'Mary Habila na like daughter to me' - Minister Umahi break silence over staff death

Minister of Works David Umahi break silence ontop di death of Mary Habila.

Dis na di first time di minister dey tok officially on di mata wey don become national tok-tok.

Di minister for briefing wit tori pipo for Abuja on Thursday say evidence boku about how Ms. Mary die.

Oga Umahi tok say Mary boyfriend don also reveal wetin e discuss wit di woman before she die.

E say im don order make dem do autopsy to really find wetin kill her.

"I hear say di family tok say autopsy dey against dia tradition but dis na serious mata wey get medical history and na autopsy go fit reveal wetin really happun to her," Umahi tok.

Earlier di minister tok-tok pesin, Francis Nwaze tell BBC say di minister wan make dem investigate di matta to determine wetin be di cause but di parents of di lady no gree.

"I don make press statement on dis matta to clarify say im get interest in autopsy but di parents of dis girls don insist say e dey against dia cultural believes, " Nwaze tok.

E add say Habila na employee of di David Umahi Federal University Teaching Hospital, she die on June 27 wen she bin dey on attachment wit di minister medical team.

Netizens don call for thorough investigation into di circumstances wey surround her death afta di foto of her lifeless body bin trend online.

Political activist Omoyele Sowore call for coroner inquest into di circumstances wey surround Ms Habila death for di minister residence.

However, inside di affidavit titled "Affidavit of Withdrawal of Case", di family of di deceased tok say dem no gree to any autopsy request by di minister or any medical team.

Di affidavit wey her papa, Tanko Habila Wisdom file bifor di High Court of Justice of Ebonyi State, say make di medical and investigation protocol leave her body intact.

"While I welcome step wey dem wan take to unravel wetin kill my daughter, my family and I no go accept any autopsy on my daughter body," di affidavit tok.

"Na my family wish and humble appeal against medical and investigation protocols make dem leave her body nad organs intact, hence dis affidavit."

Her papa tok say im wan make di police release her body for dem make dem go burial as dem no wany any further investigation.

"I also wish make dem no proceed further wit di investigation and further request make dem release my daughter body to me for burial."

Her papa tok say dem no go honour any invitation from di police or di court in connection wit di matter, as dem no "suspect any foul play."

Oga Hibila tok say dis na family decision as nobody or anytin coerce or influence dem to make dis grounds.

However, di Ebonyi State Police Command don confam say go conduct autopsy on di deadibodi to ascertain wetin kill di deceased depsite di request from di family say dem no want make dem go ahead wit di autopsy.

Joshua Ukandu tok say Mary Habila dey among di medical team dem assign to Umahi and she follow am go im hometown for Uburu, wia she die inside on of di rooms wey dey di house.

Di police tok di Divisional Police Officer for Ohaozara respond to distress call and dem inform de say Mary Habila die on 27 June for David Umahi Federal University Teaching Hospital, Uburu and dem don transfer di matta go diState Criminal Investigation Department (SCID) for investigation.

Police tok say dem dey wait for di relatives or any appointees from di family so dem go fit conduct di post-mortem examination.

Nwaze tell BBC say Habila na staff for David Umahi Federal Teaching Hospital and she die for di staff quaters wey dey for di premises of di house no be inside di minister house.

"Di building no be di residence of di minister na di staff quaters of with di premises. She no dey live for dia, she dey come dia wen dem get functions," e tok.

"Di place na staff quaters for David Umahi Federal Teaching Hospital employers, wia dem take di foto no be di residence."

Her papa also confam say Habila na staff member of di David Umahi Federal University of Medical Sciences and she dey work as personal nurse to di minister of works and members of im immediate staff.

According to di affidavit, she dey reside for di Minister Guest House for Abuja and Ebonyi State for di Staff Quaters.

Wetin we know about di woman wey allegedly die for Umahi residence?

On, June 27 Mary Habila die for David Umahi residence.

However, Nwaze tok say wetin dem gada be say she no dey feel fine but BBC no fit confam as at di time of dis report.

"I tink say she dey sick, from di information wey I gada. Her boyfriend tok say she dey sick and she also get hormonal imbalance," e tok.

"Wetin happun be say wen dem no see her around. Her relative go her house to go break di room. Na dia dem see her for dat condition."

"Immediately, medical practitioners attend to her."