Nigerian Army narrate how dem rescue Oyo kidnap victims, President Tinubu reveal dose behind di abduction

Nigerian military narrate how dem rescue 40 pupils and teachers wey terrorists kidnap from Oriire Local Government Area of Oyo State for 15 May 2026.

Dem give dis narration afta videos and fotos of di kidnap victims begin dey show all ova social media afta tok-tok pesin to Nigerian President Bayo Onanuga post am to announce di return of di victims.

Di army say na combined military operations wit plenti oda security agencies help dem carry out di operations

Alreadi, President Bola Tinubu say dem no pay any ransom and dem no do agreement wit di jaguda pipo.

Na on 10 July, 2026 tori of di release of di abducted schoolchildren and teachers bin spread afta di govment announce say dem don regain freedom, 56 days afta dia abduction from dia schools for Oriire community for Ogbomoso, Oyo State.

Di govment say dem secure di release of di abducted children and dia teachers witout any collateral damage.

Di presido also confam di arrest eight of di kidnappers and say dem kpai odas wey get hand for di operation.

Howeva, as army give details of how di rescue operation happun, President Tinubu also name dose wey dey behind di abduction.

How army rescue di Oyo kidnap victims

Lieutenant Colonel Danjuma Jonah Danjuma, wey be di Acting Deputy Director of 2 Division Army Public Relations, give account of di operation.

E say di operation last for more dan one month as dem begin dey identify di leaders of dose wey carry out di kidnap.

E say dem begin bust di terrorist and dia informants including wia dem bin hide inside di forest.

"Di operations, wey last for more dan one month, focus on identifying di terrorists kingpins wey mastermind di kidnapping, bursting and dismantling dia networks and logistics links, including dia informants and hideouts wey dey located within di Old Oyo National Park Forest, Oyo State."

Di military say dem make multiple arrests for different parts of di state and scata di group wit plenti pressure.

"As part of di operations, we make multiple arrests within Oyo State and for oda locations across some states for di kontri," dem tok.

"Dis arrests completely disorganize di group, wey put pressure on dem and lead di terrorist group to unconditionally release di pupils and teachers."

Di military say dem do di operation to ensure say di children and teachers dey safe, but some of di security officers injure.

For video wey Defense Headquarters post on social media platforms X, dem say dem do di operation through credible intelligence and work wit personnel from Nigerian Navy Special Boat Service, di Nigerian Army, Airforce, Department of State Service, Nigerian Police Force and oda security personnel.

Dem say na through inter-agency collaboration dem locate di victims and rescue dem.

Di video show wen di securities agencies dey bombard terrorist base, and wen dem carry di victims inside bus.

Di video also show wia di security pipo dey waka through di bushes, through di river, and move wit military trucks and helicopter.

Who dey behind Oyo kidnapping - Tinubu reveal

Nigerian President Bola Tinubu don name di terrorist group wey dey behind di Oyo kidnapping.

Oga Tinubu say na di Ansaru terrorists carry out di abduction of di schoolchildren and teachers for Oriire community.

"Di children and teachers abducted by Ansaru terrorists for Oyo State now dey rescued by our security forces, alive and unharmed."

Di Ansaru terrorists don carry out several oda abductions and attacks for Nigeria, including jailbreak sef.

Who be Ansaru terrorists?

For November 2013, di US designate Nigeria Boko Haram and Ansaru militant groups as foreign terrorist organisations.

E mean say say US regulatory agencies dey instructed to block business and financial transactions wit di groups.

Boko Haram don chop plenti blame for thousands of deaths while Ansaru na one of di off-shoot of Boko Haram.

Dem form Ansaru for January 2012, and dem begin rise since den wit several attacks.

Di UK list Ansaru as "terrorist group" linked to al-Qaeda for di Islamic Maghreb (AQIM).

For December 2012, about 30 Ansaru gunmen bin use dynamite to force dia way into one compound, wia dem kidnap French national Francis Colump for Katsina.

Dem carry out similar attack for February 2013, wia dem capture seven foreign nationals from housing compound owned by di Lebanese construction company Setraco.

Ansaru also dey carry out attacks on Nigerian targets.

For January 2013, Ansaru say dem carry out attack wey kpai two Nigerian sojas as dem dey prepare to deploy to Mali.

For 2025, di National Security Adviser, Nuhu Ribadu, don announce say di Nigeria security forces gbab two top Ansaru terrorist group leaders wey e identify as Abu Baraa, di Amir, and Mahmuda, di deputy Amir.

Ribadu yarn dis one for press briefing on security developments for di Office of di National Security Adviser.

Di NSA say na dis two men dey responsible for planning several terrorist operations for Nigeria and high-profile kidnappings.

According to di NSA di two men don dey ontop Nigeria most wanted list for years, afta dem jointly lead multiple attacks on civilians, security forces, and critical infrastructure.

For September 2025, Justice Emeka Nwite of di Federal High Court sama 15 years prison sentence ontop one Mahmud Usman wey di Departrment of State Services bin arraign for court on charges of terrorism.

According to di DSS, Usman na commander for Ansaru terrorist organisation, and dia work na to dey engage for illegal mining from wia dem dey get moni to dey buy dia weapons.