அண்ணாமலையின் ட்விட்டால் காரசார விவாதம் - 'சிறுவர் டி.வி. நிகழ்ச்சியில் நரேந்திர மோதி அவமதிப்பு'

தமிழகத்தில் தனியார் தொலைக்காட்சி ஒன்றில் நடந்த சிறுவர்கள் பங்கேற்கும் பொழுதுபோக்கு நிகழ்ச்சி ஒன்றில் குழந்தைகள் இருவர் நிகழ்ச்சியில் செய்த 2 நிமிடம் 20 வினாடி உரையாடல் ஒன்று சமூக வலைதளங்களில் அதிகமாக பகிரப்பட்டு வருகிறது. இது பெரும் அரசியல் மோதலுக்கு வித்திட்டிருக்கிறது.

இந்தக் காணொளியை திமுகவின் தர்மபுரி நாடாளுமன்ற உறுப்பினர் செந்தில்குமார் தனது ட்விட்டர் பக்கத்தில் பகிர்ந்துள்ளார்.

அந்தக் காணொளியில் ஒரு சிறுவர் கூறும்போது, "நம் நாட்டின் வளர்ச்சிக்கு எது தடையாக இருக்கிறது என்றால் அது கருப்பு பணம். அதனால் அனைத்து பணத்தையும் செல்லாது என்று சொல்லிவிடப் போகிறேன். அப்படி செய்தால் கருப்பு பணம் ஒழிந்துவிடும்" என்று சொல்லி சிரிக்கிறார். இப்படியாக அந்தக் காணொளி 2 நிமிடம் 20 வினாடி தொடர்கிறது.

இந்த விவகாரம் சம்பந்தமாக தமிழக பாஜக தலைவர் அண்ணாமலை அவர்கள் ஒரு ட்வீட் செய்துள்ளார். அந்த ட்வீட்டில் தமிழகத்தில் ஒரு ரியாலிட்டி டிவி ஷோவில், பாரத பிரதமர் மாண்பை குறைப்பது போல் சில காட்சிகளை வைத்திருப்பதைப் பற்றி மத்திய இணையமைச்சர் முருகன் அவர்கள் கேட்டறிந்தார் என்றும் அது சம்பந்தமாக நடவடிக்கை எடுப்பதாக உறுதி அளித்து இருப்பதாகவும் பதிவிட்டிருந்தார்.

முன்னதாக திமுக தர்மபுரி நாடாளுமன்ற உறுப்பினர் செந்தில் குமார் பகிர்ந்து இருந்து ட்வீட்டை ஸ்க்ரீன் ஷாட் எடுத்து, அதில் மத்திய இணை அமைச்சர் முருகன் அவர்களை டேக் செய்து பாஜகவின் காயத்ரி ரகுராம் பதிவிட்டிருந்தார்.

"அவர்கள் குழந்தைகளுக்கும் பார்வையாளர்களுக்கும் அவமரியாதை செய்திகளை ஊட்டுகிறார்கள். இது போன்ற செயல்களை பெற்றோர்கள் ஊக்குவிக்கிறார்கள். நிகழ்ச்சி இயக்குனர்கள் பொறுப்பற்றவர்கள் என்றும், திமுக எம்.பி தனது அரசியல் ஆதாயத்துக்காக இதுபோன்ற வீடியோக்களை பகிர்ந்து கொள்கிறார்" என்றும் குறிப்பிட்ட தனியார் தொலைக்காட்சி மீது நடவடிக்கை எடுக்க வேண்டும் என்றும் பதிவிட்டிருந்தார்.

இந்த விவகாரம் தொடர்பாக பல்வேறு ட்வீட்கள் சமூக வலைத் தளங்களில் பகிரப்பட்டு விவாதிக்கப்பட்டு வருகிறது. புதிய விவாதத்தையும் உருவாக்கி இருக்கிறது.

பிற செய்திகள்:

சமூக ஊடகங்களில் பிபிசி தமிழ்: