ਕੋਰੋਨਾਵਾਇਰਸ ਅਪਡੇਟ: ਅੰਮ੍ਰਿਤਸਰ ਦੀ ਤੁਲੀ ਲੈਬ ਦੇ ਕਥਿਤ ਘੁਟਾਲੇ ਦੀ ਜਾਂਚ ਲਈ ਬਣੀ SIT

ਲਾਈਵ ਕਵਰੇਜ

1. 12 ਜੁਲਾਈ 2020ਭਾਰਤ ਵਿੱਚ ਕੋਰੋਨਾਵਾਇਰਸ ਦੇ ਤਾਜ਼ਾ ਹਾਲਾਤ

   ਪਿਛਲੇ ਚੌਵੀ ਘੰਟਿਆਂ ਦੌਰਾਨ ਭਾਰਤ ਵਿੱਚ ਕੋਰੋਨਾਵਾਇਰਸ ਦੇ 28,637 ਨਵੇਂ ਮਾਮਲੇ ਸਾਹਮਣੇ ਆਏ ਹਨ।

   ਇਸ ਨਾਲ ਭਾਰਤ ਵਿੱਚ ਕੋਰੋਨਾਵਾਇਰਸ ਦੇ ਪੁਸ਼ਟ ਮਾਮਲਿਆਂ ਦੀ ਸੰਖਿਆ 8,49,553 ਹੋ ਗਈ ਹੈ ਅਤੇ 2,92,258 ਸਰਗਰਮ ਮਾਮਲੇ ਹਨ।

   ਭਾਰਤ ਵਿੱਚ 5,34,621 ਮਰੀਜ਼ ਠੀਕ ਹੋ ਚੁੱਕੇ ਹਨ ਅਤੇ 22, 674 ਮੌਤਾਂ ਹੋ ਗਈਆਂ ਹਨ।

   ਆਈਸੀਐੱਮਆਰ ਮੁਤਾਬਕ 11 ਜੁਲਾਈ ਨੂੰ ਭਾਰਤ ਵਿੱਚ 2,80,151 ਟੈਸਟ ਕੀਤੇ ਗਏ। ਇਸ ਦੇ ਨਾਲ ਹੁਣ ਤੱਕ 1,51,87,153 ਟੈਸਟ ਕੀਤੇ ਜਾ ਚੁੱਕੇ ਹਨ।

   ਜੌਹਨ ਹੌਪਕਿਨਸ ਯੂਨੀਵਰਸਿਟੀ ਦੇ ਕੋਰੋਨਾਵਾਇਰਸ ਡੈਸ਼ਬੋਰਡ ਮੁਤਾਬਕ ਭਾਰਕ ਮਹਾਮਾਰੀ ਤੋਂ ਪ੍ਰਭਵਿਤ ਦੇਸ਼ਾਂ ਵਿੱਚ ਅਮਰੀਕਾ ਅਤੇ ਬ੍ਰਜ਼ੀਲ ਤੋਂ ਬਾਅਦ ਤੀਜੇ ਨੰਬਰ ’ਤੇ ਬਣਿਆ ਹੋਇਆ ਹੈ।

2. 12 ਜੁਲਾਈ 2020‘ਯਮਰਾਜ ਤੇ ਚਿਤਰਗੁਪਤ’ ਨੇ ਕੀਤਾ ਲੋਕਾਂ ਨੂੰ ਮਹਾਮਾਰੀ ਬਾਰੇ ਸੁਚੇਤ

   ਛੱਤੀਸਗੜ੍ਹ ਵਿੱਚ ਕੁਝ ਕਲਾਕਾਰਾਂ ਨੇ ‘ਯਮਰਾਜ’ ਅਤੇ ‘ਚਿਤਰਗੁਪਤ’ ਦਾ ਭੇਸ ਧਾਰਿਆ ਅਤੇ ਲੋਕਾਂ ਵਿੱਚ ਕੋਰੋਨਾਵਇਰਸ ਮਹਾਮਾਰੀ ਬਾਰੇ ਜਾਗਰੂਕਤਾ ਫੈਲਾਈ।

   ਕਲਾਕਾਰਾਂ ਨੇ ਲੋਕਾਂ ਨੂੰ ਮਾਸਕ ਪਾਉਣ ਅਤੇ ਸੋਸ਼ਲ ਡਿਸਟੈਂਸਿੰਗ ਦੀ ਪਾਲਣਾ ਕਰਨ ਬਾਰੇ ਜਾਗਰੂਕ ਕੀਤਾ।

   ਇਹ ਪਹਿਲ ਰਾਇਪੁਰ ਸਮਾਰਟ ਸਿਟੀ ਲਿਮਟਿਡ, ਟਰੈਫਿਕ ਪੁਲਿਸ ਅਤੇ ਮਿਊਨਿਸੀਪਲ ਕਾਰਪੋਰੇਸ਼ਨ ਵੱਲੋਂ ਕੀਤੀ ਗਈ।

   ਸੂਬੇ ਦੇ ਸਿਹਤ ਮਹਿਕਮੇ ਮੁਤਾਬਕ ਇੱਥੇ ਸ਼ਨਿੱਚਰਵਾਰ ਨੂੰ ਕੋਵਿਡ-19 ਦੇ 65 ਨਵੇਂ ਮਰੀਜ਼ ਸਾਹਮਣੇ ਆਏ। ਜਿਸ ਤੋਂ ਬਾਅਦ ਇੱਥੇ ਹੁਣ ਤੱਕ ਸਾਹਮਣੇ ਆਏ ਕੇਸਾਂ ਦੀ ਗਿਣਤੀ 3897 ਹੋ ਗਈ ਹੈ ਅਤੇ 17 ਮੌਤਾਂ ਹੋ ਚੁੱਕੀਆਂ ਹਨ। ਜਦਕਿ 810 ਸਰਗਰਮ ਕੇਸ ਹਨ।

3. 12 ਜੁਲਾਈ 2020ਜਦੋਂ ਇੱਕ ਕੋਵਿਡ ਮਰੀਜ਼ ਦੀ ਲਾਸ਼ ਦਫ਼ਨਾਉਣ ਲਈ ਆਟੋ ਵਿੱਚ ਲਿਜਾਈ ਗਈ

   ਤੇਲੰਗਾਨਾ ਦੇ ਨਿਜ਼ਾਮਾਬਾਦ ਸਰਕਾਰੀ ਹਸਪਤਾਲ ਵਿੱਚ ਇੱਕ ਕੋਰੋਨਾ ਮਰੀਜ਼ ਦੀ ਮੌਤ ਮਗਰੋਂ ਲਾਸ਼ ਨੂੰ ਦਫ਼ਨਾਉਣ ਲਈ ਆਟੋ ਰਿਕਸ਼ਾ ਵਿੱਚ ਕਬਰਿਸਤਾਨ ਲਿਜਾਇਆ ਗਿਆ।

   ਹਸਪਤਾਲ ਦੇ ਸੁਪਰੀਟੈਂਡੇਂਟ ਨੇ ਖ਼ਬਰ ਏਜੰਸੀ ਏਐੱਨਆਈ ਨੂੰ ਦੱਸਿਆ ਕਿ ਮਰਹੂਮ ਦਾ ਰਿਸ਼ਤੇਦਾਰ ਜੋ ਕਿ ਹਸਪਤਾਲ ਵਿੱਚ ਹੀ ਨੌਕਰੀ ਕਰਦੇ ਹੈ। ਉਸ ਨੇ ਲਾਸ਼ ਮੰਗੀ ਅਤੇ ਉਸ ਨੇ ਐਂਬੂਲੈਂਸ ਦੀ ਵੀ ਉਡੀਕ ਨਹੀਂ ਕੀਤੀ।

   ਫਿਰ ਉਹ ਰਿਸ਼ਤੇਦਾਰ ਹਸਪਤਾਲ ਦੇ ਹੀ ਇੱਕ ਹੋਰ ਕਮਰਚਾਰੀ ਦੀ ਮਦਦ ਨਾਲ ਲਾਸ਼ ਨੂੰ ਕਬਰਿਸਤਾਨ ਲੈ ਗਿਆ।

4. 12 ਜੁਲਾਈ 2020ਲਗਾਤਾਰ ਵਧੀਆਂ ਮੌਤਾਂ ਦੇ ਬਾਵਜੂਦ ਖੁੱਲ੍ਹਿਆ ਵਾਲਟ ਡਿਜ਼ਨੀ

   ਅਮਰੀਕਾ ਦਾ ਵਾਲਟ ਡਿਜ਼ਨੀ ਥੀਮ ਪਾਰਕ ਸੈਲਾਨੀਆਂ ਲਈ ਧਰਤੀ ਉੱਪਰਸਭ ਤੋਂ ਵੱਧ ਖਿੱਚ ਵਾਲੀ ਥਾਂ ਮੰਨੀ ਜਾਂਦੀ ਹੈ ਪਰ ਸ਼ਨਿੱਚਰਵਾਰ ਨੂੰ ਜਦੋਂ ਮੁੜ ਖੁੱਲਿਆਂ ਤਾਂ ਮਾਹੌਲ ਵਿੱਚ ਅਜੀਬ ਜਿਹਾ ਸੀ।

   ਲੋਕਾਂ ਨੇ ਕੋਰੋਨਾਵਾਇਰਸ ਤੋਂ ਬਚਾਅ ਲਈ ਮਾਸਕ ਪਾ ਰੱਖੇ ਸਨ, ਸੋਸ਼ਲ ਡਿਸਟੈਂਂਸਿੰਗ ਦੀ ਪਾਲਣਾ ਕਰ ਰਹੇ ਸਨ ਅਤੇ ਹੱਥਾਂ ਨੂੰ ਸੈਨੇਟਾਈਜ਼ਰ ਨਾਲ ਸਾਫ਼ ਕਰ ਰਹੇ ਸਨ।

   ਪਾਰਕ ਦੇ ਕੁਝ ਹਿੱਸੇ ਚਾਰ ਮਹੀਨੇ ਬੰਦ ਰਹਿਣ ਮਗਰੋਂ ਖੋਲ੍ਹੇ ਗਏ ਹਨ।

   ਅਮਰੀਕਾ ਦਾ ਫਲੋਰਿਡਾ ਸੂਬਾ ਜਿੱਥੋਂ ਦੇ ਓਰਲੈਂਡੋ ਸ਼ਹਿਰ ਵਿੱਚ ਇਹ ਥੀਮ ਪਾਰਕ ਸਥਿਤ ਹੈ। ਅਮਰੀਕਾ ਵਿੱਚ ਕੋਰੋਨਾਵਾਇਰਸ ਮਹਾਮਾਰੀ ਤੋਂ ਸਭ ਤੋਂ ਵਧੇਰੇ ਪ੍ਰਭਾਵਿਤ ਸੂਬਿਆਂ ਵਿੱਚੋਂ ਇੱਕ ਹੈ।

   ਹਾਲਾਂਕਿ ਪਾਰਕ ਦਾਖ਼ਲੇ ਵਾਲੇ ਪਾਸੇ ਇੱਕ ਦਸਤਬਰਦਾਰੀ ਵੀ ਲਾਈ ਗਈ ਸੀ,“ਵਾਲਟ ਡਿਜ਼ਨਾ ਵਰਲਡ ਰਿਜ਼ੌਰਟ ਆ ਕੇ ਤੁਸੀਂ ਆਪਣੀ ਮਰਜ਼ੀ ਨਾਲ ਕੋਵਿਡ-19 ਦੇ ਸਨਮੁੱਖ ਆਉਣ ਦੇ ਖ਼ਤਰੇ ਨੂੰ ਸਵੀਕਾਰ ਕਰਦੇ ਹੋ।”

5. 12 ਜੁਲਾਈ 2020UAE ਦਾ ਰੈਂਜ਼ੀਡੈਂਟ ਵੀਜ਼ਾ ਤੇ ਐਂਟਰੀ ਪਰਮਿਟ ਲਈ ਅਹਿਮ ਐਲਾਨ

   ਸੰਯੁਕਤ ਅਰਬ ਅਮੀਰਾਤ (UAE) 12 ਜੁਲਾਈ ਤੋਂ ਮਿਆਦ ਖ਼ਤਮ ਹੋ ਚੁੱਕੇ ਰੈਜ਼ੀਡੈਂਟ ਵੀਜ਼ਾ ਅਤੇ ਆਈਡੀ ਕਾਰਡ ਨੂੰ ਰੀਨੀਊ ਕਰਵਾਉਣ ਲਈ ਅਰਜ਼ੀਆਂ ਸਵੀਕਾਰ ਕਰੇਗਾ।

   ਕੈਬਿਨੇਟ ਨੇ ਮਿਆਦ ਖ਼ਤਮ ਹੋ ਚੁੱਕੇ ਵੀਜ਼ਾ ਦੀ ਵੈਧਤਾ ਵਧਾਉਣ, ਅਮੀਰਾਤ ਆਈਡੀ ਕਾਰਡ ਅਤੇ ਐਂਟਰੀ ਪਰਮਿਟ ਨੂੰ ਲੈ ਕੇ ਅਹਿਮ ਫ਼ੈਸਲਾ ਕੀਤਾ ਹੈ।

   ਯੂਏਈ ਨੇ ਕੋਰੋਨਾਵਾਇਰਸ ਨੂੰ ਫ਼ੈਲਣ ਤੋਂ ਰੋਕਣ ਲਈ ਲਗਾਈਆਂ ਗਈਆਂ ਪਾਬੰਦੀਆਂ ਵਿੱਚ ਢਿੱਲ ਦੇਣ ਤੋਂ ਬਾਅਦ ਇਹ ਅਹਿਮ ਫ਼ੈਸਲਾ ਲਿਆ ਹੈ।

   ਸ਼ੁੱਕਰਵਾਰ ਨੂੰ ਫ਼ੈਡਰਲ ਅਥਾਰਿਟੀ ਫਾਰ ਆਇਡੈਂਟਿਟੀ ਐਂਡ ਸਿਟੀਜ਼ਨਸ਼ਿਪ (ICA) ਨੇ ਕਿਹਾ ਕਿ ਇਹ ਫ਼ੈਸਲਾ ਦੱਸਦਾ ਹੈ ਕਿ ਅਸੀਂ ਆਮ ਦਿਨਾਂ ਵੱਲ ਪਰਤ ਰਹੇ ਹਾਂ।

   ਆਈਸਈਏ ਨੇ ਕਿਹਾ, ‘’ਕਈ ਸੈਕਟਰਾਂ ’ਚ ਕਾਰੋਬਾਰ ਅਤੇ ਕੰਮ ਨੂੰ ਆਮ ਦਿਨਾਂ ਦੀ ਤਰ੍ਹਾਂ ਪੱਟੜੀ ਉੱਤੇ ਲਿਆਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।’’

   ਕੋਰੋਨਾਵਾਇਰਸ ਮਹਾਂਮਾਰੀ ਦੇ ਸ਼ੁਰੂਆਤੀ ਮਹੀਨਿਆਂ ਵਿੱਚ ਲੌਕਡਾਊਨ ਅਤੇ ਟ੍ਰੈਵਲ ਬੈਨ ਦੇ ਕਾਰਨ ਯੂਏਈ ਨੇ ਰੈਜ਼ੀਡੈਂਟ ਵੀਜ਼ਾ, ਐਂਟਰੀ ਅਤੇ ਰੈਜ਼ੀਡੈਂਸੀ ਪਰਮਿਟ ਦੀ ਵੈਧਤਾ ਦੀ ਮਿਆਦ ਵਧਾ ਦਿੱਤੀ ਸੀ।

   ਆਈਸੀਏ ਨੇ ਸ਼ਨੀਵਾਰ ਨੂੰ ਕਿਹਾ ਕਿ ਵੀਜ਼ਾ, ਐਂਟਰੀ ਪਰਮਿਟ ਅਤੇ ਆਈਡੀ ਕਾਰਡ ਦੀ ਸੇਵਾ ਮੁੜ ਤੋਂ ਸ਼ੁਰੂ ਹੋਣ ਜਾ ਰਹੀ ਹੈ। 12 ਜੁਲਾਈ ਤੋਂ ਲੋਕ ਇਸਦੀ ਫੀਸ ਜਮਾਂ ਕਰਵਾ ਕੇ ਆਵੇਦਨ ਸ਼ੁਰੂ ਕਰ ਸਕਦੇ ਹਨ।

   ਆਈਸੀਏ ਨੇ ਸ਼ਨੀਵਾਰ ਨੂੰ ਕਿਹਾ, ’’ਸਾਰੇ ਪਰਵਾਸੀ ਨਿਵਾਸੀਆਂ, ਯੂਏਈ ਨਾਗਰਿਕਾਂ ਅਤੇ ਜੀਸੀਸੀ ਦੇਸ਼ਾਂ ਦੇ ਲੋਕਾਂ ਨੂੰ ਬੇਨਤੀ ਹੈ ਕਿ ਉਹ ਆਪਣੇ ਅਵੈਧ ਹੋ ਚੁੱਕੇ ਦਸਤਾਵੇਜ਼ਾਂ ਨੂੰ ਵੈਧ ਕਰਵਾ ਲੈਣ।’’

   ਖ਼ਾਸ ਗੱਲਾਂ

   • ਜਿਨ੍ਹਾਂ ਦਾ ਰੈਜ਼ੀਡੈਂਟ ਵੀਜ਼ਾ ਅਤੇ ਅਮੀਰਾਤ ਆਈਡੀ ਕਾਰਡ ਇਸ ਸਾਲ ਮਾਰਚ ਅਤੇ ਅਪ੍ਰੈਲ ਮਹੀਨੇ ’ਚ ਅਵੈਧ ਹੋ ਗਿਆ ਸੀ, ਉਹ ਇਸ ਨੂੰ ਰੀਨੀਊ ਕਰਵਾਉਣ ਲਈ 12 ਜੁਲਾਈ ਤੋਂ ਅਰਜ਼ੀ ਪਾ ਸਕਦੇ ਹਨ।
   • ਜਿਨ੍ਹਾਂ ਦਾ ਰੈਜ਼ੀਡੈਂਟ ਵੀਜ਼ਾ ਅਤੇ ਅਮੀਰਾਤ ਆਈਡੀ ਕਾਰਡ ਇਸ ਸਾਲ ਮਈ ਮਹੀਨੇ ’ਚ ਅਵੈਧ ਹੋ ਗਿਆ ਸੀ, ਉਹ ਇਸ ਨੂੰ ਰੀਨੀਊ ਕਰਵਾਉਣ ਲਈ 11 ਅਗਸਤ ਤੋਂ ਅਰਜ਼ੀ ਪਾ ਸਕਦੇ ਹਨ।
   • ਜਿਨ੍ਹਾਂ ਦਾ ਰੈਜ਼ੀਡੈਂਟ ਵੀਜ਼ਾ ਅਤੇ ਅਮੀਰਾਤ ਆਈਡੀ ਕਾਰਡ 1 ਤੋਂ 11 ਜੁਲਾਈ ਦੌਰਾਨ ਅਵੈਧ ਅਵੈਧ ਹੋਇਆ ਹੈ, ਉਹ ਇਸ ਨੂੰ ਰੀਨੀਊ ਕਰਵਾਉਣ ਲਈ 10 ਸਤੰਬਰ ਤੋਂ ਅਰਜ਼ੀ ਪਾ ਸਕਦੇ ਹਨ।

   ICA ਨੇ ਬਕਾਇਦਾ ਇਹ ਜਾਣਕਾਰੀ ਆਪਣੇ ਟਵਿੱਟਰ ਹੈਂਡਲ 'ਤੇ ਸਾਂਝੀ ਕੀਤੀ ਹੈ

6. 12 ਜੁਲਾਈ 2020ਕਲਾਕਾਰ ਗੁਰਨਾਮ ਭੁੱਲਰ 'ਤੇ ਮਾਮਲਾ ਦਰਜ

   ਪਟਿਆਲਾ ਪੁਲਿਸ ਨੇ ਪੰਜਾਬੀ ਗਾਇਕ ਤੇ ਅਦਾਕਾਰ ਗੁਰਨਾਮ ਭੁੱਲਰ ਸਣੇ 40 ਲੋਕਾਂ 'ਤੇ ਕੱਥਿਤ ਤੌਰ 'ਤੇ ਸਰਕਾਰੀ ਨਿਯਮਾਂ ਦੀ ਉਲੰਘਣਾ ਕਰਨ ਦੇ ਚਲਦਿਆਂ ਮਾਮਲਾ ਦਰਜ ਕੀਤਾ ਹੈ।

   ਕੋਰੋਨਾਵਾਇਰਸ ਮਹਾਂਮਾਰੀ ਦੇ ਚਲਦਿਆਂ ਹਰ ਤਰ੍ਹਾਂ ਦੇ ਸ਼ੂਟ 'ਤੇ ਸਰਕਾਰ ਵਲੋਂ ਪਾਬੰਦੀ ਲੱਗੀ ਹੋਈ ਹੈ।

   ਐੱਸਐੱਸਪੀ ਮਨਦੀਪ ਸਿੰਘ ਸਿੱਧੂ ਨੇ ਦੱਸਿਆ ਕਿ ਰਾਜਪੁਰਾ ਦੇ ਇੱਕ ਸਿਨੇਮਾ ਹਾਲ ਵਿੱਚ ਸ਼ੂਟਿੰਗ ਚੱਲ ਰਹੀ ਸੀ।

   ਪੂਰੀ ਖ਼ਬਰ ਇੱਥੇ ਪੜ੍ਹੋ

7. 12 ਜੁਲਾਈ 2020ਅਮਿਤਾਭ ਬੱਚਨ ਅਤੇ ਅਭਿਸ਼ੇਕ ਬੱਚਨ ਨੂੰ ਕੋਰੋਨਾ, ਹਸਪਤਾਲ 'ਚ ਭਰਤੀ ਹੋਣ ਮਗਰੋਂ ਕੀ ਬੋਲੇ ਬੱਚਨ

   ਮਸ਼ਹੂਰ ਬਾਲੀਵੁੱਡ ਅਦਾਕਾਰ ਅਮਿਤਾਭ ਬੱਚਨ ਅਤੇ ਉਨ੍ਹਾਂ ਦੇ ਅਦਾਕਾਰ ਪੁੱਤਰ ਅਭਿਸ਼ੇਕ ਬੱਚਨ ਨੂੰ ਕੋਰੋਨਾਵਾਇਰਸ ਹੋਣ ਦੇ ਪੁਸ਼ਟੀ ਸ਼ਨੀਵਾਰ ਰਾਤ ਨੂੰ ਹੋਈ ਹੈ।

   ਕੋਰੋਨਾਵਾਇਰਸ ਪੌਜ਼ਿਟਿਵ ਹੋਣ ਤੋਂ ਬਾਅਦ ਅਮਿਤਾਭ ਬੱਚਨ ਨੂੰ ਦੇਰ ਰਾਤ ਮੁੰਬਈ ਦੇ ਨਾਨਾਵਤੀ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਉੱਧਰ ਅਭਿਸ਼ੇਕ ਵੀ ਹਸਪਤਾਲ 'ਚ ਭਰਤੀ ਹੋ ਗਏ ਹਨ।

   ਕੋਰੋਨਾਵਾਇਰਸ ਦੀ ਪੁਸ਼ਟੀ ਹੋਣ ਤੋਂ ਬਾਅਦ ਅਮਿਤਾਭ ਨੇ ਇਹ ਗੱਲ ਖ਼ੁਦ ਸਾਂਝੀ ਕੀਤਾ, ਉਨ੍ਹਾਂ ਨੇ ਕੀ ਲਿਖਿਆ...ਇੱਥੇ ਪੜ੍ਹੋ

8. 12 ਜੁਲਾਈ 2020ਕੋਰੇਨਾ ਮਹਾਂਮਾਰੀ ਤੋਂ ਬਾਅਦ ਪਹਿਲੀ ਵਾਰ ਮਾਸਕ ਪਾਉਣ ਮਗਰੋਂ ਕੀ ਬੋਲੇ ਟਰੰਪ

   ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਨੂੰ ਪਹਿਲੀ ਵਾਰ ਕੋਰੋਨਾਵਾਇਰਸ ਮਹਾਂਮਾਰੀ ਮਗਰੋਂ ਮਾਸਕ ਪਾਏ ਦੇਖਿਆ ਗਿਆ। ਟਰੰਪ ਵਾਸ਼ਿੰਗਟਨ ਦੇ ਨੇੜੇ ਮੌਜੂਦ ਰੀਡ ਨੈਸ਼ਨਲ ਮਿਲੀਟਰੀ ਮੈਡੀਕਲ ਸੈਂਟਰ ਗਏ ਸਨ ਜਿੱਥੇ ਉਨ੍ਹਾਂ ਨੇ ਜ਼ਖਮੀ ਸੈਨਿਕਾਂ ਅਤੇ ਸਿਹਤਕਾਮਿਆਂ ਨਾਲ ਮੁਲਾਕਾਤ ਕੀਤੀ।

   ਇਸ ਤੋਂ ਪਹਿਲਾਂ ਟਰੰਪ ਜਨਤਕ ਤੌਰ ਤੇ ਮਾਸਕ ਪਾਉਣ ਤੋਂ ਇਨਕਾਰ ਕਰਦੇ ਆ ਰਹੇ ਹਨ।

   ਸ਼ਨਿੱਚਰਵਾਰ ਨੂੰ ਵ੍ਹਾਈਟ ਹਾਊਸ ਤੋਂ ਨਿਕਲਦੇ ਵੇਲੇ ਟਰੰਪ ਨੇ ਮਾਸਕ ਪਾਇਆ ਹੋਇਆ ਸੀ।

   ਉਨ੍ਹਾਂ ਕਿਹਾ ਕਿ ਹਸਪਤਾਲ ਵਿੱਚ ਜਿੱਥੇ ਤੁਸੀਂ ਕਈ ਲੋਕਾਂ ਤੋਂ ਮੁਲਾਕਾਤ ਕਰਦੇ ਹੋ ਉੱਥੇ ਤੁਹਾਡੇ ਤੋਂ ਉਮੀਦ ਕੀਤੀ ਜਾਂਦੀ ਹੈ ਕਿ ਤੁਸੀਂ ਮਾਸਕ ਪਾਓ।

   ਟਰੰਪ ਨੇ ਕਿਹਾ, ‘‘ਮੈਂ ਕਦੇ ਵੀ ਮਾਸਕ ਦੇ ਖਿਲਾਫ਼ ਨਹੀਂ ਸੀ। ਪਰ ਮੈਨੂੰ ਲਗਦਾ ਹੈ ਕਿ ਹਰ ਗੱਲ ਦਾ ਇੱਕ ਵਕਤ ਅਤੇ ਥਾਂ ਹੁੰਦੀ ਹੈ।’’

9. 12 ਜੁਲਾਈ 2020ਕੋਰੋਨਾਵਾਇਰਸ: ਭਾਰਤ ਸਣੇ ਦੁਨੀਆਂ ਭਰ ਵਿੱਚ ਕੀ-ਕੀ ਹੋਇਆ

   • ਵਿਸਵ ਸਿਹਤ ਸੰਗਠ ਦੇ ਐਮਰਜੈਂਸੀ ਪ੍ਰੋਗਰਾਮ ਦੇ ਮੁਖੀ ਡਾਕਟਰ ਮਾਈਕ ਰਿਆਨ ਨੇ ਕਿਹਾ ਹੈ ਕਿ ਨਵੇਂ ਕੋਰੋਨਾਵਾਇਰਸ ਦਾ ਮੁਕੰਮਲ ਖ਼ਾਤਮਾ ਕੀਤਾ ਜਾ ਸਕੇਗਾ ਅਜਿਹਾ ਲਗਦਾ ਨਹੀਂ ਹੈ।
   • ਪੂਰੀ ਦੁਨੀਆਂ ਵਿੱਚ ਕੋਰੋਨਾਵਾਇਰਸ ਦੇ ਕੇਸ ਸਵਾ ਕਰੋੜ ਤੋਂ ਪਾਰ ਹੋਏ ਅਤੇ 5.64 ਲੱਖ ਲੋਕ ਮਾਰੇ ਗਏ ਹਨ। ਇਕੱਲੇ ਅਮਰੀਕਾ ਵਿੱਚ 1.34 ਲੱਖ ਤੋਂ ਵੱਧ ਮੌਤਾਂ।
   • ਬ੍ਰਾਜ਼ੀਲ ਵਿੱਚ ਕੋਰੋਨਾ ਪ੍ਰਭਾਵਿਤਾਂ ਦੀ ਗਿਣਤੀ 18 ਲੱਖ ਟੱਪ ਗਈ ਹੈ ਅਤੇ ਮ੍ਰਿਤਕਾਂ ਦੀ ਗਿਣਤੀ 70 ਹਜ਼ਾਰ ਤੋਂ ਵੱਧ ਹੋ ਗਈ ਹੈ।
   • ਕਈ ਵਾਰ ਮਨ੍ਹਾਂ ਕਰਨ ਤੋਂ ਬਾਅਦ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਆਖਿਰਕਾਰ ਮਾਸਕ ਪਾ ਹੀ ਲਿਆ।
   • ਮਸ਼ਹੂਰ ਬਾਲੀਵੁੱਡ ਅਦਾਕਾਰ ਅਮਿਤਾਭ ਬੱਚਨ ਅਤੇ ਅਭਿਸ਼ੇਕ ਬੱਚਨ ਕੋਰੋਨਾ ਪੌਜ਼ਿਟਿਵ ਪਾਏ ਗਏ ਹਨ ਅਤੇ ਮੁੰਬਈ ਦੇ ਹਸਪਤਾਲ ਵਿੱਚ ਦਾਖਲ ਹਨ। ਐਸ਼ਵਰਿਆ ਰਾਏ ਦਾ ਵੀ ਟੈਸਟ ਹੋਵੇਗਾ। ਇਸ ਤੋਂ ਇਲਾਵਾ ਜੋ ਲੋਕ ਇਨ੍ਹਾਂ ਦੇ ਸੰਪਰਕ ਵਿੱਚ ਆਏ ਸਨ ਸਭ ਨੂੰ ਟੈਸਟ ਕਰਵਾਉਣ ਲਈ ਕਿਹਾ ਗਿਆ ਹੈ।
   • ਭਾਰਤ ਵਿੱਚ 8 ਲੱਖ 20 ਹਜ਼ਾਰ ਤੋਂ ਵੱਧ ਲੋਕਾਂ ਨੂੰ ਕੋਰੋਨਾ ਦੀ ਲਾਗ ਅਤੇ ਮ੍ਰਿਤਕਾਂ ਦੀ ਗਿਣਤੀ 22 ਹਜ਼ਾਰ ਤੋਂ ਵੱਧ ਹੋ ਗਈ ਹੈ। ਪੰਜ ਲੱਖ ਤੋਂ ਵੱਧ ਲੋਕ ਠੀਕ ਹੋ ਗਏ ਹਨ।
   • ਪੰਜਾਬ ਵਿੱਚ ਕੋਰੋਨਾ ਦੇ ਕੇਸ 7587 ਕੇਸ ਹੋ ਗਏ ਹਨ ਅਤੇ 195 ਮੌਤਾਂ ਹੋਈਆਂ ਹਨ, 5000 ਤੋਂ ਵੱਧ ਲੋਕ ਠੀਕ ਵੀ ਹੋਏ। ਕੋਰੋਨਾ ਮਹਾਂਮਾਰੀ ਕਾਰਨ ਅਮੀਰਾਤ ਏਅਰਲਾਈਨਜ਼ ਵਿੱਚ 9,000 ਲੋਕਾਂ ਦੀ ਜਾ ਸਕਦੀ ਹੈ ਨੌਕਰੀ।
   • ਭਾਰਤ ਦੀ ਡਰਗ ਕੰਟਰੋਲਰ ਸੰਸਥਾ ਸੀਡੀਐੱਸਸੀਓ ਨੇ ਚਮੜੀ ਦੀ ਬਿਮਾਰੀ ਸੋਰਾਇਸਸ ਦੇ ਇਲਾਜ ਲਈ ਵਰਤੀ ਜਾਣ ਵਾਲੀ ਦਵਾਈ ਆਇਲਾਇਜ਼ੋਮੇਵ ਨੂੰ ਗੰਭੀਰ ਕੋਰੋਨਾ ਮਰੀਜ਼ਾਂ ਲਈ ਵਰਤਣ ਦੀ ਆਗਿਆ ਦੇ ਦਿੱਤੀ ਹੈ।
   • ਦਿੱਲੀ ਦੇ ਉੱਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਜਾਣਕਾਰੀ ਦਿੱਤੀ ਹੈ ਕਿ ਸੂਬਾ ਸਰਕਾਰ ਨੇ ਆਪਣੇ ਅਧੀਨ ਆਉਂਦੀਆਂ ਸਾਰੀਆਂ ਯੂਨੀਵਰਸਿਟੀਆਂ ਦੀਆਂ ਪ੍ਰੀਖਿਆਵਾਂ ਕੋਰੋਨਾਵਾਇਰਸ ਮਹਾਂਮਾਰੀ ਦੇ ਕਾਰਨ ਰੱਦ ਕਰ ਦਿੱਤੀਆਂ ਹਨ।
   • ਭਾਰਤੀ ਰਿਜ਼ਰਵ ਬੈਂਕ ਦੇ ਗਵਰਨਰ ਸ਼ਸ਼ੀਕਾਂਤ ਦਾਸ ਨੇ ਕਿਹਾ ਹੈ ਕਿ ਕੋਰੋਨਾਵਾਇਰਸ ਲੰਘੇ 100 ਸਾਲਾਂ ਵਿੱਚ ਸਾਹਮਣੇ ਆਉਣ ਵਾਲਾ ਸਭ ਤੋਂ ਵੱਡਾ ਆਰਥਿਕ ਅਤੇ ਸਿਹਤ ਸੰਕਟ ਹੈ।

10. 12 ਜੁਲਾਈ 2020

    ਬੀਬੀਸੀ ਪੰਜਾਬੀ ਦੇ ਲਾਈਵ ਪੇਜ ਵਿੱਚ ਤੁਹਾਡਾ ਸਵਾਗਤ ਹੈ। ਕੋਰੋਨਾਵਾਇਰਸ ਨਾਲ ਸਬੰਧਿਤ ਤੁਸੀਂ ਭਾਰਤ ਸਣੇ ਦੁਨੀਆਂ ਦੀਆਂ ਮੁੱਖ ਅਪਡੇਟ ਇੱਥੇ ਪੜ੍ਹ ਸਕਦੇ ਹੋ। ਇਸ ਦੇ ਨਾਲ ਹੀ ਤੁਹਾਡੇ ਲਈ ਲੈ ਕੇ ਆਵਾਂਗੇ ਜਾਣਕਾਰੀ ਭਰਪੂਰ ਵੀਡੀਓਜ਼ ਵੀ। ਜੇਕਰ ਤੁਸੀਂ 11 ਜੁਲਾਈ ਦੀਆਂ ਅਪਡੇਟਸ ਦੇਖਣਾ ਚਾਹੁੰਦੇ ਹੋ ਤਾਂ ਇਸ ਲਿੰਕ ਉੱਤੇ ਆ ਸਕਦੇ ਹੋ। ਧੰਨਵਾਦ