حضور ده‌ها خانواده پناهجوی افغان در مناطق مرزی با تاجیکستان 

تاجیکستان از ورود "۸۰ خانواده" پناهجوی افغان به این کشور خبر داده است. وزارت امور داخله تاجیکستان می‌گوید این خانواده‌ها به یک منطقه حائل مرزی میان تاجیکستان و افغانستان پناه آورده اند.

به گزارش سهراب ضیاء، خبرنگار بی‌بی‌سی در دوشنبه در خبرهای رسمی دولتی شمار دقیق اعضای این خانواده‌ها ذکر نشده و از محل حضور آنها نام برده نشده است. اما، مناطق حائل عمدتا به منطق مرزی میان ولایت ختلان تاجیکستان با ولایت‌های تخار، قندوز و بلخ افغانستان گفته می‌شود.

موضوع پناه آوردن این افراد به این کشور پس از تسلط طالبان بر ولایت‌های شمالی افغانستان در دیدار رمضان رحیم‌زاده، وزیر کشور تاجیکستان با مولوگتا زودی، مسئول دفتر کمیساریای عالی سازمان ملل متحد در امور پناهندگان در شهر دوشنبه مطرح شده است.

خاور، خبرگزاری رسمی تاجیکستان گفته که روز گذشته، در این دیدار، رسیدگی به مشکلات پناهجویان افغان و ارائه کمک به آنها بررسی شده است.

هفته گذشته، امام علی رحمان، رئیس جمهور تاجیکستان تاکید کرد که "تاجیکان" در دولت آینده افغانستان باید "جایگاه شایسته" داشته باشند، و نظام نو سیاسی در افغانستان از راه "همه‌پرسی" و با درنظرداشت دیدگاه‌های تمام شهروندان این کشور مشخص شود.

به گفته وزیر کشور تاجیکستان، در پانزده سال اخیر بیش از ۳ هزار خانواده پناهندگان افغان در این کشور ثبت نام شده‌اند، شمار اعضای این خانواده‌ها به حدود ۱۵ هزار نفر می‌رسد.

وزیر کشور تاجیکستان در مورد پنج هزار نظامی افغان که در پی تصرف نواحی شمال افغانستان توسط طالبان، به قلمرو تاجیکستان عقب‌نشینی کرده بودند، گفته بود که همه این نظامیان بعد از یک هفته اقامت در این کشور، به افغانستان برگردانده شدند. 

تاجیکستان می‌گوید که عملا امکان پذیرفتن شمار زیاد پناهجویان را ندارد.

به گفته وزیر کشور تاجیکستان طی دو دهه اخیر سازمان‌های بین‌المللی برای امور زیربنایی لازم برای پذیرش پناهجویان در این کشور کمکی نکرده‌اند.

به گفته وزیر کشور تاجیکستان، در ولایت ختلان و ولایت مختار کوهستان بدخشان این کشور برای ایجاد اردوگاه‌های ویژه و تأسیسات و زیربنای لازم ۷۰ هکتار زمین اختصاص داده شده است، اما سازمانهای بین‌المللی کمکی در این زمینه انجام ندادند.

آقای رحیم‌زاده خواستار کمک دفتر کمیساریای عالی امور پناهندگان سازمان ملل متحد برای تعمیر و بازسازی یک مرکز موقتی پذیرش و ثبت پناهجویان در ناحیه جیحون در جنوب این کشور شده است.

وزارت کشور تاجیکستان احتمال ورود اعضای سازمانهای "تروریستی" به این کشور زیر نام پناهجو را بعید نمی‌داند.

شاید به این دلیل، پناهجویانی که به تاجیکستان پناه آورده اند، ثبت‌نام می‌شوند، آزمایش کرونا می‌دهند و هویتش‌شان مشخص می‌گردد.

تاجیکستان نگران تأثیر تحولات اخیر افغانستان به بر امنیت خود است. دلیل اصلی این نگرانی حضور صدها پیکارجو از کشورهای آسیای میانه‌ در افغانستان و افزایش تهدیدهای تروریستی، قاچاق اسلحه، مواد مخدِر و مواد منفجره از افغانستان به کشورهای منطقه است.