Milipuko Uganda: Sita wauawa wakiwemo washambuliaji watatu

Moja kwa moja

Ambia Hirsi

1. 16 Novemba 2021Aung San Suu Kyi anatunzwa vyema: Jeshi Myanmar

   Jeshi la Myanmar limeambia BBC kwamba mamlaka haimtelekezi kiongozi aliyeondolewa madarakani Aung San Suu Kyi.

   Kiongozi huyo wa zamani mwenye umri wa miaka 76- hajaonekana hadharani tangu mapinduzi ya kijeshi ya Februari yaliyomuondoa mamlakani .

   Mahojiano ya BBC na msemaji wa jeshi Meja Jenerali Zaw Min Tun yanakuja baada ya kuachiliwa kwa mwanahabari wa Marekani Danny Fenster ambaye alikuwa amehukumiwa kifungo cha miaka 11 gerezani.

   Makumi ya wanahabari na maelfu ya watu wamezuiliwa tangu mapinduzi hayo yalipofanyika.

   Meja Jenerali Zaw Min Tun amesema Bi. Suu Kyi anatunzwa vizuri kizuizini.

   "Namaanisha tulimuacha aishi na watu wake kwenye nyumba ingawa yuko chini ya kizuizi cha nyumbani," alisema. "Tunajaribu tuwezavyo kwa ajili yake, kile anachotaka au chochote anachotaka kula.

   Bi Suu Kyi ameshtakiwa kwa kuvunja sheria rasmi ya siri ya enzi ya ukoloni. Pia anakabiliwa na mashtaka ya ufisadi na kumiliki mazungumzo haramu.

   Siku ya Jumanne, vyombo vya habari vya serikali viliripoti kwamba alikuwa anakabiliwa na shtaka la ziada: udanganyifu katika uchaguzi, unaohusiana na uchaguzi wa 2020 ambapo chama chake kilishinda kwa kishindo.

   Amefikishwa mahakamani lakini hajatoa tamko lolote kando na maonyesho hayo mafupi.

   Umoja wa Mataifa umetoa wito wa kuachiliwa kwake.

   Aung San Suu Kyi: Mfahamu mpiganiaji wa Demokrasia aliyepinduliwa Myanmar

   Jeshi laidhibiti Myanmar baada ya kumshikilia Aung San Suu Kyi

2. 16 Novemba 2021Kenya yatangaza zawadi kwa habari za kukamatwa kwa wafungwa 'hatari' waliotoroka jela

   Mamlaka nchini Kenya imetangaza zawadi kwa atakayetoa taarifa zitakazosaidai kukamatwa kwa wafungwa "hatari" waliotoroka jela walimokuwa wakishikiliwa kwa tuhuma zinazohusiana na ugaidi.

   Watatu hao ni Mohamed Ali Abikar, Musharaf Abdalla,na Joseph Juma Odhiambo.

   Mmoja wao, Abikar alihusika katika shambulio la Chuo Kikuu cha Garissa April 2, 2015 ambalo lilisababisha vifo vya zaidi ya wanafunzi 100.

   Abdalla alikuwa anazuiliwa kuhusiana na shambulio lililofeli katika bunge la Kenya na Odhiambo alikuwa amekamatwa kwa kuwasajili vijana katika kundi la wanamgambo wa al-Shabab, ilani iliyotolewa na polisi ilisema.

   Wafungwa hao walitoroka kutoka kwa Gereza Kuu la Kamiti viungani mwa mji mkuu, Nairobi, Jumatatu saa 01:00 kwa saa za huko.

   Polisi wanatoa zawadi ya shilingi milioni 60 za Kenya sawa na ($535,000:£398,000) kwa habari zitakazowezesha kukamatwa kwa wote watatu.

   Kenya imewahi kukumbwa na mashambulizi ya kigaidi yaliyopangwa na kutekelezwa na wanamgambo wa al-Shabab.

   Mashambulio ya mabomu ya 1998: Al shabaab iliwezaje kushambulia maeneo ya ndani ya afrika mashariki?

   Mashambulio ya mabomu ya 1998: Kenya imelipia gharama ya juu ya maisha katika vita dhidi ya Ugaidi?

   Mashambulio ya mabomu ya 1998: Kenya na Tanzania zajipata katika kampeni ya vita dhidi ya ugaidi

3. 16 Novemba 2021Mazungumzo ya Biden-Xi: Viongozi wahitimisha mkutano kwanza kupitia mtandaoni

   Rais wa Marekani Joe Biden na mwenzake wa China Xi Jinping wamehitimisha mkutano wao wa kwanza wa ana kwa ana wa mtandaoni, vyombo vya habari vya serikali ya China vilisema.

   Mkutano huo ulikuja huku mvutano ukiongezeka kati ya nchi hizo mbili kuhusu masuala kama vile Taiwan, biashara na haki za binadamu.

   Bw Biden alisema nchi zote mbili zina jukumu la kuhakikisha kuwa ushindani wao "hauendi kwenye mzozo wa wazi".

   Mazungumzo ya Jumanne ndio majadiliano muhimu zaidi ambayo viongozi wote wawili wamekuwa nayo tangu Bw Biden aingie madarakani Januari.

   Msemaji wa Wizara ya Mambo ya Nje ya China Hua Chunying aliuelezea mkutano huo kuwa "wenye kujenga na wenye tija", na kuongeza kuwa ulisaidia "kuongeza maelewano".

   Mkutano huo ulianza kwa viongozi wote wawili kusalimiana kwa furaha, huku Bw Xi akisema anafurahi kumuona "rafiki yake wa zamani" Biden.

   Kwa upande wake, Bw Biden alisema, "Labda nianze rasmi zaidi, ingawa mimi na wewe hatujawahi kuwa rasmi .." kulingana na ripoti ya Reuters.

   Joe Biden na Xi Jinping: Wanachotaka kutoka kwa mazungumzo

4. 16 Novemba 2021Genge linalotumia pikipiki lawaua watu 15 nchini Nigeria

   Watu waliokuwa wakiendesha pikipiki wamewaua kwa risasi raia 15 na kuwajeruhi wengine wengi katika jimbo la Sokoto, kaskazini magharibi mwa Nigeria.

   Mauaji hayo yametokea alfajiri ya Jumatatu.

   Gavana wa jimbo hilo, Aminu Tambuwal, ambaye alithibitisha mashambulizi hayo katika taarifa yake, alisema wahasiriwa 13 waliuawa katika mji wa Illela kwenye mpaka na Niger

   Wengine wawili waliuawa katika shambulio tofauti huko Goronyo - mji ambapo watu wenye silaha walifanya shambulio kubwa mwezi uliopita, na kuua zaidi ya watu 40 sokoni.

   Ripoti zilionyesha kuwa wakaazi wengi wamekimbia kutoka kwa nyumba zao kufuatia mashambulio ya hivi punde.

   Jimbo hilo linakabiliwa na wimbi la mauaji na utekaji nyara kwa ajili ya kulipwa fidia na magenge yenye silaha, ambayo yanaendelea licha ya kutumwa kwa maelfu ya vikosi vya usalama.

   Mwishoni mwa juma, wanamgambo wenye uhusiano na kundi linalojiita Islamic State waliwaua wanachama kadhaa wa vikosi vya usalama vya Nigeria akiwemo jenerali wa jeshi katika shambulizi la kuvizia katika jimbo la Borno.

   Boko Haram: Hizi ndizo sababu sita za serikali ya Nigeria kushindwa kuliangamiza kundi la kigaidi la Boko Haram

   Fahamu kwanini Nigeria, Mali, Burkina faso ,Niger, Chad na Cameroon zinalemewa na makundi yaliyojihami

5. 16 Novemba 2021Hujambo na karibu kwa matangazo yetu ya moja kwa moja hii leo Jumanne tarehe 16 Novemba 2021