Oyinkansola Badejo-Okunsanya emerge Nigerian Bar Association President-elect
Wia dis foto come from, Oyinkansola Badejo-Okunsanya/Instagram
Di Nigerian Bar Association (NBA) don elect Oyinkansola Badejo-Okusanya, one Senior Advocate of Nigeria (SAN), as dia next president afta she gada di most votes wen voting officially end on Sunday.
She go bicom di 33rd president of di association, afta she defeat her two male challengers.
Di Chairman of di Electoral Committee of diNigerian Bar Association, Aham Ejelam, SAN, announce di results for di NBA NBA National Secretariat for Abuja on Sunday, afta di conclusion of di election, wey technical challenges and cyberattack delay.
Ejelam say Badejo-Okusanya get 12,317 votes, wey represent 47.18 percent of di total votes cast, to defeat her closest challengers, Lateef Akangbe and Olumuyiwa Akinboro.
Lateef Omoyemi Akangbe, SAN, secure 7,934 votes (30.39 percent) to come second and Olumuyiwa Akinboro, anoda SAN, poll 5,855 votes (22.43 percent) to take di third position.
Wen inaugurated, Mrs Badejo-Okusanya go be di 33rd president of di NBA.
She go be di second woman to lead di Nigerian Bar for its 66-year-old history, afta Priscilla Kuye, wey be di first president of di association of Nigerian lawyers for 1991 and she hold di position until 1992.
Di NBA go inaugurate dia new national officers wey emerge from Saturday election during dia Annual General Conference wey dem schedule for August 21 and 28 August for Port Harcourt Rivers State.
End of Di one wey oda users dey read well well
Di outgoing president, Afam Osigwe and im co-executives dey expected to hand hand ova to di new leadership during di conference.
Meanwhile, reactions don dey trail di NBA election as some lawyers don complain of wuruwuru for di electoral process.
According to di NBA elections live page, na only 31.86% of di registered voters bin vote for di election even as many lawyers bin come online to hala about irregularities.
Fellow presidential candidate, Lateeef Omoyemi Akangbe call out di election bodi for statement wey im post on top social media.
E tok say, "di truth be say, election wia thousands of eligible, willing, determined voters bin dey prevented rom casing dia ballits by platform wey no fit reack di purpose no fit dey treated as if e produce di will of di profession.
"Di administrative collapse bin dey too deep and too wide spread and too well-documented to dey covered wit one result."Tori be say she go be di first eva elected female president for NBA history, even though she be only di second female president behind Dame Priscilla Kuye wey get di office for 1991.
For di NBA, she bin serve as di Assistant Secretary of di NBA Lagos Branch and di co-opted member of di NBA National Executive Council since 2022.
Oda winners for di election include
First Vice President - Chief Oghenero Okoro Esq
Second Vice President - Egya Nuhu John Esq
Third Vice President - Pepple Iniobong Irene Esq
General Secretary - Afam O. Okeke
Assistant General Secretary - Aghogho Gladys Okpomor
Treasurer - Esther Ifeoma Jimoh Esq
Welfare Secretary - Audrey Chinelo Ofoegbunam
Publicity Secretary - Dr Prince Azubuike
Assistant Publicity Secretary - Hadiza Nasir Ahmad
Eastern Zone - Chidi Betsy Nnaji
Western Zone - Rotimi Komolafe
Northern Zone - Huwaila Muhammad Ibrahim
Who be di new President-elect
Di President-elect of di Nigerian Bar Association (NBA), Senior Advocate of Nigeria, Oyinkansola Badejo-Okusanya, for her acceptance speech, express gratitude to members of di association wey elect her to lead di bar.
She describe her victory as mandate to build a stronger, more inclusive and responsive NBA.
For one message of appreciation wey she release afta di election, Badejo-Okusanya say she dey humbled by di confidence association get in her and thank members for embracing her campaign vision of "A Bolder Bar That Works for Everyone".
"Thank you say una believe in our shared vision of bolder bar wey work for evribodi. Dis victory no be only me get am, na for evri member wey believe say our association fit dey stronger, more inclusive, more responsive and beta positioned to serve di interests of all lawyers", she tok.
Dem call Badejo-Okusanya to di Nigerian Bar for 2002 afta she obtain her law degree from di University of Lagos.
She start her legal career for Olaniwun Ajayi LP and bicom Senior Advocate of Nigeria (SAN), di highest honour for di Nigerian legal profession, on 29 September 2025.
For 2007, one former Lagos state govnor Babatunde Fashola appoint her as senior aide on Justice Sector Reform. She bin also serve as General Counsel to di govnor from 2011-2015.
Currently, she be partner for ALP NG & Co. (Africa Law Practice NG & Company), wia she dey serve as Co-Head of di firm Litigation and Dispute Resolution Practice.
Di president-elect na ogbonge lawyer, alternative dispute resolution practitioner, and public policy professional.
She be member of di London Court of International Arbitration (LCIA), di International Council for Commercial Arbitration (ICCA), di African Arbitration Association, Arbitral Women, di International Bar Association (IBA), di Commonwealth Lawyers Association (CLA), among odas.
