ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
මහර බන්ධනාගාරයේ පුනරුත්ථාපන අංශය, අමුත්තන් පෙන්වන ස්ථානය, බන්ධනාගාර රෝහල, බන්ධනාගාර මුළුතැන්ගෙය හා කර්මාන්ත අංශ සහ බන්ධනාගාර ගොඩනැගිලි රාශියකට ද රැඳවියන් විසින් අලාභ හානි කර ඇතැයි බන්ධනාගාර මාධ්ය ප්රකාශකවරයා පවසයි.
බීබීසී සිංහල
"සාමය ආරක්ෂා කිරීම සඳහා" රාගම පොලිස් වසමේ 246 සී කැන්දලියද්ද පාළුව උතුර, 246 කැන්දලියද්ද පාළුව බටහිර හා 181 ජී දඹුව යන ග්රාම නිලධාරී වසම් සඳහා පනවා තිබූ පොලිස් ඇඳිරි නීතිය මේ වන විට ඉවත් කර තිබෙනවා.
නිවේදනයක් නිකුත් කරමින් පොලිස් මාධ්ය කොට්ඨාසය මේ බව සඳහන් කළා.
මහර බන්ධනාගාරයේ ඇතිවූ තත්ත්වයට හේතුව අධික තදබදය බව සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා පවසනවා.
900කට සිටීමට පමණ ධාරිතාවයක් ඇති ස්ථානයක 4,000කට අධික පිරිසක් රන්දවිම මෙයට හේතුවක් බව ඔහු පවසනවා.
මහර බන්ධනාගාරයේ ඇතිවූ "නොසන්සුන්තාව" හේතුවෙන් ගොඩනැගිලි රැසකට හානි වී ඇතැයි බලධාරීන් පවසනවා.
සෙනසුරාදා මහර බන්ධනාගාරයේ "රැඳවියන් විසින් ඇති කරන ලද නොසන්සුන්කාරී තත්ත්වය" අතරතුර බන්ධනාගාරයේ මුළුතැන්ගෙය සහ එදින විවෘත කරන ලද නව පුනරුත්ථාපන ගොඩනැගිල්ල "සම්පූර්ණයෙන් ම විනාශ කර ඇතැයි" බන්ධනාගාර මාධ්ය ප්රකාශක ඒ.සී. ගජනායක පවසනවා.
එමෙන් ම පුනරුත්ථාපන කාර්යාලය, ප්රධාන ජේලර් කාර්යාලය සහ බන්ධනාගාර රෝහල ද විනාශ කර ඇතැයි ඔහු පැවසුවා. බන්ධනාගාර ඉදිකිරීමට යෝජිත නව කාර්යාල පරිශ්රයක තහඩු ආවරණ යොදා තාප්පය වෙන් කර ඇති ස්ථානයකට රැඳවියන් පැමිණ එයට පහර දුන් බවත්, ඔවුන් එතැනින් පිටතට පැමිණීමට උත්සහ කළ බවත්, ප්රධාන ගේට්ටුවට පහර දුන් බවත් බන්ධනාගාර මාධ්ය ප්රකාශකවරයා කියා සිටියා.
ඔහු පැවසුවේ, අද උදෑසන වන තෙක් පැවති එම "නොසන්සුන්කාරී තත්ත්වය" බන්ධනාගාර නිලධාරීන්, පොලිසිය සහ ආරක්ෂක අංශ එක්ව මේ වන විට "සමනය" කර ඇති බවයි.
බස්නාහිර පළාත භාර ජ්යෙෂ්ඨ නියෝජ්ය පොලිස්පති සජීව මැදවත්ත ද එම අවස්ථාවේ මාධ්ය වෙත අදහස් දක්වමින් කියා සිටියේ, සෙනසුරාදා දිනයේ බන්ධනාගාරය තුළ "දැඩි නොසන්සුන්තාවක්" ඇති වූ බවයි.
එදින සවස 4ට පමණ ආරම්භ වූ මෙම තත්ත්වය ඉරිදා (අගෝස්තු 2) අලුයම 5.00 දක්වා පැවති බව ජ්යේෂ්ඨ නියෝජ්ය පොලිස්පතිවරයා කියා සිටි අතර ඔහු පැවසුවේ ගිනි තැබීමෙන් බොහෝ දේපළ විනාශ වී ඇති බවයි.
එමෙන් ම, මෙවැනි තත්ත්වයක් නැවත ඇති නොවීමට බස්නාහිර පළාතේ අනෙකුත් බන්ධනාගාරවල ද ආරක්ෂාව තහවුරු කර ඇති බව ඔහු සඳහන් කළා.
මෙම තත්ත්වය ඇති වන විට රිමාන්ඩ් භාරයේ පසු වූ සහ දඬුවම් නියම වී සිටි රැඳවියන් 4,100කට වැඩි ගණනක් මහර බන්ධනාගාරය තුළ සිටි බව ඔහු පැවසුවා.
මෑතකදී බීබීසී සිංහල යොමු කළ තොරතුරු ඉල්ලීමකින් හෙළි වූයේ මෙම මහර බන්ධනාගාරයේ රඳවා තැබිය හැකි රැඳවියන් සංඛ්යාව 991ක් බවයි.
සෙනසුරාදා (අගෝස්තු 1) මහර බන්ධනාගාරය තුළ ඇතිවූ "නොසන්සුන්තාව මේ වන විට යම් ප්රමාණයකට" සමනය වී ඇති බව අධිකරණ අමාත්ය හර්ෂණ නානායක්කාර බීබීසීයට පැවසුවා.
කෙසේ වෙතත් තවදුරටත් බන්ධනාගාරය තුළ පොලිස් විශේෂ කාර්ය බළකා කණ්ඩායම් රඳවා ඇතැයි ඔහු පැවසුවා.
මේ අතර, පොලිස් මාධ්ය ප්රකාශකවරයා පැවසුවේ බන්ධනාගාරය තුළ තත්ත්වය "මේ වන විට සමනය වී ඇතත්" අපරාධ නඩු විධාන සංග්රහයෙන් පොලිසියට පැවරී ඇති බලතල අනුව, සාමය ආරක්ෂා කිරීම සඳහා ප්රදේශයට පොලිස් ඇඳිරි නීතිය පනවා ඇති බවයි.
දැනට ඇඳිරි නීතිය පනවා ඇති ප්රදේශවල සිටින ජනතාවට නිවෙස්වලට ම වී සිටින ලෙස ඔහු ඉල්ලා සිටින අතර, යම් හදිසි අවශ්යතාවක් ඇති වුවහොත් ළඟ ම සිටින පොලිස් නිලධාරියෙකුගෙන් සහය ලබා ගන්නා ලෙස ද ඔහු පැවසුවා.
මේ වන විට මෙම සිදුවීම සම්බන්ධයෙන් වැලිසර මහේස්ත්රාත් අධිකරණයට පොලිසිය විසින් කරුණු වාර්තා කර තිබෙනවා.
සෙනසුරාදා දිනයේ මහර බන්ධනාගාරය තුළ ඇතිවූ "නොසන්සුන්තාවයෙන්" එක් රැඳවියෙකු මිය ගොස් 7 දෙනෙකු තුවාල ලබා තිබුණා.
මෙම "නොසන්සුන්තාවට" හේතුව මෙතෙක් ප්රකාශ කර නොමැති අතර රාගම පොලිස් බල ප්රදේශයේ, 246/කැන්දලියද්ද පාර - බටහිර, 246/සී කැන්දලිය පාර - උතුර සහ 181/ජී දඹුව යන ග්රාමසේවා වසම් සඳහා නැවත දැනුම් දෙනතුරු පොලිස් ඇඳිරි නීතිය පනවා තිබෙනවා.
මහර බන්ධනාගාරය අසල මේ වන විටත් ආරක්ෂාව තර කර ඇති ආකාරය නිරීක්ෂණය වන බව එහි සිටින අප වාර්තාකරු පවසනවා.
ඔහු සඳහන් කළේ, ගිනි නිවන රථ කිහිපයක් ද බන්ධනාගාර පරිශ්රය දෙසට ගමන් කරන ආකාරය දක්නට ලැබුණු බව ය.
බන්ධනාගාරය තුළ ඇති වූ බව කියන නොසන්සුන්තාවට හේතුව මෙතෙක් නිල වශයෙන් ප්රකාශ කර නැහැ.
අගෝස්තු 1 වන දින මාධ්ය රාත්රිය වන විට එක් රැඳවියෙකු ජීවිතක්ෂයට පත්ව තවත් 7 දෙනෙකු තවත් රැඳවියන් 7 දෙනෙකු තුවාල ලබා තිබුණා.
මෙහි නවතම තත්ත්වය පිළිබඳව තොරතුරු ගෙන ඒමට බීබීසී සිංහල කණ්ඩායම සූදානමින්.
බන්ධනාගාරය තුළින් මීට සුළු මොහොතකට පෙර "වෙඩි හඬ" වැනි ශබ්ද ඇසුණු බව එහි සිටින බීබීසී වාර්තාකරු පවසනවා.
ඔහු සඳහන් කළේ, සන්නද්ධ හමුදා සාමාජිකයින් මෙන් ම යුද්ධ හමුදාවට අයත් වාහන තුනක් මේ වන විට බන්ධනාගාර පරිශ්රයට ඇතුළු වූ බවයි.
එමෙන් ම විශේෂ කාර්ය බළකා සාමාජිකයින් ද ඇතුළු වූ බව ඔහු පැවසුවා. මේ වන විට බන්ධනාගාරයෙන් ඉහළට කළු දුමාරයක් නැගෙන බව එහි සිටින අප වාර්තාකරු සඳහන් කළා.
මහර බන්ධනාගාරය තුළ ඇති වූ නොසන්සුන්තාව හේතුවෙන් එක් රැඳවියෙකු ජීවිතක්ෂයට පත්ව ඇති අතර තවත් රැඳවියන් 7 දෙනෙකු තුවාල ලබා ඇති බව පොලිස් මාධ්ය ප්රකාශක එෆ්.යූ. වුට්ලර් තහවුරු කරනවා.
රාගම පොලිස් බල ප්රදේශයේ මහර බන්ධනාගාරය අවට ග්රාම සේවා වසම් තුනක් සඳහා සාමය ආරක්ෂා කිරීම වෙනුවෙන් නැවත දැනුම් දෙනතුරු පොලිස් ඇඳිරි නීතිය පැනවූ බව පොලිස් මාධ්ය ප්රකාශක එෆ්.යූ. වුට්ලර් පවසයි.
246/කැන්දලියද්ද පාර - බටහිර, 246/සී කැන්දලිය පාර - උතුර සහ 181/ජී දඹුව යන ග්රාමසේවා වසම් සඳහා එලෙස පොලිස් ඇඳිරි නීතිය පනවා ඇති බව පොලිස් මාධ්ය කොට්ටාශය සඳහන් කළා.
මීට මද වේලාවකට යුද්ධ හමුදා සහ නාවික හමුදා නිලධාරීන් මහර බන්ධනාගාර පරිශ්රයට ගමන් කරන ආකාරය නිරීක්ෂණය වුණු බව එහි සිටින අප වාර්තාකරු පවසනවා.
ඔහු සඳහන් කළේ, මීට පෙර බන්ධනාගාරය තුළ සිට ගිලන් රථ එළියට පැමිණිය ද ඉන් අනතුරව කිසිදු වාහනයක් ඉන් පිටතට නොපැමිණි බවයි.
එමෙන් ම, බන්ධාගාර ප්රධාන දොරටුව අසල රැස්ව සිටි පිරිස ද එම ස්ථානයෙන් ඉවත් කිරීමට පොලිසිය කටුයුතු කළ බව ඔහු පැවසුවා.
මීට සුළු මොහොතකට පෙර රාගම පොලිස් බල ප්රදේශයට පොලිස් ඇඳිරි නීතිය පැනවූ බව එහි සිටින අප වර්තාකරු පවසනවා.
ඔහු සඳහන් කළේ, මේ බව පොලිසිය ප්රදේශවාසීන් වෙත නිවේදනය කරන ආකාරය තමන්ට ඇසුණු බවයි.
මහර බන්ධනාගාරය තුළ "මරණ කිහිපයක් සිදුවී ඇති බවටත්, රැඳවියන් කිහිප දෙනෙකු තුවාල ලබා ඇති බවටත් තොරතුරු ලැබී ඇතැයි" සිරකරු අයිතිවාසිකම් සුරැකීමේ කමිටුව සිය නිල X ගිණුමේ සටහනක් තබමින් පවසනවා.
කෙසේ වෙතත්, මේ දක්වා බීබීසී සිංහල කණ්ඩායමට මේ පිළිබඳව නිල වශයෙන් තොරතුරු වාර්තා වී නැහැ. වැඩිදුර තොරතුරු දැනගැනීම සඳහා අප රෝහල් බලධාරීන් සහ අදාළ නිලධාරීන් සම්බන්ධ කර ගැනීමට උත්සහ කරමින් සිටිනවා.
සිරකරු අයිතිවාසිකම් සුරැකීමේ කමිටුව සිය X පණිවිඩයේ තවදුරටත් සඳහන් කර තිබුණේ, "බන්ධනාගාර නිලධාරීන් වෙඩි තබා තුවාලකරුවන්ට උපකාර කිරීම වළක්වන බවට ද තොරතුරු වාර්තා වන" අතර එය "සත්ය නම් තත්ත්වය තීරණාත්මක සේ ම භයානක" බවයි.
මහර බන්ධනාගාරයට "ඇතුළු වීමට බලය ඇති මානව හිමිකම් කොමිසමට ඒ සඳහා ප්රමාදයකින් තොරව කණ්ඩායමක් පිටත් කර හරින ලෙස" ඉල්ලා සිටිමින් සිරකරු අයිතිවාසිකම් සුරැකීමේ කමිටුව මානව හිමිකම් කොමිසමට ඉල්ලීමක් කර ඇති බව සිය නිල X ගිණුමේ සටහනක් තබමින් එම කමිටුව සඳහන් කර තිබෙනවා.
ඔවුන් අවධාරණය කර ඇත්තේ, ජීවිත ආරක්ෂා කිරීමට සහ විනිවිදභාවය සහතික කිරීමට ප්රමාදයකින් තොරව කටයුතු කරන ලෙස අදාළ සියලු ම බලධාරීන්ගෙන් ඉල්ලා සිටින බවයි.
බන්ධනාගාරයේ තත්ත්වය නිරීක්ෂණය කිරීම සඳහා ගුවන් හමුදාව බෙල් 212 වර්ගයේ හෙලිකොප්ටර් යානයක් යොදවා ඇති බව ගුවන් හමුදා මාධ්ය ප්රකාශකවරයා පැවසුවා.
බන්ධනාගාරයේ ආවේක්ෂණ කටයුතු සඳහා ශ්රී ලංකා ගුවන් හමුදාව "ඩ්රෝන යානයක්" යොදවා ඇති බව ගුවන් හමුදා මාධ්ය ප්රකාශක ගෲප් කැප්ටන් නලින් වැවකුඹුර බීබීසී සිංහල වෙත තහවුරු කළා.
බන්ධනාගාරය තුළ තත්ත්වය නිරීක්ෂණය කිරීම සඳහා යොදවා ඇති බවට "සැක කළ හැකි ඩ්රෝන යාන තුනක්" බන්ධනාගාරයට ඉහළ අහසේ දැකගත හැකි බව එහි සිටින බීබීසී සිංහල වාර්තාකරු පවසනවා.
ඔහු සඳහන් කළේ, බන්ධනාගාරය තුළින් "වෙඩි හඬ" බවට සැක කළ හැකි ශබ්ද මෙන් ම ඒ තුළ යම් නිවේදන සිදු කරන හඬ ද ඇසෙන බවයි.
මහර බන්ධනාගාරය අසල තත්ත්වය සන්සුන් බවට නිරීක්ෂණය වන බව එහි සිටින බීබීසී සිංහල වාර්තාකරු පවසනවා.
එසේ වුව ද, ඒ අවට බන්ධනාගාර රැඳවියන්ගේ ඥාතීන් සැලකිය යුතු පිරිසක් රැස්ව සිටින බව ඔහු පැවසුවා.
ඔහු සිටින ස්ථානය ආසන්නයේ පොලිස් වාහන නවතා ඇති ආකාරය සහ බන්ධනාගාරය තුළට ආරක්ෂක අංශ නිලධාරීන් ගමන් කරන ආකාරය දැකගත හැකි බව ඔහු සඳහන් කළා.
මහර බන්ධනාගාරයේ තුවාල ලැබූ "රැඳවියන් අවම වශයෙන් 5 දෙනෙකු" රාගම උතුරු කොළඹ ශික්ෂණ රෝහල වෙත ඇතුළත් කර ඇතැයි එහි ප්රකාශයෙක් පැවසුවා.
ඔවුන් මේ වන විට හදිසි ප්රතිකාර ඒකකයට ඇතුළත් කර ඇති බව පැවසූ එම ප්රකාශකයා වැඩිදුරටත් සඳහන් කළේ, "ලෑස්ති වෙලා ඉන්නේ තව එනවා කියලා," යනුවෙනි.
මහර බන්ධනාගාරයේ "නොසන්සුන්තාවක්" හට ගෙන ඇතැයි පොලිස් මාධ්ය ප්රකාශක එෆ්.යූ. වුට්ලර් බීබීසීය වෙත පැවසුවා.
අපත් සමග දුරකතනය ඔස්සේ සම්බන්ධ වෙමින් ඔහු සඳහන් කළේ, "අඩි 15ක තාවකාලිකව සකස් කරන ලද තහඩුවක් කඩාගෙන එන්න දරන උත්සහයක් බවට තොරතුරු ආරංචි වෙනවා. කඩවත, ඒ වගේ ම රාගම පොලිස් ස්ථානවලින් වැඩිදුර විමර්ශන ආරම්භ කරලා තියෙනවා."
එසේ වුව ද මේ වන විට "තත්ත්වය පාලනය කර" ඇති බව ඔහු පැවසුවා.