሊሽ

ብልጽቲ ሓዳስ ስነጥበባዊ - ቪክቶርያ ሞኔት

ብልጽቲ ናይ ዓመት ደርፊ ካብ ቀረጻ ናይ ዓመት ዝተፈለየ እዩ - እቲ ቀዳማይ ንደረፍቲ ደርፍታትን ኣብ ድርሰት ንዝረኸብዎ ዓወትን ኣፍልጦ ዝህብ ክኸውን ከሎ እቲ ካልኣይ ድማ ንምፍራይ፡ ምህንድስናን ኣቀራርባን ኣብ ግምት ብምእታው ኣብ ቴክኒካዊ መስርሕ ቀረጻ ዘተኰረ እዩ።

ቴይለር ስዊፍት ታሪኽ ሰሪሓ

ቴይለር ስዊፍት ኣብ ናይ ሎሚ ዓመት ሽልማት ግራሚ ትኵረት ናይ’ቲ ምርኢት ተቖጻጺራ’ያ፡ ንሳ ንራብዓይ ግዜ ሽልማት ብልጽቲ ኣልበም ናይዚ ዓመት ዝተሸለመት ፈላመይቲ ስነጥበባዊት ኰይና።

እታ ኮኸብ ቅድሚ ሕዚ ሰለስተ ሽልማት ብምርካብ ምስ ስቲቪ ዋንደር፡ ፖል ሳይሞንን ፍራንክ ሲናትራን ማዕረ ኰይና ነይራ።

ቅድሚ ሕዚ ኣብ 2010 ብ’ፊርለስ’፡ ኣብ 2016 ብ’1989’፡ ኣብ 2021 ድማ ብ’ፎክሎር’ ብልጽቲ ኣልበም ናይ’ዚ ዓመት ተዓዊታ እያ።

ቴይለር ነዚ ሽልማት ካብታ ትጽቢት ዘይተገብረላ ሴሊን ዳዮን እያ ተቐቢላ። ኣብቲ ኣጋጣሚ ድማ ቴይለር ሓዳስ ኣልበማ ክትፍንው ምዃና ብምቅላዕ ንኣድነቕታ ኣሓጒሳ ኣላ።

"ንዝሓለፉ ክልተ ዓመታት ዝሓባኽኡዎ ምስጢር ብምንጋር ከመስግነኩም እደሊ" ኢላ።

እታ ሓዳስ እትፍንዋ ኣልበማ ‘ዘ ቶርቸርድ ፖይትስ ዲፓርትመንት’ ብዝብል ከምዝተሰመየት’ውን ገሊጻ።

ሰሊንን ቴይለርን ዘኽብር ጽምብል ተኻይዱ

ኣቐዲማ ሳሕቲ ዝረአ ናይ ስነ-ኣእምሮ ጸገም ዘጋጠማ ሴሊን ዳዮን፡ ንኹሉ ቀጥታዊ ምርኢታታ ክትስርዝ ተጊድዳ ዳርጋ ዓመት ድሕሪ ምጽናሓ፡ ሽልማት ብልጽቲ ኣልበም ከተቕርብ ምስ ተቐልቀለት ተዓዘብቲ ኣዝዮም ተገሪሞም እዮም።

ፍስሃ ዝመልኦ ኣቀባብላ ድማ ሂቦምዋ።

"ንኹልኹም የቐንየለይ፡ ኣነ’ውን እፈትወኩም እየ። ኣብዚ ስለዝተረኸብኩ ሕጉስቲ እየ ክብል ከለኹ፡ ብሓቂ ካብ ልበይ እዩ" ኢላ።

ኣብዚ ቀረባ እዋን ጥዕናኣ ናብ ንቡር ይምለስ ከምዘሎ ዝገልጽ ሰነዳዊ ፊልም ዕላዊ ገይራ እያ፤ ንኣድነቕታ ድማ "ናብ ምርኢት ዳግማይ ክትምለስ" ኣብ መንገዲ ከምዘላ ገሊጻ ነይራ።

ሴሊን ዳዮን፡ ቴይለር ስዊፍት ተዓዋቲት ብልጽቲ ኣልበም ምዃና ምስ ኣፍለጠት ድማ ማዕረ ማዕሪኡ ውዕዉዕ ምላሽ ረኺባ እያ።

"ንዓይ እቲ ሽልማት ባዕሉ እቲ ስራሕ'ዩ" ኢላ።

ፈላማይ ሽልማት ግራሚ ንማይሊ ሳይረስ

ማይሊ ሳይረስ ሽልማት ብልጽቲ ቀረጻ ናይዚ ዓመት ረኺባ እያ።

እቲ ሽልማት ንማይሊ ናይ መጀመርታኣ እዩ።

እዚ ሓቂ'ዚ ሓደ ካብ ግጥሚ ናይታ ደርፊ ናብ፡ "በቃ ናይ መጀመርታ ግራሚ ተዓዊተ!" ናብ ዝብል ብምቕያር’ያ ገሊጻቶ።

ንብዙሕ ሽልማት ትጽቢት ዝተገብረላ ኤስዚኤ

ኤስዚኤ ንትሽዓተ ሽልማት ተሓጽያ ኣብ ቅድሚት ተሰሪዓ ነይራ፡ ኣብ መወዳእታ ድማ ሰለስተ ሽልማት ረኺባ።

ኣብቲ ስነ-ስርዓት እውን ምርኢት ኣቕሪባ እያ።

ኣዝዩ ዘደንቕ ህሞት

ቻፕማን ኣብ 2009 ሓውሲ ጡረታ ካብ እትወጽእ ንደሓር ብኣጻብዕ ዝቑጸሩ ግዜ ጥራይ እያ ኣብ ቅድሚ ህዝቢ ምርኢት ኣቕሪባ።

ኣብ’ቲ ስነስርዓት ግራሚ ግን ምስቲ ዝሓለፈ ዓመት ‘ፋስት ካር’ ብትብል ደርፋ ህቡብ ዝዀነ ድምጻዊ ካንትሪ ሉክ ኮምብስ ተጸንቢራ።

ንሕንሕ ደቡብ ኣፍሪቃን ናይጀርያን

ደቡብ ኣፍሪቃዊ ድምጻዊት ታይላ ንኣርባዕተ ናይጀርያውያን ሕጹያት በሊጻ ኣብ ግራሚ ምዕዋታ ኣብ መንጎ ክልቲአን ሃገራት ብኩዕሶ እግሪ ዝተጀመረ ኣጋዲዱ ኣሎ።

"ደቡብ ኣፍሪቃ ሎሚ ተዓዊታ ናይጀርያ ግን ረቡዕ ኣብቲ ኣዝዩ ኣገዳሲ ዝዀነ ጸወታ ክትዕወት እያ" ክብል ሓደ ናይጀርያዊ ኣብ ኤክስ ጽሒፉ።

ታይላ ‘ዎተር’ ብዝብል ደርፋ እያ ብልጽቲ ምርኢት ሙዚቃ ኣፍሪቃ ተሸሊማ።

ናይጀርያውያን ድማ ሃገራዊት ጋንትኦም ሱፐር ኢግልስ፡ ኣብ ልዕሊ ደቡብ ኣፍሪቃ ሕነ ክትፈዲ ጸዊዖም ኣለዉ።

ካብ ሽልማት ግራሚ ናብ ቤት ማእሰርቲ

ሰለስተ ሽልማት ግራሚ ዝተዓወተ ኣሜሪካዊ ራፐር ኪለር ማይክ ኣብ ትሕቲ ቀይዲ ከምዝኣተወ ፖሊስ ሎስ ኣንጀለስ ኣፍሊጡ ነይሩ።

ወሃቢ ቃል ፖሊስ ሎስ ኣንጀለስ ማይክ ሎፔዝ ንኣሶሴይትድ ፕረስ ኣብ ዝሃቦ ሓበሬታ፡ እቲ ራፐር ኣብ ኣዳራሽ እቲ ስነ-ስርዓት ሽልማት ግራሚ ዝተፈጥረ ጎንጺ ስዒቡ ከምዝተኣሰረ ገሊጹ።

ወዲ 48 ዓመት ኪለር ማይክ ብማእሰርቲ ብዘየቕጽዕ ስሕትተ ተኸሲሱ ኣብ ቀይዲ ከምዝኣተወን ድሒሩ ከምዝተፈትሐን እቲ ወሃቢ ቃል ወሲኹ ሓቢሩ።

እቲ ራፐር ንምንታይ ከምዝተኣሰረ ዛጊት ንጹር ኣይኰነን።

ኣብ ማሕበራዊ መራኸቢታት ብሰፊሑ ዝተዘርግሑ ቪድዮታት፡ እቲ ድምጻዊ፡ ኣእዳዉ ተኣሲሩ ካብቲ ስነ-ስርዓት ሽልማት ክወጽእ እንከሎ የርእዩ።