"Waxaa jug culus gaarsiiyay rakaabkiisii oo uu ku yiri 'xirta maaskarada'

Tebin toos ah

1. 6 Luulyo 2020"Waxaa jug culus gaarsiiyay rakaabkiisii oo uu ku yiri 'xirta maaskarada'

   

   Xigashada Sawirka, Reuters

   Darawal ka howlgala koonfur galbeed dalka Faransiiska ayaa lagu soo warramayaa inay weerareen rakaab kaddib markii uu baabuurkiisa u diiday inay raacaan rakaabka aanan xiran afka iyo sanka.

   Darawalka ayaa Axaddii dhowr qof oo aanan qabin maaskarada ka hor istaagay inay raacaan baabuur uu kaxeynayay, sida ilo wareedyo ka tirsan booliska ay u sheegeen wakaaladda wararka ee AFP.

   Darawalka waxaa maskaxda ka gaaray dhawaac culus.

   Shan qof oo lala xiriirinayo dhacdadaas ayaa haatan la xiray.

   Waxaa Faransiiska waajib ka ah xirashada maaskarada marka aad saaran tahay baaburta dadweynaha.

   Duqa magaalada Bayonne oo ah goobta lagu weeraray darawalka ayaa cambaareeyay falkaas, wuxuu ku tilmaamay 'mid fuleynimo ah'.

   

2. 6 Luulyo 2020Halkan ka dhageyso 'hooyo ka sheekeyneysa kufsi loo geystay gabadheeda'

3. 6 Luulyo 2020Booliska Masar oo xiray haweeney caan ka ah barta TikTok

   

   Xigashada Sawirka, AFP

   Ciidammada ammaanka ee Masar ayaa lagu soo warramayaa inay xabsiga u taxaabeen haweeney da' yar oo caan ka aheyd barta TikTok.

   Xadeer Al Hady ayaa lagu eedeeyay in muuqaal anshax xumo ah ay soo gelisay barta TikTok.

   Haweeneydan ayaa bartaas soo dhigeysay muuqaallo muujinayo iyado oo heeso qaadeyso.

   Toddobaadyadii lasoo dhaafay Masar waxay xabsiyada dhigtay rag iyo haween lagu eedeeyay in barta ay kusoo bandhigeen waxyaabo anshax xumo ah.

4. 6 Luulyo 2020Nairobi oo laga qaaday xayiraaddii dhanka safarka

   

   Xigashada Sawirka, AFP

   Madaxweynaha Kenya Uhuru Kenyatta ayaa shaaca ka qaaday in la qaaday xayiraaddii dhanka safarka ee saarneyd magaalooyinka Nairobi, Mombasa iyo Mandheera laga bilaabo berito.

   Wuxuu sidoo kale madaxweynaha sheegay in muddo 30 maalmood ah oo kale lagu daray bandowga xilligii habeenkii ee lagu soo rogay dalkaas si looga hortaggo fiditaanka cudurka Corona.

   Madaxweynaha waxaa uu sidoo kale ka dhawaajiyay in duulimaayada gudaha la furi doono 15-ka bishan July halka duulimaadyada caalamiga ah la furi doono 1-da bisha Agosto.

   Wuxuu sheegay in xayiraadda dib loo soo celin doono waa haddii mar kale ay sare u kacaan kiisaska cudurka Covid-19.

   Kenya waxay haatan diiwaan gelisay 7,886 oo kiisaska cudurka halka dhimashadu ay gaartay 160.

5. 6 Luulyo 2020Xiisad ka taagan gobolka Oromada

   Xiisad ayaa ka taagan gobolka Oromada ee dalka Itoobiya, dadku waxay ka cabsi ka qabaan in rabshado kale ay halkaas ka dhacaan.

   Adeegga Internetka ayaa weli ka maqan Itoobiya , kaas oo hawada laga saaray markii ay dibadbaxyo rabshado wato ay ka dhaceen halkaas.

   Dibadbaxyada looga soo horjeeday dilka heesaagii Hachalu Hunddessa waxaa ku dhintay in ka badan 150 qof.

   

6. 6 Luulyo 2020Itoobiya: Rabshadihii oo 'hakad geliyay' wadahadallada lagu xallinayo muranka biyo xireenka

   

   Xigashada Sawirka, getty images

   Rabshadihii dhawaan ka dhacay dalka Itoobiya ayaa horseeday in uu dib u dhaco wadaxaajoodka seddex geesoodka ahaa ee dhexmarayay Itoobiya, Suudaan iyo Masar ee ku saabsanaa muranka ka dhashay biyo xireenka ay Itoobiya dhiseyso.

   Wasiirka biyaha Itoobiya Seleshi Bekele ayaa sheegay in dibadbaxyadu ay sababeen in uu hakad galo wadahadallada la filayay inay bilaabmaan horraantii toddobaadkii hore.

   Wadahadallada u dhexeeyay Masar, Itoobiya iyo Suudaan ayaa bilowday Jimcihii kaas oo lagu xallinayo muranka ka dhashay biyo xireenka ay Itoobiya ka dhiseyso webiga Nile.

   Wuxuu sidoo kale wasiirka sheegay in rabshadihii dhawaan ka dhacay dalkaas ay saameeyeen dadaallada looga hortaggayo fiditaanka cudurka Corona isla markaana ay adkaatay in la fuliyo howlihii baaritaanka.

   Itoobiya waxaa dhawaan gilgilay mowjado rabshado ah kaddib dilkii fanaanka caanka ahaa ee Hachalu Hunddessa.

7. 6 Luulyo 2020Iiraan: "Dabkii ka kacay xarunta Nukliyerka waxaa ka dhashay khasaare weyn"

   

   Xigashada Sawirka, @AEOINEWS

   Afahayeen u hadlay dowladda Iiraan ayaa sheegay in dab Khamistii ka kacay goobta ugu weyn ee lagu sameeyo shidaalka Nukliyerka Iiraan uu khasaare weyn dhaliyay.

   Wuxuu sheegay in dabka uu ahaa mid si 'ula kac ah' loo fuliyay balse wax faahfaahin ah kama uusan bixin arrintaas.

   Afahayeenka wuxuu sheegay in qalabka ku burburay dabka goobtaas lagu baddali doono qalab kale oo casri ah.

   Mas'uuliyiinta waddanka Iiraan waxay sheegeen in qarax uu ka dhacay goobta lagu sameeyo shidaalka Nukliyerka isla markaana uu dab qabsaday.

   Afahayeen u hadlay ha'yadda quwadda Atoomikada Iiraan wuxuu sheegay in uusa ka hadli karin wax dhaliyay dabka sababo ammaan darteed.

   Wuxuu sheegay in 'dabka uu khasaare lixaad leh horseeday balse aysan jirin cid ku waxyeeloowday'.

8. 6 Luulyo 2020Suudaan oo xilka ka qaaday madaxii booliska iyo ku-xigeenkiisa

   

   Xigashada Sawirka, Getty Images

   Dowladda kumeel gaarka ah ee Suudaan ayaa xilka ka qaaday madaxii ciidammada booliska iyo ku-xigeenkiisa kaddib dibadbaxyo maalmihii lasoo dhaafay hareeeyay guud ahaan dalkaas.

   Dadka dibadbaxyada dhigayay ayaa codsanayay in dowladda ay sameyso isbaddallo siyaasadeed.

   Ra’iisul wasaare Cabdalla Xamduuk ayaa xilka ka qaaday Caaddel Maxamed Bashaar oo ahaa madaxii ciidammada booliska Suudaan, waxaa uu ku baddalay Cizzu Diin Sheekh Cali.

   Dhanka kale, bayaan ka soo baxay golaha wasiirada ayaa lagu sheegay in xilka laga qaaday taliye ku-xigeenkii guud ee booliska Cusmaan Maxamed Yuunis.

   Dowladda ma aysan sheegin sababta xilka looga qaaday saraakiishan.

   Toddobaadkii lasoo dhaafay ayay aheyd markii Ra’iisul wasaare Cabdalla Xamduuk uu sheegay in dowladdiisa ay isbaddallo ku dhaqaaqeyso.

9. 6 Luulyo 2020

   Kulan wacan saaxibbayaal kusoo dhawaada tebinta tooska ah oo aan idiin kuugu soo gudbinno wararkii ugu dambeeyay soomaalida iyo caalamka.