මහර බන්ධනාගාරයේ "නොසන්සුන්තාවක්" හට ගෙන ඇතැයි පොලිස් මාධ්ය ප්රකාශක එෆ්.යූ. වුට්ලර් පවසයි. මේ සම්බන්ධයෙන් බීබීසීය අධිකරණ අමාත්ය හර්ෂණ නානායක්කාරගෙන් විමසීමක් කළ අතර එහිදී ඔහු සඳහන් කළේ, "රැඳවියන් පිරිසක් බන්ධනාගාරයේ වහළය මත" සිටින බවට තොරතුරු වාර්තා වී ඇති බව ය.
බීබීසී සිංහල
මීට මද වේලාවකට යුද්ධ හමුදා සහ නාවික හමුදා නිලධාරීන් මහර බන්ධනාගාරය තුළ ගමන් කරන ආකාරය නිරීක්ෂණය වුණු බව එහි සිටින අප වාර්තාකරු පවසනවා.
ඔහු සඳහන් කළේ, මීට පෙර බන්ධනාගාරය තුළ සිට ගිලන් රථ එළියට පැමිණිය ද ඉන් අනතුරව කිසිදු වාහනයක් ඉන් පිටතට නොපැමිණි බවයි.
එමෙන් ම, බන්ධාගාර ප්රධාන දොරටුව අසල රැස්ව සිටි පිරිස ද එම ස්ථානයෙන් ඉවත් කිරීමට පොලිසිය කටුයුතු කළ බව ඔහු පැවසුවා.
මීට සුළු මොහොතකට පෙර රාගම පොලිස් බල ප්රදේශයට පොලිස් ඇඳිරි නීතිය පැනවූ බව එහි සිටින අප වර්තාකරු පවසනවා.
ඔහු සඳහන් කළේ, මේ බව පොලිසිය ප්රදේශවාසීන් වෙත නිවේදනය කරන ආකාරය තමන්ට ඇසුණු බවයි.
මහර බන්ධනාගාරය තුළ "මරණ කිහිපයක් සිදුවී ඇති බවටත්, රැඳවියන් කිහිප දෙනෙකු තුවාල ලබා ඇති බවටත් තොරතුරු ලැබී ඇතැයි" සිරකරු අයිතිවාසිකම් සුරැකීමේ කමිටුව සිය නිල X ගිණුමේ සටහනක් තබමින් පවසනවා.
කෙසේ වෙතත්, මේ දක්වා බීබීසී සිංහල කණ්ඩායමට මේ පිළිබඳව නිල වශයෙන් තොරතුරු වාර්තා වී නැහැ. වැඩිදුර තොරතුරු දැනගැනීම සඳහා අප රෝහල් බලධාරීන් සහ අදාළ නිලධාරීන් සම්බන්ධ කර ගැනීමට උත්සහ කරමින් සිටිනවා.
සිරකරු අයිතිවාසිකම් සුරැකීමේ කමිටුව සිය X පණිවිඩයේ තවදුරටත් සඳහන් කර තිබුණේ, "බන්ධනාගාර නිලධාරීන් වෙඩි තබා තුවාලකරුවන්ට උපකාර කිරීම වළක්වන බවට ද තොරතුරු වාර්තා වන" අතර එය "සත්ය නම් තත්ත්වය තීරණාත්මක සේ ම භයානක" බවයි.
ඡායාරූප මූලාශ්රය, Screen-grab / X
මහර බන්ධනාගාරයට "ඇතුළු වීමට බලය ඇති මානව හිමිකම් කොමිසමට ඒ සඳහා ප්රමාදයකින් තොරව කණ්ඩායමක් පිටත් කර හරින ලෙස" ඉල්ලා සිටිමින් සිරකරු අයිතිවාසිකම් සුරැකීමේ කමිටුව මානව හිමිකම් කොමිසමට ඉල්ලීමක් කර ඇති බව සිය නිල X ගිණුමේ සටහනක් තබමින් එම කමිටුව සඳහන් කර තිබෙනවා.
ඔවුන් අවධාරණය කර ඇත්තේ, ජීවිත ආරක්ෂා කිරීමට සහ විනිවිදභාවය සහතික කිරීමට ප්රමාදයකින් තොරව කටයුතු කරන ලෙස අදාළ සියලු ම බලධාරීන්ගෙන් ඉල්ලා සිටින බවයි.
බන්ධනාගාරයේ තත්ත්වය නිරීක්ෂණය කිරීම සඳහා ගුවන් හමුදාව බෙල් 212 වර්ගයේ හෙලිකොප්ටර් යානයක් යොදවා ඇති බව ගුවන් හමුදා මාධ්ය ප්රකාශකවරයා පැවසුවා.
බන්ධනාගාරයේ ආවේක්ෂණ කටයුතු සඳහා ශ්රී ලංකා ගුවන් හමුදාව "ඩ්රෝන යානයක්" යොදවා ඇති බව ගුවන් හමුදා මාධ්ය ප්රකාශක ගෲප් කැප්ටන් නලින් වැවකුඹුර බීබීසී සිංහල වෙත තහවුරු කළා.
බන්ධනාගාරය තුළ තත්ත්වය නිරීක්ෂණය කිරීම සඳහා යොදවා ඇති බවට "සැක කළ හැකි ඩ්රෝන යාන තුනක්" බන්ධනාගාරයට ඉහළ අහසේ දැකගත හැකි බව එහි සිටින බීබීසී සිංහල වාර්තාකරු පවසනවා.
ඔහු සඳහන් කළේ, බන්ධනාගාරය තුළින් "වෙඩි හඬ" බවට සැක කළ හැකි ශබ්ද මෙන් ම ඒ තුළ යම් නිවේදන සිදු කරන හඬ ද ඇසෙන බවයි.
මහර බන්ධනාගාරය අසල තත්ත්වය සන්සුන් බවට නිරීක්ෂණය වන බව එහි සිටින බීබීසී සිංහල වාර්තාකරු පවසනවා.
එසේ වුව ද, ඒ අවට බන්ධනාගාර රැඳවියන්ගේ ඥාතීන් සැලකිය යුතු පිරිසක් රැස්ව සිටින බව ඔහු පැවසුවා.
ඔහු සිටින ස්ථානය ආසන්නයේ පොලිස් වාහන නවතා ඇති ආකාරය සහ බන්ධනාගාරය තුළට ආරක්ෂක අංශ නිලධාරීන් ගමන් කරන ආකාරය දැකගත හැකි බව ඔහු සඳහන් කළා.
මහර බන්ධනාගාරයේ තුවාල ලැබූ "රැඳවියන් අවම වශයෙන් 5 දෙනෙකු" රාගම උතුරු කොළඹ ශික්ෂණ රෝහල වෙත ඇතුළත් කර ඇතැයි එහි ප්රකාශයෙක් පැවසුවා.
ඔවුන් මේ වන විට හදිසි ප්රතිකාර ඒකකයට ඇතුළත් කර ඇති බව පැවසූ එම ප්රකාශකයා වැඩිදුරටත් සඳහන් කළේ, "ලෑස්ති වෙලා ඉන්නේ තව එනවා කියලා," යනුවෙනි.
මහර බන්ධනාගාරයේ "නොසන්සුන්තාවක්" හට ගෙන ඇතැයි පොලිස් මාධ්ය ප්රකාශක එෆ්.යූ. වුට්ලර් බීබීසීය වෙත පැවසුවා.
අපත් සමග දුරකතනය ඔස්සේ සම්බන්ධ වෙමින් ඔහු සඳහන් කළේ, "අඩි 15ක තාවකාලිකව සකස් කරන ලද තහඩුවක් කඩාගෙන එන්න දරන උත්සහයක් බවට තොරතුරු ආරංචි වෙනවා. කඩවත, ඒ වගේ ම රාගම පොලිස් ස්ථානවලින් වැඩිදුර විමර්ශන ආරම්භ කරලා තියෙනවා."
එසේ වුව ද මේ වන විට "තත්ත්වය පාලනය කර" ඇති බව ඔහු පැවසුවා.
මහර බන්ධනාගාරය අසල සවස තත්ත්වය දැක්වෙන ඡායාරූප කිහිපයක් අප වර්තාකරුගෙන් බීබීසීය වෙත ලැබී තිබෙනවා.
මහර බන්ධනාගාරයේ උදගත්ව ඇති බව කියන සිද්ධිය සම්බන්ධයෙන් තොරතුරු දැන ගැනීම සඳහා බීබීසී සිංහල අධිකරණ ඇමති හර්ෂණ නානායක්කාරගෙන් විමසීමක් කළා.
"රැඳවියන් පිරිසක් වහළය මත ඉන්නවා කියලා තමයි තොරතුරු එන්නේ. මේ වනවිට සියලු ම නිලධාරීන් බන්ධනාගාර කොමසාරිස් ඇතුළුව ඒ අවශ්ය කටයුතු කරනවා ඒක සමනයට පත් කරන්න," ඔහු දුරකතනය ඔස්සේ බීබීසීය සමග සම්බන්ධ වෙමින් පැවසුවා.
මෙය ගැටුමක් ද යන්න අප ඔහුගෙන් විමසූ අතර ඊට පිළිතුරු දෙමින් ඔහු මෙලෙස සඳහන් කළා.
"දන්නේ නැහැ. කිසි තොරතුරක් මට නැහැ. දැනුයි ඒක වෙන්නේ දැන් ටිකකට කලින් තමයි මට ඔය තොරතුරු ටිකත් ආවේ."
මහර බන්ධනාගාරයේ "නොසන්සුන්තාවක්" හට ගෙන ඇතැයි පොලිස් මාධ්ය ප්රකාශක එෆ්.යූ. වුට්ලර් බීබීසී සිංහල වෙත පැවසුවා. ඒ පිළිබඳව සජීව තොරතුරු අප මෙම පිටුව ඔස්සේ ඔබ වෙත ගෙන ඒමට සූදානමින්. රැඳී සිටින්න අපත් සමග.
