BBC News, Somali
U gudub qaybta macluumaadka

Ciidamada Uganda oo isaga baxay saldhig ay ku lahaayeen Shabeellaha Hoose

Tebin toos ah

Tebin toos ah

  1. Muqdisho: Tartan kubadda ah oo markii ugu horreysay loogu qabtay dadka aragga naafada ka ah

    Magaalada Muqdisho waxa markii ugu horreysay tartan kubada Goalball ka ah loo qabtay lix kooxood oo ay u ciyaarayaan ugu yaraantii 30 ciyaartoy oo araga la' ama araga naafada ka ah.

    Waa tartankii ugu horreeyay ee noociisa ah ee loo qabto dhalinyarada araga naafada ka ah, waxayna si weyn u soo jiidatay dadweyne faro badan oo galab kasta u soo daawasho taga ciyaarahaasi, qaarkoodna waxay ka daawadaan tabinta tooska ah ee teleefishinada maxaliga ah.

    Dadka baahiyaha gaarka ah qaba ayaan helin adeegyadii ay u baahnaayeen iyo ciyaarihii ay hibadooda ku soo bandhigi lahaayeen taasoo ku keenta inay guryaha iska joogaan, haseyeeshee, tartankan kubadda shanqarta ayaa niyadooda kor u qaaday oo keentay inay markooda farxaan.

    Weriyaha BBC-da ee Muqdisho Ibraahim Maxamad Aadan ayaa ka warramayaa.

    Qoraalka Codka, Tartan kubadda ah oo markii ugu horreysay loogu qabtay dadka aragga naafada ka ah

  2. Afar ka mid ah dadkii caanka ahaa ee uu Mareykanka ku dilay Soomaaliya

  3. Macalimad dugsi qur'aan arday ugu dhigta geed hoostiis

  4. Khilaafka Kenya iyo Soomaaliya: Guddi xaqiiqo raadin ah oo warbixintooda soo gabagabeeyay

    Madaxwayne Farmaajo iyo dhigiisa Kenya Uhuru Kenyatta

    Xigashada Sawirka, VILLA SOMALIA

    Qoraalka sawirka, Madaxwayne Farmaajo iyo dhigiisa Kenya Uhuru Kenyatta

    Guddi uu madaxweynaha Jabuuti Ismaaciil Cumar Geelle u xil saaray xaqiiqo-raadin ku saabsan waxyaabaha ay isku hayaan dowladaha Soomaaliya iyo Kenya ayaa soo gebagabeeyay baaritaankooda, waxaana warbixinta ay diyaariyeen la wadaageen madaxweynaha Jabuuti.

    Guddiga oo la sameeyay kaddib shirkii urur goboleedka IGAD ee ka dhacay caasimadda Jabuuti bishii December ee la soo dhaafay ayaa booqday labada dal.

    Yaasiin Cilmi Buux oo ah safiirka Jabuuti u fadhiya Kenya oo kamid ah guddiga ayaa sheegay in labadan dhinac ay la kulmeen isla markaana ay warbixintooda u gudbiyeen madaxweynaha Jabuuti Ismaaciil Cumar Geelle oo loo xil saaray xaqiiqo raadinta ku aadan khilaafka Soomaaliya iyo Kenya.

    "Guddiyadii waxay tageen labada waddan, Muqisho ayay ku horreysay...dad waan wareysanay, madax badan baa la kulannay, madaxda soomaalida, madaxda Kenya..sidii aan wax u arkeynay madaxweynaha waan ugu keenay"

    Bishii December ee sanadkii tagey shirkii urur goboleedka IGAD ee Jabuuti waxaa ka dhacay kulan ay isku hor fariisteen madaxwaynayaasha Soomaaliya iyo Kenya. Waxaa shirkaas goobjoog ka ahaa madaxweynaha Jabuuti, Ismaaciil Cumar Geelle iyo Ra'iisul Wasaaraha Itoobiya Abiy Axmed.

  5. Ciidamada Uganda oo isaga baxay saldhig ay ku lahaayeen Shabeellaha Hoose

      • Author, Ibrahim Aden
      • Role, BBC Africa, Mogadishu
    Ciidamada Uganda

    Xigashada Sawirka, AFP

    Qoraalka sawirka, Ciidamada Uganda

    Ciidamada dalka Uganda ee qaybta ka ah hawlgalka Midowga Afrika ee loo yaqaano AMISOM ayaa saaka isaga guuray saldhig milatari oo ay ku lahaayeen deegaanka Mashallaay oo u dhexeeya degmooyinka Qoryoolay iyo Buula Mareer ee gobolka Shabeellada Hoose ee koonfurta Soomaaliya.

    Illaa hadda ma cadda sababta ay uga guureen saldhigaas oo ay fadhiyeen tan iyo 2014 kii markaas oo ay kala wareegeen Al-Shabaab.

    Dadka deegaanka ayaa BBC-da u sheegay inay arkeen ciidanka oo qalabkooda kala baxaya xerada.

    Dadka deegaanka ayaa sidoo kale soo weriyay in markii ciidamada Uganda ka baxeen saldhiga ay soo galeen dagaalyahano ka tirsan Al-Shabaab oo markii horeba aan ka fogeyn deegaanka.

  6. War deg deg ah, Qarax ka dhacay duleedka Muqdisho oo mas'uuliyiin lala beegsaday

    Warrarka ka imaanaya duleedka koonfureed ee magaalada Muqdisho ayaa sheegaya in qarax wadada dhinaceeda la dhigay uu qabsaday gaari ay la socdeen mas'uuliyiin ka tirsan deegaanka Garasbaaleey.

    Illo ku dhawdhaw maamulka gobolka Banaadir ayaa BBC-da u sheegay in guddoomiye ku-xigeenkii amniga iyo guddoomiyihii dhalinyarada ee deegaanka iyo labo ilaalladooda ah lagu dilay qaraxaasi.

    Illaa hadda ma jirto cid sheegatay masuuliyadda qaraxa, waxaase weerarrada noocan ah Muqdisho iyo deegaannada ku xeeran ka fuliya Al-Shabaab.

  7. Waddamo ay Soomaaliya kamid tahay oo codkooda UN ku waayi doono deyn darteed

    .

    Xigashada Sawirka, AFP

    Qaramada Midoobey ayaa sheegtay in 9 dal oo Afrikaan oo ay kamid tahay Soomaaliya lagu leeyahay lacagaha ay bixiyaan dalalka xubanaha ka ah UN.

    Sidaas darteedna ay meesha ka baxeyso xuquuqdooda dhanka codeynta ah ee Qaramada Midoobey waa haddii ay bixin waayaan lacagta laga qaado dalalkaas ee loogu talagalay in lagu kaabo miisaaniyadda howlagalka Qaramada Midoobey.

    Waddamadan ayaa laga doonayaan inay bixiyaan lacagaha lagu leeyahay, Soomaaliya waxaa lagu leeyahay $1,443,640.

    Waddamada kale ee loo heysto lacagta waxaa kamid ah Iran oo laga rabo inay bixiso $16,251,298, Congo $90,844, Zimbabwe $81,770, Jamhuuriyadda Bartamaha Afrika $29,395, South Sudan $22,804,Niger $6,733 , Comoros $871,632, Sao Tome and Principe $829,888 iyo Libya oo la doonayo inay bixiso $705,391.

  8. TPLF oo laga saaray diiwaanka xisbiyada Itoobiya

    .

    Xigashada Sawirka, TPLF FACEBOOK

    Guddiga doorashooyinka dalka Itoobiya ayaa shaaca ka qaaday in diiwaanka xisbiyada siyaasadda laga saaray xisbigii ka talin jiray gobolka Tigray ee TPLF kaddiba markii howlgal militeri lagu qaaday gobolka bishii Nofembar.

    Guddiga doorashada ayaa ku eedeeyay TPLF inay ka dambeeyeen qalalaase ka dhacay dalkaas.

    Sidoo kale, guddiga wuxuu ka codsaday saddex xisbi oo kale oo ka jira Tigray inay sharraxaad ka bixiyaaan doorashadii ay kala qeyb qaateen TPLF bishii September ee sannadkii lasoo dhaafay ka dhacday Tigray taas oo ay dowladda ku tilmaantay sharci darro.

  9. Mucaaradka Jabuuti oo ku eedeeyay dowladda inay kula kaceyso caburin

    Mucaaradka dalka Jabuuti waxay ku eedeeyeen xukuumadda Jabuuti in ay cuburinayso xubnaha ka tirsan xisbiyada mucaaradka xilli ay bisha April lagu wado in dalkaas ay ka dhacdo doorashada madaxtinimada.

    Duqii hore ee caasimadda Jabuuti imikana ah madaxa xisbiga mucaaradka ee Raad, Cabdiraxmaan Maxamed Geele oo BBC la hadlay ayaa sheegay in xubno ka tirsan xisbigiisa ay maalmihii u dambeeyay ku xirnaayeen magaalada Jabuuti islamarkana aan wax maxkamad ah lagu soo oogin.

    “Siyasiyiinta mucaaradka iyo dadkan uu si nabad ah u halgamaya kana soo horjeeda in markii shanaad uu Ismaaciil Cumar Geele talada kusoo noqdo, kuwii isaga taageersanaa waa loo ogolyahay dadka kasoo horjeedana waa la xir xiraya”

    Wuxuu dhanka kale sheegay in dalka ay ka dhaceen banaanbaxyo looga soo horjeedo dowladda.

    Qoraalka Codka, Mucaaradka Jabuuti oo dhaliiyay Ismaaciil Cumar Geelle

    Dhanka kale xiriir aan la sameynay xukuumada Jabuuti ayaanan noo suuragalin oo kama aysan jawaabin taleefoonadii iyo fariimihii aan u dirnay.

  10. Asalaamu Calaykum.

    Subax wanaagsan. Kusoo dhawaada tebinta tooska ah ee BBC Somali. Maanta oo Talaado ah waxaan idin kugu soo gudbinaynaa wararkii ugu dambeeyay ee Soomaalida iyo caalamka.