Koox hubeysan oo markab u leexsatay dhanka Soomaaliya

Tebin toos ah

1. 21 Agoosto 2026War deg deg ah, Degdeg: Israa'iil oo sheegtay in ay heshay xog khatar ku ah oo ka imaanaysa Turkiga

   Safiirka Israel u fadhiya Maraykanka ayaa sheegay in Israel ay heshay xog cad oo muujinaysa in Turkigu qorsheynayo inuu si weyn u ballaariyo joogitaankiisa milatari ee Suuriya.

   Sida uu sheegay safiirku, Israel waxay tallaabada Turkiga u aragtaa “Khad cas oo la gudbay.”

   Wuxuu sheegay in Israel aysan doonayn inay sii kordhiso xiisadda ama dagaal la gasho Turkiga ama Suuriya, balse uu sheegay in khadka cas laga gudbay.

   Safiirku wuxuu intaas ku daray in tallaabada Israel ay ku salaysnayd xog ay heshay, isagoo ku tilmaamay joogitaanka Turkiga inuu yahay xadgudub cad oo ka dhan ah isfahamkii hore.

   Dhanka kale, wasiirka gaashaandhigga Israel ayaa madaxweynaha Turkiga ku eedeeyay inuu dalkiisa ku jiidayo “tallaabooyin khatar ah” oo ka dhacaya Suuriya. Hadalka ayaa yimid kaddib markii Israel si dadban u qiratay inay weerartay saldhig diyaaradeed oo ku yaalla waqooyiga Suuriya horraantii toddobaadkan.

   Wasiirku wuxuu sheegay in halkii Turkigu uu tijaabin lahaa go’aanka Israel ee ku aaddan is-difaaceeda, ay habboonaan lahayd in uu ku ekaado cambaareynta ay ka horjeedinayaan baarlamaanka Turkiga.

2. 21 Agoosto 2026War deg deg ah, Ra'iisul Wasaarahihii hore ee Pakistan Imraan Khan oo isbitaal la geeyay

   Ra’iisul wasaarihii hore ee Pakistan Imraan Khan ayaa gaaray isbitaal ku yaalla Islamabad, kaddib markii Maxkamadda Sare ay amartay in xabsiga looga soo saaro si loo sameeyo baaritaanno caafimaad.

   Booliis aad u badan ayaa lagu arkay Rawalpindi, halkaas oo lagu hayay tan iyo Agoosto 2023, ka hor inta aan loo qaadin isbitaalka. Agagaarka isbitaalka gaarka loo leeyahay ayaa la xiray, waxaana la adkeeyay ammaanka.

   Ra’iisul wasaarihii hore ayaa lagu helay dambi la xiriira musuqmaasuq, balse wuxuu sheegay in eedeymaha loo soo jeediyay ay yihiin kuwo dano siyaasadeed laga leeyahay.

3. 21 Agoosto 2026Vance: Qalabka ugu waxtarka badan ee aan u adeegsan karno Iran waa cadaadis dhaqaale

   Madaxweyne ku-xigeenka Maraykanka JD Vance ayaa ku dhawaaqay in uu billowday “waji cusub” oo dagaalka Maraykanka iyo Iiraan ah, isagoo sheegay in “qalabka ugu wax-ku-oolsan ee aan u adeegsan karno Iiraan uu yahay cadaadis dhaqaale.”

   Mr Vance oo ka hadlayay barnaamijka Kelly ee Travis & Buck Sexton, ayaa xusay “xiriirka xasaasiga ah” ee labada dal.

   Madaxweyne ku-xigeenka Maraykanka ayaa yiri: “Waxaan saaraynaa cadaadis dhaqaale, iyaguna waxay isku dayayaan inay cadaadis dhaqaale nagu saaraan. Laakiin xaqiiqadu waxay tahay in toddobaadyadii u dambeeyay ay iyagu la kulmayeen cadaadis aad uga badan kan na haysta.”

   Wuxuu intaas ku daray: “Waxaan sii wadi doonnaa hannaankan, sababtoo ah waxaan aaminsanahay in tani ay tahay habka ugu wanaagsan ee ugu dambayn lagu gaari karo hadafkeenna.”

   Saacado ka hor, Xoghayaha Maaliyadda Maraykanka Scott Bessent ayaa wareysi uu siiyay CNBC ku sheegay in dowladda Maraykanku toddobaadka soo socda ku dhawaaqi doonto cunaqabateyn dhaqaale oo ka sii adag kuwii hore kuwaasi oo ka dhan ah Iiraan, taas oo uu sheegay inay horseedi karto burburka xukuumadda Iiraan.

   Wuxuu cunaqabateyntan ku tilmaamay “dadaalkii ugu weynaa ee isku-dubaridan ee taariikhda lagu go'doominayo dal dhaqaale ahaan.”

   Warar dheeraad ah:

   Dakhliga Al-Shabaab ee Muqdisho oo hoos u dhacay iyo tababar ay ka heleen Xuutiyiinta - Warbixin QM

   Sida loo bilaabo ganacsi adigoo haysta raasumaal yar kadibna loo kobciyo

4. 20 Agoosto 2026Maxaad ka taqaanaa saddexda cunto ee xanuunka ama dhimashada kuu horseedi karo?

   Cuntada inta badan waxa dhibaato ah ma keento laakiin mararka qaarkood waxaa dhacda in cunnooyinka qaar ay sababaan xanuun ama xitaa dhimasho. Haddaba waa kuwee cuntooyinkaas?

   Sii akhri: Maxaad ka taqaanaa saddexda cunto ee xanuunka ama dhimashada kuu horseedi karo?

5. 20 Agoosto 2026War deg deg ah, Weli waxaad nagala socotaan BBCSomali, waxaana halkaan idinkugu soo gudbinaynaa wararkii ugu dambeyay ee dunida . MAHADSANIDIIN.

6. 20 Agoosto 2026War deg deg ah, War cusub: Doon qalibantay oo dad badan ku dhinteen

   Aas ayaa ka socday waqooyi-galbeed Nigeria, kaddib markii ku dhowaad 50 qof ay ku dhinteen doon rakaab ah xilli ay webi ka gudbayeen.

   Mas’uuliyiintu waxay sheegeen in dadka dhintay intooda badan ay ahaayeen haween iyo carruur u socday inay ka qayb qaataan goosashada dalagyada beeraha ee ku yaalla dhinaca kale ee webiga.

   Waxaa la sheegay in doonta ay sidday in ka badan 70 qof markii ay rogmatay. Booliisku waxay sheegeen in 16 qof ay badbaadeen, halka ugu yaraan 12 qof ay weli maqan yihiin.

   Shilalka doonyaha ayaa ku badan marinnada biyaha ee Nigeria, iyadoo doonyaha badankood ay yihiin kuwo si liidata loo dayactiray, isla markaana inta badan lagu raro dad ka badan awoodda ay qaadi karaan.

7. 20 Agoosto 2026War deg deg ah, Degdeg: Faahfaahin ka soo baxaysa Markab kooxo hubeysan u weeciyeen dhanka Soomaaliya

   Warbixinno ka soo baxay hay’adaha ammaanka badda ayaa sheegaya in Markab shidaal lagu qabsaday xeebaha Yemen, kaddib markii lix nin oo hubaysan ay la wareegeen markabka, kuna khasbeen inuu jihada u beddelo dhanka Soomaaliya.

   Markabku wuxuu ka soo shiraacday Cumaan. Waxa uu diray baaq degdeg ah kaddib markii ay u soo dhawaatay doon kaga timid galbeedka Gacanka Cadmeed. Ilaa hadda lama hayo faahfaahin ku saabsan xaaladda badbaadada shaqaalaha markabka oo ka babanayay calan shisheeye.

   Dhacdadan waxay kusoo beegmaysaa xilli ay kordheen weerarrada la xiriira burcad-badeednimada ee ka dhaca xeebaha Soomaaliya. Tirada dhacdooyinka burcad-badeednimada ayaa gaartay heerkii ugu sarreeyay muddo toban sano ah, inkastoo ay weli aad uga yar tahay ku dhowaad 200 weerar sanad kasta oo la diiwaangelin jiray intii u dhexeysay 2009 iyo 201

8. 20 Agoosto 2026War deg deg ah, War cusub: Mareykanka oo Qadar ka iibinaya diyaarado qiimahoodu aad u sarreeyo iyo waxa ay u adeegsan doonto

   Wasaaradda Arrimaha Dibadda ee Mareykanka ayaa maanta oggolaatay iib suurtagal ah oo Qadar loogu iibinayo diyaarado shidaal-ku-shubis ah oo qiimahoodu gaarayo 4.5 bilyan oo doollar

   Qadar ayaa codsatay inay iibsato ilaa afar diyaaradood oo KC-46A ah, kuwaas oo lagu qalabeyn doono nidaamyo digniin ka bixiya gantaallada. Heshiiskan ayaa loo gudbiyay Kongareeska Mareykanka si uu u bixiyo oggolaanshaha kama dambaysta ah.

   Wasaaradda Arrimaha Dibadda Mareykanka ayaa sheegtay in heshiisku gacan ka geysan doono xoojinta awoodda difaaca Qadar iyo iskaashiga milatari ee ay la leedahay ciidamada Mareykanka iyo xulafadooda.

   Go’aankan ayaa yimid xilli Qadar ay ka mid tahay dalalka dhexdhexaadinaya wadahadallada u dhexeeya Mareykanka iyo Iran, kuwaas oo lagu doonayo in lagu soo afjaro bilo dagaal socda, inkastoo wadahadalladu hadda hakad ku jiraan. Qadar sidoo kale waxay ku lug leedahay dadaallada lagu dhexdhexaadinayo Israel iyo Xamas.

   Saldhigga Ciidanka Cirka ee Cubeyda, oo ah saldhigga milatari ee ugu weyn Mareykanka ee Bariga Dhexe, ayaa ku yaalla Qadar, waxaana la sheegay in dhowr jeer lagu bartilmaameedsaday weerarro ka yimid Iran tan iyo markii dagaalku billowday dhammaadkii Febraayo.

9. 20 Agoosto 2026War deg deg ah, 70,000 oo tallaal Ebola ah oo loo diray dalka Congo.

   70,000 tallaal ayaa loo diray Jamhuuriyadda Dimuqraadiga ah ee Congo si looga hortago faafitaanka cudurka Ebola.

   Hay’adda caalamiga ah ee kormeerta soo saarista tallaallada ayaa sheegtay in xirmadan ay ka kooban tahay 50,000 qiyaasood oo tallaal ah, kuwaas oo la siin doono kalkaaliyayaasha caafimaadka iyo shaqaalaha safka hore ee la dagaallamaya cudurka.

   Tallaallo kale ayaa loo isticmaali doonaa baaritaanno iyo tijaabooyin caafimaad. Tallaalkan waxaa loogu tala galay inuu dadka ka difaaco nooca Zaire Ebola, oo ka mid ah noocyada sida fudud u faafa. Hase yeeshee, weli lama xaqiijin inuu si fiican uga hortago nooca Bundibugyo, kaas oo lala xiriiriyay faafitaanka hadda socda.

   Waxaa la filayaa in dhowaan la bilaabo tijaabada tallaallo isku-dhafan oo loogu talagalay nooca Bundibugyo, iyadoo markii ugu horreysay tijaabada lagu sameyn doono dadka.

10. 20 Agoosto 2026War deg deg ah, Madaxweynaha Cameroon oo muddo la la'aa oo dalka dib ugu soo laabtay

    Madaxweynaha Cameroon, Paul Biya, ayaa dib ugu laabtay dalkiisa kadib markii uu in ka badan laba bilood ku maqnaa Geneva, Switzerland, halkaas oo lagu sheegay inuu ku jiray xaalad go’doon ah.

    Biya oo 93 jir ah, isla markaana ah madaxweynaha xilka haya ee ugu da’da weyn dunida, ayaa caawa fiidkii tagay caasimadda Yaoundé isaga iyo xaaskiisa Chantal Biya.

    Garoonka diyaaradaha caalamiga ah ee Yaoundé Nsimalen, boqolaal taageerayaal ah ayaa isugu soo baxay soo dhaweyntiisa.

    Taageerayaashu waxay xirnaayeen dhar ay ku xardhan tahay sawirka madaxweynaha, iyagoo qoob-ka-ciyaaraya kuna dhawaaqaya erayo taageero ah.

    Muuqaallo toos ah ayaa muujiyay madaxweynaha oo gaari dhexdiisa gacanta u taagaya taageerayaashiisa, balse uusan istaagin si uu ula hadlo. Waxa kale oo si kooban warbixin uga siiyay qaar ka mid ah mas’uuliyiinta sare ee dowladda.

11. 20 Agoosto 2026War deg deg ah, Dalka Jarmalka 14,000 oo qof oo kulayl dartii ugu dhimatay

    Jarmalka ayaa sheegay in ku dhowaad 14,000 qof ay sanadkan ugu dhinteen dhibaatooyinka la xiriira kulaylka, taas oo ah tiradii ugu badnayd ee abid la diiwaangeliyo.

    In ka badan 70% dhimashadaasi waxay dhacday hal toddobaad oo keliya, dhammaadkii Juun, xilligaas oo heerkulku gaaray 40°C.

    Sida laga soo xigtay hay’adaha caafimaadka dadweynaha ee Jarmalka, tiradani waxay ka badan tahay tii sannadihii hore, markaas oo kumannaan qof ay u dhinteen kulaylka.

    Dadka ugu badan ee dhintay waxay ahaayeen kuwa da’doodu ahayd 75 sano iyo wixii ka weyn.

    Warar dheeraad ah:

    Dakhliga Al-Shabaab ee Muqdisho oo hoos u dhacay iyo tababar ay ka heleen Xuutiyiinta - Warbixin QM

    Sida loo bilaabo ganacsi adigoo haysta raasumaal yar kadibna loo kobciyo

12. 20 Agoosto 2026Sida loo bilaabo ganacsi adigoo haysta raasumaal yar kadibna loo kobciyo

    Iyadoo dalalka Afrika qaar ay wajahaayn sicir-barar, lacag yari iyo kharashka badan ee ku baxa hawlgelinta xirfad ama ganacsi, in ganacsi lagu bilaabo raasumaal yar waxay noqon kartaa caqabad weyn.

    Si kastaba ha ahaatee, raasumaal badan la'aantu macnaheedu ma aha in qofku aanu samaysan karin ganacsi faa'iido u soo saara.

    Khubarradu waxay aaminsan yihiin in waxa ugu muhiimsani yahay in la ogaado nooca ganacsi ee ku habboon raasumaalka iyo xaaladda jirta, in lacagta si qorshaysan loo isticmaalo, iyo in laga fogaado in faa'iidada la isticmaalo ka hor inta aanu ganacsigu xoogaysan.

    Faa'iido yar oo si joogto ah loo helo waxay noqon kartaa raasumaal weyn, haddii qayb ka mid ah faa'iidadaas dib loogu celiyo ganacsiga.

    Haddaba, sidee ayuu qofku ganacsi ugu bilaabi karaa raasumaal yar, u ilaalin karaa lacagta uu geliyay, kadibna si tartiib-tartiib ah ugu kobcin karaa ilaa uu ganacsigu noqdo mid weyn?

    Sii akhri......

13. 20 Agoosto 2026Turkiga, Masar, Qadar oo cambaareeyay weerarradii Israa'iil ay ku qaadday Gaza

    Turkiga, Masar iyo Qadar ayaa si xooggan u cambaareeyay weerarradii dhawaan Israa'iil ay ku qaadday Gaza, iyagoo ku sheegay bayaan wadajir ah in Israa'iil "ay waajib ku tahay inay u hoggaansanto waajibaadkeeda ku xusan heshiiska xabad joojinta oo ay ka fogaato ficillada horseedi kara xiisadda oo sii kordheysa."

    Dalalkan ayaa sidoo kale ku dhawaaqay: "Dalalka dhexdhexaadinaya ayaa xoogga saaraya in kororka weerarrada Israa'iil uu wiiqayayo dadaallada gobolka iyo kuwa caalamiga ah xilli xasaasi ah."

    Sida laga soo xigtay saddexda waddan, waxaa hadda socda dadaallo ballaaran oo lagu hirgelinayo "Qorshaha Dhammaystiran ee lagu soo afjarayo Khilaafka Qasa," oo ay ku jiraan kulan dhexmaray "Wakiilka Nabadda" iyo mas'uuliyiinta Israa'iil, iyo "tallaabo wax ku ool ah ayaa laga qaaday geeddi-socodka gorgortanka."

    Turkiga, Masar iyo Qadar ayaa sheegay in bulshada caalamka iyo "hawlgalka nabadda" ay tahay inay qaadaan tallaabooyinka lagama maarmaanka ah si loo hubiyo u hoggaansanaanta xabbad joojinta iyo ka hortagga sii kordhinta xiisadda.

    Warar dheeraad ah:

    Dakhliga Al-Shabaab ee Muqdisho oo hoos u dhacay iyo tababar ay ka heleen Xuutiyiinta - Warbixin QM

    Sida loo bilaabo ganacsi adigoo haysta raasumaal yar kadibna loo kobciyo

14. 20 Agoosto 2026Trump oo ballan-qaaday tallaabooyin dhaqaale oo adag oo ka dhan ah Iran iyo waddamada taageera

    Donald Trump ayaa sheegay inuu qaadi doono tallaabooyin dhaqaale oo ka sii adag kuwii hore oo ka dhan ah Iiraan, iyo sidoo kale dal kasta oo caawiya ama ganacsi la sameeya Iiraan.

    Madaxweynaha Mareykanka ayaa bartiisa Truth Social ku qoray, isaga oo dhammaan xarfaha waaweyn adeegsanaya, inuu bilaabayo “hawlgalkii dhaqaale ee ugu burburka badnaa ee abid laga qaado waddan”, balse ma uusan bixin faahfaahin dheeraad ah ama magaca dal kale oo aan Iran ahayn.

    Arrintan ayaa timid kadib markii xabbad-joojin 60 maalmood ah ay si rasmi ah u dhammaatay Isniintii, iyadoo aan weli muuqan wax heshiis diblomaasiyadeed ah oo lagu soo afjarayo dagaalka ay Mareykanka iyo Israa’iil bilaabeen dhammaadkii Febraayo. Tehran ayaa sheegtay in hanjabaadda Trump ay sii kordhin doonto colaadda iyo cadaawadda.

    Haddii la hirgeliyo, tallaabadan waxay sii ballaarin doontaa olole dhaqaale oo cadaadis lagu saarayo Iran, kaas oo loogu talagalay in lagu qasbo inay is-dhiibto.

    Mareykanka ayaa bishii Abriil bilaabay mowjado cunaqabateyn ah oo lagu qaaday bangiyada iyo shirkadaha shisheeye ee ganacsi la sameeya Iran, xilli ay caddaatay in tallaabadii militari aysan horseedin riditaanka xukuumadda Tehran ama is-dhiibiddeeda, taas oo ahayd waxa Trump markii hore rajaynayay.

    Dhanka kale, tan iyo markii uu dagaalku bilowday, Iran waxay awood u yeelatay inay xaddiddo isu socodka maraakiibta ganacsiga ee maraya marin-biyoodka Hormuz, taas oo sare u qaadday qiimaha tamarta adduunka.

    Warar dheeraad ah:

    Dakhliga Al-Shabaab ee Muqdisho oo hoos u dhacay iyo tababar ay ka heleen Xuutiyiinta - Warbixin QM

    Sida loo bilaabo ganacsi adigoo haysta raasumaal yar kadibna loo kobciyo

15. 20 Agoosto 2026Dowladda Itoobiya oo lagu eedeeyay inay duqeymo ka geysatay Tigray

    Sida uu sheegay Xafiiska Arrimaha Isgaarsiinta ee gobolka, 13 qof ayaa ku dhaawacmay weerarro diyaaradaha aan duuliyaha lahayn oo saaka, 20-ka Agoosto 2026, ka dhacay Mekelle, caasimadda gobolka Tigray ee Itoobiya.

    Bayaan ay soo saareen, mas’uuliyiintu waxay dowladda federaalka ku eedeeyeen inay sii waddo duqeymaha cirka ee dhowaanahan dhacay, iyagoo sheegay in laba weerar ay ka dhaceen meelo kala duwan oo magaalada ah.

    Weerarkii ugu horreeyay ayaa ku dhacay xaafadda Momona ee hoos-tagta Hawelti, halka kan labaadna uu ku dhuftay deegaanka Kuha.

    Mas’uuliyiintu waxay sheegeen in weerarrada lagu bartilmaameedsaday guryo ay dad rayid ahi deggan yihiin, waxaana ku dhaawacmay 13 qof oo rayid ah. Waxay dadka deegaanka uga digeen inay taxaddar muujiyaan, iyadoo laga cabsi qabo weerarro kale.

    Tigray TV ayaa sidoo kale sheegay in weerar kale laguq aaday xaafadda Daero ee Mekelle, halkaas oo ay ku dhaawacmeen hooyooyin iyo carruur ku dhowaa goobta. Warbaahintu waxay baahisay muuqaallo muujinaya guryo burburay iyo dad rayid ah oo dhaawac ah oo loo fidinayo daryeel caafimaad.

    Weerarka maanta ayaa noqonaya kii ugu weynaa ee ka dhaca caasimadda gobolka Mekelle tan iyo markii la saxiixay Heshiiskii Pretoria, kaas oo soo afjaray dagaalkii Tigray ee 2020–2022. Duqeymaha dib u soo cusboonaaday ayaa kordhiyay walaaca laga qabo in uu dib u qarxo dagaal ballaaran oo u dhexeeya dowladda federaalka iyo TPLF, oo ah Jabhadda Xoreynta Shacabka Tigray.

    Mas’uuliyiinta gobolka ayaa ciidamada federaalka ku eedeeyay inay maalmihii u dambeeyay fuliyeen weerarro drone oo dhowr ah. 18-kii Agoosto, waxay BBC u sheegeen in laba weerar oo ka dhacay meel u dhow Dandera, oo qiyaastii 15 kiiloomitir u jirta Mekelle, ay ku dhinteen hal qof, mid kalena uu ku dhaawacmay. 10-kii Agoosto, weerarro drone oo ka dhacay degmada Raya-Alamata ayaa lagu dilay hal qof, halka saddex kalena ay ku dhaawacmeen koonfurta Tigray.

    Dowladda federaalka ayaan weli wax war ah ka soo saarin weerarradii ugu dambeeyay.

    Warar dheeraad ah:

    Dakhliga Al-Shabaab ee Muqdisho oo hoos u dhacay iyo tababar ay ka heleen Xuutiyiinta - Warbixin QM

    Sida loo bilaabo ganacsi adigoo haysta raasumaal yar kadibna loo kobciyo

16. 20 Agoosto 2026Koox hubeysan oo markab u leexsatay dhanka Soomaaliya

    Hay'adda amniga badda ee UK ayaa sheegtay in markab xamuul ah oo ku safrayay Gacanka Cadan ay saarnaayeen dad hubaysan kuwaasoo u weeciyay dhanka Soomaaliya.

    Dhacdadan ayaa timid iyadoo ay soo ifbaxday weerarro burcad badeed Soomaali ah ka dib in ka badan toban sano.

    Waxay sidoo kale ku soo beegantay hanjabaadda Iiraan ee ah in xulafadeeda Xuutiyiinta Yemen ay ka horjoogsan doonaan maraakiibta Badda Cas ee dhex marta Gacanka.

    Hay'adda amniga badda ee UK ayaa sheegtay in markabkan ay saarnaayeen lix qof oo hubaysan wuxuuna marayay meel qiyaastii 136 mayl badeed bari ka xigta Yemen, kaasoo ku yaal dhinac ka mid ah Gacanka Cadan.

    Waxay ku sii jeedaan Soomaaliya, oo dhinaca kale ah. Weli ma cadda cidda afduubtay markabka, laakiin tani waa dhacdadii ugu dambeysay tan iyo markii ay soo ifbaxday burcad badeedda Soomaaliya bishii Abriil.

    Wararka ayaa sheegaya in ay tan sii hurisay caro gudaha ah oo ka dhalatay maraakiibta kalluumeysiga ee sharci darrada ah ee shisheeye. Laakiin qaar ka mid ah falanqeeyeyaasha difaaca ayaa tuhunsan in fallaagada Xuutiyiinta Yemen ay la shaqeyn karaan burcad badeedda si ay u carqaladeeyaan maraakiibta Badda Cas.

    Iiraan ayaa ku hanjabtay inay sidaas sameyn doonto iyadoo ka jawaabaysa xayiraadda ciidamada badda ee Mareykanka ee Marinka Hormuz.

    Warar dheeraad ah:

    Ehellada mid ka mid ah burcad-badeed lagu xukumay Hindiya oo farriin u diray dowladda Soomaaliya

    Burcad-badeed xeebaha Soomaaliya ku afduubtay markab shidaal siday

17. 20 Agoosto 2026Deynta Mareykanka oo sare u dhaaftay 40 trillion oo doolar

    Tirakooyinka ka soo baxay Wasaaradda Maaliyadda ee Mareykanka ayaa muujinaya in deynta qaranka Mareykanka ay laba jibbaarantay muddo toban sano ah, iyadoo kor u dhaaftay $40 tiriliyan.

    Kororka deyntaas ayaa ka dhashay sannado badan oo ay dowladdu si weyn u kharash-gareysay intii ay talada hayeen madaxweynayaashii Donald Trump iyo Joe Biden, iyo sidoo kale kororka dulsaarka oo sii kordhiyay wadarta deynta.

    Kharashaadka dowladda oo kordhay, oo ay ku jiraan kharashaadka dagaalka, iyo canshuur-dhimista ayaa ka mid ah sababaha arrintan keenay.

    Si kastaba ha ahaatee, Madaxweyne Trump wuxuu ku eedeeyay kororka heerarka dulsaarka. Wuxuu sheegay in "haddii dalkeennu doonayo inuu guuleysto oo horumar sameeyo, heerarka dulsaarku ay tahay inay hoos u dhacaan, sababtoo ah taasi waxay sii caddaynaysaa in dalkeennu yahay dal xooggan".

    Sannadkii 2016, deynta qaranka Mareykanka waxay ka yareyd $20 tiriliyan.

    Xafiiska Miisaaniyadda Kongareeska Mareykanka ayaa hore u saadaaliyay in wadarta deyntu ay gaari doonto $39.6 tiriliyan marka uu dhammaado sannad-maaliyadeedka 2026.

    Kororka deynta oo ka sare u dhaafay intii la filayay ayaa walaac ka dhaliyay qiyaasta ay dowladda Mareykanku u baahan tahay inay lacag ku amaahato iyo saameynta arrintaasi ay mustaqbalka ku yeelan karto kororka dulsaarka.

    Xafiiska Miisaaniyadda Kongareeska ayaa sheegay in kharashka dulsaarka deynta Mareykanku uu ku dhowaanayo $1.41 tiriliyan, iyadoo la filayo in deynta qaranku ay gaarto ku dhowaad $64 tiriliyan marka la gaaro 2036.

    Iyadoo dowladda Mareykanku ay lacag badan u adeegsanayso buuxinta farqiga miisaaniyaddeeda, macaamiisha ayaa iyaguna wajahaya dulsaaryo sare iyo sicir-barar.

18. 20 Agoosto 2026War deg deg ah, Garsoorka Iiraan oo dil ku fuliyay Ghaem Hosseini

    Wakaaladda wararka ee Mizan, oo ah wakaaladda wararka ee Garsoorka Jamhuuriyadda Islaamiga ah ee Iiraan, ayaa ku dhawaaqday in subaxnimadii Khamiista lmaanta ah a fuliyay xukunkii dilka ee Ghaem Hosseini, oo ahaa qof kale oo ka mid ah dadkii ka qaybgalay mudaaharaadyadii dhacay bishii Janaayo.

    Garsoorku wuxuu ku tilmaamay inuu yahay “muwaadin ajnabi ah”, balse ma uusan sheegin dhalashadiisa.

    Waxaa lagu soo oogay dacwad ah “ku lug lahaanshaha dembiga ka dhacay Fagaaraha Alikhani ee Isfahan.”

    Eedaha loo jeediyay waxaa ka mid ah “hub la bixid iyo cabsi gelin, abuurista amni-darro guud iyo mid baahsan, iyo falal ka dhan ah badqabka jireed ee dadka iyo amniga qaranka.”

    Sida uu sheegay garsoorku, kiiska Ghaem Hosseini waxaa dib u eegay Maxkamadda Sare kaddib markii racfaan laga qaatay, hase yeeshee xukunku halkaasna waa lagu ansixiyay.

    Wakaaladda wararka Mizan ayaa sheegtay in intii uu socday baaritaanka kiiska, Ghaem Hosseini oo loo yaqaan “Arian” uu “qirtay” inuu joogay mudaaharaadyadii ka dhacay Fagaaraha Alikhani ee Isfahan, isla markaana uu watay hub qabow.

    Abolfazl Sepahi, Amir Hossein Safari, Erfan Esfandiari iyo Gol Mohammad Mohammadi ayaa horay loogu fuliyay xukun dil ah oo kiiskan la xiriira.

    Shervin Bagherian, Amir Hossein Maleki iyo Alireza Sepahi ayaa ah saddexda kale ee lagu helay dembiga kiiskan.

    Warbaahinta dowladda ayaa Mohammad Hemmati, Valiollah Safari, Hossein Ramezani iyo Ali Khashooi ku tilmaantay afar askari oo loo diray Fagaaraha Alikhani 8-dii Janaayo, si ay uga hortagaan mudaaharaadyada. Sida ku xusan sheekada rasmiga ah, waxaa la dilay kaddib markii ay mudaharaadayaashu hareereeyeen.

    Tan iyo markii uu dagaalka u dhexeeya Maraykanka, Israa’iil iyo Iiraan bilowday 28-kii Febraayo, waxaa dalka Iiraan si weyn u dardar-galay fulinta xukunnada dilka. Garsoorku wuxuu dil ku fuliyay tobannaan qof oo lagu soo oogay eedo kala duwan, oo ay ka mid yihiin “basaasnimo” iyo “la-shaqaynta Maraykanka iyo Israa’iil”.

    Dadka la dilay waxaa sidoo kale ka mid ahaa qaar ka mid ah dadkii la xiray intii ay socdeen mudaaharaadyadii dalka oo dhan bishii Diseembar

19. 20 Agoosto 2026Maamulka Trump oo bartilmaameedsan kara kumanaan Itoobiyaan ah si dalka looga masaafuriyo

    Garsoore heer federaal ah ayaa Talaadadii u oggolaaday maamulka Madaxweynaha Mareykanka Donald Trump inuu soo afjaro ilaalinta sharci ee la siiyay in ka badan 5,000 Itoobiyaan ah, taas oo u saamaxaysay inay ku noolaadaan ksna shaqeeyaan gudaha Mareykanka.

    Garsooraha Maxkamadda Degmada Mareykanka ee Boston, Brian Murphy, ayaa qaaday xannibaaddii ugu dambeysay ee garsooreyaashu saareen go'aanka Waaxda Amniga Gudaha Mareykanka (DHS) ee lagu joojinayo Xaaladda Ilaalinta Ku-meelgaarka ah (TPS) ee dalalka qaarkood. Tallaabadan ayaa timid kadib markii Maxkamadda Sare ee Mareykanka ay bishii Juun u oggolaatay maamulka Trump inuu soo afjaro ilaalinno la mid ah kuwaas oo loo fidiyay kumannaan qof oo ka soo jeeda Haiti iyo Suuriya.

    Go'aanka Maxkamadda Sare, oo ay taageertay aqlabiyadda muxaafidka ah ee 6-3, ayaa xaddiday awoodda garsooreyaasha ay ugu eegaan tallaabooyinka DHS ee maamulka Trump ku doonayo inuu ku soo afjaro TPS-ka 13 dal, kuwaas oo muhaajiriinta u qalanta siinayay ilaalin bani'aadamnimo.

    James Percival, oo ah la-taliyaha guud ee DHS, ayaa soo dhaweeyay go'aanka, isagoo qoraal uu baraha bulshada ku daabacay ku yiri: "Dhammaan joojinta TPS-ka hadda way dhaqan galeen!"

    Joojinta TPS-ka Itoobiya ayaa waxaa ka horyimid muwaadiniin Itoobiyaan ah iyo ururka u dooda bulshada African Communities Together, kuwaas oo muujiyay niyad-jab ku aaddan go'aanka Talaadadii.

    "Dhibaatada Itoobiya wali way socotaa, go'aankanna wuxuu nolosha kumannaan Itoobiyaan ah oo ku nool Mareykanka gelinayaa khatar aad u weyn," ayay tiri Diana Konaté, oo ah ku-xigeenka agaasimaha fulinta ee ururka u qaabilsan siyaasadda iyo u doodista.

    TPS, oo uu dhigayo sharciga federaalka Mareykanka, waxaa loo heli karaa dadka dalalkooda ay ka dhaceen musiibooyin dabiici ah, colaado hubeysan ama xaalado kale oo aan caadi ahayn. Waxay dadka u qalma siisaa oggolaansho shaqo iyo ilaalin ku-meelgaar ah oo ka dhan ah masaafurinta.

    Sii akhriso

20. 20 Agoosto 2026Faahfaahin ka soo baxeysa shil diyaarad oo ka dhacay Kenya

    Dowladda Ecuador ayaa sheegtay in madaxa waaxdeeda sirdoonka iyo xaaskiisa ay ku dhinteen shil diyaaradeed oo helicopter ah, kaas oo Arbacadii shalay ka dhacay degmada Samburu ee dalka Kenya.

    Shan muwaadin oo Maraykan ah ayaa sidoo kale ku dhintay shilkaasi, sida uu sheegay afhayeenka Wasaaradda Arrimaha Dibadda ee Maraykanka.

    Hay’adda Duulista Rayidka Kenya (KCAA) ayaa sheegtay in helicopter-ka uu ku jiray safar dalxiis ah, isagoo ka ambabaxay keydka duurjoogta ee Loisaba kuna sii jeeday Ewaso Nyiro, oo ah webi mara agagaarka dhowr keyd oo qaran.

    Degmada Samburu waa mid ka mid ah goobaha dalxiiska ee ugu caansan Kenya, waxaana ku yaalla keydyo badan oo duurjoogta ah oo ay maamulaan shirkado gaar loo leeyahay. Waxa kale oo ay caan ku tahay muuqaalkeeda dabiiciga ah ee quruxda badan oo gaar ah.

    Sawirrada laga qaaday goobta shilku ka dhacay ayaa muujinayay qiiq ka baxaya dhul geedo leh, halkaas oo helicopter-ku ku dhacay buurta Ololokwe. Shaqaalaha Laanqayrta Cas ee Kenya ayaa la arkayay iyagoo ku dhowaanaya burburka helicopter-ka oo weli dab ka holcayay.

    Dowladda Ecuador ayaan faahfaahin ka bixin geerida Sensi-Contugi, oo 44 jir ahaa, kaas oo sannadkii 2024 loo magacaabay Agaasimaha Guud ee Xarunta Sirdoonka Istiraatiijiga ah ee dalkaas.