Tebin toos ah
Waxaan intaas ku soo gabagabaynaynaa tebintii tooska ahayd ee aan maanta oo Arbaca ah wadnay.
Mahadsanidiin.
Sheekooyinkii ugu waaweynaa maanta.
Cabdiraxmaan Cabdishakuur “Boorarkii musharraxnimada ee iigu dhegenaa magaalada waan iska fujiyay”
In ka badan 15 qof oo ku dhimatay qarax ka dhacay duleedka Balcad
Afarta digniin ee ugu culus ee dowladda Soomaaliya loo diray
Xigashada Sawirka, Getty Images
Mareykanka ayaa sii wadi doona inuu taageero Afghanistan ka dib marka uu kala baxo ciidamdiisa. Waxaa sidaasi xaqiijiyay madaxweyne Biden.
Xoghayaha arrimaha dibedda Mareykanka, Antony Blinken, ayaa ku adkeystay inay tahay waqtigii ugu haboonaa ee ciidammada Mareykanka laga soo saari lahaa Afghanistan - labaatan sannadood ka dib markii ugu horreysay ee ay galeen.
Blinken ayaa shir jaraa'id oo uu ku qabtay magaalada Brussels ku sheegay in xoogagga Mareykanka ay isku dubaridi doonaan bixitaankooda.
Wuxuu sheegay inay ku guuleysteen yoolalkii ay dejiyeen. Talaadadii, saraakiisha Aqalka Cad ayaa sheegay in ciidamada Mareykanka ay ka bixi doonaan Afghanistan 11-ka bisha Sebtember waxaana la sugayaa in Madaxweyne Biden uu ku dhawaaqo go’aankaasi.
Saddexda wadan ee reer Yurub ee saxeexay heshiiska Nukliyeerka Iran ayaa walaac xooggan ka muujiyay qorshayaasha tayeynta yuraaniyamka ee xukuumadda Tehran.
Bayaan ay si wada jir ah u soo saareen, Faransiiska, Jarmalka iyo Ingiriiska ayaa waxay ku sheegeen in uraniumka Iran la kordhiyo boqolkiiba lixdan ay tahay horumar halis ah.
Waxay sheegeen inaysan jirin sabab ay Iran ugu baahantahay inay kobciso uraniumkeeda. Madaxweynaha Iiraan, Xasan Ruuxaani, ayaa sheegay in go’aanka lagu kobcinayo barnaamijka tayeynta yuraaniyamkooda uu jawaab u ahaa weerar ay Israa’iil ku qaadday mid ka mid ah xarumaheeda nukliyeerka.
Iran ayaa sheegtay Talaadadii inay si weyn kor ugu qaadi doonto hanaanka tayeynta boqolkiiba lixdan. Sare u qaadiddan ayaa waxay aad uga sarreeysaa tii la isku raacay heshiiskii 2015-kii ee Niyukleerka Iran, inkastoo ay ka yartahay caddadii looga baahnaa in Bambo atomic ah lagu sameeyo.
Mdaxaweyne Xasan Rouhani ayaa sheegay in qaraxa lala beegsaday xarunta uu ahaa weerar Israel ay ka dambeeysay isla markaana Iran ay dib u tayayn doonto iyadoo adeegsanaysa qalab casri ah, si loo xoojiyo tayeynta uraniumka.
Soomaliland ayaa qoraal rasmi ah oo ay kasoo saartay xiisadda siyaasaddeed ee Soomaaliya, waxay walaac kaga muujisay xaaladda hadda ka dhex taagan dawladda iyo mucaaridka.
Qoraal kasoo baxay wasaaradda arrimaha dibedda ee Jamhuuriyada Iskeeeed Madaxbanaanida ugu dhawaaqday ee Soomalailand ayaa lagu yiri :
"Ismari-waagga siyaasaddeed ee maanta jira ayaa u muuqda mid khatar buuxda ku ah amniga iyo xasiloonida gobolka taasi oo dhibaato hor leh abuuri karta."
Xigashada Sawirka, MADAXTOOYADA SOMALILAND
Xigashada Sawirka, PA Media
Denmark ayaa noqotay dalkii ugu horreeyay ee gebi ahaanba joojiya isticmaalka tallaalka fayraska corona ee AstraZeneca.
Guddiga caafimaadka Qaranka ayaa sheegay inuu jiro xiriir ka dhaxeeya tallaalka AstraZeneca iyo dhiig xinjiroowga.
Waxay Denmark sheegtay in fayraska ay xakameeyeen sidoo kalana ay dalka yaallaan tallaallo kale, sidaa darteed waxay sheegeen inay gabi ahaanba joojiyeen isticmaalka tallaalka AstraZeneca.
Bil ka hora ayay hakad geliyeen isticmaalka tallaalka ka dib markii ay soo baxeen wararka sheegaya in tallaalka uu sababo dhiig xinjirow. Hay’adda dawooyinka ee Yurub iyo hay’adda caafimaadka Adduunka ayaa labaduba sheegay in faa’iidada tallaalka ay ka badan tahay halistiisa.
Qiyaastii boqol iyo konton kun oo qof oo reer Denmark ah oo horey u qaatay qeybtii ugu horreysay ee tallaalka AstraZeneca ayaa haatan la siin doonaa tallaal ka duwan kii hore.
Xigashada Sawirka, ABDIRAHMAN ABDISHAKUR WARSAME/ FACEBOOK
Cabdiraxmaan Cabdishakuur oo kamid ah musharraxiinta doorashada madaxtinimada Soomaaliya ayaa boorarkiisa ololaha doorashada ee ku dhegenaa waddooyinka magaalada Muqdisho uu ka fujiyay halkaas kadib go’aanka muddo kordhinta loogu sameeyay hay’adaha dowladda.
Wuxuu sheegay in aysan jirin sabab uu usii wato ololahiisa doorashada isla markaana ‘hadda aysan jirin meel laga tartamo’
“Waxaan sheegay in aan boorarkii musharraxnimada ee iigu dhegenaa magaalada waan iska fujiyay, 13 boorar ayay ahaayeen,sababtana waxay tahay in madaxweynihii xilkiisa dhamaaday diiday in doorasho la qabto”
Ugu yaraan 17 qof oo rayid ah ayaa dhintay kadib markii gaari kuwa dadweynaha ah oo ay la socdeen ay miino kula qaraxday duleedka degmada Balcad ee gobolka Shabeellada Dhexe galinkii dambe ee maanta sida laga soo xigtay booliska magaalada Balcad.
Afar qof oo kale oo iyana dhaawacyo culus ka soo gaareen qaraxa miinada ayaa loo qaaday magaalada Muqdisho.
Jabuuti ayaa ka mid ah dalalka ay ka jirto shaqa la'aanta haysata dhalinyarada.
Balse xarun lagu magacaabo hal-abuurka dhalinyarada oo ku taalla caasimadda Jabuuti ayaa ku dedaalaysa sidii ay u soo saari lahayd dhalin iskood u shaqeysta isla markaana wax ku soo kordhiya dhaqaalaha dalka.
Ubax Axmed Mallow oo madax ka ah xaruntaas ayaa BBC u sheegtay in xarunta ay ka shaqeeneyso sidii dhalinyarada looga caawin lahaa hirgelinta fikradaha ku saleysan horumarinta noloshooda iyo shaqo abuurka.
Beesha caalamka ayaa sheegay inay ka walaacsan yihiin muddo kordhinta loo sameeyay muddo xileedka loo sameeyay hay’adaha dowladda Soomaaliya.
“Waxaan dhowr jeer ku celcelinay in doorasho is barbar socota ama mid aanan loo dhaneyn ama dadaal kasta oo horseedayo muddo kororsi aanan la taageeri doonin” ayaa lagu yiri warqadda kasoo baxday beesha caalamka.
Waxay sidoo kale sheegeen in go’aankan uu caqabad ku yahay amniga iyo xasiloonida dalka.
Warqaddan ayaa kasoo baxday (AMISOM), Canada, Denmark, Midowga Yurub, Finland, Jarmalka, Urur Goboleedka (IGAD), Ireland, Talyaaniga, Netherlands, Norway, Spain, Sweden, Switzerland, UK, Mareykanka iyo Qaramada Midoobey.
Ugu yaraan 20 qof ayaa ku dhimatay shil gaari oo ka dhacay gobolka Asyut oo dalka Masar.
Saraakiisha waxay sheegeen in shilka uu ka dhashay kadib markii bas uu ku dhacay baabuur xamuul ah kadibna uu dab qabsaday.
Tiro dad ah ayaa toddobaadkan gudihiisa ku dhintay shilal ka dhacay waddooyinka dalkaas.
Xigashada Sawirka, Villa Somalia
Madaxweynaha Soomaaliya Maxamed Cabdullaahi Farmaajo ayaa saxeexay sharci muran badan dhaliyay oo muddo kordhin labo sano ah loogu sameeyay dowladda xilli ay isa soo tarayaan cadaadiiska beesha caalamka ee ku aadan arrintaas.
Waxay u muuqataa in wax saameyn ah uusan soo kordhin cadaadiska beesha caalamka.
Waxaa laga yabaa in madaxweyneyaasha dalalka kale aysan dhag jalaq u siin hadallada beesha caalamka balse Soomaaliya ayaa ka duwan dalalkaas maadama dowladda ay ku tiirsan tahay taageerada ay siiyaan beesha caalamka oo ay kamid yihiin dhaqaalaha la siiyo ciidamada Amisom ee ilaaliyo madaxtooyada Soomaaliya.
Beesha caalamka ayaa ka digtay go'aankan isl markaana ku baaqday in dib loogu laabto miiska wadahadalka si heeshiis looga gaaro khilaafka doorashada.
Jarmalka ayaa sheegay in qaraarka lagu ansixiyay muddo kordhinta hay'adaha dowladda Soomaaliya uu yahay go'aan halis ku ah amniga iyo xasiloonida dalka.
Waxay ugu baaqeen madaxda Soomaaliya inay dib ugu laabtaan miiska wadahadalka si heshiis looga gaaro khilaafka harreeyay hannaanka doorashada ee Soomaaliya.
Macluumaadkan waxaa daabacay X. Waxaan dalbanayenaa fasaxaaga ka hor inta aan la furin, waxaa laga yaabaa inay isticmaalayaan cookies iyo farsamooyin kale. hadii aad u bahato akhri X xeerarka cokie iyo kan ku saabsan xogta gaarka ah ka hor inta aadan aqbalin. si aad u aragto xogta guji ‘aqbal oo soco’.
Dhammaadka X boggan
Xigashada Sawirka, TELEFISHINKA QARANKA SOOMAALIYEED
Beesha caalamka ayaa dhaleeceysay go’aankii ay Golaha Shacabka Soomaaliya muddo labo sano ah ugu kordhiyeen dowladda Soomaaliya.
Midowga Yurub, Mareykanka iyo UK ayaa ka digay cawaaqib xumada ka dhalan karta go’aankan.
Madaxweynaha Soomaaliya ayaa xaley saxeexay sharciga gaarka ah ee muddada loogu kordhiyay dowladda.
Xigashada Sawirka, Golaha Shacabka
Dowladda Britain ayaa ka hor timid tallaabadii baarlamaanka Soomaaliya ay ku ansixiyeen in muddo labo sano ah loogu kordhiyo hay'adaha dolwadda ee wakhtigoodu dhamaaday.
Bayaanka kasoo baxay dowladda UK ayaa lagu sheegay “Waxaan ka walaacsanahay go’aanka Golaha Shacabkka ay muddo labo sano ah ugu kordhiyeen muddo xileedka Maxamed Cabdullaahi Farmaajo iyo ha’yadaha dowladda”
Waxay intaas ku dartay in go’aankan uusan horseedeyn in xal laga gaaro ismari-waaga ka dhashay arrimaha doorashada.
“Waxaan gebi ahaanba kasoo horjeednaa dadaal kasta oo lagu qabanayo doorashooyin is-barbar socda ah ama hal dhinac ah ama wax muddo kororsi ah”
Asalaamu Calaykum.
Subax wanaagsan. Kusoo dhawaada tebinta tooska ah ee BBC Somali. Maanta oo Arbaco ah waxaan idin kugu soo gudbinaynaa wararkii ugu dambeeyay ee Soomaalida iyo caalamka.
