Waliyoyapitia wanajeshi wa Urusi katika mapigano huko Kherson

Jeshi la Kiukreni lilipitia Ukingo wa kushoto wa Dnieper.

Siku chache zilizopita, askari wa Kiukreni walikinyakua kijiji cha Krynki, na siku moja iliyopita walihamishia vifaa vizito huko.

BBC iliweza kuzungumza na wanajeshi kadhaa wa Urusi ambao wanaelezea mapigano karibu na Krynki kama "kifo".

Vyanzo vya BBC katika jeshi la Urusi vilithibitisha kwamba Vikosi vya Wanajeshi vya Ukraine sio tu vilivuka katika eneo lililokaliwa na Urusi na kwa mara ya kwanza kwenye ukingo wa kushoto wa Mto Dnieper katika mkoa wa Kherson, lakini pia walianza kusafirisha vifaa vya kijeshi huko.

Kama vyanzo vya BBC katika Vikosi vya Wanajeshi vya Ukraine vinasema, kutoka kwa hatua hii Vikosi vya Wanajeshi vya Ukraine vinataka kuanzisha mashambulizi makubwa zaidi, kugawanya wanajeshi wa Urusi na kukata mwanya wa usambazaji.

“Ndiyo, wako upande wetu. Walianzisha kituo katika eneo la Krynok. Kwa kweli kuna takribani Waukraine 500 huko," jeshi lilisema.

Wanajeshi, kwa kuongezea, walisema kwamba kabla ya mafanikio na kutekwa kwa Krynoki, vikundi kadhaa vya hujuma na uchunguzi wa Kikosi cha Wanajeshi wa Kiukreni walisafiri kando ya ukingo uliokaliwa wa Dnieper.

Walikuwa wamevalia kama wanajeshi wa Urusi wa zimamoto, au wafanyakazi wa Wizara ya Hali za Dharura. "Tuliendesha gari karibu karibu. Watu wetu walipokuwa wakitazama, wote walishambuliwa,” kilisema chanzo cha BBC.

Baada ya mashambulizi hayo, askari wa miguu walivuka Dnieper na kupitia msitu hadi Krynki.

"Mnamo Oktoba 19, 20, 21, tulishindwa vibaya hapa. Lakini basi walitutumia wanajeshi wana maji, na tulinusurika kwa sababu ya hii. Sikuona mizinga yoyote hapa, waliwafukuza kutoka upande mwingine na walikuwa wakizunguka karibu na eneo la Antonovka. Lakini waliteka magari yetu kadhaa."

Jeshi la Ukraine limetumia na linaendelea kutumia boti ambazo zinaweza kusafiri kwa kasi ya kilomita 100 kwa saa, na katika kuanguka, katika ukungu mzito wa bahari, ni vigumu kufuatilia, anasema mmoja wa wanajeshi.

Kikosi cha Wanajeshi wa Kiukreni pia kilitumia helikopta, ambayo, ikifanya kazi katika eneo la ukingo wa kushoto, iliruka chini sana na kurusha makombora yasiyokuwa na mwongozo kwenye maeneo ya Urusi, na kisha kurudi.

"Watu kadhaa tayari wamekamatwa. Kamanda wetu na manaibu wake wote walitoweka. Tuna hali ngumu. Waukraine wamejikita katika upande wetu katika eneo la Krynok, na hatuwezi kuwaondoa huko''.

Wiki moja iliyopita, redio za jeshi la Urusi zilichukuliwa, walipigana kwa siku sita bila mawasiliano. “Tumekuwa tukitenda kama tulivyoamua kwa siku sita sasa bila kuwasiliana. Sasa kila kitu kimetulia kidogo, lakini kila kitu kinatetemeka hapa.”

Taarifa kuhusu uhamisho wa makundi ya kijeshi ya Kiukreni kwenye ukingo wa kushoto wa Dnieper zimetangulia. Hata hivyo, hivi karibuni tu wameanza kuzungumza juu ya kuonekana kwa vifaa vizito kwenye eneo hilo.

Krynki iko kaskazini-mashariki mwa wilaya kwenye ukingo wa kushoto wa Dnieper tayari inachukuliwa na askari wa Kiukreni katika eneo la Antonovsky Bridge.

Pamoja na ujio wa Kikosi cha Wanajeshi wa Ukraine huko Krynki, "eneo la kijivu" linaanza kukua karibu na kijiji hiki kidogo, kilicho kwenye barabara kati ya Novaya Kakhovka na Aleshki, askari wa Urusi wanapoteza udhibiti wa eneo hilo hatua kwa hatua, njia zinakuwa salama.

Hali hiyo inazidishwa na tofauti kubwa ya urefu: silaha za kivita za Kiukreni ziko kwenye ukingo wa juu wa kulia wa Dnieper zina faida kubwa, ndiyo sababu jeshi la Urusi haliwezi kumudu kufanya shambulio kubwa kwenye madaraja yanayopanuka. Na mashambulizi ya makundi ya askari wa miguu hayaleti chochote isipokuwa hasara.

"Hatutarudi kwenye maeno ya zamani"

Waukraine walisafirisha vipande kadhaa vya vifaa vizito kwa magari yenye uwezo wa kupita nchi kavu na majini hadi kwenye ukingo unaokaliwa wa Dnieper asubuhi ya Novemba 9.

Wanajeshi watatu wa Urusi waliokuwa mstari wa mbele waliripoti kwa BBC.

“Kila mtu alifikiri kwamba bila daraja la pantoni wasingeweza kusafirisha vifaa hivyo. Kweli, bado hawana daraja, lakini waliburuta bunduki kadhaa kando ya mto na gari.

Hakika kuna uthibitisho kwamba magari ya kivita yalikuwa tayari kwenye ufuo wetu usiku. Zaidi ya hayo wamekamata yetu.” Mwanajeshi huyo hakusema ni magari gani ambayo jeshi la Urusi ilipoteza.

Chaneli za telegramu za "waandishi wa kijeshi" wa Urusi zina picha zilizopigwa mapema, mnamo Novemba 5, kutoka kwenye kamera ya droni ambapo msafirishaji wa Kiukreni anaonekana akija ufukweni, akiburuta shehena ya kivita ya Bucephalus kwenye kebo.

Baada ya shambulio la usiku la Wanajeshi wa Kiukreni, ambapo magari mengine mawili ya mapigano ya askari wa miguu yalishambuliwa, alasiri ya Novemba 9, mabaki yaliondolewa kutoka Krynki.

"Sasa hali ni tulivu. Lakini tayari wanasema kwamba lazima tuwe tayari kuhamia Krynki wakati wowote. Sijui itakuwaje. Hatutarudi tena kwenye maeneo yetu ya zamani.

Inaonekana kana kwamba kujitakia kifo kuhamia huko. Kila mtu hapa anakunywa ili kupata ujasiri sasa. Wanaelewa kwamba, kuna uwezekano mkubwa, italazimika kwenda."

"Sasa ni wazi kwa nini nchi nzima iliwekwa katika hali ya umasikini"

Sasa, sio mbali na Krynki, Wizara ya Ulinzi ya Urusi inaunda kikosi upya. Wanamaji na kikosi cha Storm Z cha wafungwa wa zamani na wanajeshi walio na hatia watavamia Krynki.

Wanajeshi kutoka vitengo vilivyoshindwa walipelekwa katika nafasi za mbali. "Natumai hawatatutupa hapo kwanza, lakini Jeshi la Wanamaji na Jeshi la Anga litaenda huko," mmoja wa wanajeshi hao alisema.

"Na mimi binafsi sielewi kabisa tunachofanya hapa." Wanasiasa wanavuruga na watu wengi wazuri walikufa kwasababu ya hilo. Nani amelala pale kando ya mto? Miili haitaweza hata kufika nyumbani. Huu wote ni upuuzi. Kuna chuki nyingi. Kila mtu anamchukia mwenzake, lakini kwa nini ? Siwezi hata kumuuliza mtu yeyote swali kama hilo.”

Anaamini kwamba aliingia kwenye vita kwa udanganyifu: "Nilitia saini mkataba kwa ujinga. Walihitaji pesa, walinilaghai. Walisema, ikiwa utapata pesa, hautaenda mstari wa mbele kabisa. Utafanya kazi kwenye ghala. Na mwezi mmoja baadaye nilikuwa tayari katika mkoa wa Kherson.

"Kwa pesa zote tulizotumia kwenye vita, tungeweza kufurahisha kila mtu. "Jenga jamii ya kawaida, iliyoelimika," anasema.

Lakini sasa ni wazi kwa nini nchi nzima iliwekwa katika umasikini. Tupe pesa kidogo na tutafanya chochote kwa hilo. Na wengi hawatakuwa na wakati wa kuelewa chochote. Wanaoneshwa kwenye habari kwamba operesheni maalumu inaendelea, mipango yake inafanyika, kila kitu ni shwari, endelea na maisha yako.

Imetafsiriwa na Lizzy Masinga na kuhaririwa na Seif Abdalla