You’re viewing a text-only version of this website that uses less data. View the main version of the website including all images and videos.
Tabinta tooska ah kaga bogo wararka Soomaalida iyo kuwa caalamka.
Magaalooyinka Garowe,Muqdisho iyo Jigjiga ayaa waxay kamid yihiin magaalooyinka ka tirsan deegaanada soomaalida oo maanta si weyn looga cidaya.
Dadweyne badan ayaa saaladda ciidda ku tukaday meelo kala duwan oo ka tirsan magaalooyinkaas.
Xilli muslimiinta ay maanta u dabaaldegayaan munaasabadda Ciiddul Fitriga, muslimiin badan ayaa saaka saaladda Ciidda ku tukaday meelo kala duwan oo ka tirsan caalamka.
Deegaannada Soomaalida ayaa kamid ah meelaha maanta laga ciidaya, xaafadda Islii ee magaalada Nairobi waxay dadweyne badan saaka ku tukadeen goobo dhowr ah.
Waxaan halkan idiin kuugu soo gudbineynaa sawirrada dadka saaka isugu soo baxay xaafadda Islii ee magaalada Nairobi si ay saaladda ciidda u tukadaan.
Hoggaamiyeyaasha militariga Suudaan waxay sheegeen inay meesha ka saareen dhammaan heshiisyadii ay la galeen isbaheysiga mucaaradka ugu weyn ee dalkaas.
Militariga waxay ka dhawaajiyeen in dalka ay ka qaban doonaan doorasho muddo 9 bilood gudahood.
Hadalka militariga ayaa imaanaya xilli ay wajahayaan cambaareyn caalami ah kadddib markii la laayay ugu yaraan 30 qof oo ka qeyb qaadanayay dibadbaxyo gudaha magaalada Khartuum.
Mareykanka waxaa ku tilmaamay weerarka mid ‘gurucan oo loo geystay shacab’
Midowga Afrika waxaa uu dhaleeceyay rabshadihii ugu dambeeyay ee ka dhacay isla markaasna waxaa uu ugu baaqay dalalka gobolka in aysan fargelin xaaladda.
Dad badan oo ku sugan Suudaan waxay ka careysan yihiin tallaabada dalalka Sucuudiga, Imraatka Carabta iyo Masar ay taageerada ugu fidiyeen golaha sare ee militariga dalkaas.
Howlgalka ka dhanka shacabka ayaa imaanaya golaha militariga iyo dadka horkacayay dibadbaxyada ay wada gaareen heshiis ku saabsan qaabkii xukunka loogu wareejin lahaa dowlad rayid ah.
Madaxa golaha sare ee militariga Suudaan, Janaraal Cabddel Fataax Al Burhaan ayaa waxaa uu telefishinka dalkaas ka sheegay inay joojiyeen wadahadalladii ay la yeelanyeen mucaaradka islamarkaasna meesha laga saaray qodobadii lagu heshiiyay.
Waxaa uu intaasi ku daray in doorashada ay qaban doonaan 9 bilood gudahood ay kormeeri doonaan dalalka gobolka iyo beesha caalamka.
Kulanti wacan akhyaarta halkan nagala socotaay kusoo dhawaada tebinta tooska ah oo aan idiin kuugu soo gudbinno wararkii ugu dambeeyay soomaalida iyo caalamka.
Ciid wanaagsan dhammaantiin.
Waa Talaado taarikhda waxay ku beegantahay 4-ta bisha June sannadka 2019-ka.
Ruushka ayaa waxba kama jiraan ka soo qaaday dalabka ka yimid Madaxweyne Trump ee shaagaya in diyaaradahoodu ay duqaynta ka daayaan gobolka Idlib ee dalka Suuriya.
Gobolkaas oo ay jabhaduhu gacanta ku hayaan ayaa laga soo sheegayaa in ay dad badan ku dhinteen.
Afhayeen u hadlay aqalka looga arrimiyo Ruushka ee Kremlin ayaa sheegay in kooxaha argagixisada ah ay weerarro aan loo dulqaadan karin ka soo qaadayaan goobaha ay ku xoog badan yihiin, iyaga oo bartilmaameedsanaya shacabka iyo ciidammada Ruushka ee agaas jooga.
Idlib waxaa ku xoogan badan koox jihaaddoon ah oo lala xiriirin jiray Al Qaacidda.
Twitter uu horay u qoray ayuu Trump ku sheegay in Ruushka, Suuriya iyo Iiraan ay si aan kala sooc lahayn Idlib ugu laynayaan dad aan waxba galabsan, wuxuuna sheegay in dunidu ay fiirsanayso wax uu ugu yeeray kawaan.
Hoggaamiyeyaasha mudaaharaadayaasha Suudaan ayaa sheegay in ay xiriirka u jarayaan milatariga, ka dib rabshadihii Isniinta ka dhacay Khartuum, kuwaas oo la sheegay in ay ku dhinteen ugu yaraan 12 ruux oo mudaaharaadeyaal ah.
Qolyaha dimuqraadiyadda u ol’oleeya ayaa wadahadal kula jiray milatariga iyaga oo ka arrinsanaya sidii loo soo dhisi lahaa maamul dusha kala socda sidii dalku uu dimuqraadiyadda ugu guuri lahaa.
Ugu yaraan siddeed may iyo dad badan oo dhaawac ah ayaa la geeyay isbitaalka ugu wayn magaalada Khartuum ee dalka Suudaan, sida uu BBC u sheegay qof isbitaalka ku sugan.
Laamaha ammaanka ayaa rasaas ku furay mudaaharaadayaasha Isniintan, balse masuuliyiin u hadlay ciidammada ayaa diiday in ay isku dayeen in ay kala eryaan mudaaharaadayaasha hor dagay xarunta ugu wayn ee milatariga.
Golaha Milatariga Suudaan ee haya awoodda dalkaas ayaa diiday in uu awood u adeegsaday kala eryidda mudaaharaadayaasha ku sugan bannaanka saldhigga ciidammada ee ugu wayn dalkaas oo ku yaalla magaalada caasimadda ah ee Khartuum.
“Milatariga Makala eryin mudaaharaadayaasha fariisinka ka samaysay bannaankka saldhigga ugu wayn ee ciidammada, balse goob kale oon ka fogayn ayay bartilmaameedsadeen, taas oo halis ku ahayd ammaanka muwaadiniinta” sida uu sheegay Sarreeye Guud Shams al-Din Kabbashi oo la hadlay Sky News Arabia TV oo fadhigiisu yahay Imaaraadka.
Wararku waxay sheegayaan in shan ruux ay ku dhimatay rabshadihihii dhacay subaxii.
Hadda waxaa na soo gaaray sawirro Khartuum laga qaaday iyadoo mudaaharaadayaashu ay samaysanayaan jidgooyooyin.
Mar sii horraysayna Ururka Xirfadleyaasha Suudaan ee hoggaaminaya mudaaharaadyada ayaa ku baaqay in dadku ay waddooyinka u soo baxaan, ka dib markii ay ciidammadu rasaas ku fureen dibadbaxayaasha.
Rasaas ayaa laga maqlay Khartuum dhimasho ayaana la soo sheegay, balse qiyaasta dadka dhintay ayaa lagu kala duwan yahay.
Suudaan waxaa hoggaminayay Gole Milatari tan iyo markii ay xukunka ka maroorsadeen madaxweyne Cumar Xasan Al Bashiir bishii Abriil.
Mudaaharaadayaasha ayaa dalbanaya in xukuumad rayid ah lagu wareejiyo talada.
Safiirka Britain u fadhiya dalka Suudaan ayaa walaaca uu ka qabo rasaaasta khartuum ka dhacaysa ku soo qoray Twitterka.
“Waxaa waajib ah in hadda la joojiyo.” Ayuu soo qoray.
Benjamin Strick oo ah saxafi khibrad u leh xaqiijinta run ahaanshaha muuqaallada Twitterka ayaa soo dhigay muuqaallo laga duubaay caasimadda Suudaan ee Khartuum.
Waxaa ka mid ah midkan oo aad si isdaba joog ah uga maqli karto dhawaqa rasaasta iyadoo ay dadku kala cararayaan.
Sawirro toos looga baahiyay magaalada Khartuum ee caasimadda dalka Suudaan ayaa muujinaya qiiq ka baxaya goobta fariisinka u ah mudaaharaadayaasha.
Qof goobjooge ah ayaa xaaladda halkaa ka jirta ku tilmaamay mid qasan, wuxuu intaas ku daray in dad mudaaharaadaya oon hubaysnayn lagu qaaday weerar degdeg ah oo abaabulan, laamaha ammaanka ayuuna ku eedeeyay in ay rasaas adeegsadeen.
Qof goobjooge ah ayaa sheegay in dadku ay billaabeen in ay dab qabadsiiyaan taayiradii iyo jidgooyooyinkii, si ay laamaha ammaanka ugu xannibaan, ugu yaraan hal qof ayaa la sheegay in uu ku dhintay, dad badan oo kalana way dhaawacmeen.
Warar kala duwan ayaa sheegaya in rasaas laga maqlay fariisinka mudaaharaadayaasha Suudaan ee ku yaalla bartamaha magaalada caasimadda ah ee Khartuum.
Wakaaladda wararka ee Reuters oo soo xiganaysa telefeshinnada Carabiga ku hadla ayaa sheegtay in laamaha ammaanku ay galeen goobta ay mudaaharaadayaashu fadhiyaan.
Dadka xuquuqda aadanaha u dooda ayaa sheegay in tallaabadaas lagu doonayo in lagu kala diro mudaaharaadayaasha.
Muuqaal la soo dhigay Twitterka ayaa u muuqda dad dhaawac ah balse lama xaqiijin.
Wasiirka arrimaha dibadda Maraykanka, Mike Pompeo, ayaa sheegay in Marakanku diyaar u yahay wadahadallo uu Iiraan la yeesho oo bilaa shuruud ah.
Pompeo ayaa hadalkaa ka sheegay dalka Switzerland oo uu booqasho rasmi ah ku marayo, dalkaas oo danaha Maraykanka wakiil uga ahaa Iiraan tan iyo sannadkii 1979.
Hadallada Pompeo ayaa u dhadhamayay sidii kuwo nabadeed, ka dib toddobaadyo ay cirka isku sii shareeraysay xiisadda u dhaxaysa Washington iyo Tehran.
Balse baaqa wasiirka Arrimaha Dibadda ee Maraykanku ma u qalmaa in la dhoho waa mid aan shuruud lahayn, maadaa oo uu sheegay in Iiraan looga baahan yahay in ay caddayso in ay u dhaqmayso sidii dal caadi ah, isaga oo intaas ku daray in Maraykanku uusan joojinayn dadaallada uu wax uga qabanayo wax uu Pompeo ku tilmaamay tallaabooyinka halista ah ee Iiraan.
Xitaa haddii ay labada dhinac kulmaan, ma cadda waxa ay ka wada hadli doonaan.
Madaxweyne Trump ayaa isaga baxay heshiis uu sixiixay Obama oo muddo sannado laga xaajoonayay, kaas oo loogu talagalay in lagu xakameeyo barnaamijka Nukliyeerka ee Iiraan.
Iiraan ayaa sheegtay in aan loo baahnayn in heshiiskaas dib wada hadal looga galo.
Switzerland ayaa sheegtay in ay rajaynayso in ay mar kale dhexdhexaadiye noqoto, balse wasiirka arrimaha dibadda ee Switzerland ayaan la gaban sida dawladdiisu ay uga walaacsan tahay saamaynta ay shacabka Iiraan ku yeelan karto cunaqabataynta uu Maraykanku saaray dawladda.
Pompeo ayaanse sheegin wax bidhaaminaya in Washington ay rabto in ay dabciso cunqabataynta Iiraan.
Madaxweynaha Maraykanka Donald Trump ayaa ka dagay Britain, isaga oo booqasho rasmi ah oo saddex maalmood ah ku joogi doona halkaas.
Diyaaradda madaxweynaha ee Air Force One ayaa caga dhigatay garoonka Stansted Airport waxyar uun ka hor 11:00 barqinimo saacadda geersa Afrika.
Trump ayaa la kulmi doona qoyska boqortooyada.
Wadahadalka uu la yeelan doono ra’iisulwasaaraha Britain Theresa May ayaa la filayaa in ay iskula soo qaadi doonaan arrimo ay ka mid yihiin isbadalka cimilada adduunka iyo shirkadda dhanka tiknoolajiyadda ee Huawei oo Shiinaha laga leeyahay.
Trump intii uusan caga dhigan wuxuu weeraray duqa magaalada London Sadiq Khan oo ay horay isugu dhaceen.
Ciidammada cirka ee Singapore ayaa labo diyaaradood oo kuwa dagaalka ah u diray diyaarad soo socoto oo wadda rakaab shacab ah ka dib markii la sheegay in bam uu saaran yahay, sida ay masuuliyiintu sheegeen.
Bamkaas ayaase markii dambe la ogaaday in uu been yahay.
Diyaaradda oo ay saarnaayeen 144 ruux oo rakaabka ah waxaa lahayd shirkadda Scoot, duulimaad lambarkeeduna wuxuu ahaa TR385, waxay ka soo duushay Philippines Axaddii, markaas oo booliiska lagu wargaliyay halis ammaanka ku soo foolleh.
Wiil 13 jir ah oo aan magaciisa la shaacin ayaa lagu eedeeyay in uu bamka beenta ah ka dambeeyay, sida ay ku warrantay warbaahinta gudaha.
Hadda booliiska ayuu kala shaqaynayaa baaritaanka ay wadaan, sida ay wararku sheegayaan.
Afhayeen u hadlay shirkadda Scoot ee laga leeyahay Singapore ayaa warbaahinta The Straits Times u sheegay in 144 ruux ee rakaabka ahayd iyo lix shaqaale ah ay si nabad ah u cago dhigreen garoonka Changi Airport.
Wasiirka difaaca ee dalka Singapore Ng Eng Hen ayaa mardambe sheegay “in Singapore ay hanjabaad kaste ay run u qaadan doonto inta laga xaqiijinayo in ay been tahay”.
“Labo diyaaradood oo kuwa dagaalka ah ayaa hareeraha ka maray diyaaradda, balse waxaa markii dambe caddaatay in waxa digniinta laga soo diray ay been ahayd” ayuu Facebook ku soo qoray Ng
“Sikastaba ha ahaatee, Ciidammada Cirka ee Jamhuuriyadda Singapore markaste heegan ayay ku jiri doonaan” ayuu intaas ku sii daray.
Madaxweyne Trump ayaa ku sii jeeda Britain halkaas oo ay uga billaabanayso booqasho rasmi ah oo saddex maalmood ah.
Arrintaas ayuuna ku tilmaamay safar aad muhiim u ah, dhanka kalana Ra'iisulwasaaraha Britain Theresa May ayaa sheegtay in ay tahay fursad lagu sii xoojin karo calaaqaadka aadka u wanaagsan ee labada dal ka dhaxeeya.
Balse siyaasadaha labada dal ayaa kala duwan marka ay timaaddo xaaladda Iiraan iyo isbadalka Cimilada Adduunka. Iyadoo arrinta booqashaduna ay taagan tahay, safiirka Maraykanka u fadhiya Britain ayaa ka digay in London ay la macaamisho shirkadda Huawei ee Shiinaha laga leeyahay, gaar ahaanna marka ay timaaddo khadka casriga ah ee 5G loo yaqaanno.
Dhanka kalana intii uusan duulin madaxweyne Trump wuxuu sheegay in uu soo dhawaynayo wadahadal uu lagalo Mexico, balse uu doonayo in dawladdaasi ay qaaddo tallaabooyin wax ku ool ah oo ay ku joojinayso soogalootiga ku qulqulaya Maraykanka.
Mexico ayuu markale ku eedeeyay in ay Maraykanka ka faa'iidaysanayso, wuxuuna ugu baaqay in ay arrintaas ka waantawdo.
Kulanti wanaagsan akhyaarta halkan naga daalacataay, kuna soo dhawaada tabinta tooska ah een ku samaynayno wararka Soomaalida iyo kuwa caalamka.
Waa maalin Isniin ah oo ay taariikhdu tahay 03 bisha Juunyo sannadka 2019.