Rigathi Gachagua: Wabunge wapiga kura kuamua hatma ya naibu wa Rais

Moja kwa moja

Na Asha Juma, Lizzy Masinga, Dinah Gahamanyi &Seif Abdalla

1. 8 Oktoba 2024Waziri Mkuu wa zamani wa Lebanon asema nchi yake imetelekezwa na jumuiya ya kimataifa

   Aliyekuwa waziri mkuu wa Lebanon wakati wa vita vyake vya mwisho na Israel mwaka 2006 ameambia BBC kuwa nchi yake imetelekezwa na jumuiya ya kimataifa.

   Fouad Siniora alisema ni jambo lisilokubalika kuiacha Lebanon isambaratike, na kulikuwa na ukosefu wa kujitolea linapokuja suala la kujaribu kurejesha amani.

   “Sasa tuko katika hali ngumu sana inayohitaji juhudi za kweli ndani ya nchi, pia kwa upande wa Waarabu na kimataifa.

   "Unaweza kushinikiza mambo - wakati mwingine hadi kufikia hatua ya kukaribia kusambaratika - katika janga kubwa bila kutambua baadaye itakuwa inamaanisha nini.

   "Inatokea wakati utawala wa Marekani una shughuli nyingi na uchaguzi.

   "Na hatuna uwezo wa kumchagua rais, kwa sababu baadhi ya makundi hasa Hezbollah, yamekuwa yakisisitiza kwamba wanataka rais ambaye hatakuja kusaliti kundi hilo baadaye," Siniora alisema.

   Vita vya mwisho kati ya Lebanon na Israel, karibu miaka 20 iliyopita, vilianza pale wapiganaji wa Hezbollah walipovuka mpaka na kuwashambulia wanajeshi wa Israel.

   Wawili walitekwa nyara na watatu waliuawa, na kusababisha vita vya mwezi mzima.

   Katika siku zilizofuata, Siniora alitoa taarifa kwa umma kuitenganisha serikali ya Lebanon na kile kilichotokea.

   Anafikiria, viongozi wa sasa wa nchi wameshindwa kufanya kile ambacho raia waliwaamini nacho, kufanya kama ilivyotokea wakati ule.

   "Serikali hii haikufanya kile ambacho serikali yangu ilifanya siku hiyo. Serikali yangu ilikuwa wazi na ilidhamiria kusema kwamba hatukujua, na hatukuwa tumearifiwa juu ya mpango wa Hezbollah wa kuvuka mpaka na kuteka nyara na kuua wanajeshi wa Israel.

   "Wakati huu hakujakuwa na hatua yoyote iliyofanywa na serikali ya Lebanon. Faida ya tulichofanya ni kwamba tuliweka mpaka kati ya serikali ya Lebanon na Lebanon upande mmoja, na Hezbollah kwa upande mwingine," alielezea.

   Siniora hajaegemea upande wowote katika tathmini yake ya uhuru uliopotea wa Lebanon.

   "Kiuhalisia, Lebanon kama taifa imetekwa nyara na Hezbollah. Na nyuma ya Hezbollah ni Iran.

   "Bunduki hii iliyokuwa inashikiliwa na Hezbollah, badala ya kunyooshewa Israel, ilianza kunyooshewa ndani ya nchi na ikaanza kutumika kama njia ya Iran kuingilia Syria, Iraq na Yemen. Lebanon haiwezi kujihusisha na vita vya namna hiyo.

   " Siniora pia alikuwa mmoja wa wasanifu wa azimio la UN 1701, makubaliano ambayo yalimaliza vita vya 2006.

   Soma zaidi:

   Uvamizi wa Lebanon: Je! Jeshi la Lebanon liko wapi wakati Israel inavamia?

   Unachopaswa kujua kuhusu mzozo kati ya Israel na Hezbollah

2. 8 Oktoba 2024'Jinsi Israeli inavyojilinda ni muhimu,' asema Kamala Harris

   Makamu wa Rais wa Marekani Kamala Harris amefanya mahojiano ya dakika 60 na shirika la habari la CBS News ambapo amebanwa kuhusu masuala kama vile Mashariki ya Kati, Ukraine, umiliki wa bunduki na uhamiaji.

   Katika mahojiano hayo yaliyorekodiwa, Harris aliulizwa nini Mashariki ya Kati inaweza kufanya kuzuia vita kuenea au hata kufikia kiwango cha "kutoweza kudhibitika".

   "Israel ina haki ya kujilinda," alisema. "Tungefanya hivyo. Na namna inavyofanya hivyo ni muhimu. Wapalestina wengi mno wasio na hatia wameuawa. Vita hivi lazima vikome," Harris alijibu.

   Pia aliulizwa jinsi Marekani ilivyomwomba Waziri Mkuu wa Israel Benjamin Netanyahu kukubali kusitishwa kwa mapigano, ili kutoingia Lebanon - lakini maombi yote mawili yamepuuzwa.

   Harris alisema Marekani "haitaacha kutafuta kile ambacho ni muhimu kwa Marekani, kuwa wazi kuhusu wapi tunasimama ili vita hivi viishe".

   Aliongeza kuwa muungano wa Israel na Marekani bado ni imara.

   Soma zaidi:

   Israel yaadhimisha mwaka mmoja tangu shambulio la Hamas huku mapigano yakiendelea

   Jeshi la Israel lashambulia maeneo ya Hamas kote Ukanda wa Gaza - msemaji wa jeshi la Israel

   Makumbusho yafanyika mwaka mmoja tangu kutokea kwa shambulizi la Hamas

3. 8 Oktoba 2024Israel yaadhimisha mwaka mmoja tangu shambulio la Hamas huku mapigano yakiendelea

   Israel imefanya sherehe za kuwakumbuka wahanga wa mauaji ya watu na utekaji nyara uliofanywa na Hamas tarehe 7 Oktoba 2023, huku mapigano yakiendelea katika Ukanda wa Gaza na Lebanon.

   Mwaka mmoja baada ya shambulio hilo - ambalo lilishuhudia takriban watu 1,200 wakiuawa na 251 kuchukuliwa mateka - Waziri Mkuu wa Israel Benjamin Netanyahu aliapa kusitisha shambulio kama hilo kutokea tena, akisema vikosi vya kijeshi vya Israel "vilikuwa vinabadilisha uhalisia wa hali ya usalama" eneo hilo.

   Tangu tarehe 7 Oktoba, karibu watu 42,000 wameuawa wakati wa mashambulizi ya Israel huko Gaza, kulingana na wizara ya afya inayoendeshwa na Hamas.

   Wakati siku ya kumbukumbu hiyo ikiendelea, Israel ilisema imenasa zaidi ya makombora 100 yaliyorushwa na Hezbollah nchini Lebanon pamoja na makombora yaliyorushwa na Wahouthi wa Yemen na Hamas huko Gaza.

   Oktoba iliyopita, watu wenye silaha kutoka Hamas huko Gaza walivunja uzio wa mpaka na kuvamia vijiji vya karibu vya Israel, Kibbutzim, vituo vya kijeshi na tamasha la muziki la Nova.

   Siku ya Jumatatu, familia za mamia waliouawa na makumi ya watu waliochukuliwa mateka katika tamasha hilo walikusanyika kwenye eneo kwa hafla ya kumbukumbu ya kwanza ya siku hiyo.

   Wakiwa wameshikilia picha za wapendwa wao walisikiliza wimbo wa mwisho uliochezwa kwenye tamasha hilo kabla ya Rais wa Israel Isaac Herzog kuongoza kimya cha dakika moja saa 06:29, muda ambao shambulio hilo lilianza.

   Soma zaidi:

   Jeshi la Israel lashambulia maeneo ya Hamas kote Ukanda wa Gaza - msemaji wa jeshi la Israel

   Makumbusho yafanyika mwaka mmoja tangu kutokea kwa shambulizi la Hamas

   Mwanajeshi wa Israel auawa kwenye mpaka wa Lebanon

   Jeshi la Israeli latangaza kumuua kamanda mwingine wa Hezbollah

   Nani anaiongoza Lebanon na Hezbollah ina nguvu gani?

4. 8 Oktoba 2024Hujambo na karibu katika matangazo yetu ya moja kwa moja ikiwa ni tarehe 08/10/2024