ਕੋਰੋਨਾਵਾਇਰਸ: ਅਮਰੀਕਾ ਚ 30 ਹਜ਼ਾਰ ਤੋਂ ਵੱਧ ਮੌਤਾਂ, 2 ਕਰੋੜ ਤੋਂ ਵੱਧ ਲੋਕਾਂ ਦੀ ਨੌਕਰੀ ਗਈ, ਯੂਰਪੀ ਯੂਨੀਅਨ ਨੇ ਮੰਗੀ ਇਟਲੀ ਤੋਂ ‘ਦਿਲ ਤੋਂ ਮਾਫ਼ੀ’

ਲਾਈਵ ਕਵਰੇਜ

1. 16 ਅਪ੍ਰੈਲ 2020ਕੋਰੋਨਾਵਾਇਰਸ ਦਾ ਹੋਮਿਓਪੈਥੀ ਵਿੱਚ ਇਲਾਜ ਦੇ ਦਾਅਵੇ ਦੀ ਪੜਤਾਲ

   ਸੋਸ਼ਲ ਮੀਡੀਆ ਉੱਤੇ ਕੋਰੋਨਾਵਾਇਰਸ ਦੇ ਬਚਾਅ ਦੇ ਕਈ ਤਰੀਕੇ ਦੱਸੇ ਜਾ ਰਹੇ ਹਨ। ਕੋਈ ਲ੍ਹਸਣ ਖਾਣ ਦੀ ਸਲਾਹ ਦਿੰਦਾ ਹੈ ਤਾਂ ਕੋਈ ਵਾਰ-ਵਾਰ ਚਾਹ ਪੀਣ ਦੀ।

   ਇਸੇ ਤਰ੍ਹਾਂ ਹੋਮਿਓਪੈਥੀ ਰਾਹੀਂ ਇਸ ਦੇ ਇਲਾਜ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ। ਇਹ ਕਿੰਨਾ ਸੱਚ ਹੈ, ਇਸ ਵੀਡੀਓ ਵਿੱਚ ਦੇਖੋ।

2. 16 ਅਪ੍ਰੈਲ 2020ਕੋਰੋਨਾਵਾਇਰਸ ਦੇ ਮਾਮਲਿਆਂ ਦੀ ਚਰਮ ਸੀਮਾ ਖ਼ਤਮ ਹੋਈ-ਟਰੰਪ

   ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਦਾ ਦਾਅਵਾ ਹੈ ਕਿ ਅਮਰੀਕਾ ਵਿੱਚ ਕੋਵਿਡ-19 ਦੇ ਮਾਮਲਿਆਂ ਦੀ ਚਰਮ ਸੀਮਾ ਖ਼ਤਮ ਹੋ ਗਈ ਹੈ।

   ਉਨ੍ਹਾਂ ਇਸ ਮਹੀਨੇ ਕੁੱਝ ਸੂਬੇ ਖੋਲ੍ਹਣ ਦਾ ਦਾਅਵਾ ਕੀਤਾ।

   ਵ੍ਹਾਈਟ ਹਾਊਸ ਦੀ ਬ੍ਰੀਫਿੰਗ ਦੌਰਾਨ ਟਰੰਨ ਨੇ ਕਿਹਾ ਕਿ ਗਵਰਨਜ਼ ਨਾਲ ਗੱਲਬਾਤ ਤੋਂ ਬਾਅਦ ਦੇਸ ਮੁੜ ਖੋਲ੍ਹਣ ਸਬੰਧੀ ਵੀਰਵਾਰ ਨੂੰ ਨਵੇਂ ਦਿਸ਼ਾ-ਨਿਰਦੇਸ਼ ਦਿੱਤੇ ਜਾਣਗੇ।

   ਉਨਾਂ ਕਿਹਾ, "ਅਸੀਂ ਸਭ ਵਾਪਸ ਆਵਾਂਗੇ। ਅਸੀਂ ਆਪਣਾ ਦੇਸ ਵਾਪਸ ਲਿਆਉਣਾ ਚਾਹੁੰਦੇ ਹਾਂ।"

   ਅਮਰੀਕਾ ਵਿੱਚ ਤਕਰੀਬਨ 6,35,000 ਕੋਰੋਨਾਵਾਇਰਸ ਦੇ ਪੌਜਿਟਿਵ ਮਾਮਲੇ ਹਨ ਅਤੇ 28,000 ਤੋਂ ਵੱਧ ਮੌਤਾਂ ਹੋ ਚੁੱਕੀਆਂ ਹਨ।

3. 16 ਅਪ੍ਰੈਲ 2020ਭਾਰਤ ਨੂੰ WHO ਦੀ ਪੋਲੀਓ ਨਿਗਰਾਨੀ ਟੀਮ ਦਾ ਸਾਥ ਮਿਲਿਆ

   ਭਾਰਤ ਵਿੱਚ ਕੋਵਿਡ -19 ਦੇ ਇਨਫੈਕਸ਼ਨ ਨੂੰ ਰੋਕਣ ਦੀ ਮੁਹਿੰਮ ਵਿੱਚ ਵਿਸ਼ਵ ਸਿਹਤ ਸੰਗਠਨ ਦੇ ਨੈਸ਼ਨਲ ਪੋਲੀਓ ਸਰਵੀਲਾਂਸ ਨੈਟਵਰਕ ਦਾ ਸਾਥ ਮਿਲ ਗਿਆ ਹੈ।

   ਕੇਂਦਰੀ ਸਿਹਤ ਮੰਤਰੀ ਡਾ. ਹਰਸ਼ਵਰਧਨ ਨੇ ਇਸ ਦੀ ਜਾਣਕਾਰੀ ਦਿੰਦਿਆਂ ਕਿਹਾ, "ਇੱਕ ਵਾਰ ਫਿਰ ਭਾਰਤ ਸਰਕਾਰ ਅਤੇ ਡਬਲੂਐੱਚਓ ਨੇ ਹੱਥ ਮਿਲਾਇਆ ਹੈ। ਅਸੀਂ ਪੋਲੀਓ ਦਾ ਹੱਲ ਕੱਢਣ ਵਿੱਚ ਕਾਮਯਾਬ ਹੋਏ ਸੀ। ਸਾਡੀ ਕਾਬਲੀਅਤ ਇੰਨੀ ਹੈ ਕਿ ਅਸੀਂ ਇਸ ਵਾਰੀ ਵੀ ਸਫ਼ਲ ਹੋਵਾਂਗੇ।"

   WHO ਦੀ ਦੱਖਣ ਏਸ਼ੀਆਈ ਮੁਖੀ ਡਾ. ਪੂਨਮ ਖੇਤਰਪਾਲ ਨੇ ਕਿਹਾ ਹੈ ਕਿ ਡਬਲੂਐੱਚਓ ਦੇ ਅਨੁਭਵ, ਜਾਣਕਾਰੀ ਅਤੇ ਕਾਬਲੀਅਤ ਨਾਲ ਮਰੀਜਾਂ ਦੀ ਨਿਗਰਾਨੀ ਅਤੇ ਸੰਪਰਕ ਟਰੇਸਿੰਗ ਵਿੱਚ ਮਦਦ ਮਿਲੇਗੀ।

4. 16 ਅਪ੍ਰੈਲ 2020ਟਰੰਪ ਦੇ ਫੈਸਲੇ ’ਤੇ WHO ਦਾ ਪ੍ਰਤੀਕਰਮ

   WHO ਨੇ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਫੰਡ ਬੰਦ ਕਰਨ ਦੇ ਫੈਸਲੇ 'ਤੇ ਦੁੱਖ ਜ਼ਾਹਿਰ ਕੀਤਾ ਹੈ।

   WHO ਮੁਖੀ ਡਾ. ਟੈਡਰੋਸ ਏਡਨਮ ਗਿਬਰਿਏਸਸ ਨੇ ਕਿਹਾ, ''ਅਮਰੀਕਾ ਲੰਮੇ ਸਮੇਂ ਤੋਂ WHO ਦਾ ਦੋਸਤ ਰਿਹਾ ਹੈ ਅਤੇ ਉਹ ਵਿੱਤੀ ਤੌਰ 'ਤੇ ਮਦਦ ਵੀ ਕਰਦਾ ਰਿਹਾ ਹੈ।''

   ਡਾ. ਟੈਡਰੋਸ ਨੇ ਕਿਹਾ, ''ਅਮਰੀਕਾ ਦੇ ਫੰਡ ਬੰਦ ਹੋਣ ਤੋਂ ਬਾਅਦ ਪੈਣ ਵਾਲੇ ਅਸਰ ਦੀ ਡਬਲੂਐੱਚਓ ਸਮੀਖਿਆ ਕਰ ਰਿਹਾ ਹੈ। ਅਸੀਂ ਆਪਣੇ ਸਹਿਭਾਗੀਆਂ ਨਾਲ ਆਰਥਿਕ ਸੰਕਟ ਨੂੰ ਲੈ ਕੇ ਕੰਮ ਕਰਾਂਗੇ ਤਾਂ ਕਿ ਕਿਸੇ ਤਰ੍ਹਾਂ ਦੀ ਮੁਸ਼ਕਲ ਨਾ ਹੋਵੇ। ਅਸੀਂ ਇਸ ਗੱਲ ਨੂੰ ਯਕੀਨੀ ਕਰਾਂਗੇ ਕਿ ਕੰਮ ਰੁਕੇ ਨਾ।''

5. 16 ਅਪ੍ਰੈਲ 2020ਕੋਰੋਨਾਵਾਇਰਸ ਸਬੰਧੀ ਹੁਣ ਤੱਕ ਕੀ-ਕੀ ਹੋਇਆ

   ਸਤਿ ਸ੍ਰੀ ਅਕਾਲ, ਬੀਬੀਸੀ ਪੰਜਾਬੀ ਦੇ ਲਾਈਵ ਪੇਜ ’ਤੇ ਤੁਹਾਡਾ ਸਵਾਗਤ ਹੈ। ਕੋਰੋਨਾਵਾਇਰਸ ਨਾਲ ਜੁੜੀ ਦੇਸ-ਵਿਦੇਸ਼ ਦੀ ਹਰ ਅਪਡੇਟ ਤੁਹਾਨੂੰ ਇਸ ਪੇਜ ’ਤੇ ਮਿਲੇਗੀ। ਆਓ ਜਾਣਦੇ ਹਾਂ ਹੁਣ ਤੱਕ ਕੀ ਹੋਇਆ:

   • ਪੂਰੀ ਦੁਨੀਆਂ ਵਿੱਚ 20 ਲੱਖ ਤੋਂ ਵੱਧ ਲੋਕ ਕੋਰੋਨਾਵਾਇਰਸ ਦੀ ਲਪੇਟ ਵਿੱਚ ਹਨ।
   • ਸਿਰਫ਼ 13 ਦਿਨਾਂ ਵਿੱਚ ਕੋਰੋਨਾਵਾਇਰਸ ਦੇ ਮਰੀਜ਼ਾਂ ਦੀ ਗਿਣਤੀ 10 ਲੱਖ ਤੋਂ 20 ਲੱਖ ਹੋਈ।
   • ਭਾਰਤ ਵਿੱਚ ਕੋਰੋਨਾਵਾਇਰਸ ਦੇ ਕੁੱਲ 11,933 ਪੌਜਿਟਿਵ ਕੇਸ ਅਤੇ 392 ਮੌਤਾਂ ਹੋਈਆਂ, 1343 ਮਰੀਜ਼ ਠੀਕ ਹੋਏ।
   • ਅਮਰੀਕੀ ਰਾਸ਼ਟਰਪਤੀ ਟਰੰਪ ਵੱਲੋਂ ਵਿਸ਼ਵ ਸਿਹਤ ਸੰਗਠਨ ਨੂੰ ਫੰਡ ਨਾ ਦੇਣ ਦੇ ਐਲਾਨ ਤੋਂ ਬਾਅਦ ਆਲੋਚਨਾ ਹੋ ਰਹੀ ਹੈ।
   • ਕੋਰੋਨਾਵਾਇਰਸ ਦੇ ਸਭ ਤੋਂ ਵੱਧ ਸ਼ਿਕਾਰ ਅਮਰੀਕਾ ਵਿੱਚ ਹਨ ਜਿੱਥੇ 28 ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।
   • ਯੂਕੇ ਵਿੱਚ ਮ੍ਰਿਤਕਾਂ ਦੀ ਗਿਣਤੀ 12 ਹਜ਼ਾਰ ਦੇ ਪਾਰ ਹੋ ਗਈ ਹੈ।
   • ਪੰਜਾਬ ਵਿੱਚ ਕੋਰੋਨਾਵਾਇਰਸ ਦੇ 186 ਮਾਮਲੇ ਸਾਹਮਣੇ ਆਏ ਹਨ, 13 ਲੋਕਾਂ ਦੀ ਮੌਤ ਚੁੱਕੀ ਹੈ ਅਤੇ 26 ਮਰੀਜ਼ ਠੀਕ ਹੋ ਗਏ ਹਨ।
   • ਭਾਰਤ ਦੇ 170 ਹੌਟਸਪੌਟ ਜ਼ਿਲ੍ਹਿਆਂ ਵਿੱਚ ਪੰਜਾਬ ਦੇ 4 ਜ਼ਿਲ੍ਹੇ (ਮੁਹਾਲੀ, ਨਵਾਂਸ਼ਹਿਰ, ਜਲੰਧਰ ਅਤੇ ਪਠਾਨਕੋਟ) ਰੈੱਡ ਹੌਟ ਸਪੌਟ ਹਨ।
   • ਚੰਡੀਗੜ੍ਹ ਨੂੰ ਰੈੱਡ ਜ਼ੋਨ ਵਾਲੀ ਕੈਟਾਗਰੀ ਵਿੱਚ ਰੱਖਿਆ ਗਿਆ ਹੈ।

   ਬੁੱਧਵਾਰ ਦੀ ਅਪਡੇਟ ਲੈਣ ਲਈ ਇਸ ਲਿੰਕ ’ਤੇ ਕਲਿੱਕ ਕਰੋ।