'Wen you grow up, I go marry you' - Who be di Ghana lawmaker wey 'sexualise' young schoolgirl

One lawmaker for Ghana dey trend afta im make inappropriate sexual comments to one young schoolgirl for di kontri parliament.

Oga Yakubu Mohammed wey be Member of parliament for Ahafo Ano Southeast for di kontris Ashanti Region dey captured inside one viral video wen im dey address di group of school children wey visit di parliament house for excursion.

Di 37-year-old first-time lawmaker bin dey motivate di children say dem fit become anytin dem wan be for future if dem study hard.

But along di line, oga Yakubu Mohammed bin stop to ask one girl, "wetin be your name? you, di one wey dey stand for dia, wetin be your name?"

Afta di girl bin respond, di MP tok say "you be very beautiful, wen you grow up, I go marry you. She be my wife. For future, I go marry her, she also go become MP."

Di comments don trigger condemnation across social media as pipo dey call out di lawmaker ova di "sexual and pedophilic comments."

Social media users bin dey put pressure say make im resign, odas dey tok say make im political party di National Democratic Congress (NDC) call am out and issue apology.

For some pipo, parliament gatz take immediate action against di lawmaker.

Reaction to di sexual comments

Human Rights groups and oda citizens say di behaviour of di lawmaker dey unacceptable.

One Human Rights advocate Rev. Hornam Adzraku-Kevi tok say di kontri gatz promote young women and girls to take leadership places no be to dey "objectify dem as sex objects or marriage tools."

"Women no be only image of sex, and marriage – for Ghana hia we get many women wey bin rise to become lawmakers, politicians, Chief Justice, speaker of parliament and oda ogbonge positions, dat be wetin we gatz push, no be to project women as sex objects," she tok to local network Channel One TV.

Rev. Hornam Adzraku-Kevi also say "men for no tink about women only as marriage materials, dat be di wahala we get for dis kontri. Dis narrative wey dey paint women as only marriage material dey affect our young girls."

"Wetin di lawmaker gatz tok for dat meeting wit di children na to inspire dem say dem fit grow to become MP whether dem be boys or girls, dat be how we empower di children, no be to tok about dia body and marriage."

On top social media users like Nana Amma Des Bordes tok say "for dis one, even apology no dey enough; dis MP gatz even resign or parliament gatz boot am out; dis be crass behaviour, wat a shame."

Sarah Djosu also write on top her social media say "dis be so wrong, whether di MP tok am as joke or not. Dis be inappropriate, we no fit normalise comments wey sexualise children. Public figures gatz know beta."

Ebenezer Afanyi Dadzie also tok say "di sad part be say di MP no even sabi how wrong dis be sake of how we don sexualise women and girls for our society."

"You see many men for hia dey defend dis behaviour. Di MP bin use di opportunity to encourage di young girl to put for her mind say wetin dey matter be her beauty and marriage. I dey embarrassed."

'I regret my words' - MP Yakubu react

Ghana Gender ministry and parliament no yet respond to di backlash.

But Inside one apology letter to di public, Yakubu Mohammed bin tok say "di comment no be to harm, disrespect, embarrass or discomfort di pupil, her family and school authorities."

"I acknowledge say di comment be in appropriate sake of e dey involve pickin."

Di MP also add say "I regret my choice of words. And apologise to di relevant authorities, di pupil, her parents, her family and di public."

"As MP, I sabi di responsibility of my words and public conduct. I dey committed to protect and respect di dignity, welfare and rights of every child."

Profile of Yakubu Mohammed

Di 37-year-old be enta parliament for di first time afta di 2024 elections to represent di Ahafo Ano South-East Constituency.

Im be member of di govment National Democratic Congress (NDC) wey im be board member of di kontris Minerals Income Investment Fund (MIIF).

Im get Earth Science degree from di University for Development Studies (UDS), wey im also get experience for marketing and public relations.

Yakubu Mohammed also get MBA for International Business from Cardiff Metropolitan University

Bifor im enta parliament, im be businessman.

Im also get expertise for procurement, wey im work for communications roles for di London School of Commerce Group of Institutions, di Ministry of Defence (Ghana), and oda international organisations.