You’re viewing a text-only version of this website that uses less data. View the main version of the website including all images and videos.
ਯੂਕਰੇਨ 'ਤੇ ਰੂਸ ਦੇ ਹਮਲੇ ਨੂੰ ਚਲਦਿਆਂ ਇੱਕ ਮਹੀਨੇ ਤੋਂ ਜ਼ਿਆਦਾ ਹੋ ਗਿਆ ਹੈ, ਅਹਿਮ ਘਟਨਾਵਾਂ ਬਾਰੇ ਇੱਥੇ ਜਾਣੋ
ਪ੍ਰਿਅੰਕਾ ਧੀਮਾਨ and ਗੁਰਕਿਰਪਾਲ ਸਿੰਘ
ਯੂਕਰੇਨ-ਰੂਸ ਜੰਗ ਬਾਰੇ ਬੀਬੀਸੀ ਪੰਜਾਬੀ ਦੇ ਇਸ ਲਾਈਵ ਪੰਨੇ ਨੂੰ ਅਸੀਂ ਇੱਥੇ ਹੀ ਵਿਰਾਮ ਦੇ ਰਹੇ ਹਾਂ। ਭਲਕੇ ਨਵੇਂ ਘਟਨਾਕ੍ਰਮ ਨਾਲ ਤੁਹਾਡੇ ਮੁੜ ਮੁਖਾਤਿਬ ਹੋਵਾਂਗੇ।
ਰੂਸ ਯੂਕਰੇਨ ਜੰਗ ਬਾਰੇ ਵੀਡੀਓ ਸਮੱਗਰੀ ਦੇਖਣ ਲਈ ਸਾਡੇ ਯੂਟਿਊਬ ਚੈਨਲ ਉੱਪਰ ਵਿਸ਼ੇਸ਼ ਪਲੇਲਿਸਟ ਦੇਖ ਸਕਦੇ ਹੋ।
ਸਾਡੇ ਨਾਲ ਜੁੜਨ ਲਈ ਧੰਨਵਾਦ
ਰੂਸ ਅਤੇ ਯੂਕਰੇਨ ਦਰਮਿਆਨ ਜਾਰੀ ਜੰਗ ਨੂੰ ਇੱਕ ਮਹੀਨੇ ਤੋਂ ਉੱਪਰ ਦਾ ਸਮਾਂ ਹੋ ਗਿਆ ਹੈ। ਜੇ ਤੁਸੀਂ ਸਾਡੇ ਨਾਲ ਹੁਣੇ-ਹੁਣੇ ਜੁੜ ਰਹੇ ਹੋ ਤਾਂ ਪੇਸ਼ ਹਨ ਅਹਿਮ ਘਟਨਾਕ੍ਰਮ-
ਸੰਯੁਕਤ ਰਾਸ਼ਟਰ ਦੀ ਰਿਫਿਊਜੀ ਸੰਸਥਾ ਵੱਲੋਂ ਜਾਰੀ ਤਾਜ਼ਾ ਆਂਕੜਿਆਂ ਮੁਤਾਬਕ ਯੂਕਰੇਨ ਉੱਪਰ ਰੂਸੀ ਹਮਲੇ ਤੋਂ ਹੁਣ ਤੱਕ 4,019,000 ਲੋਕ ਯੂਕਰੇਨ ਛੱਡ ਕੇ ਗੁਆਂਢੀ ਦੇਸਾਂ ਵਿੱਚ ਜਾ ਚੁੱਕੇ ਹਨ।ਜਦਕਿ ਕੋਈ ਸੱਠ ਲੱਖ ਲੋਕ ਦੇਸ ਦੇ ਅੰਦਰ ਹੀ ਜੰਗ ਕਾਰਨ ਉਜਾੜੇ ਲਈ ਮਜ਼ਬੂਰ ਹੋਏ ਹਨ।
ਇਸ ਦਾ ਮਤਲਬ ਹੈ ਕਿ ਯੂਕਰੇਨ ਦੀ ਲਗਭਗ ਇੱਕ ਚੌਥਾਈ ਅਬਾਦੀ ਨੂੰ ਜੰਗ ਕਾਰਨ ਆਪਣੇ ਘਰੋਂ-ਬੇਘਰ ਹੋਣਾ ਪਿਆ ਹੈ।
ਲਗਭਗ 40 ਲੱਖ ਲੋਕ ਜਿਨ੍ਹਾਂ ਵਿੱਚ ਜ਼ਿਆਦਾਤਰ ਔਰਤਾਂ ਅਤੇ ਬੱਚੇ ਹਨ ਗੁਆਂਢੀ ਦੇਸਾਂ ਦੇ ਰਹਿਮੋ-ਕਰਮ ਉੱਪਰ ਨਿਰਭਰ ਹਨ।
ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਯੂਰਪ ਦਾ ਸਭ ਤੋਂ ਵੱਡਾ ਮਨੁੱਖੀ ਸੰਕਟ ਹੈ।
ਇਕੱਲੇ ਪੋਲੈਂਡ ਨੇ ਹੀ ਹੁਣ ਤੱਕ ਲਗਭਗ 23 ਲੱਖ ਲੋਕਾਂ ਨੂੰ ਪਨਾਹ ਦਿੱਤੀ ਹੈ।
ਚੀਨ ਅਤੇ ਰੂਸ ਦੇ ਵਿਦੇਸ਼ ਮੰਤਰੀਆਂ ਦੀ ਬੈਠਕ ਚੀਨ ਵਿੱਚ ਬੈਠਕ ਹੋਈ ਹੈ।
ਚੀਨ ਦੇ ਸਰਕਾਰੀ ਮੀਡੀਆ ਮੁਤਾਬਕ ਚੀਨੀ ਵਿਦੇਸ਼ ਮੰਤਰੀ ਨੇ ਕਿਹਾ ਹੈ ਕਿ ਦੋਵਾਂ ਦੇਸਾਂ ਦਰਮਿਆਨ ਰਿਸ਼ਤਿਆਂ ਨੇ ਸਮੇਂ ਦੀਆਂ ਕਈ ਪ੍ਰੀਖਿਆਵਾਂ ਪਾਸ ਕੀਤੀਆਂ ਹਨ ਅਤੇ ਦੋਵਾਂ ਦੇ ਦਰਪੇਸ਼ ਨਵੀਂ ਕੌਮਾਂਤਰੀ ਸਥਿਤੀ ਪੇਸ਼ ਹੋਈ ਹੈ।
ਚੀਨੀ ਵਿਦੇਸ਼ ਮੰਤਰੀ ਵੈਂਗ ਵੀ ਨੇ ਕਿਹਾ ਕਿ ਚੀਨ ਰੂਸ ਨਾਲ ਆਪਣੇ ਰਿਸ਼ਤੇ ਨਵੇਂ ਯੁੱਗ ਵਿੱਚ ਅਤੇ ਨਵੇਂ ਸਿਖਰਾਂ ਤੇ ਲਿਜਾਣਾ ਚਾਹੁੰਦਾ ਸੀ।
ਰੂਸੀ ਵਿਦੇਸ਼ ਮੰਤਰੀ ਸਰਗੇ ਲੈਵਰੋਵ ਨੇ ਚੀਨੀ ਹਮਰੁਤਬਾ ਨੂੰ ਯੂਕਰੇਨ ਵਿੱਚ ਜਾਰੀ ਰੂਸ ਦੇ ''ਵਿਸ਼ੇਸ਼ ਮਿਲਟਰੀ ਆਪ੍ਰੇਸ਼ਨ'' ਬਾਰੇ ਦੱਸਿਆ।
ਲਾਵਰੋਵ ਨੇ ਕਿਹਾ, ''ਰੂਸ ਸ਼ਾਂਤੀ ਵਾਰਤਾ ਨਾਲ'' ਅਤੇ ''ਕੌਮਾਂਤਰੀ ਭਾਈਚਾਰੇ ਨਾਲ ਗੱਲਬਾਤ ਜਾਰੀ ਰੱਖਣ'' ਅਤੇ ''ਤਣਾਅ ਨੂੰ ਘਟਾਉਣ ਲਈ ਵਚਨਬੱਧ ਹੈ''।
ਰੂਸ ਦੇ ਵਿਦੇਸ਼ ਮੰਤਰੀ ਸਰਗੇ ਲੈਵਰੋਵ ਦੋ ਦਿਨਾਂ ਭਾਰਤ ਦੌਰੇ 'ਤੇ ਆ ਰਹੇ ਹਨ। ਵਿਦੇਸ਼ ਮੰਤਰਾਲੇ ਮੁਤਾਬਕ ਯੂਕਰੇਨ ਉੱਪਰ 24 ਫ਼ਰਵਰੀ ਨੂੰ ਹਮਲੇ ਤੋਂ ਬਾਅਦ ਰੂਸ ਅਤੇ ਭਾਰਤ ਦਰਮਿਆਨ ਇਹ ਪਹਿਲੀ ਉੱਚ ਪੱਧਰੀ ਬੈਠਕ ਹੋਣ ਜਾ ਰਹੀ ਹੈ।
ਭਾਰਤੀ ਵਿਦੇਸ਼ ਮੰਤਰਾਲੇ ਦੀ ਵੈੱਬਸਾਈਟ ਉੱਪਰ ਲਿਖਿਆ ਗਿਆ ਹੈ,''ਰੂਸੀ ਫੈਡਰੇਸ਼ਨ ਦੇ ਵਿਦੇਸ਼ ਮੰਤਰੀ ਸਰਗੇ ਲਾਵਰੋਵ 31 ਮਾਰਚ ਤੋਂ ਪਹਿਲੀ ਮਾਰਚ, 2022 ਤੱਕ ਭਾਰਤ ਦੀ ਸਰਕਾਰੀ ਫੇਰੀ ਉੱਪਰ ਹੋਣਗੇ।''
ਲਾਵਰੋਵ ਦਾ ਦੌਰਾ ਅਜਿਹੇ ਸਮੇਂ ਹੋ ਰਿਹਾ ਹੈ ਜਦੋਂ ਬ੍ਰਿਟਿਸ਼ ਵਿਦੇਸ਼ ਮੰਤਰੀ ਲਿਜ਼ ਟ੍ਰਸ ਅਤੇ ਅਮਰੀਕਾ ਵਿੱਚ ਕੌਮਾਂਤਰੀ ਅਰਥਚਾਰੇ ਦੇ ਉਪ ਸਲਾਹਕਾਰ (ਡਿਪਟੀ ਐਨਐਚਐਸ) ਦਲੀਪ ਸਿੰਘ ਵੀ ਭਾਰਤ ਦੌਰੇ ਦੌਰਾਨ ਦਿੱਲੀ ਵਿੱਚ ਹੋਣਗੇ। ਲਿਜ਼ ਟ੍ਰਸ 31 ਮਾਰਚ ਨੂੰ ਭਾਰਤ ਆ ਰਹੇ ਹਨ।ਜਦਕਿ ਦਲੀਪ ਸਿੰਘ 30 ਮਾਰਚ ਨੂੰ ਆ ਰਹੇ ਹਨ। ਇਸ ਤੋਂ ਇਲਾਵਾ ਜਰਮਨੀ ਦੇ ਵਿਦੇਸ਼ ਅਤੇ ਰੱਖਿਆ ਨੀਤੀ ਸਲਾਹਕਾਰ ਜੇਮਜ਼ ਪਲੇਟਨਰ ਵੀ ਭਾਰਤ ਵਿੱਚ ਹੋਣਗੇ।
ਖ਼ਬਰ ਏਜੰਸੀ ਪੀਟੀਆਈ ਦੇ ਮੁਤਾਬਕ ਲਾਵਰੋਵ ਦੇ ਭਾਰਤ ਦੌਰੇ ਦਾ ਮਰਕਜ਼ ਰੂਸ ਤੋਂ ਰਿਆਤੀ ਦਰਾਂ ਉੱਪਰ ਪੈਟਰੋਲ ਦੀ ਖ਼ਰੀਦ ਰਹਿ ਸਕਦੀ ਹੈ। ਰੂਸੀ ਵਿਦੇਸ਼ ਮੰਤਰੀ ਦਜੇ ਦੌਰੇ ਨਾਲ ਜੁੜੇ ਅਧਿਕਾਰੀਆਂ ਮੁਤਾਬਕ ਭਾਰਤ ਦੇ ਦਰਮਿਆਨ ਰੁਪਏ ਅਤੇ ਰੂਬਲ ਵਿੱਚ ਭੁਗਤਾਨ ਉੱਪਰ ਵੀ ਗੱਲਬਾਤ ਹੋ ਸਕਦੀ ਹੈ। ਪੱਛਮੀ ਦੇਸਾਂ ਦੀਆਂ ਪਾਬੰਦੀਆਂ ਤੋਂ ਬਾਅਦ ਰੂਸ ਰੂਬਲ ਵਿੱਚ ਭੁਗਤਾਨ ਕਰਨ ਉੱਪਰ ਜ਼ੋਰ ਪਾ ਰਿਹਾ ਹੈ।
ਗੱਲਬਾਤ ਦੌਰ ਭਾਰਤ-ਰੂਸ ਤੋਂ ਐਸ-400 ਮਿਜ਼ਾਈਲ ਸਿਸਟਮ ਅਤੇ ਦੂਜੇ ਸੈਨਿਕ ਸਾਜ਼ੋ-ਸਮਾਨ ਦੀ ਸਮੇਂ ਸਿਰ ਡਲਿਵਰੀ ਕਰਨ ਉੱਪਰ ਜ਼ੋਰ ਦੇ ਸਕਦਾ ਹੈ।
ਇਸ ਤੋਂ ਪਹਿਲਾਂ ਲਾਵਰੋਵ ਉਨ੍ਹਾਂ ਦੇਸਾਂ ਦੇ ਵਿਦੇਸ਼ ਮੰਤਰੀਆਂ ਨਾਲ ਬੈਠਕ ਵਿੱਚ ਹਿੱਸਾ ਲੈਣ ਚੀਨ ਪਹੁੰਚੇ ਸਨ, ਜਿਨ੍ਹਾਂ ਦੀ ਹੱਦਾਂ ਅਫ਼ਗਾਨਿਸਤਾਨ ਨਾਲ ਲਗਦੀਆਂ ਹਨ।
ਚੀਨੀ ਵਿਦੇਸ਼ ਮੰਤਰੀ ਪਿਛਲੇ ਹਫ਼ਤੇ ਹੀ ਭਾਰਤ ਆਏ ਸਨ।
ਅਮਰੀਕਾ ਅਤੇ ਚੀਨ ਤੋਂ ਬਾਅਦ ਭਾਰਤ ਦੁਨੀਆਂ ਦਾ ਤੀਜਾ ਵੱਡਾ ਤੇਲ ਦਾ ਉਪਭੋਗਤਾ ਹੈ, ਜਿੱਥੇ 80% ਤੋਂ ਵੱਧ ਦਰਾਮਦਗੀ ਕੀਤੀ ਜਾਂਦੀ ਹੈ।
ਸਾਲ 2021 ਵਿੱਚ ਭਾਰਤ ਨੇ ਰੂਸ ਕੋਲੋਂ 12 ਮਿਲੀਅਨ ਬੈਰਲ ਤੇਲ ਖਰੀਦਿਆਂ ਸੀ, ਜੋ ਉਸ ਦੇ ਆਯਾਤ ਦਾ ਸਿਰਫ਼ 2 ਫੀਸਦ ਸੀ।
ਪਿਛਲੇ ਸਾਲ, ਹੁਣ ਤੱਕ ਦੀ ਸਭ ਤੋਂ ਵੱਡੀ ਸਪਲਾਈ ਮੱਧ ਪੂਰਬ ਤੋਂ ਆਈ ਸੀ, ਮਹੱਤਵਪੂਰਨ ਮਾਤਰਾ ਵਿੱਚ ਅਮਰੀਕਾ ਅਤੇ ਨਾਈਜੀਰੀਆ ਤੋਂ ਵੀ।
ਨਿਗਰਾਨੀ ਸੰਸਥਾ ਮੈਕਸਰ ਵੱਲੋਂ ਯੂਕਰੇਨੀ ਸ਼ਹਿਰ ਮਾਰੀਓਪੋਲ ਵਿੱਚ ਰੂਸੀ ਹਮਲੇ ਕਾਰਨ ਹੋਈ ਤਬਾਹੀ ਦੀਆਂ ਤਾਜ਼ਾ ਸੈਟਲਾਈਟ ਤਸਵੀਰਾਂ ਜਾਰੀ ਕੀਤੀਆਂ ਹਨ।
ਫ਼ੋਟੋਆਂ ਵਿੱਚ ਰੂਸੀ ਬੰਬਾਰੀ ਕਾਰਨ ਤਬਾਹ ਹੋਈਆਂ ਰਿਹਾਇਸ਼ੀ ਇਮਾਰਤਾਂ ਦੇਖੀਆਂ ਜਾ ਸਕਦੀਆਂ ਹਨ।
ਸ਼ਹਿਰ ਦੇ ਮੇਅਰ ਦਾ ਕਹਿਣਾ ਹੈ ਕਿ ਇੱਥੇ ਰੂਸੀ ਹਮਲੇ ਕਾਰਨ ਹੁਣ ਤੱਕ 210 ਬੱਚਿਆਂ ਸਮੇਤ 5000 ਜਾਨਾਂ ਜਾ ਚੁੱਕੀਆਂ ਹਨ।
ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੂਅਲ ਮੈਕਰੋਨ ਨੂੰ ਰੂਸੀ ਰਾਸ਼ਟਰਪਤੀ ਨੇ ਕਿਹਾ ਸੀ ਕਿ ਸ਼ਹਿਰ ਉੱਪਰ ਬੰਬਾਰੀ ਉਦੋਂ ਤੱਕ ਜਾਰੀ ਰਹੇਗੀ ਜਦੋਂ ਤੱਕ ਕਿ ਯੂਕਰੇਨ ਆਤਮ ਸਮਰਪਣ ਨਹੀਂ ਕਰ ਦਿੰਦਾ।
ਯੂਕਰੇਨ ਉੱਪਰ ਰੂਸ ਦੇ ਹਮਲੇ ਨੂੰ ਇੱਕ ਮਹੀਨਾ ਹੋ ਚੁੱਕਿਆ ਹੈ। ਹੁਣ ਤੱਕ ਇਸ ਲੜਾਈ ਵਿੱਚ ਯੂਕਰੇਨ ਨੇ ਕਈ ਅੜਚਨਾ ਨੂੰ ਪਾਰ ਕੀਤਾ ਹੈ।
2022 ਵਿੱਚ ਰੂਸ ਦਾ ਅਸਲੀ ਮਕਸਦ ਸੀ ਕਿ ਯੂਕਰੇਨ ਦੀ ਰਾਜਧਾਨੀ ਕੀਵ ਸਮੇਤ ਦੂਜੇ ਵੱਡੇ ਸ਼ਹਿਰਾਂ ਉਤੇ ਕਬਜ਼ਾ ਕਰਕੇ ਸਰਕਾਰ ਦਾ ਅਸਤੀਫ਼ਾ ਲਿਆ ਜਾਵੇ ਪਰ ਰੂਸ ਸਾਫ ਤੌਰ 'ਤੇ ਇਸ ਵਿੱਚ ਅਸਫਲ ਰਿਹਾ ਹੈ।
ਯੂਕਰੇਨ ਰੂਸ ਦੇ ਅੱਗੇ ਟਿਕਿਆ ਹੋਇਆ ਹੈ। ਅਜਿਹੇ ਵਿੱਚ ਇਹ ਜਾਨਣਾ ਜ਼ਰੂਰੀ ਹੈ ਕਿ ਆਖ਼ਰ ਯੂਕਰੇਨ ਦੀ ਸਫ਼ਲਤਾ ਦੇ ਕਾਰਨ ਕੀ ਹਨ। ਜਾਣੋ ਇਸ ਰਿਪੋਰਟ ਵਿੱਚ।
ਰੂਸ ਅਤੇ ਯੂਕਰੇਨ ਦਰਮਿਆਨ ਜਾਰੀ ਜੰਗ ਨੂੰ ਇੱਕ ਮਹੀਨੇ ਤੋਂ ਉੱਪਰ ਸਮਾਂ ਹੋ ਗਿਆ ਹੈ ਤੇ ਮੰਗਲਵਾਰ ਨੂੰ ਤੁਰਕੀ ਵਿੱਚ ਰੂਸ ਅਤੇ ਯੂਕਰੇਨ ਦੇ ਨੁਮਾਇੰਦਿਆਂ ਦਰਮਿਆਨ ਬੈਠਕ ਹੋਈ ਹੈ। ਇਸ ਬੈਠਕ ਵਿੱਚ ਪਹਿਲੀ ਵਾਰ ਰੂਸ ਨੇ ਆਖਿਆ ਕਿ ਉਹ ਯੂਕਰੇਨ ਵਿਚ ਆਪਣੀ ਫੌਜ ਨੂੰ ਘੱਟ ਕਰੇਗਾ।
ਇਸ ਤੋਂ ਇਲਾਵਾ ਇਹ ਰਿਹਾ ਅਹਿਮ:
ਨਾਟੋ ਦੇ ਸਾਬਕਾ ਡਿਪਟੀ ਸੁਪਰੀਮ ਕਮਾਂਡਰ ਰਿਚਰਡ ਸ਼ੀਰਫ਼ ਨੇ ਰੂਸ ਅਤੇ ਯੂਕਰੇਨ ਦਰਮਿਆਨ ਜਾਰੀ ਜੰਗ 'ਤੇ ਟਿੱਪਣੀ ਕਰਦਿਆਂ ਆਖਿਆ ਹੈ ਕਿ ਜਦੋਂ ਤੱਕ ਵਲਾਦੀਮੀਰ ਪੁਤਿਨ ਸੱਤਾ ਵਿੱਚ ਹਨ ਯੂਰਪ ਵਿੱਚ ਸ਼ਾਂਤੀ ਨਹੀਂ ਹੋ ਸਕਦੀ।
ਉਨ੍ਹਾਂ ਨੇ ਆਖਿਆ ਕਿ ਬਾਕੀ ਲੋਕਾਂ ਵਾਂਗੂੰ ਉਨ੍ਹਾਂ ਨੂੰ ਵੀ ਰੂਸ ਤੇ ਯੂਕਰੇਨ ਵਿੱਚ ਆਪਣੀ ਫ਼ੌਜ ਘੱਟ ਕਰਨ ਦੇ ਬਿਆਨ ਉੱਪਰ ਸ਼ੰਕਾਵਾਂ ਹਨ।
ਉਨ੍ਹਾਂ ਨੇ ਆਖਿਆ ਕਿ ਨਾਟੋ ਨੂੰ ਇਹ ਸੁਨਿਸ਼ਚਿਤ ਕਰਨਾ ਚਾਹੀਦਾ ਹੈ ਕਿ ਇਹ ਸ਼ੀਤ ਯੁੱਧ ਹੀ ਰਹੇ।
ਰੂਸ ਵੱਲੋਂ ਯੂਕਰੇਨ ਵਿੱਚ ਆਪਣੀਆਂ ਫ਼ੌਜਾਂ ਘਟਾਉਣ ਤੋਂ ਲੈ ਕੇ ਕਈ ਤਰ੍ਹਾਂ ਦੇ ਸ਼ੰਕੇ ਹਨ।
ਇਸ ਬਾਰੇ ਸੋਚਿਆ ਜਾ ਰਿਹਾ ਹੈ ਕਿ ਕੀ ਰੂਸ ਸੱਚਮੁੱਚ ਆਪਣੀਆਂ ਫ਼ੌਜਾਂ ਪਿੱਛੇ ਹਟਾ ਰਿਹਾ ਹੈ ਜਾਂ ਫਿਰ ਜਿਨ੍ਹਾਂ ਇਲਾਕਿਆਂ ਤੋਂ ਅਜਿਹਾ ਕਰਨ ਦਾ ਐਲਾਨ ਹੋਇਆ ਹੈ ਉੱਥੇ ਰੂਸ ਨੇ ਮੰਨ ਲਿਆ ਹੈ ਕਿ ਉਨ੍ਹਾਂ ਦੀ ਫ਼ੌਜ ਅਸਫਲ ਹੋਈ ਹੈ?
ਕੀ ਅਜਿਹੇ ਵਿੱਚ ਰੂਸ ਆਪਣੀ ਸਾਰੀ ਤਾਕਤ ਪੂਰਬੀ ਯੂਕਰੇਨ ਉਪਰ ਲਗਾਉਣਾ ਚਾਹੁੰਦਾ ਹੈ?
ਤੁਰਕੀ ਵਿੱਚ ਮੌਜੂਦ ਬੀਬੀਸੀ ਪੱਤਰਕਾਰ ਟੋਮ ਬੇਟਮੈਨ ਮੁਤਾਬਕ ਪੱਛਮੀ ਦੇਸ਼ ਆਖ ਰਹੇ ਹਨ ਕਿ ਉਹ ਰੂਸ ਨੂੰ ਮਹਿਜ਼ ਬਿਆਨਾਂ ਕਰਕੇ ਨਹੀਂ ਬਲਕਿ ਧਰਾਤਲ 'ਤੇ ਹੋਣ ਵਾਲੇ ਬਦਲਾਅ ਉਸ ਮੁਤਾਬਕ ਹੀ 'ਜੱਜ' ਕਰਨਗੇ।
ਜਦੋਂ ਤੱਕ ਜੰਗਬੰਦੀ ਦਾ ਸਵਾਲ ਹੈ ਜਾਂ ਤਣਾਅ ਖ਼ਤਮ ਕਰਨ ਦੀ ਗੱਲ ਹੈ ਯੂਕਰੇਨ ਦਾ ਕਹਿਣਾ ਹੈ ਕਿ ਗੱਲਬਾਤ ਜਾਰੀ ਰਹੇਗੀ।
ਯੂਕਰੇਨ ਦੂਸਰੇ ਦੇਸ਼ਾਂ ਨੂੰ ਵੀ ਆਪਣੇ ਸੁਰੱਖਿਆ ਗਾਰੰਟੀਆਂ ਦਾ ਹਿੱਸਾ ਬਣਾਉਣ ਦਾ ਚਾਹਵਾਨ ਹੈ।
ਦਹਾਕਿਆਂ ਤੋਂ ਰੂਸ ਦੇ ਧਨਾਢਾਂ ਨੇ ਵਿਦੇਸ਼ਾਂ ਵਿੱਚ ਕਰੋੜਾਂ ਡਾਲਰਾਂ ਦੀ ਕਮਾਈ ਕੀਤੀ ਹੈ ਅਤੇ ਉਨ੍ਹਾਂ ਨੂੰ ਸ਼ੈੱਲ ਕੰਪਨੀਆਂ ਵਿੱਚ ਲਗਾ ਦਿੱਤਾ ਤਾਂ ਜੋ ਕਿਸੇ ਨੂੰ ਪਤਾ ਨਾ ਲੱਗ ਸਕੇ।
ਸ਼ੈੱਲ ਕੰਪਨੀਆਂ ਤੋਂ ਭਾਵ ਉਨ੍ਹਾਂ ਕੰਪਨੀਆਂ ਤੋਂ ਹੈ, ਜੋ ਸਿਰਫ਼ ਕਾਗ਼ਜ਼ਾਂ ਵਿੱਚ ਹੀ ਨਾਮਜ਼ਦ ਹੁੰਦੀਆਂ ਹਨ।
ਹੁਣ, ਦੁਨੀਆ ਭਰ ਦੇ ਦੇਸ਼ ਇਸ ਨੂੰ ਟਰੈਕ ਕਰਨ ਲਈ ਕਦਮ ਚੁੱਕ ਰਹੇ ਹਨ।
ਪੂਰੀ ਖ਼ਬਰ ਪੜ੍ਹਨ ਲਈ ਇੱਥੇ ਕਲਿੱਕ ਕਰੋ।
ਮੰਗਲਵਾਰ ਸ਼ਾਮ ਹੋਏ ਵੱਖ ਵੱਖ ਅੰਤਰਰਾਸ਼ਟਰੀ ਫੁਟਬਾਲ ਮੁਕਾਬਲਿਆਂ ਵਿੱਚ ਖੇਡ ਪ੍ਰੇਮੀਆਂ ਤੇ ਖਿਡਾਰੀਆਂ ਨੇ ਯੂਕਰੇਨ ਵਿੱਚ ਜੰਗ ਰੋਕਣ ਦੀ ਅਪੀਲ ਕੀਤੀ ਅਤੇ ਸ਼ਾਂਤੀ ਦਾ ਸਮਰਥਨ ਕੀਤਾ।
ਰੂਸ ਅਤੇ ਯੂਕਰੇਨ ਦਰਮਿਆਨ ਜਾਰੀ ਜੰਗ ਨੂੰ ਇੱਕ ਮਹੀਨੇ ਤੋਂ ਉੱਪਰ ਸਮਾਂ ਹੋ ਗਿਆ ਹੈ ਅਤੇ ਰੂਸ ਦੇ ਉਪ ਰੱਖਿਆ ਮੰਤਰੀ ਨੇ ਆਖਿਆ ਹੈ ਕਿ ਉਹ ਕੀਵ ਅਤੇ ਚਰਨਿਹੀਵ ਦੇ ਕੋਲ ਆਪਣੀ ਫੌਜ ਨੂੰ ਘਟਾਉਣਗੇ।
ਵੱਖ ਵੱਖ ਦੇਸ਼ਾਂ ਵੱਲੋਂ ਇਸ ਉੱਪਰ ਵੱਖ ਵੱਖ ਪ੍ਰਤੀਕਿਰਿਆਵਾਂ ਆ ਰਹੀਆਂ ਹਨ।
ਜਿੱਥੇ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਆਖਿਆ ਹੈ ਕਿ ਖ਼ਤਰਾ ਹੁਣ ਵੀ ਟਲਿਆ ਨਹੀਂ ਹੈ ਉੱਥੇ ਹੀ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡੇਨ ਨੇ ਆਖਿਆ ਹੈ ਕਿ ਧਰਾਤਲ 'ਤੇ ਕੀ ਹੁੰਦਾ ਹੈ, ਇਹ ਵੇਖਣਾ ਹੋਵੇਗਾ।
ਯੂਕੇ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜੌਨਸਨ ਨੇ ਯੂਕਰੇਨ ਨੂੰ ਸਤਰਕ ਰਹਿਣ ਵਾਸਤੇ ਆਖਿਆ ਹੈ। ਉਨ੍ਹਾਂ ਨੇ ਆਖਿਆ ਕਿ ਉਹ ਰੂਸ ਦੀ ਕਾਰਵਾਈ ਉੱਪਰ ਨਜ਼ਰ ਰੱਖਣਗੇ ਨਾ ਕਿ ਸਿਰਫ਼ ਅਜਿਹੇ ਬਿਆਨਾਂ ਉੱਪਰ।
ਤੁਰਕੀ ਮੁਤਾਬਕ ਇਹ ਹੁਣ ਤਕ ਦਾ ਸਭ ਤੋਂ ਅਹਿਮ ਐਲਾਨ ਹੈ ਜੋ ਸ਼ਾਂਤੀ ਵਾਰਤਾ ਦਾ ਨਤੀਜਾ ਹੈ।
ਫਰਾਂਸ, ਜਰਮਨੀ, ਇਟਲੀ ਦੇ ਆਗੂਆਂ ਨੇ ਅਪੀਲ ਕੀਤੀ ਹੈ ਕਿ ਪੱਛਮੀ ਦੇਸ਼ ਯੂਕਰੇਨ ਦੇ ਮਾਮਲੇ ਵਿੱਚ ਰੂਸ ਨਾਲ ਨਰਮ ਨਾ ਹੋਣ।
ਬੈਠਕ ਦੌਰਾਨ ਰੂਸ ਦੀ ਨੁਮਾਇੰਦਗੀ ਕਰਨ ਵਾਲੇ ਅਧਿਕਾਰੀ ਮੁਤਾਬਕ ਫੌਜਾਂ ਘਟਾਉਣ ਦਾ ਮਤਲਬ ਜੰਗਬੰਦੀ ਨਹੀਂ ਹੈ।
ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਮੰਗਲਵਾਰ ਦੇਰ ਰਾਤ ਆਪਣੇ ਸੰਬੋਧਨ ਵਿੱਚ ਆਖਿਆ ਕਿ ਜਦੋਂ ਤੱਕ ਜੰਗ ਖ਼ਤਮ ਨਹੀਂ ਹੁੰਦੀ ਉਦੋਂ ਤੱਕ ਰੂਸ ਉਪਰ ਲੱਗੀਆਂ ਪਾਬੰਦੀਆਂ ਨਹੀਂ ਹਟਣਗੀਆਂ।
ਇਸੇ ਦੇ ਨਾਲ ਹੀ ਉਨ੍ਹਾਂ ਨੇ ਆਖਿਆ ਕਿ ਰੂਸ ਅਤੇ ਯੂਕਰੇਨ ਦਰਮਿਆਨ ਹੋਈ ਵਾਰਤਾ ਸਕਾਰਾਤਮਕ ਰਹੀ ਹੈ ਪਰ ਹੁਣ ਵੀ ਰੂਸੀ ਹਮਲੇ ਦਾ ਖ਼ਤਰਾ ਉਨ੍ਹਾਂ ਦੇ ਦੇਸ਼ ਉੱਪਰ ਮੰਡਰਾ ਰਿਹਾ ਹੈ।
ਰੂਸ ਦੇ ਉਪ ਰੱਖਿਆ ਮੰਤਰੀ ਵੱਲੋਂ ਆਖਿਆ ਗਿਆ ਹੈ ਕਿ ਯੂਕਰੇਨੀ ਰਾਜਧਾਨੀ ਕੀਵ ਦੇ ਆਸ ਪਾਸ ਮੌਜੂਦ ਰੂਸੀ ਫ਼ੌਜਾਂ ਦੀ ਗਿਣਤੀ ਨੂੰ ਘਟਾਇਆ ਜਾ ਰਿਹਾ ਹੈ।
ਯੂਕਰੇਨ ਦੇ ਰਾਸ਼ਟਰਪਤੀ ਨੇ ਆਖਿਆ ਕਿ ਇਸ ਦਾ ਮਤਲਬ ਇਹ ਨਹੀਂ ਹੈ ਕਿ ਜੰਗ ਖ਼ਤਮ ਹੋ ਰਹੀ ਹੈ। ਉਨ੍ਹਾਂ ਮੁਤਾਬਕ ਹਾਲਾਤ ਹੁਣ ਵੀ ਸੌਖੇ ਨਹੀਂ ਹਨ।
ਯੂਕਰੇਨ 'ਤੇ ਰੂਸ ਦੇ ਹਮਲੇ ਨੂੰ ਚਲਦਿਆਂ ਇੱਕ ਮਹੀਨੇ ਤੋਂ ਜ਼ਿਆਦਾ ਹੋ ਗਿਆ ਹੈ। ਇਸ ਜੰਗ ਜੁੜੇ ਅਹਿਮ ਅਪਡੇਟ ਅਸੀਂ ਇਸ ਲਾਈਵ ਪੇਜ ਰਾਹੀਂ ਸਾਂਝੇ ਕਰਾਂਗੇ।
ਯੂਕਰੇਨ-ਰੂਸ ਜੰਗ ਨਾਲ ਜੁੜੀਆਂ ਜਾਣਕਾਰੀਆਂ ਬੀਬੀਸੀ ਪੱਤਰਕਾਰ ਖੁਸ਼ਬੂ ਸੰਧੂ ਤੇ ਅਰਸ਼ਦੀਪ ਕੌਰ ਸਾਂਝੀਆਂ ਕਰ ਰਹੇ ਹਨ।
29 ਮਾਰਚ ਦੇ ਅਪਡੇਟ ਤੁਸੀਂ ਇੱਥੇ ਕਲਿੱਕ ਕਰੋ।