You’re viewing a text-only version of this website that uses less data. View the main version of the website including all images and videos.
ਯੂਕਰੇਨ ਤੇ ਰੂਸ ਵਿਚਕਾਰ ਜੰਗ ਦਾ ਅੱਜ 13ਵਾਂ ਦਿਨ ਹੈ। ਜਾਣੋ ਅਹਿਮ ਗਤੀਵਿਧੀਆਂ ਬਾਰੇ ਜਾਣਕਾਰੀ
ਯੂਕਰੇਨ ਵਿੱਚ ਭਾਰਤੀ ਦੂਤਾਵਾਸ ਨੇ ਦੱਸਿਆ ਹੈ ਕਿ ਮਾਈਕੋਲਿਵ ਬੰਦਰਗਾਹ ਉੱਤੇ ਫਸੇ 75 ਨਾਵਿਕਾਂ ਨੂੰ ਕੱਢਣ ਦਾ ਕੰਮ ਜਾਰੀ ਹੈ।
ਦੂਤਾਵਾਸ ਨੇ ਇਨ੍ਹਾਂ ਨੂੰ ਸੁਰੱਖਿਅਤ ਕੱਢਣ ਲਈ ਬੱਸਾਂ ਦਾ ਪ੍ਰਬੰਧ ਕੀਤਾ ਹੈ। ਹੁਣ ਤਕ 57 ਨਾਵਿਕ ਸੁਰੱਖਿਅਤ ਕੱਢ ਲਏ ਗਏ ਹਨ।
ਇਨ੍ਹਾਂ ਵਿਚੋਂ ਦੋ ਲਿਬਨਾਨ ਅਤੇ ਤਿੰਨ ਸੀਰੀਆ ਦੇ ਨਾਗਰਿਕ ਵੀ ਸ਼ਾਮਲ ਹਨ।
ਬਾਕੀ 23 ਨਾਗਰਿਕਾਂ ਨੂੰ ਕੱਢਣ ਲਈ ਵੀ ਭਾਰਤ ਸਰਕਾਰ ਕੋਸ਼ਿਸ਼ ਕਰ ਰਹੀ ਹੈ।
ਰੂਸ ਅਤੇ ਯੂਕਰੇਨ ਦਰਮਿਆਨ ਜਾਰੀ ਜੰਗ ਕਰਕੇ ਕਈ ਦੇਸ਼ਾਂ ਦੇ ਨਾਗਰਿਕ ਵੱਖ ਵੱਖ ਥਾਵਾਂ ਉਪਰ ਫਸੇ ਹੋਏ ਹਨ।
ਰੂਸ ਨੇ ਕਿਹਾ ਹੈ ਕਿ ਜੇ ਪੱਛਮ ਨੇ ਰੂਸ ਦੇ ਤੇਲ ਉੱਪਰ ਪਾਬੰਦੀਆਂ ਲਗਾਉਣ ਦੀਆਂ ਆਪਣੀਆਂ ਯੋਜਨਾਵਾਂ ਤੋਂ ਪਿੱਛੇ ਨਾ ਹਟੇ ਤਾਂ ਉਹ ਜਰਮਨੀ ਨੂੰ ਮੁੱਖ ਪਾਈਪ ਨਾਲ ਜਾਣ ਵਾਲੀ ਸਪਲਾਈ ਰੋਕ ਸਕਦਾ ਹੈ।
ਡਿਪਟੀ ਪ੍ਰਾਈਮ ਮਨਿਸਟਰ ਐਲਗਜ਼ੇਂਡਰ ਨੋਵਾਕ ਨੇ ਕਿਹਾ,''ਰੂਸੀ ਤੇਲ ਉੱਪਰ ਪਾਬੰਦੀਆਂ ਦੇ ਵਿਸ਼ਵੀ ਮੰਡੀ ਲਈ ਤਬਾਹਕਾਰੀ ਸਿੱਟੇ ਨਿਕਲਣਗੇ।''
ਉਨ੍ਹਾਂ ਨੇ ਕਿਹਾ ਕਿ ਵਿਸ਼ਵੀ ਬਾਜ਼ਾਰ ਵਿੱਚ ਤੇਲ ਦੀ ਕੀਮਤ 300$ ਫ਼ੀ ਬੈਰਲ ਨੂੰ ਪਹੁੰਚ ਜਾਵੇਗੀ।
ਅਮਰੀਕਾ ਆਪਣੇ ਸਾਥੀਆਂ ਨਾਲ ਮਿਲ ਕੇ ਰੂਸ ਨੂੰ ਯੂਕਰੇਨ ਹਮਲੇ ਦੀ ਸਜ਼ਾ ਦੇਣ ਦੇ ਮਕਸਦ ਨਾਲ ਰੂਸੀ ਤੇਲ ਉੱਪਰ ਪਾਬੰਦੀ ਲਗਾਉਣ ਦੀ ਯੋਜਨਾ ਰੱਖ ਚੁੱਕਿਆ ਹੈ।
ਹਾਲਾਂਕਿ ਜਰਮਨੀ ਅਤੇ ਨੀਦਰਲੈਂਡਸ ਇਸ ਨੂੰ ਰੱਦ ਕਰ ਚੁੱਕੇ ਹਨ।
ਯੂਰਪੀ ਯੂਨੀਅਨ ਆਪਣੀ ਜ਼ਰੂਰਤ ਦੀ 40% ਗੈਸ ਅਤੇ ਤੇਲ ਹਾਸਲ ਕਰਦਾ ਹੈ। ਜੇ ਰੂਸ ਵੱਲੋਂ ਸਪਲਾਈ ਵਿੱਚ ਰੋਕ ਲਗਾਈ ਜਾਂਦੀ ਹੈ ਤਾਂ ਖਿੱਤੇ ਲਈ ਮੁਸ਼ਕਲ ਖੜ੍ਹੀ ਹੋ ਸਕਦੀ ਹੈ
ਅੱਜ ਰੂਸ ਦੇ ਯੂਕਰੇਨ ਉੱਪਰ ਹਮਲੇ ਦਾ 13ਵਾਂ ਦਿਨ ਹੈ।
ਇਸ ਤੋਂ ਇਲਾਵਾ-
ਰੂਸ-ਯੂਕਰੇਨ ਬਾਰੇ ਜਾਣਕਾਰੀ ਭਰਭੂਰ ਵਿਸ਼ਲੇਸ਼ਣ ਪੜ੍ਹਨ ਅਤੇ ਵੀਡੀਓ ਦੇਖਣ ਲਈ ਤੁਸੀਂ ਸਾਡੀ ਵੈਬਸਾਈਟਉੱਪਰ ਵੀ ਆ ਸਕਦੇ ਹੋ।
ਵੀਡੀਓ ਸਮੱਗਰੀ ਲਈ ਤੁਸੀਂ ਸਾਡੇ ਯੂਟਿਊਬ ਚੈਨਲ ਉੱਪਰ ਬਣੀ ਰੂਸ-ਯੂਕਰੇਨ ਜੰਗ ਬਾਰੇ ਪਲੇਲਿਸਟਵੀ ਦੇਖ ਸਕਦੇ ਹੋ।
ਰੂਸ ਅਤੇ ਯੂਕਰੇਨ ਦਰਮਿਆਨ ਜਾਰੀ ਜੰਗ ਤੋਂ ਬਾਅਦ ਲੱਖਾਂ ਨਾਗਰਿਕ ਦੇਸ਼ ਛੱਡ ਕੇ ਗਏ ਹਨ। ਹਜ਼ਾਰਾਂ ਨਾਗਰਿਕ ਅਜਿਹੇ ਵੀ ਹਨ ਜਿਨ੍ਹਾਂ ਨੇ ਪਿੱਛੇ ਰੁਕ ਕੇ ਦੇਸ਼ ਦੀ ਫੌਜ ਦੀ ਸਹਾਇਤਾ ਕਰਨ ਦਾ ਫ਼ੈਸਲਾ ਕੀਤਾ ਹੈ।
ਅਜਿਹੇ ਹੀ ਕੁਝ ਨਾਗਰਿਕ ਮਿਲ ਕੇ 'ਮੋਲੋਟੋਵ ਕਾਕਟੇਲ' ਬਣਾ ਰਹੇ ਹਨ। ਇਹ ਕੋਈ ਕਾਕਟੇਲ ਨਹੀਂ ਸਗੋਂ ਘਰੇਲੂ ਬੰਬ ਹਨ ਜੋ ਕੱਚ ਦੀਆਂ ਬੋਤਲਾਂ ਵਿੱਚ ਬਣਾਏ ਜਾ ਰਹੇ ਹਨ।
ਯੂਕਰੇਨ ਦੀਆਂ ਅਜਿਹੀਆਂ ਤਸਵੀਰਾਂ ਦੁਨੀਆਂ ਭਰ ਵਿੱਚ ਵਾਇਰਲ ਹੋ ਗਈਆਂ ਹਨ ਜਿਸ ਵਿੱਚ ਨੌਜਵਾਨ ਅਤੇ ਬਜ਼ੁਰਗ ਔਰਤਾਂ, ਆਦਮੀ ਮਿਲ ਕੇ ਮੋਲੋਟੋਵ ਬੰਬ ਬਣਾ ਰਹੇ ਹਨ।
ਪੜ੍ਹੋ ਇਹ ਜਾਣਕਾਰੀ ਭਰਭੂਰ ਰਿਪੋਰਟ।
ਯੂਕਰੇਨ ਦੇ ਮਿਲਟਰੀ ਨੇ ਜਾਰੀ ਰੂਸੀ ਹਮਲੇ ਬਾਰੇ ਆਪਣੀ ਤਾਜ਼ਾ ਸੂਚਨਾ ਵਿੱਚ ਕਿਹਾ ਹੈ ਕਿ ਦੁਸ਼ਮਣ ਦੀ ਹਮਲਾਵਰ ਕਾਰਵਾਈ ਜਾਰੀ ਹੈ ਪਰ ਉਸ ਦੀਆਂ ਫ਼ੌਜਾਂ ਦੀ ਅੱਗੇ ਵਧਣ ਦੀ ਗਤੀ ਕਾਫ਼ੀ ਘਟੀ ਹੈ।
ਲੜਾਈ ਦੇ 13ਵੇਂ ਦਿਨ ਜਨਰਲ ਸਟਾਫ਼ ਆਫ਼ ਯੂਕਰੇਨਜ਼ ਆਮਰਮਡ ਫੋਰਸਜ਼ ਨੇ ਕਿਹਾ, ਕਿ 8 ਮਾਰਚ ਨੂੰ ਸਥਾਨਕ ਸਮੇਂ ਮੁਤਾਬਕ ਸਵੇਰੇ ਛੇ ਵਜੇ ਯੂਕਰੇਨੀ ਫ਼ੌਜੀਆਂ ਵੱਲੋਂ ਦੱਖਣੀ, ਪੂਰਬੀ ਅਤੇ ਉੱਤਰੀ ਖੇਤਰਾਂ ਦੀ ਰੱਖਿਆ ਜਾਰੀ ਹੈ। ਰਾਜਧਾਨੀ ਕੀਵ ਅਤੇ ਉੱਤਰੀ ਸ਼ਹਿਰ ਚਰਨੀਵ ਅਜੇ ਵੀ ਯੂਕਰੇਨੀ ਹੱਥਾਂ ਵਿੱਚ ਹਨ।''
ਬਿਆਨ ਵਿੱਚ ਕਿਹਾ ਗਿਆ ਕਿ ਦੇਸ ਦੀ ਹਵਾਈ ਸੁਰੱਖਿਆ ਦੁਸ਼ਮਣ ਦੇ ਹਵਾਈ ਹਮਲਿਆਂ ਤੇ ਮਿਜ਼ਾਇਲਾਂ ਨੂੰ ਰੋਕ ਰਹੀ ਹੈ।
ਯੂਕਰੇਨ ਦੀ ਮਿਲਟਰੀ ਨੇ ਕਿਹਾ ਹੈ ਕਿ ਰੂਸ ਹੁਣ ਮਨੋਵਿਗਿਆਨਕ ਲੜਾਈ ਲੜ ਰਿਹਾ ਜਿਸ ਦੇ ਹਿੱਸੇ ਵਜੋਂ ਰੂਸੀ ਅਧਿਕਾਰ ਹੇਠਲੇ ਇਲਾਕਿਆਂ ਵਿੱਚ ਸਥਾਨਕ ਵਾਸੀਆਂ ਨੂੰ ਪ੍ਰਭਾਵਿਤ ਕਰਨ ਲਈ ''ਪ੍ਰਾਪੇਗੰਡਾ ਚਲਾਇਆ'' ਜਾ ਰਿਹਾ ਹੈ।
ਹਾਲਾਂਕਿ ਬੀਬੀਸੀ ਸੁਤੰਤਰ ਰੂਪ ਵਿੱਚ ਇਨ੍ਹਾਂ ਦਾਅਵਿਆਂ ਦੀ ਪੁਸ਼ਟੀ ਨਹੀਂ ਕਰਦਾ ਹੈ।
ਜਦੋਂ ਰੂਸ ਯੂਕਰੇਨ ਜੰਗ ਦੀ ਸ਼ੁਰੂਆਤ ਦੌਰਾਨ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੂੰ ਕਥਿਤ ਤੌਰ 'ਤੇ ਦੇਸ਼ ਛੱਡਣ ਦਾ ਵਿਕਲਪ ਮਿਲਿਆ ਸੀ ਤਾਂ ਉਹਨਾਂ ਨੇ ਸਪੱਸ਼ਟ ਤੌਰ 'ਤੇ ਆਖਿਆ ਸੀ ਕਿ ਉਨ੍ਹਾਂ ਨੂੰ ਹਥਿਆਰ ਚਾਹੀਦੇ ਹਨ ਨਾ ਕਿ ਬਾਹਰ ਨਿਕਲਣ ਲਈ ਰਾਹ।
ਉਨ੍ਹਾਂ ਦੀ ਪਤਨੀ ਓਲੇਨਾ ਜ਼ੇਲੇਂਸਕੀ ਅਤੇ ਦੋ ਬੱਚੇ ਸਾਸ਼ਾ ਅਤੇ ਸੀਰਲ ਨੇ ਵੀ ਦੇਸ਼ ਵਿੱਚ ਹੀ ਰਹਿਣ ਦਾ ਫ਼ੈਸਲਾ ਕੀਤਾ ਸੀ।
ਇਸ ਰਿਪੋਰਟ ਰਾਹੀਂ ਜਾਣੋ ਯੂਕਰੇਨ ਦੀ ਪ੍ਰਥਮ ਮਹਿਲਾ ਅਤੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਦੀ ਪਤਨੀ ਓਲੇਨਾ ਜ਼ੇਂਲੇਂਸਕੀ ਬਾਰੇ।
ਜ਼ੇਲੇਂਸਕੀ ਨੇ ਆਪਣੇ ਕੈਰੀਅਰ ਦੀ ਸ਼ੁਰੂਆਤ ਇੱਕ ਕਾਮੇਡੀਅਨ ਵਜੋਂ ਕੀਤੀ ਸੀ ਅਤੇ ਰਾਸ਼ਟਰਪਤੀ ਬਣਨ ਤੱਕ ਦਾ ਉਨ੍ਹਾਂ ਦਾ ਸਫ਼ਰ ਰਵਾਇਤੀ ਸਿਆਸਤਦਾਨਾਂ ਵਰਗਾ ਨਹੀਂ ਸੀ।
ਪੜ੍ਹੋ ਵੋਲੋਦੀਮੀਰ ਜ਼ੇਲੇਂਸਕੀ ਦੀ ਜ਼ਿੰਦਗੀ ਬਾਰੇ ਇਸ ਰਿਪੋਰਟਵਿੱਚ।
ਰੂਸੀ ਖ਼ਬਰ ਏਜੰਸੀ ਟੀਐਐਸਐਸ ਮੁਤਾਬਕ ਰੂਸ ਅਤੇ ਯੂਕਰੇਨ ਦੋਵਾਂ ਧਿਰਾਂ ਨੇ ਮੰਨਿਆ ਹੈ ਕਿ ਤੀਜੇ ਦੌਰ ਦੀ ਗੱਲਬਾਤ ਬਹੁਤੀ ਸਾਰਥਕ ਨਹੀਂ ਰਹੀ ਹੈ।
ਯੂਕਰੇਨ ਦੇ ਅਖ਼ਬਾਰ ਕੀਵ ਪੋਸਟ ਮੁਤਾਬਕ ਤੀਜੇ ਦੌਰ ਦੀ ਬੈਠਕ ਦੌਰਾਨ ਰੂਸੀ ਫ਼ੈਡਰੇਸ਼ਨ ਨੇ ਯੂਕਰੇਨ ਅੱਗੇ ਤਿੰਨ ਮੰਗਾਂ ਰੱਖੀਆਂ ਗਈਆਂ-
1. ਰੂਸ ਓਪੋਜ਼ੀਸ਼ਨਲ ਪਲੇਟਫਾਰਮ ਫਾਰ ਲਾਈਫ਼ ਦੇ ਮੁਖੀ ਯੂਰੀ ਬੋਇਕੋ ਨੂੰ ਪ੍ਰਧਾਨ ਮੰਤਰੀ ਨਿਯੁਕਤ ਕਰ ਰਿਹਾ ਹੈ।
2. ਯੂਕਰੇਨ ਡੀਐਨਆਰ/ਐਲਐਨਆਰ ਅਤੇ ਕ੍ਰੀਮੀਆ ਨੂੰ ਮਾਨਤਾ ਦੇਵੇ।
3. ਯੂਕਰੇਨ ਨਾਟੋ ਵਿੱਚ ਜਾਣ ਤੋਂ ਇਨਕਾਰ ਕਰੇ।
ਹਾਲਾਂਕਿ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਇਨ੍ਹਾਂ ਮੰਗਾਂ ਤੋਂ ਪਿਹਲਾਂ ਹੀ ਇਨਕਾਰ ਕਰ ਚੁੱਕੇ ਹਨ।
ਸੰਯੁਕਤ ਰਾਸ਼ਟਰ ਦੇ ਮਨੁੱਖਤਾਵਾਦੀ ਉਧਮਾਂ ਦੇ ਮੁਖੀ ਮਾਰਟਿਨ ਗ੍ਰਿਫਿਥਸ ਨੇ ਯੂਕਰੇਨ ਤੇ ਰੂਸ ਨੂੰ ਅਪੀਲ ਕੀਤੀ ਹੈ ਕਿ ਉਹ ਨਾਗਰਕਾਂ ਨੂੰ ਨਿਕਲਣ ਲਈ ਅਤੇ ਪੀੜਤਾਂ ਤੱਕ ਮਾਨਵੀ ਸਹਾਇਤਾ ਦੇ ਪਹੁੰਚਣ ਲਈ ਸੁਰੱਖਿਅਤ ਲਾਂਘਾ ਯਕੀਨੀ ਬਣਾਉਣ।
ਸੰਗਠਨ ਵੱਲੋਂ ਇਹ ਬਿਆਨ ਰੂਸ ਤੇ ਯੂਕਰੇਨ ਦਰਮਿਆਨ ਜਾਰੀ ਦੂਸ਼ਣਬਾਜ਼ੀ ਕਾਰਨ ਆਇਆ ਹੈ ਜਿਸ ਵਿੱਚ ਉਨ੍ਹਾਂ ਨੇ ਲੋਕਾਂ ਨੂੂੰ ਨਿਕਲਣ ਦੇਣ ਲਈ ਤੈਅ ਰੂਟ ਉਪਰ ਗੋਲੀਬੰਦੀ ਭੰਗ ਕਰਨ ਦੇ ਇਲਜ਼ਾਮ ਲਗਾਏ ਸਨ।
.ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਕਿਹਾ ਹੈ ਕਿ ਰੂਸ ਨਾਲ ਜਾਰੀ ਜੰਗ ਨੂੰ ਜਿੱਤਣ ਵਿੱਚ ਜਿੰਨੀ ਦੇਰ ਲੱਗੇਗੀ ਉਹ ਉਨੀਂ ਦੇਰ ਟਿਕੇ ਰਹਿਣਗੇ।
ਉਨ੍ਹਾਂ ਨੇ ਕਿਹਾ, ''ਮੈਂ ਲੁਕ ਨਹੀਂ ਰਿਹਾ ਅਤੇ ਮੈਨੂੰ ਕਿਸੇ ਦਾ ਡਰ ਨਹੀਂ।''
ਉਨ੍ਹਾਂ ਨੇ ਇਹ ਗੱਲ ਰਾਜਧਾਨੀ ਕੀਵ ਵਿੱਚ ਸਥਿਤ ਆਪਣੇ ਦਫ਼ਤਰ ਤੋਂ ਆਪਣੇ ਸੋਸ਼ਲ ਮੀਡੀਆ ਹੈਂਡਲ ਉੱਪਰ ਪੋਸਟ ਕੀਤੀ ਵੀਡੀਓ ਵਿੱਚ ਕਹੀ।
ਜ਼ੇਲੇਂਸਕੀ ਨੇ ਇਹ ਦਰਸਾਉਣ ਲਈ ਕਿ ਵੀਡੀਓ ਸੋਮਵਾਰ ਸ਼ਾਮ ਹੀ ਰਿਕਾਰਡ ਕੀਤਾ ਗਿਆ ਹੈ, ਕੀਵ ਦੀ ਸ਼ਾਮ ਦੇ ਦ੍ਰਿਸ਼ ਵੀ ਦਿਖਾਏ।
ਇੱਕ ਭਾਰਤੀ ਡਾਕਟਰ ਗਿਰੀਕੁਮਾਰ ਪਾਟਿਲ ਯੂਕਰੇਨ ਦੇ ਦੋਨਬਾਸ ਖੇਤਰ ਵਿੱਚ ਰਹਿੰਦੇ ਹਨ।
ਉਨ੍ਹਾਂ ਨੇ ਕਿਹਾ ਹੈ ਕਿ ਉਹ ਆਪਣੇ ਦੋ ਪਾਲਤੂ ਜਾਨਵਰਾਂ ਇੱਕ ਚੀਤਾ ਅਤੇ ਇੱਕ ਕਾਲੇ ਚੀਤਾ ਤੋਂ ਬਿਨਾਂ ਭਾਰਤ ਵਾਪਸ ਨਹੀਂ ਆਉਣਗੇ।
ਉਨ੍ਹਾਂ ਨੇ ਕਿਹਾ, "ਮੈਂ ਭਾਰਤੀ ਅੰਬੈਸੀ ਨੂੰ ਫ਼ੋਨ ਕੀਤਾ ਸੀ ਪਰ ਕੋਈ ਢੁਕਵਾਂ ਜਵਾਬ ਨਹੀਂ ਮਿਲਿਆ। ਮੇਰੀ ਜਗ੍ਹਾ ਨੂੰ ਰੂਸੀਆਂ ਨੇ ਘੇਰਿਆ ਹੋਇਆ ਹੈ ਪਰ ਮੈਂ ਆਪਣੀ ਪੂਰੀ ਕੋਸ਼ਿਸ਼ ਕਰ ਰਿਹਾ ਹਾਂ। ਮੈਂ ਉਨ੍ਹਾਂ ਨੂੰ ਆਪਣੇ ਬੱਚਿਆਂ ਵਾਂਗ ਸੰਭਾਲ ਕਰਦਾ ਹਾਂ।"
ਜ਼ਿਕਰਯੋਗ ਹੈ ਕਿ ਉਹ ਯੂਟਿਊਬ ਚੈਨਲ ਵੀ ਚਲਾਉਂਦੇ ਹਨ ਜਿਨ੍ਹਾਂ ਉੱਪਰ ਕਿ ਉਹ ਇਨ੍ਹਾਂ ਜੀਵਾਂ ਦੀਆਂ ਵੀਡੀਓ ਅਪਲੋਡ ਕਰਦੇ ਰਹਿੰਦੇ ਹਨ। ਉਨ੍ਹਾਂ ਦੇ ਚੈਨਲ ਦੇ 85,000 ਸਬਸਕ੍ਰਾਈਬਰ ਹਨ।
15 ਲੱਖ ਤੋਂ ਵੱਧ ਲੋਕਾਂ ਨੇ ਜੰਗ ਦੌਰਾਨ ਯੂਕਰੇਨ ਛੱਡ ਦਿੱਤਾ ਹੈ। ਘਰਾਂ ਤੇ ਆਪਣਿਆਂ ਨੂੰ ਛੱਡਣਾ ਇਨ੍ਹਾਂ ਲਈ ਬਹੁਤ ਔਖਾ ਹੈ।
ਕੁਝ ਪਰਿਵਾਰ ਪੋਲੈਂਡ ਪਹੁੰਚ ਰਹੇ ਹਨ ਤੇ ਇਨ੍ਹਾਂ ਕੋਲ ਕਿਤੇ ਹੋਰ ਜਾਣ ਦਾ ਰਾਹ ਨਹੀਂ ਹੈ। ਇਸ ਲਈ ਪੋਲੈਂਡ ਦੇ ਲੋਕ ਇਨ੍ਹਾਂ ਦੀ ਮਦਦ ਲਈ ਆਪਣੇ ਘਰ ਦੇ ਦਰਵਾਜ਼ੇ ਖੋਲ੍ਹ ਰਹੇ ਹਨ।
ਪੋਲੈਂਡ ਦੇ ਲੋਕ ਇਹ ਯਕੀਨੀ ਬਣਾਉਂਦੇ ਹਨ ਕਿ ਇੱਥੇ ਪੌਦੇ ਹੋਣ ਤੇ ਘਰ ਵਰਗਾ ਮਹਿਸੂਸ ਹੋਵੇ ਅਤੇ ਸੁਰੱਖਿਅਤ ਵੀ ਲੱਗੇ।
ਓਲੇਂਕਾ ਅਤੇ ਉਨ੍ਹਾਂ ਦੇ ਪਰਿਵਾਰ ਦੇ 6 ਮੈਂਬਰ ਕੀਵ ਅਤੇ ਲੁਤਸਕ 'ਚ ਹਮਲਿਆਂ ਤੋਂ ਬਾਅਦ ਇੱਥੇ ਰਹਿ ਰਹੇ ਹਨ।'
ਯੂਰਪੀ ਯੂਨੀਅਨ ਨੇ ਰੂਸ ਉੱਪਰ ਆਪਣੀ ਨਿਰਭਰਤਾ ਘਟਾਉਣ ਲਈ ਆਪਣੀ ਊਰਜਾ ਪੂਰਤੀ ਵਿੱਚ ਵਿਭਿੰਨਤਾ ਲਿਆਉਣ ਲਈ ਯੋਜਨਾ ਘੜਨੀ ਸ਼ੁਰੂ ਕਰ ਦਿੱਤੀ ਹੈ।
ਯੂਰਪ ਅਜੇ ਤੱਕ ਆਪਣੀ ਜ਼ਰੂਰਤ ਦੀ ਲਗਭਗ ਅੱਧੀ ਕੁਦਰਤੀ ਗੈਸ, ਕੋਲ ਅਤੇ ਇੱਕ ਤਿਹਾਈ ਕੱਚਾ ਤੇਲ ਰੂਸ ਤੋਂ ਹਾਸਲ ਕਰਦਾ ਹੈ।
ਯੂਰਪੀ ਯੂਨੀਅਨ ਦੇ ਆਗੂ ਇਸ ਵੀਰਵਾਰ ਤੇ ਸ਼ੁੱਕਰਵਾਰ ਨੂੰ ਫਰਾਂਸ ਵਿੱਚ ਪੜਾਅਵਾਰ ਅਮਲ ਵਿੱਚ ਲਿਆਂਦੀ ਜਾਣ ਵਾਲੀ ਯੋਜਨਾ ਦੀਆਂ ਬਾਰੀਕੀਆਂ ਬਾਰੇ ਚਰਚਾ ਕਰਨਗੇ।
ਯੋਜਨਾ ਦੇ ਡਰਾਫਟ ਬਿਆਨ ਵਿੱਚ ਰੂਸ ਦੇ ਯੂਕਰੇਨ ਉੱਪਰ ਤਾਜ਼ਾ ਹਮਲੇ ਨੂੰ ਯੂਰਪੀ ਇਤਿਹਾਸ ਦਾ ਵੱਡਾ ਬਦਲਾਅ ਕਹਿੰਦਿਆਂ ਧਰਤੀਆਂ ਦੀਆਂ ਟੈਕਟੌਨਿਕ ਪਲੇਟਾਂ ਦੇ ਹਿੱਲਣ ਨਾਲ ਤਸ਼ਬੀਹ ਦਿੱਤੀ ਗਈ ਹੈ।
ਊਰਜਾ ਉੱਪਰ ਨਿਰਭਰਤਾ ਘਟਾਉਣ ਲਈ 2030 ਦਾ ਟੀਚਾ ਤਜਵੀਜ਼ ਕੀਤੀ ਗਈ ਯੋਜਨਾ ਵਿੱਚ ਮਿੱਥਿਆ ਗਿਆ ਹੈ।
ਹੋਰ ਪੱਛਮੀ ਦੇਸ ਵੀ ਕੌਮਾਂਤਰੀ ਮੰਡੀ ਉੱਪਰ ਪੈਣ ਵਾਲੇ ਅਸਰ ਲਈ ਆਪਣੇ-ਆਪ ਨੂੰ ਤਿਆਰ ਕਰ ਰਹੇ ਹਨ।
ਅਮਰੀਕਾ ਆਪਣੀ ਜ਼ਰੂਰਤ ਦਾ ਲਗਭਗ 8% ਕੱਚਾ ਤੇਲ ਰੂਸ ਤੋਂ ਲੈਂਦਾ ਹੈ।
ਪੇਸ਼ ਹੈ ਹੁਣ ਤੱਕ ਦਾ ਅਹਿਮ ਘਟਨਾਕ੍ਰਮ-
ਬੀਬੀਸੀ ਪੰਜਾਬੀ ਦੇ ਯੂਕਰੇਨ-ਰੂਸ ਜੰਗ ਬਾਰੇ ਲਾਈਵ ਪੇਜ ਉੱਪਰ ਤੁਹਾਡਾ ਸਵਾਗਤ ਹੈ। ਅੱਜ ਜੰਗ ਦਾ 13ਵਾਂ ਦਿਨ ਹੈ। ਇਸ ਲਾਈਵ ਪੇਜ ਰਾਹੀਂ ਅਸੀਂ ਤੁਹਾਨੂੰ ਜੰਗ ਦੀਆਂ ਅੱਜ ਦੀਆਂ ਅਹਿਮ ਘਟਨਾਵਾਂ ਬਾਰੇ ਦੱਸਾਂਗੇ।
ਅੱਜ ਦਾ ਲਾਈਵ ਪੇਜ ਖੁਸ਼ਬੂ ਸੰਧੂ ਅਤੇ ਗੁਰਕਿਰਪਾਲ ਸਿੰਘ ਵੱਲੋਂ ਸ਼ੁਰੂ ਕੀਤਾ ਜਾ ਰਿਹਾ ਹੈ।
7 ਮਾਰਚ ਦੇ ਅਪਡੇਟਸ ਜਾਨਣ ਲਈ ਇੱਥੇ ਕਲਿੱਕ ਕਰੋ।
ਰੂਸ-ਯੂਕਰੇਨ ਬਾਰੇ ਜਾਣਕਾਰੀ ਭਰਭੂਰ ਵਿਸ਼ਲੇਸ਼ਣ ਪੜ੍ਹਨ ਅਤੇ ਵੀਡੀਓ ਦੇਖਣ ਲਈ ਤੁਸੀਂ ਸਾਡੀ ਵੈਬਸਾਈਟ ਉੱਪਰ ਵੀ ਆ ਸਕਦੇ ਹੋ।
ਵੀਡੀਓ ਸਮੱਗਰੀ ਲਈ ਤੁਸੀਂ ਸਾਡੇ ਯੂਟਿਊਬ ਚੈਨਲ ਉੱਪਰ ਬਣੀ ਰੂਸ-ਯੂਕਰੇਨ ਜੰਗ ਬਾਰੇ ਪਲੇਲਿਸਟ ਵੀ ਦੇਖ ਸਕਦੇ ਹੋ।