Dleastanasan

Tha mi ag obair mar innealadair fuaim ann an Glaschu agus bha agam ri cleasaichean a chlàradh san stiùidio. Leugh mi na sgriobtaichean agus bhruidhinn mi ri Jo mus do chlàir sinn a dh'fhaighinn a-mach dè an dreach a mhiannaicheadh i airson nam prògraman rèidio [Beurla]. 'S urrainn do dràma rèidio toirt a chreidsinn gu bheil na cleasaichean san stiùidio ann an àiteachean eadar-dhealaichte, mar seòmar ann an taigh no amar snàimh.

'S e pàirt den obair agamsa na cleasaichean a dhèanamh cofurtail san stiùdio, gu h-àraidh mur eil iad air obrachadh air pròiseact mar seo roimhe. 'S dòcha gu feumar sealltainn dhaibh mar a chleachdas iad maicreafòn gus fuaim a dhèanamh a tha a' toirt a chreidsinn gu bheilear a' ruith air an oidhche no a' snàmh.

'S e an ath ìre a' gearradh a' chòmhraidh agus ga mheasgachadh le fuaimean eile gus am bi blas suidheachadh fìor air na tha ri chluinntinn. Bidh mi a' cleachdadh bather-bog Sadie airson na h-obrach seo. Tha 8 earrannan aige airson còmhradh, fuaim, ceòl agus mac-talla.

Thug sinn latha a' clàradh nan cleasaichean agus trì latha a' measgachadh an fhuaim airson gach prògraim.

Prìomh uidheamachd

Inneal sam bith a chlàras fuaim, bho inneal le maicreafòna ghabhas a ghiùlain gu deasca measgachaidh le 96 earrannan a chleachdas dusanan de mhaicreafònan, gach fear le a dhòigh fhèin air fuaimean a chlàradh, bho druma gleadhrach gu piseag a' dèanamh crònan socair.

Clàr-obrach

Tha mi air a bhith ag obair aig a' BhBC airson trithead bliadhna. Thòisich mi le trì mìosan de thrèanadh airson a bhith nam neach fo thrèanadh mar Manaidsear Stiùidio. Thar nam bliadhnaichean dh' obraich mi air prògraman Rèidio agus Tbh. Prògraman le còmhlain a' cluich beò, prògraman comadaidh agus naidheachdan. 'S e am prìomh sgil a th' agam fuaim a mheasgachadh agus a ghearradh le Pro-tools no Sadie.