You’re viewing a text-only version of this website that uses less data. View the main version of the website including all images and videos.
ਦੁਨੀਆਂ ਭਰ ਵਿੱਚ ਕੋਰੋਨਾਵਾਇਰਸ ਦੇ ਮਾਮਲੇ 71 ਲੱਖ ਤੋਂ ਪਾਰ, 4 ਲੱਖ 7 ਹਜਾਰ ਤੋਂ ਵੱਧ ਮੌਤਾਂ
ਖ਼ਬਰ ਏਜੰਸੀ ਏਐੱਨਆਈ ਮੁਤਾਬਕ ਅੱਜ ਤੋਂ ਪੰਜਾਬ ਵਿੱਚ ਕਮਿਊਨਿਟੀ ਕਿਚਨ, ਲੰਗਰ ਅਤੇ ਪ੍ਰਸ਼ਾਦ ਵੰਡਣ ਦੀ ਇਜਾਜ਼ਤ ਮਿਲ ਗਈ ਹੈ।
ਮੁਹਾਲੀ ਵਿੱਚ ਗੁਰਦੁਆਰਾ ਸਾਹਿਬ ਸਿੰਘ ਦੇ ਮੈਂਬਰ ਸਤਵਿੰਦਰ ਸਿੰਘ ਨੇ ਕਿਹਾ, "ਅਸੀਂ ਇਸ ਨਿਰਦੇਸ਼ ਲਈ ਧੰਨਵਾਦੀ ਹਾਂ। ਪ੍ਰਸ਼ਾਦ ਧਾਰਮਿਕ ਅਸਥਾਨਾ ਦਾ ਅਹਿਮ ਹਿੱਸਾ ਹੈ।"
ਵਿਸ਼ਵ ਸਿਹਤ ਸੰਗਠਨ ਦੇ ਇੱਕ ਵਿਗਿਆਨੀ ਨੇ ਸਪਸ਼ਟ ਕੀਤਾ ਹੈ ਕਿ ਬਿਨਾ ਲੱਛਣ ਵਾਲੇ ਲੋਕਾਂ ਤੋਂ ਕੋਰੋਨਾਵਾਇਰਸ ਕਿੰਨਾ ਫੈਲਦਾ ਹੈ, ਇਸ ਬਾਰੇ ਅਜੇ ਵੀ ‘ਵੱਡੀ ਅਣਜਾਣਤਾ’ ਹੈ।
ਡਾ. ਮਾਰੀਆ ਵੈਨ ਕੇਰਖੋਵ ਨੇ ਸੋਮਵਾਰ ਨੂੰ ਕਿਹਾ ਸੀ ਕਿ ਬਿਨਾ ਲੱਛਣ ਵਾਲੇ ਲੋਕਾਂ ਵਿੱਚ ਬਿਮਾਰੀ ਨੂੰ ਫੈਲਾਉਣ ਦੀ ਸੰਭਾਵਨਾ 'ਬਹੁਤ ਹੀ ਘੱਟ' ਹੈ।
ਪਰ ਉਨ੍ਹਾਂ ਨੇ ਹੁਣ ਜ਼ੋਰ ਦਿੱਤਾ ਹੈ ਕਿ ਇਹ ਨਿਰੀਖਣ ਇੱਕ ਕਾਫੀ ਛੋਟੇ ਅਧਿਐਨਾਂ 'ਤੇ ਅਧਾਰਿਤ ਸੀ।
ਸਬੂਤ ਤੋਂ ਪਤਾ ਲਗਦਾ ਹੈ ਕਿ ਲੱਛਣ ਵਾਲੇ ਲੋਕ ਸਭ ਤੋਂ ਵੱਧ ਲਾਗ ਫੈਲਾਉਣ ਵਾਲੇ ਹੁੰਦੇ ਹਨ ਪਰ ਬਿਮਾਰੀ ਵਧਣ ਤੋਂ ਕਾਫੀ ਪਹਿਲਾਂ ਹੀ ਇਸ ਦੀ ਲਾਗ ਫੈਲ ਸਕਦੀ ਹੈ।
ਹਾਲਾਂਕਿ ਲੋਕਾਂ ਦਾ ਇੱਕ ਅਨੁਪਾਤ ਬਿਨਾਂ ਲੱਛਣਾਂ ਦੇ ਪੌਜ਼ਿਟਿਵ ਪਾਇਆ ਗਿਆ ਹੈ ਪਰ ਇਹ ਪਤਾ ਨਹੀਂ ਹੈ ਕਿ ਇਹਨਾਂ ਵਿੱਚੋਂ ਕਿੰਨੇ ਲੋਕ ਦੂਜਿਆਂ ਨੂੰ ਲਾਗ ਦਿੰਦੇ ਹਨ।
ਵੱਖ-ਵੱਖ ਦੇਸਾਂ ਦੇ ਲਾਗ ਦੇ ਸਮੂਹਾਂ ਦੀ ਜਾਂਚ ਨੂੰ ਦੇਖਦੇ ਹੋਏ, ਉਨ੍ਹਾਂ ਨੇ ਕਿਹਾ ਕਿ ਜਿੱਥੇ ਕਿਸੇ ਬਿਨਾ ਲੱਛਣ ਵਾਲੇ ਕੇਸ ਦੀ ਜਾਂਚ ਕੀਤੀ ਗਈ ਸੀ, ਉਨ੍ਹਾਂ ਦੇ ਸੰਪਰਕਾਂ ਵਿੱਚ ਕਿਸੇ ਹੋਰ ਨੂੰ ਲਾਗ ਲੱਗਣ ਦੇ ਮਾਮਲੇ “ਬਹੁਤ ਹੀ ਘੱਟ” ਸੀ।
ਪਰ ਉਨ੍ਹਾਂ ਕਿਹਾ ਕਿ ਅਜੇ ਵੀ ਇੱਕ "ਵੱਡਾ ਖੁੱਲ੍ਹਾ ਸਵਾਲ" ਹੈ ਕਿ ਕੀ ਇਹ ਵਿਸ਼ਵਵਿਆਪੀ ਤੌਰ ’ਤੇ ਅਜਿਹਾ ਹੈ।
ਆਈਫ਼ਲ ਟਾਵਰ ਯੂਰਪ ਦੇ ਸਭ ਤੋਂ ਮਸ਼ਹੂਰ ਅਸਥਾਨਾਂ ਵਿੱਚੋਂ ਇੱਕ ਹੈ। ਮਹਾਂਦੀਪ ਦੇ ਬਹੁਤ ਸਾਰੇ ਹਿੱਸਿਆਂ ਵਾਂਗ ਇਹ ਵੀ ਮਹੀਨਿਆਂ ਤੋਂ ਬੰਦ ਹੈ।
ਪਰ 25 ਜੂਨ ਨੂੰ ਆਈਫਲ ਟਾਵਰ ਇੱਕ ਵਾਰ ਫਿਰ ਸੈਲਾਨੀਆਂ ਲਈ ਖੋਲ੍ਹ ਦਿੱਤਾ ਜਾਵੇਗਾ।13 ਮਾਰਚ ਨੂੰ ਇਸ ਨੂੰ ਬੰਦ ਕਰ ਦਿੱਤਾ ਗਿਆ ਸੀ। ਤਿੰਨ ਮਹੀਨਿਆਂ ਤੋਂ ਵੱਧ ਸਮੇਂ ਬਾਅਦ ਇਹ ਮੁੜ ਖੁੱਲ੍ਹੇਗਾ।
ਦੂਜੇ ਵਿਸ਼ਵ ਜੰਗ ਤੋਂ ਬਾਅਦ ਇਹ ਸਭ ਤੋਂ ਵੱਧ ਸਮੇਂ ਲਈ ਬੰਦ ਰਿਹਾ ਹੈ।
ਪਰ ਤੁਹਾਨੂੰ ਚਿਹਰੇ 'ਤੇ ਮਾਸਕ ਪਹਿਨਣਾ ਪਏਗਾਅ ਤੇ ਸਿਰਫ ਪਹਿਲੇ ਪੱਧਰ ਤੱਕ ਹੀ ਜਾਣ ਦੀ ਇਜਾਜ਼ਤ ਹੋਵੋਗੀ।
ਉੱਚੇ ਅਤੇ ਛੋਟੇ ਲੈਵਲ ਬੰਦ ਰਹਿਣਗੇ।
ਕੋਰੋਨਾਵਾਇਰਸ ਕਾਰਨ ਲੱਗੇ ਲੌਕਡਾਊਨ 'ਚ ਵਿਆਹਾਂ ਤੇ ਹੋਰ ਵੱਡੇ ਇਕੱਠਾਂ 'ਤੇ ਮਨਾਹੀ ਹੈ ਜਿਸ ਕਾਰਨ ਆਰਕੈਸਟਰਾਂ ਨਾਲ ਜੁੜੇ ਲੋਕਾਂ ਦਾ ਰੁਜ਼ਗਾਰ ਖੁਸ ਗਿਆ।
ਇਸ ਕੰਮ ਨਾਲ ਜੁੜੇ ਲੋਕਾਂ ਨੇ ਆਪਣੀ ਹੱਡਬੀਤੀ ਸੁਣਾਈ।
ਖ਼ਬਰ ਏਜੰਸੀ ਏਐੱਨਆਈ ਮੁਤਾਬਕ ਰਾਜਸਥਾਨ ਨੇ ਇੱਕ ਹਫ਼ਤੇ ਲਈ ਬਾਰਡਰ ਸੀਲ ਕਰਨ ਦਾ ਫੈਸਲਾ ਕੀਤਾ ਹੈ।
ਜਿਨ੍ਹਾਂ ਕੋਲ ਪਾਸ ਹਨ ਉਨ੍ਹਾਂ ਨੂੰ ਹੀ ਜਾਣ ਦੀ ਇਜਾਜ਼ਤ ਹੋਵੇਗੀ।
ਹਵਾਬਾਜ਼ੀ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਟਵੀਟ ਕਰਕੇ ਦੱਸਿਆ ਕਿ ਵਿਦੇਸ਼ਾਂ ਵਿੱਚ ਫਸੇ ਭਾਰਤੀਆਂ ਨੂੰ ਵਾਪਸ ਲਿਆਉਣ ਦਾ ਕੰਮ ਜਾਰੀ ਹੈ।
9 ਜੂਨ ਨੂੰ ਨੇਵਾਰਕ, ਇਸਤਾਨਬੁਲ, ਨਿਊਯੌਰਕ, ਸਟੌਕਹੌਮ, ਆਬੂ ਧਾਬੀ, ਸਿੰਗਾਪੁਰ, ਦੋਹਾ, ਮਸਕਟ, ਦੁਬਈ ਅਤੇ ਕੌਲਾਲੰਪੁਰ ਤੋਂ 2441 ਭਾਰਤੀ ਵਾਪਸ ਲਿਆਂਦੇ ਗਏ।
ਪੰਜਾਬ ਸਰਕਾਰ ਟੈਸਟ ਦੀ ਗਿਣਤੀ ਵਧਾਉਣ ਲਈ 10 ਹੋਰ ਟਰੂਨੈਟ ਮਸ਼ੀਨਾਂ ਲਾਉਣ ਜਾ ਰਹੀ ਹੈ।
5 ਟਰੂਨੈਟ ਮਸ਼ੀਨਾਂ ਪਹਿਲਾਂ ਹੀ ਲੁਧਿਆਣਾ, ਜਲੰਧਰ, ਮਾਨਸਾ, ਬਰਨਾਲਾ ਅਤੇ ਪਠਾਨਕੋਟ ਵਿੱਚ ਲਾਈਆਂ ਗਈਆਂ ਹਨ।
10 ਹੋਰ ਮਸ਼ੀਨਾਂ ਬਠਿੰਡਾ, ਫਾਜ਼ਿਲਕਾ, ਗੁਰਦਾਸਪੁਰ, ਹੁਸ਼ਿਆਰਪੁਰ, ਕਪੂਰਥਲਾ, ਮੋਗਾ, ਮੁਕਤਸਰ ਸਾਹਿਬ, ਐੱਸਬੀਐੱਸ ਨਗਰ, ਰੋਪੜ ਅਤੇ ਸੰਗਰੂਰ ਵਿੱਚ ਲਾਈਆਂ ਜਾ ਰਹੀਆਂ ਹਨ।
ਸੈਂਪਲਿੰਗ ਦੀ ਪ੍ਰਕਿਰਿਆ ਨੂੰ ਵਧਾਉਣ ਲਈ ਆਯੁਸ਼ ਮੈਡੀਕਲ ਅਫ਼ਸਰਾਂ ਅਤੇ ਆਰਐੱਮਓ ਨੂੰ ਟਰੇਨਿੰਗ ਦਿੱਤੀ ਜਾ ਰਹੀ ਹੈ।
ਦਿੱਲੀ ਦੇ ਸਿਹਤ ਮੰਤਰੀ ਸਤੇਂਦਰ ਜੈਨ ਨੇ ਦਾਅਵਾ ਕੀਤਾ ਹੈ ਕਿ ਕਮਿਊਨੀ ਟਰਾਂਸਮਿਸ਼ਨ ਹੈ।
ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਉਨ੍ਹਾਂ ਕਿਹਾ, "ਕਮਿਊਨਿਟੀ ਵਿੱਚ ਟਰਾਂਸਮਿਸ਼ਨ ਹੈ, ਇਹ ਟੈਕਨੀਕਲ ਟਰਮ ਹੈ, ਹੁਣ ਕਮਿਊਨਿਟੀ ਟਰਾਂਸਮਿਸ਼ਨ ਹੈ ਜਾਂ ਨਹੀਂ ਇਹ ਫੈਸਲਾ ਕੇਂਦਰ ਸਰਕਾਰ ਹੀ ਕਰੇਗੀ।"
ਭਾਰਤ ਸਰਕਾਰ ਵੱਲੋਂ ਖੇਤੀ ਨਾਲ ਜੁੜੇ ਕੁਝ ਨਵੇਂ ਆਰਡੀਨੈਂਸ ਲਿਆਂਦੇ ਗਏ ਹਨ ਅਤੇ ਇਸ ਪਿੱਛੇ ਸਰਕਾਰ ਦਾ ਤਰਕ ਹੈ ਕਿ ਇਹ ਖੇਤੀ ਦੇ ਸੁਧਾਰਾਂ ਲਈ ਹੈ।
ਪਰ ਪੰਜਾਬ ਦੇ ਕਿਸਾਨ ਇਨ੍ਹਾਂ ਦੇ ਵਿਰੋਧ ਵਿੱਚ ਹਨ।
ਗੱਬਰ ਸੰਗਰੂਰ ਤੇ ਗੁਰਜਿੰਦਰ ਇੱਕ-ਦੂਜੇ ਲਈ ਅਜਨਬੀ ਸਨ ਪਰ ਮਜ਼ਦੂਰਾਂ ਨੂੰ ਘਰ ਪਹੁੰਚਾਉਣ ਦੇ ਮਕਸਦ ਨੇ ਇਨ੍ਹਾਂ ਨੂੰ ਜੋੜ ਦਿੱਤਾ।
ਇਨ੍ਹਾਂ ਦਾ ਦਾਅਵਾ ਹੈ ਕਿ ਉਹ ਹੁਣ ਤੱਕ ਦਸ ਤੋਂ ਵੱਧ ਬੱਸਾਂ ਮਜ਼ਦੂਰਾਂ ਦੀ ਭੇਜ ਚੁੱਕੇ ਹਨ।
ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਅੱਗੇ ਕਿਹਾ-
ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ-
ਬ੍ਰਾਜ਼ੀਲ ਨੇ ਕੋਰੋਨਾਵਾਇਰਸ ਦੇ ਪੌਜ਼ਿਟਿਵ ਮਾਮਲਿਆਂ ਅਤੇ ਕੋਵਿਡ-19 ਨਾਲ ਮਰਨ ਵਾਲਿਆਂ ਦੇ ਅੰਕੜੇ ਦੁਬਾਰੇ ਸ਼ਾਮਲ ਕਰ ਲਏ ਹਨ।
ਮੰਗਲਵਾਰ ਨੂੰ ਸੁਪਰੀਮ ਕੋਰਟ ਨੇ ਸਰਕਾਰ ਨੂੰ ਅੰਕੜਿਆਂ ਦੇ ਮਾਮਲੇ ਵਿੱਚ ਨਿਰਦੇਸ਼ ਦਿੱਤਾ ਸੀ।
ਕਰੀਬ 2 ਦਿਨ ਪਹਿਲਾਂ ਬ੍ਰਾਜ਼ੀਲ ਦੇ ਸਿਹਤ ਮੰਤਰਾਲੇ ਦੀ ਅਧਿਕਾਰਤ ਵੈਬਸਾਈਟ ਤੋਂ ਕੋਰੋਨਾ ਦੇ ਮਰੀਜ਼ਾਂ ਦੀ ਗਿਣਤੀ ਨਾਲ ਜੁੜੇ ਸਬੰਧਤ ਕਈ ਪੰਨਿਆਂ ਨੂੰ ਹਟਾ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਅਦ ਹੀ ਬ੍ਰਾਜ਼ੀਲ ਦੀ ਆਲੋਚਨਾ ਹੋ ਰਹੀ ਸੀ।
ਪਰ ਮੰਗਲਵਾਰ ਨੂੰ ਦੇਸ ਦੀ ਸਰਬਉੱਚ ਅਦਾਲਤ ਨੇ ਮੰਤਰਾਲੇ ਨੂੰ ਫਿਰ ਤੋਂ ਅੰਕੜਿਆਂ ਨੂੰ ਜੋੜਨ ਦਾ ਨਿਰਦੇਸ਼ ਦਿੱਤਾ।
ਸੁਪਰੀਮ ਕੋਰਟ ਦੇ ਜੱਜ ਨੇ ਇਹ ਹੁਕਮ ਦਿੰਦਿਆਂ ਕਿਹਾ ਕਿ ਸਰਕਾਰ ਦੇ ਇਸ ਕਦਮ ਨੇ ਕੋਰੋਨਾਵਾਇਰਸ ਦੀ ਨਿਗਰਾਨੀ ਬਿਲਕੁਲ ਅਸੰਭਵ ਕਰ ਦਿੱਤੀ ਹੈ।
ਵਿਸ਼ਵ ਸਿਹਤ ਸੰਗਠਨ ਨੇ ਸੁਰੱਖਿਅਤ ਖਾਣ-ਪੀਣ ਸਬੰਧੀ ਪੰਜ ਮਹੱਤਵਪੂਰਨ ਸੁਝਾਅ ਸਾਂਝੇ ਕੀਤੇ ਹਨ।
ਜ਼ਿਆਦਾਤਰ ਸੂਖਮ ਜੀਵ ਕੋਈ ਬਿਮਾਰੀ ਨਹੀਂ ਫੈਲਾਉਂਦੇ, ਪਰ ਇਨ੍ਹਾਂ ਵਿੱਚ ਕੁਝ ਖ਼ਤਰਨਾਕ ਜੀਵਾਣੂ ਵੀ ਹੁੰਦੇ ਹਨ ਜੋ ਮਿੱਟੀ, ਪਾਣੀ, ਜਾਨਵਰਾਂ ਅਤੇ ਮਨੁੱਖਾਂ ਵਿੱਚ ਵਿਆਪਕ ਤੌਰ 'ਤੇ ਪਾਏ ਜਾਂਦੇ ਹਨ।
ਇਹ ਸਾਡੇ ਹੱਥਾਂ, ਕੱਪੜਿਆਂ, ਭਾਂਡਿਆਂ ਤੇ ਇੱਥੋਂ ਤੱਕ ਕਿ ਸਬਜ਼ੀਆਂ ਕੱਟਣ ਲਈ ਵਰਤੇ ਜਾਣ ਵਾਲੇ ਬੋਰਡ 'ਤੇ ਵੀ ਮੌਜੂਦ ਹੁੰਦੇ ਹਨ।
ਇਨ੍ਹਾਂ ਦਾ ਖਾਣ-ਪੀਣ ਦੀਆਂ ਵਸਤੂਆਂ ਨਾਲ ਹੋਇਆ ਹਲਕਾ ਜਿਹਾ ਸੰਪਰਕ ਵੀ ਬਿਮਾਰੀ ਦਾ ਖ਼ਤਰਾ ਬਣ ਸਕਦਾ ਹੈ।
ਪੂਰੀ ਖ਼ਬਰ ਪੜ੍ਹਣ ਲਈ ਇੱਥੇ ਕਲਿੱਕ ਕਰੋ।
ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਮਿਲਖਾ ਸਿੰਘ ਦਾ ਇੱਕ ਵੀਡੀਓ ਸਾਂਝਾ ਕੀਤਾ ਹੈ ਜਿਸ ਵਿੱਚ ਉਹ ਕੋਰੋਨਾਵਾਇਰਸ ਤੋਂ ਬਚਣ ਲਈ ਹੱਥ ਧੋਣ ਅਤੇ ਸੋਸ਼ਲ ਡਿਸਟੈਂਸਿੰਗ ਦਾ ਪਾਲਣ ਕਰਨ ਦੀ ਅਪੀਲ ਕਰ ਰਹੇ ਹਨ।
ਉੱਤਰ ਪ੍ਰਦੇਸ਼ ਦੇ ਬਨਾਰਸ ਅਤੇ ਬਿਹਾਰ ਦੇ ਅਰਰੀਆ ਵਿਚਾਲੇ 500 ਕਿੱਲੋਮੀਟਰ ਤੋਂ ਵੱਧ ਦਾ ਫਾਸਲਾ ਹੈ। ਪਰ ਕਿੰਨੀਆਂ ਵੀ ਦੂਰੀਆਂ ਹੋਣ, ਹੌਸਲਾ ਅਤੇ ਮਜਬੂਰੀ ਚਾਹੇ ਤਾਂ ਸਭ ਮਿਟਾ ਸਕਦੀ ਹੈ।
11 ਸਾਲਾ ਤਬਾਰਕ ਅਤੇ ਉਸਦੇ ਮਾਤਾ-ਪਿਤਾ ਇਹ ਚੰਗੀ ਤਰ੍ਹਾਂ ਜਾਣਦੇ ਹਨ... ਕਿਉਂਕਿ ਇਹ ਪਰਿਵਾਰ ਰੇਹੜੀ 'ਤੇ ਬੈਠ ਕੇ ਇਹ ਦੂਰੀ ਤੈਅ ਕਰ ਚੁੱਕਿਆ ਹੈ।
ਮਹਾਰਾਸ਼ਟਰ ਵਿੱਚ ਕੋਰੋਨਾਵਾਇਰਸ ਦੇ ਕੁੱਲ 90,787 ਮਾਮਲੇ ਹੋ ਗਏ ਹਨ। ਮਹਾਰਸ਼ਟਰ ਵਿੱਚ ਚੀਨ ਦੇ ਵੂਹਾਨ ਨਾਲੋਂ ਵੀ ਵੱਧ ਮਾਮਲੇ ਹੋ ਗਏ ਹਨ।
ਵੂਹਾਨ ਤੋਂ ਹੀ ਕੋਰੋਨਾਵਾਇਰਸ ਦੀ ਸ਼ੁਰੂਆਤ ਹੋਈ ਸੀ।
ਜੌਹਨਸ ਹੌਪਕਿਨਜ਼ ਮੁਤਾਬਕ ਚੀਨ ਵਿੱਚ ਹੁਣ ਤੱਕ 84,198 ਕੋਰੋਨਾਵਾਇਰਸ ਦੇ ਮਾਮਲਿਆਂ ਦੀ ਪੁਸ਼ਟੀ ਹੋਈ ਹੈ।
ਸਿਹਤ ਮੰਤਰਾਲੇ ਮੁਤਾਬਕ 44,860 ਐਕਟਿਵ ਮਾਮਲੇ ਹਨ ਜਦੋਂਕਿ 42,638 ਲੋਕ ਠੀਕ ਹੋ ਗਏ ਹਨ।
ਖ਼ਬਰ ਏਜੰਸੀ ਪੀਟੀਆਈ ਮੁਤਾਬਕ ਦਿੱਲੀ ਵਿੱਚ ਮੰਗਲਵਾਰ ਨੂੰ ਕੋਰੋਨਾਵਾਇਰਸ ਦੇ 1366 ਨਵੇਂ ਕੇਸ ਸਾਹਮਣੇ ਆਏ, ਜਿਸ ਨਾਲ ਦਿੱਲੀ ਵਿੱਚ ਕੋਰੋਨਾਵਾਇਰਸ ਦੇ ਕੇਸਾਂ ਦਾ ਕੁੱਲ ਅੰਕੜਾ 31,309 ਹੋ ਗਿਆ ਹੈ ਅਤੇ ਮੌਤਾਂ ਦੀ ਗਿਣਤੀ 905 ਹੋ ਗਈ ਹੈ।
ਸਿਹਤ ਤੇ ਪਰਿਵਾਰ ਭਲਾਈ ਮੰਤਰਾਲੇ ਮੁਤਾਬਕ ਭਾਰਤ ਵਿੱਚ ਪਿਛਲੇ 24 ਘੰਟਿਆਂ ਦੌਰਾਨ ਕੋਰੋਨਾਵਾਇਰਸ ਦੇ 9,985 ਨਵੇਂ ਕੇਸ ਸਾਹਮਣੇ ਆਏ ਹਨ ਅਤੇ 279 ਮੌਤਾਂ ਹੋਈਆਂ ਹਨ।
ਇਸ ਦੇ ਨਾਲ ਹੀ ਭਾਰਤ ਵਿੱਚ ਕੁੱਲ ਕੇਸਾਂ ਦੀ ਗਿਣਤੀ 2,76,583 ਹੋ ਗਈ ਹੈ ਤੇ 7,745 ਮੌਤਾਂ ਦਰਜ ਹੋਈਆਂ ਹਨ।
ਇਨ੍ਹਾਂ ਵਿਚੋਂ 1,35,206 ਮਰੀਜ਼ ਠੀਕ ਵੀ ਹੋਏ ਹਨ।