ቓዛ፡ መጥቃዕቲ እስራኤል ትሽዓተ ደቂ ሓንቲ ማህጸን ቀቲሉ

እስራኤል ኣብ ቓዛ ብዘካየደቶ መጥቃዕቲ ኣየር ትሽዓተ ቆልዑት ደቂ ሓንቲ ማህጸን ከም ዝቐተለ፡ እታ ኣደ ትሰርሓሉ ሆስፒታል ኣፍሊጡ።

እታ ኣደ ብሞያ ሓኪም ክትከውን እንከላ ካብቶም ዓሰርተ ደቃ ብጀካ ሓደ ብህይወት ዝድሓነ ኩሎም በቲ መጥቃዕቲ ኣየር ከም ዝሞቱ ተፈሊጡ።

እታ ዶክተር ካን ዮኒስ ኣብ ዝርከብ ሆስፒታል ናስር ትሰርሕ ኮይና ሓደ ወዳን በዓል ቤታን'ውን ግዳያት እቲ ሓደጋ'ኳ እንተኾኑ ብህይወት ከም ዝተረፉ ገሊጹ።

ነቲ ብህይወት ዝጸንሐ ወዲ 11 ዓመት ወዳ መጥባሕቲ ዝገበረ ኣብቲ ሆስፒታል ዝሰርሕ ብሪጣንያዊ ሓኪም ግሬም ግሩም ንቢቢሲ ኣብ ዝሃቦ ሓበሬታ፡ እታ ናይ ህጻናት ሓኪም ኮይና መዋእላ ህጻናት እናኣለየት ዝመጽአት ዶክተር ብሰንኪ ሓደ መጥቃዕቲ ሚሳይል ዳርጋ ኩለንተንኣ ከም ዝሰኣነት ንቢቢሲ ገሊጹ።

ወተሃደራዊ ሓይሊ እስራኤል፡ ነፈርቱ ብዓርቢ ኣብ ካን ዩኒስ "ብዙሓት ጥርጡራት" ከም ዝሃረማን፡ "እቲ ኣብ ልዕሊ ሰላማውያን በጺሑ ዝተባህለ ጉድኣት ዝምልከት ክሲ ኣብ ምጽራይ ከምዘሎን" ገሊጹ።

ሓላፊ ናይቲ ብሓማስ ዝመሓደር ሚኒስትሪ ጥዕና ዘካፈሎን ብቢቢሲ ዝተረጋገጸን ቪድዮ፡ ኣብ ካን ዩኒስ ብዝተፈጸመ መጥቃዕቲ ካብ ፍርስራስ ዝተቓጸሉ ንኣሽቱ ሬሳታት ከም ዝተልዓሉ ዘርኢ እዩ።

ሓይልታት ምክልኻል እስራኤል፡ ነፈርቱ ኣብ ከባቢ ካን ዩኒስ "ምስ ወተሃደራት ምክልኻል እስራኤል ካብ ዝዳወብ ከባቢ ዝንቀሳቐሱ ዝነበሩ ብርክት ዝበሉ ጥርጡራት ወቒዐን" ኢሉ።

"ከባቢ ካን ዩኒስ ሓደገኛ ናይ ኲናት ዞባ'ዩ። ኣብኡ ስርሒታት ቅድሚ ምጅማሩ፡ ሰራዊት ምክልኻል እስራኤል ሰላማውያን ሰባት ንድሕነቶም ክብል ካብዚ ከባቢ ኣውጺኡ'ዩ" ይብል።

ሰራዊት ምክልኻል እስራኤል ትማሊ ቀዳም ኣብ ዘውጽኦ ሓፈሻዊ መግለጺ፡ ኣብ ዝሓለፈ መዓልቲ ኣብ መላእ ቓዛ ልዕሊ 100 ዕላማታት ከም ዝወቕዐ ገሊጹ።

እቲ ብሓማስ ዝመሓደር ሚኒስትሪ ጥዕና ብወገኑ፡ ሎሚ ሰንበት ብውሕዱ 74 ሰባት ብሰራዊት እስራኤል ከም ዝተቐትሉ ሓቢሩ።

ዳይረክተር ሚኒስትሪ ጥዕና ዶክተር ሙኒር ኣልቦርሽ ኣብ ኤክስ ኣብ ዝሃቦ መግለጺ፡ በዓል ቤት ዶክተር ኣልናጃር ሓምዲ ንበዓልቲ ቤቱ ብመኪና ናብ ስራሕ ኣብጺሑ ድሕሪ ምምላሱ ኣብ ዝነበራ ሒደት ደቓይቕ ገዛ ስድራቤት ኣልናጃር ከም ዝተሃርመ ኣፍሊጡ።

ኣብ ሆስፒታል ናሰር ዝሰርሕ ካልእ ብሪጣንያዊ ናይ መጥባሕቲ ሓኪም ቪክቶርያ ሮዝ ኣብ ኢንስታግራም ኣብ ዝዘርግሖ ቪድዮ፡ ኣቦ እቶም ህጻናት "ኣዝዩ ብከቢድ ቆሲሉ" ኢሉ።

ንሱ ንቢቢሲ ኣብ ዝሃቦ ሓበሬታ፡ እቲ ኣቦ "ኣብ ውሽጣዊ ክፋል ርእሱ መጉዳእቲ" ከም ዝበጽሖ ገሊጹ።

ብዛዕባ እቲ ኣቦ ኣብቲ ሆስፒታል ካብ ዝሰርሑ ሰባት ሓቲቱ ዝረኸቦ ምላሽ "ፖለቲካውን ወተሃደራውን ርክብ ከም ዘይብሉን ኣብ ማሕበራዊ መራኸቢታት ጐሊሑ ዝረአ ከም ዘይመስልን" ከም ዝተነግሮ ገሊጹ።

ንዶክተር ኣላኣ ኣል-ናጃር "ክትሓስቦ ዘይትኽእል" ኩነታት ክብል ገሊጽዎ።

እቲ ብህይወት ዝተረፈ ወዲ 11 ዓመት ቆልዓ፡ ዕድሚኡ "ኣዝዩ ንእሽቶ" ምዃኑ ገሊጹ።

"ጸጋማይ ቅልጽሙ ተንጠልጢሉ እዩ ነይሩ፡ ብቑርጽራጽ መጉዳእቲ ተሸፊኑ፡ ሓያሎ ብርክት ዝበሉ ውቃዓት ነይርዎ" ክብል ንቢቢሲ ተዛሪቡ።

"ክልቲኦም ወለዱ ሓካይም ስለ ዝኾኑ፡ ኣብ ቓዛ ካብቶም ዝሓሸ ዕድል ዘለዎም ስድራቤት ዝመስል'ኳ እንተነበረ ኣብ ጠረጴዛ መጥባሕቲ ክንገበረሉ ኢልና ክንልዕሎ ከለና ግን ካብ 11 ዓመት ኣዝዩ ዝነኣሰ ኮይኑ ተሰሚዑና" ኢሉ።

ወሃቢ ቃል ብሓማስ ዝመሓደር ትካል ሲቪል ምክልኻል ቓዛ፡ ማሕሙድ ባሳል ብዓርቢ ድሕሪ ቀትሪ ኣብ ቴሌግራም ኣብ ዝሃቦ መግለጺ፡ ጋንታታቱ ካብቲ ኣብ ካን ዩኒስ ኣብ ጥቓ መዐደሊ ነዳዲ ዝርከብ ገዛ ኣል-ናጃር ሸሞንተ ሬሳታትን ሓያሎ ጉዱኣትን ከም ዝረኸበን ሓቢሩ።

እቲ ሆስፒታል ፈለማ ኣብ ፌስቡክ ሸሞንተ ህጻናት ከም ዝተቐትሉ ዝለጠፈ ኮይኑ፡ ድሕሪ ክልተ ሰዓታት ነቲ ቁጽሪ ናብ ትሽዓተ ከም ዘዕበዮ ተገሊጹ።

ካልእ ዶክተር ዩሱፍ ኣቡ ኣልሪሽ፡ ብመገዲ ሚኒስትሪ ጥዕና ኣቢሉ ኣብ ዝሃቦ መግለጺ፡ ዶክተር ኣል-ናጃር ብዛዕባ ብህይወት ዝተረፈ ወዳ ሓበሬታ ክጽበ ኣብ ክፍሊ መጥባሕቲ ከም ዝበጽሐን ከጸናንዓ ከም ዝፈተነን ገሊጹ።

ሓዋ ዩሱፍ ኣል-ናጃር ብማዕከን ዜና ኤኤፍፒ ኣብ ዝተቐድሐ ቃለ መሕትት "ይኣክል! ምሕረት ይግበረልና! ንኹለን ሃገራት፡ ማሕበረሰብ ዓለም፡ ህዝቢ፡ ሓማስን ኩለን ውድባትን ምሕረት ክግበረልና ንልምን" ኢሉ።

እቲ ሓዋ ወሲኹ "ብምፍንቓልን ጥምየትን ተዳኺምና ኣለና፡ ይኣኽለና!" እናበለ ይምሕጸን።

ብዓርቢ ጸሓፊ ሕቡራት ሃገራት ኣንቶንዮ ጉተረዝ፡ ኣብ ቓዛ ዝርከቡ ሰባት "እቲ ዝኸፍአን ጭካነ ዝተመልኦን ምዕራፍ" ናይቲ ኲናት ይጻወርዎ ከም ዘለዉ ብምግላጽ፡ እስራኤል ኣብ ወርሒ መጋቢት ኣብ ልዕሊ ሰብኣዊ ሓገዛት ዝገበረቶ እገዳ'ውን ኮኒኑ።

እስራኤል ኣብ መጀመርታ ናይዚ ሰሙን ነቲ እገዳ ብኸፊል ዘልዓለቶ ኮይና ወተሃደራዊ ኣካል እስራኤል ትማሊ ዓርቢ 83 ተወሰኽቲ ናይ ጽዕነት መካይን ሓርጭ፣ መግቢ፣ ናውቲ ሕክምና መድሃኒታት ዝጸዓና ናብ ቓዛ ከም ዝኣተዋ ሓቢሩ።

ሕቡራት ሃገራት ብተደጋጋሚ እቲ ዝኣቱ ሓገዝ ን2.1 ሚልዮን ህዝቢ እቲ ግዝኣት ዝኣክል ከም ዘይኮነ ብምግላጽ - ኣብ መዓልቲ ካብ 500 ክሳብ 600 ናይ ጽዕነት መካይን ከም ዘድልያ ብምግላጽ - እስራኤል ድማ ካብዚ ንላዕሊ ክትፈቅድ ጸዊዑ።

ኣብዚ ሰሙን ናብ ቓዛ ዝተልኣኸ ውሱን መጠን መግቢ ህውከት ዝተመልኦ ትርኢታት ኣለዓዒሉ።

ዕጡቓት ንሓደ ናይ ረድኤት ማእከል ከጥቅዑን ፍልስጤማውያን ድማ ባኒ ንምርካብ ኣብ ደገ እንዳ ዳቦ ተጨናኒቖምን ይረኣዩ።

ኣብዚ ወርሒ ብሕቡራት ሃገራት ዝድገፍ ገምጋም፡ ህዝቢ ቓዛ ከቢድ ናይ ጥሜት ሓደጋ ኣንጸላልይዎ ከምዘሎ ይገልጽ።

ኣብ ቓዛ ዝርከቡ ሰባት መግቢ ከም ዘይብሎም ንቢቢሲ ዝሓበሩ ኮይኖም ሕጽረት መግቢ ዘለወን ኣዴታት ድማ ንህጻናት ጡብ ከጥብዋ ኣይክእላን እየን።

እስራኤል እቲ ኣብ ልዕሊ ሓማስ ዝወሰደቶ ናይ እገዳ ስጉምቲ፡ ነቶም ክሳብ ሕጂ ኣብ ቓዛ ተታሒዞም ዘለዉ ጅሆ ንምፍታሕ ጸቕጢ ንምፍጣር ዝዓለመ ምዃኑ ገሊጻ።