ايران کې احتجاج کوونکې مېرمنې: په زندان کې د مرګ تر کچې ځورول شوې

بي بي سي ته په ایران کې د وروستیو حکومت ضد مظاهرو په ترڅ کې د نیول شویو ښځو د جنسي ځورونې په اړه جزیات ورکړل شوي دي.

په دې اړه، د بشري حقونو فعالې نرګس محمدي له بند بي بي سي ته یو لیک استولی چې په ایوین زندان کې له مظاهره کوونکو ښځو سره د وروستیو پېښو په اړه تفصیل پکې لیکل شوی دی.

ایران کې له تېرو درېیو میاشتو راهیسې د مظاهرو پر مهال زرګونه کسان نیول شوي. دغلته بندي ښځې د چارواکو له خوا د تاوتريخوالي او شکنجه کېدو خبر ورکوي.

کورنۍ یې ډېر کله ګواښل کېږي او له څه ویلو منع کېږي خو د یو څو مېرمنو په اړه معلومات شته چې په توقیف کې له ښځو سره د چلند ناوړه انځور ښيي.