Ghana go become di fifth African kontri on record wey di opposition party win election dis year if tins remain as dem be.
Di Vice-President of Ghana Mahamudu Bawumia concede defeat for di election wey happun on Saturday.
Im congratulate di opposition leader and former President John Mahama on im victory.
Early results suggest say dis fit be one of di heaviest defeats in decades for di New Patriotic Party (NPP), wey bin dey power since 2016.
Voters bin dey vex sake of many tins like, rising cost of living, series of high-profile scandals and a major debt crisis wey no allow goment deliver on key promises.
Sake of dis, di NPP fit don drop below 45% of di presidential vote for di first time since 1996.
Di vote for Ghana don end a remarkable 12 months in African politics, wey don see five transfer of power - more dan eva before.
Dis era don also bring opposition victories for Botswana, Mauritius, Senegal and di self-declared republic of Somaliland.
Even beyond dis results, almost evri election wey don happun for di region dis year under reasonably democratic conditions, di governing party don lose a significant number of seats.
Sabi pipo say na a combination of factors like di economic downturn, growing public intolerance of corruption and di emergence of increasingly assertive and well-co-ordinated opposition parties dey cause dis trend.
Di trend fit kontinu into 2025, and e go cause trouble for leaders like Malawian President Lazarus Chakwera, wey im kontri go do election for September.